येँया फोहोर व्यवस्थापन विषय कन्ह्यः शुक्रबाः स्थानीय वासिन्दापि नाप छलफल याइगु जुगु दु।

येँ महानगरपालिका नाप स्वनिगया स्थानीय तह, धादिङया धुनिवेशी नगरपालिका व नुवाकोटया ककनी गाउँपालिका प्रतिनिधिपि नाप स्थानीयपि छलफलय् सहभागीताय् शहरी विकास मन्त्रालयं धाउगु दु।

शहरी विकास मन्त्री रामकुमारी झाँक्रीया प्रेस संयोजक विष्णु राईगाई न स्थानीय वासिन्दा, जनप्रतिनिधि, सुरक्षा निकायया प्रतिनिधिपि नाप सर्वपक्षीय छलफल जुइ त्यःगु दु धका धाउगु दु।

‘मन्त्री रामकुमारी झाँक्री नाप मन्त्रालयया सचिव, महाशाखा प्रमुखपि न वार्ताय् च्वनेत्यःगु खः। कन्ह्यःया बैठकं छु ठोस निर्णय याइ’ धका वयकलं धाउगु दु।

थ्व स्वया न्ह्यः वंगु सोमबाः शहरी विकास मन्त्रालय, उपत्यकाया स्थानीय तहया जनप्रतिनिधि व बञ्चरेडाँडा क्षेत्र लाउगु धादिङया धुनीवेशी नगरपालिका व नुवाकोटया ककनी गाउँपालिकाया प्रतिनिधि दथुइ सहमति जुगु खः।

तर उगु सहमतिइ स्थानीयपिन्सं माने मयायेवं फोहोर ज्वना वंगु ट्रकय् अवरोध याउगु खः।

धादिङया धुनिबेसीइ च्वंगु बञ्चरेडाँडाय् न्हुगु ल्यान्डफिल साइटय् स्वनिगःया फोहोर वांन्छ्वयके बिउगु मदुनि।

१० वैशाखनिस फोहोर वांन्छ्वयकेगु बन्द याउगु नुवाकोटया ककनी गाउँपालिकाय् च्वंगु सिसडोल ल्यान्डफिल साइट धाःसा जोखिमयुक्त अवस्थाय् थ्यःगु दु। नेपाल विज्ञान तथा प्रविधि प्रज्ञा प्रतिष्ठान (नास्ट) या अध्ययन टोलीं सिसडोलया ल्यान्डफिल साइटय् हाकन फोहोर वांन्छ्वलकि मेगु संकट वइ धइगु प्रारम्भिक रिपोर्ट बिउगु दु।

वंगु मंगलबाः नास्टया प्रविधि संकाय प्रमुख वैज्ञानिक डा. रवीन्द्र ढकाल नेतृत्वया टोलीं सिसडोल क्षेत्रय् अध्ययन याउगु खः। ढकालया कथं ल्यान्डफिल साइटय् क्षमता स्वया अप्पो फोहोर वांन्छ्वया तःगु दु धका धाउगु दु। ‘सिसडोलय् फोहोरय् यक्को मिथेन दु, उकियात धाने यायेत हिसावं कम्याक्टिङ याउगु मदु। उगु मिथेनयात पिने हयेगु संयन्त्र व उपकरण हे तःगु मदु,’ धका वयकलं धाउगु दु।

‘फोहोरया डंगुर दुने मिथेन, हाइड्रोजन सल्फाइड, कार्बनडाइअक्साइड, कार्बनमनोअक्साइड लगायतया ग्यास बने जुयाच्वंगु दु। पिने पिहा वइगु कथं साइफोनिङ, पाइपिङ वा ट्यापिङ याइगु छु न उपकरण जडान याउगु मदु,’ वयकलं धयादीगु दु, ‘गथे फोहोर क्षमता स्वया अप्पो मुुकां यकिइ, उकिइ गुवलय् मुयावइगु जोखिम दु। स्वभाविक रुपं ग्यास रिलिज जुया न वने याः।’ विस्तृत अध्ययन मयातले जोखिमया मात्रा गये जुए धका धाये मफु धका ढकालं धाउगु दु।

तर, आः न सिसडोलय् मेगु फोहोर वांन्छ्वलकि मेगु खरतरनाक जुइ धइगुे प्रारम्भिक निचोड खः,’ धका वैज्ञानिक डा. ढकालं धाउगु दु। सिसडोलय् मेगु प्यदँ न्यादँ तक लिचेड बाः वनाच्वनिइगु अवस्था दु। ‘फोहोर वांन्छ्वयेगु त्वतलकि विस्तारं च्वंनिसे दबाव वनकि लिचेड पिहावनिइ,’ वयकलं धयादीगु दु,’ च्वं वाः वइगु इलय् न पिहावनिइ। लिचेडया असरं गज्याउगु व्यवस्थापन यायेगु धइगु जिमिसं छगु समाधान बिइगु कुतः याये।

’२०६२ जेठ २२ स्वदँया लागि धका सिसडोल ल्यान्डफिल साइटय् फोहोर वांन्छ्वयेगु याउगु खः। सुरुया इलय् येँ व यलय् न्हि ३७५ मेट्रिक टन तक फोहोर थ्यउगु खः, लिपागु इलय वया ११ सय मेट्रिकटन तक थ्यंगु दु। वंगु १० वैशाख तक सामान्य अवस्थाय् अन न्हि १६० ट्रक तक थ्यःगु दु।

येँ महानगरया प्रमुख बालेन्द्र शाह (बालेन) न नवनिर्वाचित कार्यपालिका सदस्यपिन्त पद व गोपनीयताया शपथ काउगु दु।

थौं राष्ट्रिय सभागृहय् वयकलं शपथ याकूगु खः। उगु ज्याझ्वलय् उपप्रमुख सुनिता डंगोल, प्रमुख प्रशासकीय अधिकृत लोकनाथ पौड््याल नाप राजनीतिक दलया प्रतिनिधिपिनिगु सहभागी दुगु खः।

शपथ काये न्ह्यः मुख्य निर्वाचन अधिकृत राजुकुमार खतिवडां निर्वाचित कार्यपालिका सदस्यपिन्त प्रमाण पत्र लल्हाउगु खः। कार्यपालिका च्याम्ह सदस्यपि निर्वाचित जुगु खः।

नगरकार्यपालिकाय् मिसा सदस्य पदय् नेपाली कांग्रेसया उम्मेदवारपि मीना सुनार, मीना सिंह, कञ्चना नेपाली हरिजन व ललिता खड्गी नाप नेकपा समाजबादीया मैयाँलक्ष्मी महर्जन निर्वाचित जुगु खः।

अथेहे दलित व अल्पसंख्यकपाखे नेपाली कांग्रेका उम्मेदवार बिनोद अछामी व महेश नेपाली नाप नेकपा माओवादीया अनिता कार्की ढोली निर्वाचित जुगु खः।

येँया टुकुचा खुँसि बहां वया छगः मोटरसाइकल चुइकूगु दु।

येँ महानगरपालिका वडा–२ लाजिम्पाटय् निलसरस्वती नाप टुकुचा खुँसि बहां वया मोटरसाइकल नाप छम्ह मनूयात चुइकूगु दु धका महानगरीय प्रहरी परिसरं धाउगु दु।

येँया महानगरपालिका धापासी छेँ दुम्ह २१ दँ दुम्ह सुरज अर्यालया बागमती प्रदेश–०२–०१३ प २५८८ नम्बरयो मोटरसाइकल खुँसिइ चुइकूगु खः।

चालक अर्यालयात तत्काल सकुशल उद्धार याउगु दु सा मोटरसाइकल धासा चुइका यकूगु दु धका प्रहरीं धाउगु दु।

ख्वपय् च्वंगु सल्लाघारी २५ दँ पुलांगु डा.इवामुरा मेमोरियल अस्पतालया व्यवस्थापनय् न्हूगु पुचलं वइगु असार १ गतेनिसे न्ह्याकिइगु जुगु दु।

इवामुरा अस्पतालया व्यवस्थापकीय न्हुगु नेतृत्वय् वरिष्ठ रेडियोलोजिष्ट डा.मनोजमान श्रेष्ठया पुचलं याये त्यःगु दु। १०० शैय्याया इवामुरा अस्पतालया व्यवस्थापन १५ दँ तक न्हूगु पुचलं यायेगु सहमति जुगु दु।

कलेज व्यवस्थापनय् धाःसा पुलांगु पुचलं याइगु जुगु दु। न्हूगु व्यवस्थापकीय नेतृत्व वरिष्ठ रेडियोलोजिष्ट डा. श्रेष्ठ छत्रपाटी निःशुल्क चिकित्सालयया नं अध्यक्ष खः।

२५ दँ न्ह्यः जापानी समाजसेवी डा. नोबुरु इवामुराया लुमन्तीइ अस्पताल स्थापना याउगु खः। डा. इवामुरां जापानिज स्वयंसेवक कथं नेपाः वया टिबी रोग नियन्त्रणय् तधःगु योगदान दुगु खः।

वयकःया हे लुमन्तीइ सन् १९९८ य् स्थापना जुगु खःसा इवामुरा हस्पिटल सन् २००१ य् सञ्चालनय् वःगु खःसा सन् २००५ य् निसे स्थानीयपिनिगु न सहभागी दुगु खः।