लुँ तोलां थौ निद्धः व न्ह्यय्सः थहावंगु दु। थौ लुँ तोलां निद्धः व न्ह्यय्सः थहावनां २ लाख ३९ हजार तका न कारोबार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

अथेहे थौ वहः तोलां नीतका कुहावःगु दु। वहः तोलां नीतका कुहावया थौ २ हजार ९ सय ६० तका न कारोबार जुयाच्वंगु दु धका महासङ्घं धाःगु दु।

नेपाल संवत न्हूदँ राष्ट्रिय समारोह समिति ११४६ या ग्वसालय् नीखुक्वःगु शंखधर दिवस कछलाथ्व दशमी शुक्रवाः सुथय् तःजिक हंगु दु।शंखधर साख्वाः व नेपाल संवतलिसे ऐतिहासिक स्वापू दूगु लखुतीर्थय् च्वंगु जगत सुन्दर ब्वनेकुथिइ शंखधर साख्वाःया झ्वाताय् माल्यार्पण यानाः शंखधर दिवस हंगु खः।

भाषा आयोगया नायः डा. गोपाल ठाकुरया मूपाहाँसुइ जूगु उगु ज्याझ्वलय् विशेष पाहाँ कथं नेवाः न्ह्यलुवा मल्ल के सुन्दर झायादीगु खःसा अथेहे ज्याझ्वलय् न्हूदँ संरक्षण समाजया कजि प्रा.डा.नरेशमान बज्राचार्य, येँ १५ वडाया वडाध्यक्ष ईश्वरमान डंगोल, न्हूदँ समारोह समितिया सल्लाहकार राजेन्द्र प्रसाद श्रेष्ठया उपस्थित जुगु खः।ज्याझ्वः समारोह समितिया नायः प्रेमहिरा तुलाधरया सभापतित्वय् जूगु खः।ज्याझ्वलय् मूपाहाँ डा. गोपाल ठाकुरं नेपाल संवतया आन्दोलनय् थःपिं नं दूगु खँ कनादिसें शंखधर साख्वाः नेपाःया म्हसीका जूगु विचाः प्वंकादीगु खः।

अथेहे, असनय् शंखधर दिवस न्यायेकूगु दु। असं त्वाःया दबुली शंखधर ब्वज्या जूगु दुसा उगु ज्याझ्वलय् येँ महानगरपालिका २७ वडाया वडाध्यक्ष योगेश कुमार खड्गीं शंखधरया झ्वाताय् माल्यार्पण यानादीगु खःसा अथेहे न्हूदँ संरक्षण समाजया कजि प्रा.डा. नरेशमान बज्राचार्य, समारोह समितिया नायः प्रेमहिरा तुलाधरलिसें समारोह समिति सचिवालयया दुजःपिन्सं शंखधरया झ्वाताय् माल्यार्पण याःगु खः

प्रधानमन्त्री सुशीला कार्कीलिसे नेपाःया निंतिं जर्मनीया राजदूत उडो भोल्जं नापलानादीगु दु। प्रधानमन्त्री नापं मन्त्रिपरिषद् ज्याकुथि सिंहदरबारय् नापलायेगु झ्वलय् नेपाः व जर्मनी दथुइ निगूपक्षीय हित नापं मित्रताया विषय बिचाः कालबिल जूगु खः।

प्रधानमन्त्रीइ कार्की नियुक्त जुइधुंकाः वय्कःपिं न्हापांखुसी नापलानादीगु खः।थ्व झ्वलय् जर्मनीया राजदूत भोल्जं प्रधानमन्त्री कार्कीयात सफल कार्यकालया निंतिं भिंतुना प्वंकादिसें न्ह्याबलें थें नेपाःया प्राथमिकताकथं आवश्यक ग्वाहालि यायेत तयार दूगु जानकारी बियादिल।

प्रधानमन्त्री कार्कीं नेपाःया राहदानी छापे यायेगु भाला काःगु जर्मन कम्पनीलिसे सम्झौताय् जूगु ईस्वयां न्ह्यवंनिसें हे राहदानी छापे यायेत आवश्यक कुतः यायेत इनाप यानादिल। वय्कलं नेपाःया नागरिकतय्त याकनं सेवा प्रवाह यायेत थ्व ज्याय् जर्मन पक्षपाखें ग्वाहालि दइगु भलसा नं प्वंकादिल।

लिसलय् राजदूत भोल्जं थःपिनिगुपाखें कम्पनीयात इनाप यानाः थुगु विषय फयांफक्व कुतः यायेगु धयादिल। नाप लायेगु झ्वलय् सञ्चार नापं सूचना प्रविधिमन्त्री जगदीश खरेल, प्रधानमन्त्रीया मुख्य सल्लाहकार अजयभद्र खनाल, परराष्ट्र मन्त्रालयया सचिव अमृतबहादुर राईलिसें कूटनीतिक अधिकारीतय् उपस्थिति दूगु खः।

सञ्चार नापं सूचना प्रविधिमन्त्री जगदीश खरेलयात नेपाःया निंतिं भारतीय राजदूत नवीन श्रीवास्तवं नापलानादीगु दु।सिंहदरबारय् च्वंगु मन्त्रालय नापलायेगु झ्वलय् निगू देय् दथुइया सम्बन्ध, सहकार्य, थौंया अवस्थाया विषय सहलह जूगु धका मन्त्रालयं धाःगु खः।

नापलायेगु झ्वलय् सञ्चारमन्त्री खरेलं नेपाः व भारत दथुइ दयावयाच्वंगु ऐतिहासिक सम्बन्ध, नेपालय् भारतया ग्वाहालिइ न्ह्याना च्वंगु विकास आयोजनालिसें थी थी कालखण्डय् नेपाःया सामाजिक नापं राजनीतिक विकासय् भारतं यानाच्वंगु ग्वाहालि नापं सद्भावयात च्वछानादिल। मन्त्री खरेलं नेपाःया दयाच्वंगु परिस्थितिया बारे न्ह्यथनादिसें स्वतन्त्र नापं निष्पक्ष रुपं निर्वाचनयात पूवंकेगु, भ्रष्टाचार नियन्त्रण व सुशासन प्रवद्र्धन हे सरकारया प्रमुख प्राथमिकता जूगु धयादिल।

सरकारया प्रवक्ता तकं जुयादीम्ह सञ्चारमन्त्री खरेलं क्वःछिनातःगु इलय् हे निर्वाचन याकेत सरकारं राजनीतिक दल व जेनजी प्रतिनिधिलिसे संवाद न्ह्याकागु धयादिल। उगु झ्वलय् राजदूत श्रीवास्तवं सञ्चारमन्त्री खरेलयात बधाई ज्ञापन यानादिसें भिंम्ह जःलाखःलाया नातां भारतया ग्वाहालि दयाच्वनीगु प्रतिबद्धता प्वंकादिल।

भारत सरकार नेपाःया आर्थिक रुपान्तरण नापं समृद्धिया निंतिं नेपाःया प्राथमिकताया ख्यलय् वित्तीय व प्राविधिक ग्वाहालि अप्वयेकेत तयार दूगु धयादिल। उगु झ्वलय् सञ्चार मन्त्रालय व परराष्ट्र मन्त्रालयया अधिकारीतय् नं ब्वति दूगु खः।

शेयर बजाः परिसूचक नेप्से ३४.२२ ल्याखं थहावनां २६००.३८ विन्दुइ थ्यःगु दु।थौ म्यूचुअल फण्ड बाहेक दक्को समूह थहावंगुलि जलविद्युत् समूह साढे २ प्रतिशत स्वया अप्पो थहावंगु दु।

गुराँस लघुवित्त व उन्नती सहकार्य लघुवित्तया शेयर १० प्रतिशतं थहावनां सकरात्मक सर्किटय् थ्यःगु दु।अथे थौ नेप्से नापं कारोवार रकम न अप्पो जुगु दु।