वंगु शुक्रबाःया ल्याखय् स्थानीय बजारय् थौं लुँया भाः सामान्य कथं थहांवंगु दु। नेपाल सुनचाँदी व्यवसायी महासङ्घया कथं लुँया भाः तोलां न्हय्सः न थहांवंगु दुसा वहः तोलां न्यातका कुहांवंगु दु।

वंगु शुक्रबाः लुँया भाः तोलां निगू लख स्विगुद्वः कारोवार जूगु खः सा थौं छगू तोला लुँया भाः निगू लख स्विगुद्वः व न्हय्सः तका थ्यंगु दु धका महासङ्घं धाःगु दु। अथे हे, वहः तोलाया स्वद्वः व न्यय् न्यातका न कारोवार जुगु दु धका महासङ्घं धाःगु दु।

माइतीघरय् प्रदर्शन याम्ह छम्ह मनूयात प्रहरीं नियन्त्रणय् काःगु दु। निवर्तमान प्रधानमन्त्री केपी शर्मा ओली व निवर्तमान गृहमन्त्री रमेश लेखक लगायतयात ज्वने माः धका प्रदर्शन याम्हेसित प्रहरीं नियन्त्रणय् काःगु दु।

जेनजी आन्दोलनया घटनाय् ओली व लेखकनापं येँया तत्कालीन सीडीओ छवि रिजालयात ज्वने माःधका प्रदर्शन यायेगु झ्वलय् प्रहरीं ज्वंगु खः।

सहरी विकासमन्त्री कुलमान घिसिङं बञ्चरेडाँडा ल्याण्डफिल साइटय् च्वपिनिगु माग १५ दिं दुने पूरा यायेगु प्रतिबद्धता याःगु दु।मन्त्री घिसिङं प्रतिबद्धता यायेवं फोहोर वान्छ्यकेत थानीय सहमत जूगु दु।

अन च्वपि स्थानीय तय्स प्यन्हु निसे फोहोर वान्छेवके मबिउगु खः।

जनकवि दुर्गालाल श्रेष्ठया खुगू सफू व ‘जिगु गर्व’ म्येया म्युजिक भिडियो म्हिगः पितब्वयेगु ज्या जूगु दु।

उगु ज्याझ्वलय् मूपाहाँ येँ महानगरपालिकाया उपमेयर सुनिता डंगोलं जनकवि दुर्गालाल श्रेष्ठया खुगू सफूत कपूया कुँ, नःलिगु नुगः खँ, छुंछुं गिजिमिजि ध्वः, कावा, कविया बाखं कविया भासं व अन्तर्भाव थूया पितब्वयादिल धाःसा विशेष पाहाँ नेपालभाषा एकेदेमिया चान्सलर मल्ल के. सुन्दरं ‘जिगु गर्व’ म्येया म्युजिक भिडियो प्ले यानाः पितब्वयादीगु खः। थुगु म्युजिक भिडियोया निर्देशक विश्वास वज्राचार्य खः।

जनकवि दुर्गालालया च्वसाया प्रवृत्ति व वय्कःलिसे लुमंतिया बारे कवि सुरेश किरणनापया अन्तक्र्रिया ज्याझ्वलय् च्वमि मल्ल के. सुन्दरं दुर्गालालपाखें अभिप्रेरित जुइमाःगु मू खँ धैगू जीवनया थथ्याःक्वथ्या दुने जि नेवाः खः धैगू स्वत्वया भावना गबलें मत्वतीगु खँ धयादिल। २००६ सालपाखे गम्भीरमान मास्के नायः जुयादीगु विद्यार्थी साहित्य मण्डलया साहित्यिक ज्याझ्वलय् दकले न्हापां थःगु रचना ज्वना दं झागु खँ लुमंकुसें च्वमि मल्लं दुर्गालाललिसे ५० दँ नापनापं ज्या यानावया च्वनागु खँ कनादिल। कवि दुर्गालालयात दकसिबे न्हापां गबले खनादिया धकाः न्यंगु न्ह्यसलय् वय्कलं ग्राम्य जीवन धाःगु नाटकय् प्याखंम्वः जुयाः घिंतामुनि प्याखं ल्हूबलय् खना धयादिल।

५० दँ न्ह्यः व लिपा दुर्गालालया प्रवृत्तिइ वःगू ह्यूपाःयात दुवाला वय्कल धयादिल – दुर्गालालया काव्य प्रवृत्तिइ न्हापां आवेग, आक्रोश व अक्रान्त दुथ्याःगु व लिपा राजनीतिक चेतना वयेधुंकाः समानता, वामपन्थी भावना, समाजय् दयाच्वंगु थथ्याःक्वयाया विरुद्ध विद्रोहया भावना दुथ्याःगु खने दु।

अनं लिपा सांसारिक जीवनपाखें विरक्तम्ह सिद्ध थें जुयादिल।वय्कलं श्रोतातय्सं न्यंगु न्ह्यसःया नं लिसः बियादीगु खः। उपमेयर डंगोलं रचनात्मक साहित्यिक ज्याझ्वः ग्वसाःग्वःगु धासें ग्वसाःखलः दुर्गालाल साहित्य प्रतिष्ठानयात च्वछायादिल। ज्याझ्वलय् आपालं च्वमि, साहित्यकार, भाषिक कार्यकर्ता नापं भाषाह्यःमितय् उपस्थिति दुगु खः।

देयन्यकाया २५ गु उद्योगया लाइन काटे यायेवं थीथी निजी जलविद्युत् आयोजनापाखे उत्पादन जुगु ४ सय ५० मेगावाट सितिकं वनाच्वंगु दु।

आः नेपाल विद्युत् प्राधिकरणयात न्हि ५ करोड स्वया अप्पो घाटा जुयाच्वंगु दु।आः देयन्यक १६ गु जलविद्युत् आयोजनापाखे ४ सय ५० मेगावाट विद्युत् ‘कन्टिन्जेन्सी’ य् दु धका प्राधिकरणयो विद्युत् व्यापार विभागया निर्देशकं धाःगु दु।विद्युत् कन्टिन्जेन्सी धाःसा उत्पादन जूसा नेपाल विद्युत् प्राधिकरणं मन्यागु दु विद्युत् खः।अथेहे तधःगु मात्राय् प्राधिकरणं बिजुली मन्यासा निजी क्षेत्रया जलविद्युत् कम्पनीयात न्हि करिब ६ करोड रुपैयाँ नोक्सान जुयाच्वंगु दु।

प्राधिकरणं ‘डेडिकेटेड’ व ‘ट्रंक लाइन’ विवादं कात्तिक ४ गते निसे थीथी उद्योगया लाइन काटे याःगु खः। सुरुइ खुगु उद्योगया लाइन काटे याःगु खःसा आःतक २५ गु उद्योगया लाइन काटे याये धुकुगु दु।उगु उद्योगपाखे न्हि करिब ३ सय मेगावाट खपत यायेगु याइ।