प्रधानमन्त्री शेरबहादुर देउवा लैनचौरय् भारतीय दूतावासय् वना राजदूत बिनयमोहन क्वात्रायात बिदाइ ज्याझ्वलय् थ्यंगु दु।

म्हिगः बहनि गठबन्धन बैठक लिपा हे बालुवाटारं तःपिक देउवा भारतीय दूतावासय् वंगु खः। भारतीय विदेश सचिवय् बढुवा जूया दिल्ली लिहावनेत्यम्ह क्वात्रायात बिदाइ यायेत ग्वसाः ग्वंगु रात्रीभोजय् सहभागी जुइत देउवा दूतावासय् वःगु खः।

उगु रात्रीभोजय् पूर्व प्रधानमन्त्री नाप माओवादी अध्यक्ष प्रचण्ड, नेकपा एकीकृत समाजवादीया अध्यक्ष माधवकुमार नेपाल न सहभागी जुगु खः।

रात्रीभोजय् एमाले अध्यक्ष नाप पूर्व प्रधानमन्त्री केपी शर्मा ओलीयात ब्वनातःगु खःसा प्रोटोकलया कारण दूतावास मवःगु खः। क्वात्राय् हे बालकोटय् वना ओलीयाके बिदाइ भेट यावंगु धका धाउगु दु।

एमालेपाखे उपाध्यक्ष शुभाष नेम्वाङ दुतावासय् उगु भ्वँजय् सहभागी जुगु खः।

नेकपा माओवादी केन्द्रं थःगु चुनावी पोस्टरय् नेपाल विद्युत् प्राधिकरणया कार्यकारी निर्देशक कुलमान घिसिङया किपा न तःगु दु।

पार्टी अध्यक्ष पुष्पकमल दाहाल प्रचण्डया आधिकारिक फेसबुक पेजय् थौं बुधबाः सार्वजनिक याउगु डिजिटल पोस्टरय् प्रचण्ड, अर्थमन्त्री जनार्दन शर्मा व प्राधिकरणया कार्यकारी निर्देशक घिसिङया तस्बिर दुगु खः।

डिजिटल पोस्टरय् ‘अँध्यारोबाट उज्यालोतर्फको यात्रा’, ‘लोडसेडिङ अन्त्य एउटा फड्को, अब पालो निःशुल्क बिजुलीको’ च्वयातःगु खः।

निर्वाचन आचारसंहिताय् सरकारी कर्मचारीपि छु न राजनीतिक दल वा उम्मेदवारया पक्ष वा विपक्षय् प्रचारप्रसारय् संलग्न यायेगु रोक लगे याउगु खः।

नेपाल राष्ट्रिय खड्गी समाज येँ जिल्ला समितिं नायः खि बाजं प्रशिक्षण छगु ज्याझ्वः  दथुइ येँ महानगरपालिकाया उपमेयर हरिप्रभा श्रेष्ठ खड्गी न उलेज्या यानादीगु दु।

उगु ज्याझ्वलय् नायः खि बाजं ’प्रशिक्षक प्रशिक्षण, नायः गुरुजु’ पुरोहित व खड्गी  महिला सशक्तिकरणया लागि कानुनी आधारभूत प्रशिक्षण याइगु ज्या याइगु जुगु दु।

उगु ज्याझ्वलय् मूपाहाँ येँ महानगरपालिकाया उपमेयर हरिप्रभा श्रेष्ठ खड्गी, अध्यक्ष सुबास शाही, प्रथम उपाध्यक्ष पुष्पराज शाही, उपाध्यक्ष रिकेश शाही, दिपा शाही, सचिव प्रतिक खड्गी, कोषाध्यक्ष अजित शाहीपिनिगु न उपस्थिति दुगु खः।

पोखरा महानगर मेयरया निति एमालेपाखे झीनिम्हेसिगु दाबी याउगु दु।

अथेहे, उपमेयरय् ११ म्हेसिया दाबी पेस याउगु दु। एमाले पोखरा महानगर कमिटीं मंगलबाः ग्वसाः ग्वःगु उम्मेदवार सिफारिस यायेत जुगु भेलाय् अथे दाबी पेस याउगु खः।

मेयरया लागि एमाले केन्द्रीय सदस्य नाप प्रदेश सांसद कृष्ण थापा, राजीव पहारी, भीम कार्की, मिना गुरूङ, रस्मी आचार्य, जिल्ला उपसचिव दर्शन लामा, पूर्व नगर अध्यक्ष दीपक पौडेल, बालासिंह काउचा मगर, चिनाकुमारी गुरूङ, डा. विश्वकल्याण पराजुली, व्यवसायी पुष्पराज अधिकारी, पुष्पज्वति ढुङ्गाना व महानगर अध्यक्ष दीलिप न्यौपानेपिन्स दाबी पेस याउगु खः।

अथेहे, उपमेयरया लागि व्यवसायी संजिवबहादुर कोइराला, वडाध्यक्ष शोभामोहन पौडेल, वामदेव ढुंगाना, टिकाराम पंगेनी, तेजनारायण अधिकारी, देवका पहारी, जीवन आचार्य, बलराम गायक, हरिमाया गुरुङ, जिल्ला समन्वय समितिया प्रमुख बैनबहादुर क्षेत्री, प्रेस चौतारीया सुष्मा पौडेलपिन्स दाबी पेस याउगु खः।

आकांक्षीपि सहमति मजूसा निर्वाचन प्रक्रियापाखे उम्मेदवार सिफारिस यायेगु एमाले न तयारी याउगु दु।

छु ईनिसे स्वनिगलय् फोहर व्यवस्थापनया ज्या सुरु जूसा व स्वया न्ह्यः मुना च्वंगु दक्को फोहरयात वाना छ्वयेगु थासये थ्यकिइगु निति अय्न छु ई काइ धका धाउगु दु।

तारकेश्वर नगरपालिकाया मुड्खु–तीनपिप्लेच्वपिन्स सतक कालोपत्रे यायेत लिबाकूगुलि ढिला जुगुलि स्वनिगलय् फोहर व्यवस्थापनया लागि सिसडोल वनेत रोके यानातःगु खः।

सोमबाःनिसे फोहरको गाडी सिसडोल वनेगु सुरु जूसा ताःईनिसे रोके जुगु फोहर व्यवस्थापन जुइत छु ईकाइ धका येँ महानगरपालिकां धाउगु दु। स्थानीय व ठेकेदार कम्पनी दथुइ सतक मर्मतया ज्या तत्काल यायेगु सहमति जुगुलि सोमबाःनिसे फोहर यके धुकुगु दु।

फागुन लिपागु वाःनिसे सिसडोल व बञ्चरेडाँडाया स्थानीयपिन्स छवाः फोहोर वान्छयेत रोके याउगु खःसा वंगु १८ चैतनिसे अवरोध यानाच्वंगु खः।

च्यादँ न्ह्यःनिसे शैलुङ कन्स्ट्रक्सनया ठेक्का कया नुवाकोट वनेगु लँ पासाङल्हामु राजमार्ग सतक आःतक दयकूगु मदुनि। ईलय् हे ज्या मजुगुलि स्वनिगःया  १८ स्थानीय तहया फोहर व्यवस्थापन जुइ मफुगु खः।

न्हिन्हि स्वनिगःपाखे १ हजार २०० मेट्रिक टन फोहर सिसडोलय् व्यवस्थापन जुया वयाच्वंगु खः।