प्रधानमन्त्री केपी शर्मा ओलीं कास्कीइ दयेकूगु पोखरा स्वास्थ्य विज्ञान प्रतिष्ठानया प्राज्ञिक व आकस्मिक भवनया उलेज्या यानादीगु दु।

प्रतिष्ठानया न्हापांगु दीक्षान्त समारोहय् ब्वति कायेत थौं पोखरा थ्यंक झाम्ह प्रधानमन्त्री ओलीें १७ क्वःति लाय् तयाः दयेकूगु भवनया थौं हे उलेज्या यानादीगु खः।

उलेज्या धुंका वय्कलं नवनिर्मित भवनया निरीक्षण नं यानादिगु खः।

डेमोक्र्याटिक लयर्स एसोसियशन (डिएलए) नेपालं अदालतदुने वरिष्ठ अधिवक्ता दिनेश त्रिपाठीयात जूगु आक्रमणया निन्दा यासें थ्व कानुनी शासन व लोकतान्त्रिक पद्दतीया अःखः जूगु धाःगु दु।

डिएलएया नायः वरिष्ठ अधिवक्ता सीताराम केसी व महासचिव अधिवक्ता ज्ञानेन्द्रप्रसाद अधिकारीं थौं पिथंगु प्रेस विज्ञप्तीइ स्वर्णलक्ष्मी बहुउद्देश्यीय सहकारी संस्था लिमिटेडया मुद्दाय् पीडिततय्गु पाखें बहसपैरवी यानाः अदालतं पिहाँवयेगु झ्वलय् जूगु आक्रमणप्रति गम्भीर ध्यानाकर्षण जूगु धाःगु दु।

“कानुन बनेज्या स्वतन्त्र न्यायपालिकाया ब्व खः, अदालतय् वनाः पक्षपिनिगु पाखें स्वतन्त्र व निर्भीक जुयाः बहसपैरवी यायेगु कानुन बन्जाःतय्गु संवैधानिक व कानुनी अधिकार खः”, डिएलएं पिथंगु विज्ञप्तीइ धयातःगु दु।डिएलए नेपालं येँ जिल्ला अदालतपाखें पिहाँ वयेगु झ्वलय् हुलदङ्गा, थसाःक्वसाः, दायेगु नापं नाराबाजी यायेगु स्वतन्त्र न्यायपालिका, कानुनी शासन व लोकतान्त्रिक पद्दतीया अःखः जूगु धाःगु दु।

थजाःगु ज्याखँ जुइगु धइगु गैरकानुनी खः धकाः धासें डिएलएं उकिया भत्र्सना याःगु दु। वरिष्ठ अधिवक्ता त्रिपाठीयात आक्रमण याःम्ह मनू म्हसीकाः तुरुन्त हे ज्वनाः कानुनी कारबाही न्ह्याकेत डिएलए नेपालं विज्ञप्तीपाखें सरकारयात इनाप याःगु दु।

प्रधानमन्त्री केपी शर्मा ओलीं शिक्षा व स्वास्थ्य ख्यःयात च्वन्ह्याकेत सरकारं कुतः यानाच्वंगु दु धकाः धयादीगु दु।

पोखरा स्वास्थ्य विज्ञान प्रतिष्ठानया न्हापांगु दीक्षान्त समारोहयात संबोधन यानादिसें कुलपति ओलीं मुलुकय् थी थी ख्यलय् ह्यूपाः व प्रगति जुयावंगुलिं ऋषिमुनी तय्सं धयावंगु ‘सर्वे भवन्तु सुखिनः’या आधुनिक रुप ‘समृद्ध नेपाः, सुखी नेपाःमि’या गन्तव्यय् थ्यंकेगु ध्यानय् तयाः थःम्हेसिनं ज्या यानाच्वनागु धकाः ध्वाः थुइकादिल।

वय्कलं व्यवस्थाय् ह्यूपाः वल, अवस्थाय् ह्यूपाः मवःनि धाइपिंत प्रतिष्ठान नीस्वंगु व पोखराय् हे  जनशक्ति उत्पादन जूगु छगू दसू जूगु व पोखराय् १४ म्ह ल्वगितय्गु मिर्गौला प्रत्यारोपण जूगु छगू विशेष उपलब्धिया विषय जूगु धयादिल। प्रधानमन्त्री ओलीं हलिमयय् थुगु भूभाग ज्ञान व खोजया भूमि जुगुलिं आधुनिक चिकित्सा सुरु जुइ न्ह्यः हे वेद–विज्ञान व प्राचीन चिकित्सा थन न्ह्यायेधुंकूगु गौरवशाली इतिहास नं कनादिल। “झीपिं थहाँ वयेमफइगु छुं हुनि मदु। झीसं सुचं प्रविधि व आर्टिफिसियल इन्टेलिजेन्सयात छ्यलाः विकास यायेत न्ह्याःवनेगु जुइ।”, प्रधानमन्त्री ओलीं धयादिल, “चीनं उलिमछि जनसङ्ख्यायात म्ह्वः इलय् हे गरिबीया ध्वःपाखें थकाल।

झीसं नं झीगु देय् थःपिंसं दयेकेगुलिइ वनेमाः। झीपिं उकिइ न्ह्याःवन धाःसा नेपाः विकास जुइ।” प्रधानमन्त्री ओलीं दीक्षित विद्यार्थीतय्त दृष्टान्तयोग्य, इमानदार, आदर्शवान् व समाजया निंतिं उपयोगी जुइफयेमा धइगु भिंतुना बियादिसें प्रधानमन्त्री ओलीं विद्यार्थी व अभिभावकतय्गु आर्थिक लगानी, स्नेह व ईया लगानीया लिच्वः वःगु धकाः धयादिल। विसं २०८० व २०८० य् प्रतिष्ठानपाखें एमडी व एमएसय् उत्तीर्ण जूपिं ३८ म्ह विद्यार्थीत दीक्षित जूगु दु । कुलपति ओलीं उत्कृष्ट विद्यार्थी अरविन्दकुमार शाह (अर्थोपेडिक्स) व आषिश सापकोटा (जनरल सर्जरी)यात उपकुलपति पदक लःल्हानादिल।

विश्वविद्यालयया सहकुलपति नापं स्वास्थ्य व जनसङ्ख्यामन्त्री प्रदीप पौडेल नं झायादीगु उगु समारोहय् कारोलिनस्का इन्स्टिच्युट स्टकहोम, स्वीडेनया प्रा माग्नुस वेस्ग्रेनं दीक्षान्तय् भाषण बियादीगु खः। प्रतिष्ठानया उपकुलपति प्राडा डुकबहादुर क्षेत्रीं सेवा चकंकेगु झ्वलय् अस्पतालय् ५० गू खाताया आकस्मिक विभाग सञ्चालन यायेगु तयारी जुइधुंकूगु खँ नं कनादिल।

प्रधानमन्त्री केपी शर्मा ओली पोखरा स्वास्थ्य विज्ञान प्रतिष्ठानया न्हापांगु दीक्षान्त समारोहय् ब्वति कायेत थौं न्हिनय् गण्डकी प्रदेशया राजधानी पोखरा थ्यंकादीगु दु।

प्रधानमन्त्री ओलीयात पोखरा अन्तर्राष्ट्रिय विमानस्थलय् गण्डकी प्रदेश प्रमुख डिल्लीराज भट्ट, मुख्यमन्त्री सुरेन्द्रराज पाण्डे, पूर्वमुख्यमन्त्री खगराज अधिकारीलिसें उच्चपदस्थ सरकारी अधिकारीतय्सं लसकुस यानादीगु खः।

प्रधानमन्त्री ओली प्रतिष्ठानया कुलपति खः। प्रतिष्ठानपाखें थौं ४३ म्ह दीक्षित जुइत्यंगु खः।

प्रधानमन्त्री केपी शर्मा ओलीें सरकारय् दुथ्यापि प्रमुख दलया शीर्ष नेता, विज्ञ व सरोकार दथुइ च्वपिनाप सहलह याये धुका सुशासन व विकास यायेगु निति थीथी अध्यादेश हइगु धका धयादीगु खः।

नेपाः सरकारया सिफारिसय् राष्ट्रपतिपाखे जारी याःगु अध्यादेशया सम्बन्धय् प्रधानमन्त्री लिसे मन्त्रिपरिषदया कार्यालय, सिंहदरबारय् छगु पत्रकार सम्मेलन याना प्रधानमन्त्री ओलीं जारी याये हे माःगु तसक साबधानी व मेहनतं अध्यादेश सिफारिस जुगु खः।

“जिपि सरकार टिके यायगु ज्या जक मखु, सरकार थः हे टिके जुइ। थुकियात ताः लाकेगु व लिच्वः बिइगु मू जिम्मेवारी खः।”, प्रधानमन्त्री ओलीं धयादीगु दु, “थुगु अध्यादेशं सरकारया सुशासन व विकासया प्रतिबद्धता ज्वलन्त कथं खनेदुगु दु। थ्व पू वंगु सहमतिइ अध्यादेश वःगु खः। अध्यादेश राष्ट्रपतिपाखे रोके याःगु हल्ला यात। भूमिसम्बन्धी अध्यादेश अध्ययनया झ्वलय् जक खः, दिकूगु मदु। अध्यादेशया विरोध जुल धका नेपाली काँग्रेसया सभापति शेरबहादुर देउवाबारे नक्कली विज्ञप्ति पिहावल। थ्व दक्को भ्रमयात चिइकूगु दु । सरकार क्वधलं धका तधःगु खुसिइ सिथय् च्वना अप्पां कयेकिइगु जक कुतः खः।”