राष्ट्रपति रामचन्द्र पौडेलं नेपाल सरकारया वइगु आर्थिक दँ २०८२÷८३ या नीति व ज्याझ्वः सङ्घीय संसदया निगुलिं सदनया मंकाः बैठकय् न्ह्यब्वयादीगु दु।

न्हू बानेश्वरया सङ्घीय संसद् भवनय् च्वंगु प्रतिनिधिसभा व राष्ट्रियसभाया मंकाः बैठकय् राष्ट्रपति पौडेलं नीति व ज्याझ्वः वाचन यानादीगु खः। राष्ट्रपति पौडेलयात प्रधानमन्त्री केपी शर्मा ओलीं नीति व ज्याझ्वःया संबोधनया छगू प्रति लःल्हानादीगु खः। थ्व स्वयां न्ह्यः राष्ट्रपतियात सभामुख देवराज घिमिरे, राष्ट्रियसभाया अध्यक्ष नारायणप्रसाद दाहाल व सचिवालयया महासचिव पद्यप्रसाद पाण्डें लसकुस यानादीगु खः।

राष्ट्रपति पौडेलयात संसद् भवन गेटनिसें नेपाली सेनां ‘रिसल्ला’ लिसेंया राजकीय हना लःल्हाःगु खः।नेपाःया संविधानया धारा ९५ कथं राष्ट्रपतिं सङ्घीय संसदया निगुलिं सदनया मंकाः बैठकयात संबोधन याइगु व्यवस्था दु। सचिवालयं थ्व हे वैशाख २२ निसें २८ गतेतक सरकारया नीति व ज्याझ्वलय् सहलह यानाः पारित यायेगु ज्याया धलः थ्व स्वयां न्ह्यः हे क्वःछिइ धुंकूगु खः।

थ्व हे वैशाख ३० गते विनियोजन विधेयकया सिद्धान्त व प्राथमिकता सम्बन्धय् सहलह न्ह्याकी । नेपाःया संविधान कथं दँय् दसं जेठ १५ गते सरकारया वइगु आर्थिक दँया बजेट सङ्घीय संसदया मंकाः बैठकय् अर्थमन्त्रीं न्ह्यब्वइगु व्यवस्था यानातःगु दु।

प्रधानमन्त्री केपी शर्मा ओलीं नेपालय् सतक, विद्युतलिसें पूर्वाधारया विकास जूगुलिं सूचना नापं प्रविधिया ख्यलय् लगानी यायेत वैदेशिक लगानीकर्तात य्त इनाप यानादीगु दु।

राष्ट्रिय सूचना नापं सञ्चार प्रविधि दिवस, २०८२ या झ्वलय् थौं सूचना नापं सञ्चार प्रविधि मन्त्रालयं ग्वसाः ग्वगु ज्याझ्वलय् प्रधानमन्त्री ओलीं नेपाःयात आधुनिक व प्रविधिमय दयेकेत न्हिं छपलाः न्ह्याकेगु धइगु बिचाः तयाः ज्या यायेत इनाप यानादिल। वय्कलं मुलुकया सुशासन, विकास व सहज सेवा प्रवाहय् सूचना नापं सञ्चार प्रविधि छ्यलेगु अधिकारयात तब्याकुसें अझ मेमेगु उपलब्धि याये फयेकेमाः धकाः धयादिल।

“झीगु मुलुक उर्वर व जीवनमय जू। थन लगानीया यक्व सम्भावना दु। झीसं झीगु हे इलय् छुं यायेफइ धइगु आत्मविश्वास ज्वनाः ज्या याये। झीगु यात्रा अग्रगामी पलाःपाखे पक्कां नं न्ह्याःवनी”, प्रधानमन्त्री ओलीं धयादिल, “शिक्षालिसें दक्व ख्यलय् सूचना व प्रविधिया छ्यलाबुला अप्वोया वनाच्वंगु दु। एसइई ५२ प्रतिशत विद्यार्थी फेल जुइगु अवस्था न्हंकेत व्यक्तिगत कुतलय् नं थगुनेनिसें ‘अनलाइन’ माध्यमं महत्वपूर्ण विषयकय् कक्षा सञ्चालन जुल।

विद्यार्थीतय्गु भविष्य अन्धकारय् लाके मज्यू धकाः न्ह्याकूगु थजाःगु ज्यातय्त हःपाः बिइमाः।” प्रधानमन्त्री ओलीं आः झीसं थःगु हे सुरक्षालिसेंया ‘डेटा’ प्रणाली दयेके माःगुलिइ बः बियादिसें व्यवस्था ह्यूपाःलिपा अवस्थाय् ह्यूपाः मवः धइपिंत सूचना प्रविधिया विकास थःथवं हे लिसः जूगु टिप्पणी यानादिल। “छगू लाइन टेलिफोन कायेत मन्त्रीया तोक तयेमाःगु अवस्थां झीपिं यक्व न्ह्याः वने धुनागु दु। अन्तरिक्षय् नं थःगु हे ‘स्याटेलाइट’ छ्वयेगु कुतः न्ह्याःगु दु।

थ्व ख्यलय् न्हूगु पुस्ताया हस्ती तयार जुइ धुंकूगु दु,” वय्कलं धयादिल, “झीपिं आत्मविश्वासलिसें न्ह्याःवने। सूचना प्रविधिया ख्यलय् थप दक्ष जनशक्ति उत्पादन व तालिमय् बः बियाः न्ह्याः वने। आः मुलुकया समृद्धिया निंतिं कुंकुलामय् च्वंपिं जनताया विकास व सुशासनया निंतिं सूचना नापं सञ्चार प्रविधि तब्याकाः व छ्यलाः वनेमाः। सूचना व प्रविधिया दुरुपयोग यानाः मनूतय्गु हुर्मत कायेगु प्रवृत्तिपाखें सचेत जुइमाः।

ज्याझ्वलय् प्रधानमन्त्री ओलीं बागमती प्रदेश सरकारया सवारी चालक अनुमतिपौ (लाइसेन्स) व सवारीधनी दसिपौ (ब्ल्यू बुक)यात नागरिक एपय् स्वाकेगु ज्याया शुभारम्भ यानादिल। उगु झ्वलय् राष्ट्रिय सूचना प्रविधि अवार्डपाखें प्राडा शशीधर राम जोशीलिसें थीथी मनूत व संस्थातय्त सिरपाः लःल्हाःगु खः।

नेवाः पत्रकार राष्ट्रिय दबूया केन्द्रिय सल्लाहकार नरेशवीर शाक्यया अबु धर्मबीर शाक्यया मन्त। पारिवारिक स्रोतं ब्यूगु जानकारी कथं वयकः ९४ दँय् मदुगु दु।

वयकः इतुंबहाः सर्वसंघया न्वकू लिसें सुनचाँदी व्यवसायी संघया संस्थापक अध्यक्ष न जुयादी। म्हीगः मोडल अस्पतालय् मदुगु खः थौ बुधवाः सुथय् ११ बजे लुतिइ अन्त्येष्टि याइगु जुगु दु।

दुम्ह शाक्यया स्वम्ह काय् व न्याम्ह म्ह्याय्पिं दी। नरेशवीर शाक्य तधिम्ह काय् खः।

थगुने आर्थिक दँसिबें न्ह्यानाच्वंगु आर्थिक दँय् हनुमान ढोका दरबार संरक्षण ज्याझ्वःया आम्दानी अप्वःगु दु।

वंगु आवया वैशाख न्हापांगु वाःतकय् १४ क्वति खुगू लख ६३ द्वः तका पर्यटनतपाखें शुल्क सङ्कलन याःगु उगु ज्यझ्वलं न्ह्याना च्वंगु आवया व हे ईया दुने १५ क्वति २६लख ३५ द्वः तका सङ्कलन यायेधुंकूगु ज्याझ्वःया प्रमुख चन्द्रगोपाल प्रधानं धयादिल।

प्रमुख प्रधानया कथं पर्यटन सेवा शुल्कनापं मेमेगु सेवा शुल्क व मेमेगु प्रशासनिक सेवा शुल्क यानाः आम्दानी अप्वःगु खः। ज्याकुथिं न्ह्याना च्वंगु आवया नितिं १७ क्वति आम्दानी यायेगु आज्जु तःगु व अःपुक उगु आज्जु पूवनीगु वय्कःया धापू दु। वंगु आवय् धाःसा उगु ज्याकुथिं १५ क्वति जकया आज्जु तःगु खः। उगु ज्याकुथिया विशेष यानाः हनुमानध्वाखा चाःह्यू वइपिं पर्यटकतपाखें प्रवेश शुल्कं वःगु ध्यबा हे आम्दानी खः।

आः थन उगु ऐतिहासिक थाय् चाःह्यूवइपिं पर्यटक सार्क देय्या निंतिं ५०० ध्यबा क्वःछिनातःगु दु धाःसा मेमेगु देय्यापिंत पर्यटकया निंतिं द्वःछि क्वःछिना तःगु धकाः प्रधानं धयादिल। नेपाःमि तय्त दुहां वनेत शुल्क म्वाःसां सङ्ग्रहालय चाःलिहेत धाःसा प्रवेश शुल्क पुलेमाः। हनुमानध्वाखा चाःहिलेया निंतिं पर्यटकीय मौसमय् न्हि ७०० तक पर्यटकत वयेगु याइ।

विशेष यानाः भदौ, असोज व कार्तिकय् पर्यटक अप्वः वइगु प्रधानं धयादिल । वय्कःया कथं वंगु आवय् सार्क देय्पाखें ४७ द्वः ३९९ म्ह पर्यटकत चाःह्यूवःगु खःसा मेमेगु देय्यापिं छगू लख ५३ द्वः २६२ म्ह पर्यटकत चाःह्यूवःगु धाःगु दु। अथे हे न्ह्यानाच्वंगु आवया आःतकया इलय् सार्क देय्पाखें ३५द्वः ७५८ व मेमेगु देय्यापिं धाःसा छगू लख ४५ द्वः ६२५ म्हेस्यां हनुमानध्वाखा चाःह्यूवयेधुंकूगु धाःगु दु । न्हापा न्हापाया दँय् थें मखुसें थुगुसिइ वैशाखय् नं पर्यटकया ल्याः छुं म्हो मजूगु धाःगु दु।

येँयाया इलय् मेमेगु ई सिबें तसकं हे अप्वः पर्यटकत चाःह्यूवयेगु यानाच्वंगु दु।

उपराष्ट्रपति रामसहायप्रसाद यादवलिसे नेपाःया निंतिं युरोपेली सङ्घया राजदूत भेरोनिक लोरेन्जों नापलानादीगु दु।

येँ लैनचौरय् च्वंगु उपराष्ट्रपतिया ज्याकुथिइ थौं नापलानाः निगूपक्षीय सम्बन्धया थी थी आयामबारे खँल्हाबल्हा जूगु उपराष्ट्रपतिया ज्याकुथिं धाःगु दु। उपराष्ट्रपति यादवं नेपाः व युरोपेली सङ्घ (इयु) दथुइ सन् १९७४ निसें स्थापित मैत्रीपूर्ण सम्बन्धयात नेपालं उच्च महत्त्व बियावयाच्वंगु खँ कनादिल।

“नेपाः व इयुदथुइया दीर्घकालीन मित्रता व सहकार्ययात अझ क्वातुकूगु भलसा कयाच्वनागु दु”, वय्कलं धयादिल, “इयु नेपाःया प्रमुख विकास साझेदार जुयावयाच्वंगु खः।” स्वास्थ्य, शिक्षा, खानेपानी, सुचुकुचुलिसें ग्रामीण विकासया ख्यलय् युरोपेली सङ्घ समर्थित ज्याझ्वःया उपयोगितायात च्वछानादिसें वय्कलं कर्णाली प्रदेशय् इयुया ग्वाहालि अन्तर्गतया आयोजनां दुर्गम थासय् च्वंपिं जनतातय्त तसकं फाइदा जूगु खँ कनादिल।

‘सगरमाथा संवाद’ या महत्त्वबारे खँ न्ह्यथनादिसें उपराष्ट्रपति यादवं ‘जलवायु ह्यूपाः, च्वापुगुँ व मानवया भविष्य’ बारे विश्वस्तरीय बहसया ताःतयाः स्थापना याःगु संवाद दबूया आः जुइगु संस्करणया आयोजना मे १६–१८, २०२५ य् येँय् जुइगु जानकारी नं बियादिल। नेपाःया निंतिं युरोपेली सङ्घया राजदूत भेरोनिक लोरेन्जों नेपाः व युरोपेली सङ्घदथुइया सम्बन्ध लिपांगु इलय् अझ क्वातुनावनाच्वंगु धकाः धयादिल।

“युरोपेली सङ्घ वातावरण व जलवायु ह्यूपालय् लगानी याये मास्ति वयेका च्वंगु दु”, वय्कलं धयादिल। राजदूत लोरेन्जों दूधकोशी हाइड्रोपावरय् इयु लगानी यायेत इच्छुक जूगु कनादिसें नेपाःया कर्णाली व मधेस प्रदेशय् नवीकरणीय ऊर्जा ख्यलय् लगानी यायेगु व मधेस प्रदेशया शिक्षा ख्यलय् ग्वाहालि यायेगु धकाः धयादिल।