उपराष्ट्रपति नन्दबहादुर पुनं संविधान पालनाय् छु भचा चुनौती खनेदुगु दु धका धयादीगु दु। तर न संविधान कार्यान्वयनया अवस्था सन्तोषजनक दु धका वयकलं धयादीगु दु।

संविधान दिवसया लसताय् भिंतुना बिइगु झ्वलय् वयकलं समृद्ध राष्ट्र व समतामूलक समाज निर्माणया लागि संविधानं पूर्ण पालना, संरक्षण व संवद्र्धन अनिवार्य सर्त जुगु धका उल्लेख यानादीगु दु।

संविधान कथं निकःतक स्थानीय तहया निर्वाचन क्वचाःगु धका धयादीसे वयकलं संविधान गतिशील दस्तावेज जुगलि संविधान दुने च्वना थुकियात अझ न समृद्धि दयका यंकेमाः धका धयादीगु दु।

उपराष्ट्रपति पुनं संविधान कार्यान्वयनय् महत्वपूर्ण पक्षया रुपय् दुगुलि वइगु प्रतिनिधिसभा व प्रदेशसभाया निर्वाचनयात महान् उत्सवय् रुपं कया ब्बति कायेत सकल नेपाःमि दाजुकिजा तता केँहपिन्त इनाप यानादीगु दु।

राष्ट्रपति विद्यादेवी भण्डारीं संविधान दिवस व राष्ट्रिय दिवस, २०७९ या लसताय् सकल नेपाःमिपिन्त भिंतुना बियादीसे वयकलं संविधानं नेपाःया समाजयात बृहत् राष्ट्रिय एकताया सूत्रय् आबद्ध याःगु दु धका धयादीगु दु।

भिंतुना सन्देशय् राष्ट्रपति भण्डारीं सङ्घीय लोकतान्त्रिक गणतन्त्र स्थापनार्थ यायेगुलि थीथी आन्दोलनया झ्वलय् जीवन उत्सर्ग यायेत शहीद जुयादीपिन्त भावपूर्ण श्रद्धाञ्जली अर्पण यानादीसे देशय् लोकतान्त्रिक प्रणालीया जग तयेत पथ प्रदर्शन यानादिपि सकल न्ह्यलुवा पिन्त सम्मान यानादीगु दु।

‘नेपाःया जनता दशकौँ तक सङ्घर्ष व बलिदानया फलस्वरूप २०७२ साल असोज ३ गते सङ्घीय लोकतान्त्रिक गणतन्त्र नेपाःया संविधान जारी जूगु ऐतिहासिक उपलब्धियात लुमकां व सम्मान यायेत थौं झीसं संविधान दिवस नाप राष्ट्रिय दिवस हनाच्वनागु दु’ धका सन्देशय् धयादीगु खः।

नेपाल संवत राट्रिय न्हूदँ समारोह समितिं राट्रिय बिभूति शखधर साख्वाः प्रतिष्ठानय् अवलोकन ज्याझ्वः याःगु दु।

छगु ज्याझ्वः दथुइसमारोह समितिया सल्लाकार नाप पूर्व राज्यमन्त्री तीर्थराम डंगोलया नेतृत्वय् समारोह समितिया दुजःपिं प्रतिष्ठानया ज्याकू थिमिइ वनाः थथे अवलोकन याःगु खः।

समारोह समितिया दुजःपिन्त प्रतिष्ठानया अध्यक्ष ज्ञानुराम श्रेष्ठं लसकुसयासें नेपाल संवतया आनदोलनया थपु यायेत शखधरयात कयाः अध्ययन अनुसन्धान यायेत समारोह समितिलिसें मंकाः कथं ज्या याना वनेगु बिचाः प्वंकादिगु खः।

अथेहे वयकलं प्रतिष्ठान आःतक याना वयाच्वंगु थीथी ज्याखँया जानकारी बियादिगु खः। 

संस्कृति पर्यटन व नागरिक उडड्यनमन्त्री जीनवराम श्रेष्ठं जात्रा पर्व, धर्म संस्कृति राज्यया सम्पत्ति खः थुकियात संरक्षण यायेगु झीगु दायित्व खः धका धयादीगु दु।

न्यतय् श्वेतकाली द्यः छेँ उलेज्या यायेगु झ्वलय् मन्त्री श्रेष्ठं धयादीगु दु कला संस्कृतिया संरक्षण मजुतलय् देय्या आर्थिक रुपान्तरण जुइ मखु धासें देय् विकासया मू आधार हे पर्यटन खः।अथे जुगुलि पर्यटनयात नाप स्वाःगु सम्पदाया संरक्षण यायेमाःगु आवश्यकता खः धका धयादीगु खः।

ज्याझ्वलय् येँ महानगरपालिया प्रमुख बालेन्द्र साह, उपप्रमुख सुनिता डगोल, पुरातत्व विभागया प्रमुख दामोदर गौतम, येँ मनपा १८ वडाध्यक्ष न्हूछेँ काजी महर्जनपिनिगु न उपस्थिति दुगु खः।

प्रतिनिधिसभाया चालु अधिवेशन क्वचाःगु दु। राष्ट्रपति विद्यादेवी भण्डारीं मन्त्रिपरिषदया निर्णय कथं प्रतिनिधिसभाया चालु अधिवेशन असोज १ गते चान्ह्यः १२ बजेनिसे क्वचाःगु दु।

शनिबाःया प्रतिनिधिसभा बैठकय् राष्ट्रपतिं संसद अधिवेशन क्वचाःगु दु धका जानकारीनाप पौं सभामुख अग्निप्रसाद सापकोटां वाचन यानादीगु खः। शनिबाः प्रतिनिधिसभा बैठकय् दलया शीर्ष नेतापिन्स सम्बोधन याःगु खः।

सभामुख सापकोटां प्रतिनिधिसभाय् ज्याया विवरण प्रस्तुत याःगु खः।