प्रधानमन्त्री केपी शर्मा ओलीयात संयुक्त अरब इमिरेट्स (यूएई) या उपप्रधानमन्त्री नाप विदेशमन्त्री शेख अब्दुल्लाह बिन जायेद अल नाह्यानं नापलानादीगु दु।

प्रधानमन्त्री नाप मन्त्रिपरिषदया कार्यालय सिंहदरबारय् थौ नापलायेगु झ्वलय् निगु देय् दथुइ सम्बन्ध नाप थीथी पक्ष व व्यापार, लगानी यायेगु विषय सहलह जुगु दु धका धाःगु दु।

ओलीं विकासया लँपुलि यूएई न याकन याःगुलि प्रशंसा यानादीसे नेपालय् जलविद्युत्, हरित ऊर्जा, हाइड्रोइनर्जी लगायत क्षेत्रय् लगानी विस्तार यायेत इनाप यानादील।

पप्रधानमन्त्री नाह्यानं यूएईया व्यवसायीतयेस नेपाःया पर्यटन, ऊर्जा, कृषिलगायत क्षेत्रय् लगानी विस्तारया निति प्रोत्साहन यायेगु धका धयादीगु दु। नेपाः निन्हु निति झायादीम्ह वयकलं नेपालय् स्वतन्त्र व्यापार सम्झौता यायेत थःपि तयार दु धका धयादीगु दु।

शिक्षा, विज्ञान नापं प्रविधिमन्त्री विद्या भट्टराईं राजीनामा बियादीगु दु।  प्रधानमन्त्री केपी शर्मा ओलीयात नापलाना भट्टराई न राजीनामा बियादीगु धका वयकःया प्रेस संयोजक रामजी लम्सालं जानकारी बियादिगु दु।

“शिक्षामन्त्रीं प्रधानमन्त्रीयात थौं राजीनामा बियादीगु खः”, वय्कलं धयादिल, “छाय् राजीनामा बियादीगु खः धइगु जानकारी मदु।” विद्यालय शिक्षा ऐन जारी याये माःगु माग यासें शिक्षक आन्दोलनया २० न्हु जुइ धुंकल।

थ्व दथुइ शिक्षा मन्त्रीं राजीनामा बियादीगु दु।

हल्चोक आकाश भैरव झीनिदँ जात्रा बैसाख महिनायक न्ह्याना च्वंगु दु।

थ्व हे झ्वलय् म्हिगः खुसिबुइ तःजिक जुगु दु। खुसिबुइ केशबलाल श्रेष्ठं ग्वसाः ग्वयादीगु उगु ज्याझ्वलय् उगु जात्रा जुगु खः।

नेवाः राष्ट्रिय मुक्ति मोर्चाया स्वक्वःगु तःमुँज्यां उमेश स्थापितयात न्हूम्ह नांयः ल्यंगु दु।

बसन्तपुरय् ज्याझवःया उलेज्या जुगु खःसा कालिमाति ब्यांक्वेटय् बन्द सत्रजुगु खः।

प्रधानमन्त्री केपी शर्मा ओलीं सुशासनया निंतिं दृढ अठोट यानाः जनतायात पवित्रभावं सेवा बियाः लोकतान्त्रिक गणतन्त्रयात सुदृढ याये माःगुलिइ बः बियादीगु दु।

मधेस प्रदेशसभायात थौं संबोधन यानादिसें प्रधानमन्त्री ओलीें जनताया न्हापांगु अधिकार गरिबीपाखें मुक्त जुइगु जूगुलिं गरिबीया न्ह्यःने मेगु अधिकारया छुं नं अर्थ मदुगु धयादिसें विकास व समृद्धिया लँय् मिले जुयाः न्ह्याः वनेत आह्वान यानादिल। “सङ्घीय लोकतान्त्रिक गणतान्त्रिक व्यवस्था तःधंगु उपलब्धि खः। थ्व उपलब्धियात राजनीतिक उपलब्धि कथं जक मखु जनताया सङ्घर्षपाखें वःगु उपलब्धि कथं कायेमाः।

उकिं झीगु कुतः जनताया सेवा यायेगुलिइ समर्पित जुइमाः। परिपूर्ण लोकतन्त्रया निंतिं झीसं ज्या यायेमाः,” प्रधानमन्त्री ओलीं धयादिल, “जनतां ह्यूपाःया उपलब्धि थःगु प्वाः, थःगु म्ह व सन्ततिया हित जुइकेत स्वइ। उकिं झीसं जनतायात लोकतान्त्रिक अधिकार छ्यलाबुला याके बिइमाः। दक्व सामाजिक जीवनय् लोकतन्त्र ह्वयेकेमाः। उकिया निंतिं समाजयात विकास व सुशासनयात गतिइ यंके हे माः।” प्रधानमन्त्री ओलीं मधेस प्रदेशया सामाजिक, सांस्कृतिक ऐक्यबद्धता, सहिष्णुता व सद्भाव तसकं बांलाःगु पक्ष जूगु धयादिसें थनया अनुशासित, चेतनशील नापं विकासप्रेमी नागरिकतय्सं नेपाःया स्वतन्त्रता, सार्वभौमिकता, भौगोलिक अखण्डता, राष्ट्रिय एकता, स्वाधीनता व स्वाभिमान दयेकातयेत ब्यूगु योगदानयात च्वछानादिल।

संविधानं मधेस प्रदेशयात स्वायत्तता प्रदान याःगु व थ्व स्वायत्तताया पाय्छिकथं छ्यलेगु सकसिगुं दायित्व जूगु धयादिसें प्रधानमन्त्रीं सङ्घ, प्रदेश व स्थानीय तहदथुइया समन्वय, नीति निर्माण व विकासया ज्यायात प्रभावकारी जुइकेत प्रदेश सरकारया विशेष भूमिका जुइ धकाः धयादिल। प्रधानमन्त्री ओलीं मधेस प्रदेश सम्भावनां जाःगु उर्वर भूमि, कृषिया निंतिं पाय्छिगु चुरेक्षेत्र जडीबुटी, जङ्गलनिसें लःया तःधंगु स्रोत दूगुलिं थनया विकासयात सकसिगु नं ग्वाहालिं न्ह्याकेमाःगुलिइ बः बियादिल। वय्कलं सुनकोशी मरिन डाइभर्सन आयोजनां मधेसय् सिँचाइ जुयाः राष्ट्रिय उत्पादन व उत्पादकत्व वृद्धि यायेगु व थुकिं पहाड व तराई दथुइया एकताभाव सृजना याइ धकाः धयादिल।

प्रधानमन्त्री ओलीं औद्योगिक ख्यः, पेट्रोलियम पाइपलाइन, रेलमार्ग, हुलाकी सतक, दू्रतमार्ग, रामराजाप्रसाद सिंह अस्पताल मधेसया विकास व समृद्धिया आधार जूगुलिं एकीकृत जाँच चौकी नापं प्रमुख भन्सार नाका वीरगञ्जयात आर्थिक केन्द्र नापं प्राचीन शहर जनकपुरधामयात सांस्कृतिक पर्यटनया आधार कथं विकास यायेफइ धकाः धयादिल।

वय्कलं राजर्षि जनक, मां सीता, महर्षि परशुराम, महाकवि विद्यापति थेंजाःपिं विभूति व विद्वान नापं छिन्नमस्ता, गढीमाईलिसें द्यःतय्गु भूमि मधेस प्रदेशय् उगु पुर्खाया ज्ञान व गौरवयात लुमंकाः आः विकासया लँपुइ न्ह्यावनेमाःगुलिइ बः बियादिल।