गृहमन्त्री ओमप्रकाश अर्याललिसे नेपाःया निंतिं अमेरिकाया राजदूत डिन आर थम्प्सनं नापलानादीगु दु। सिंहदरबारया मन्त्रालयय् थौं नाप लायेगु झ्वलय् वय्कःपिं दथुइ निगूपक्षीय सम्बन्धया विषयय् सहलह जूगु मन्त्रालयं धाःगु खः।

उगु झ्वलय् मन्त्री अर्यालं लिपांगु इलय् मुलुकया अवस्थाय् न्हियां न्हिथं सुधार जुया वयाच्वंगु न्ह्यथनादिल। थुकिया निंतिं दक्व पक्षलिसे सहकार्य जूगु नापं सर्वसाधारण व सुरक्षा संयन्त्र दथुइ विश्वासया वातावरण दयाच्वंगु वय्कःया धापू खः।राजदूत थम्प्सनं लिपांगु इलय् मुलुकय् ब्वलंगु परिस्थिति लिपा शान्ति कायम यायेत व सुरक्षा व्यवस्थापनया निंतिं गृहमन्त्रालय, नेपाल प्रहरी, सशस्त्र प्रहरीं म्हितूगु भूमिकायात च्वछानादिल।

राजदूत थम्प्सनं लिपांगु इलय् एमसिसी परियोजनाया विरुद्धय् जुयाच्वंगु बयानबाजी व एमसिए नेपालं छुंछुं थासय् मछिनाच्वंगु विषयय् च्यूताः प्वंकादिल । उगु सम्बन्धय् मन्त्री अर्यालं आःया सरकार न्हापाया सरकार, संसदं याःगु प्रतिबद्धता पूवंकेत तयार दूगु धयादिल।

उगु झ्वलय् राजदूत थम्पसनं नेपालय् दुपिं शरणार्थी सम्बन्धी च्यूताः तयादीगु व मन्त्री अर्यालं नेपालं फुक्क कथंया मानवअधिकारयात हनेगु धयादिल। लिसें गृहमन्त्रालयं निर्वाचन आयोगलिसे सुरक्षाया विषयय् परामर्श यानाच्वंगु मन्त्री अर्यालया धापू खः।

लुँ तोलां न्ह्यय्सः कुहावःगु दु। लुँ तोलां न्ह्यय्सः कुहावया २ लाख ३६ हजार ३ सय तका कारोबार जुयाच्वंगु दु धका नेपाल सुनचाँदी व्यवसायी महासंघं धाःगु दु।

अथेहे, वहः तोलां थौ वहः पीन्यातका थहावःगु दु। वहः तोलां पीन्यातका थहावना २ हजार ९ सय ६५ तका थ्यःगु दु।

सर्वाेच्च अदालतय् प्रतिनिधिसभा विघटनविरुद्ध लाःगु रिट निवेदनया सुनुवाइ यायेत संवैधानिक इजलास नीस्वंगु दु।प्रधानन्यायाधीश प्रकाशमानसिंह राउत, न्यायाधीशपिं सपना प्रधान मल्ल, कुमार रेग्मी, हरिप्रसाद फुँयाल व डा मनोजकुमार शर्माया संवैधानिक इजलास नीस्वंगु सर्वाेच्च अदालतया प्रवक्ता अर्जुनप्रसाद कोइरालां धयादिल।

आःया अन्तरिम सरकारया सिफारिसय् राष्ट्रपति रामचन्द्र पौडेलं वंगु भदौ २७ गते प्रतिनिधिसभा विघटन यानादीगु खः। थ्वहे सन्दर्भय् अन्तरिम सरकारया प्रधानमन्त्रीया नियुक्तिलिसें संसद् विघटन बदर नापं संसद् पुनः स्थापाना सम्बन्धी परमादेशया माग यासें सर्वाेच्च अदालतय् झिंछगू रिट निवेदन दायर जूगुलिं थनिनिसें प्रारम्भिक सुनुवाइ जुइत्यंगु दु। वंगु भदौ २४ गते सर्वाेच्च अदालतया मुख्य भवनय् मिं च्याःगुलिं कार्यसम्पादन प्रभावित जूगु अवस्थाय् थनिनिसें एनेक्स भवनया संवैधानिक इजलासय् उगु रिट निवेदनय् सुनुवाइ जुइगु अदालत प्रशासनं धाःदु।

जेनजी आन्दोलनया झ्वलय् वंगु भदौ २४ गते अदालतय् मिं तयाबी धुंकाः, तोडफोड व लुटपाटपाखें क्षति जूगु बन्दी प्रत्यक्षीकरणया निवेदन लिसें मदयेकं मगाःगु निवेदन दर्ता व सुनुवाइ बाहेकं मेगु फुक्क ज्या दिनाच्वंगु खः। वंगु असोज २८ गतेनिसें रिट निवेदन दर्ता व सुनुवाइ चाले धुंकाः प्रतिनिधिसभा विघटनविरुद्ध रिट निवेदन लाःगु खः। अधिवक्ता डा प्रेमराज सिलवाल, युवराज पौडेल, अधिवक्ता कीर्तिनाथ शर्मा पौडेल, आयुष बडाल, मकबुल मियाँ, अधिवक्ता खडकबहादुर शाह, डम्बरप्रसाद शिवाकोटी, अधिवक्ता दलबहादुर धामी, प्रकाश भुजेल व विपिन ढकालपिन्स बहस याइगु जुगु दु।

थ्वसिबें न्ह्यः प्रधानन्यायाधीश प्रकाशमानसिंह राउतलिसें सकल न्यायाधीशया पूर्ण बैठक (पूmलकोर्ट)नं वंगु असोज २८ गते रिट निवेदन दर्ता लिसें सुनुवाइ यायेगु निर्णय याःगु खः। जेनजी आन्दोलनया झ्वलय् जूगु तोडफोड व मिं च्यानाः क्षतिग्रस्त जूगु सर्वाेच्च अदालतया ‘डिजिटल’ प्रणाली ‘रिकभर’ जूगु दु। थ्व प्रणाली रिकभर जूगुलिसें विचाराधीन नापं पैmसला जुइधुंकूगु मुद्दाया तथ्याङ्कत सुरक्षित दूगु खनेदूगु प्रवक्ता कोइरालां धयादिल। सर्वाेच्च अदालतय् आः न्यागू इजलासजक सञ्चालन यानाः सुनुवाइ जुयाच्वंगु दु।

प्रधानमन्त्री सुशीला कार्कीया आह्वानय् सरकार, राजनीतिक दल व जेनजी समूह दथुइ निर्वाचनया वातावरण निर्माणलिसेंया विषय त्रिपक्षीय सहलह जुइत्यंगु दु।प्रधानमन्त्री निवासय् थौं सनिलया ४ ताः इलय् जुइगु सहलहय् विघटित प्रतिनिधिसभाय् प्रतिनिधित्व याःगु प्रमुखलिसें दलया प्रतिनिधि, सरकारया मन्त्रीपिं व जेनजी समूहया न्ह्यलुवा लिसें प्रतिनिधितय्सं ब्वति काइगु धाःगु दु।

सञ्चार लिसें सुचं प्रविधिमन्त्री लिसें सरकारया प्रवक्ता जगदीश खरेलं निर्वाचन सुथांलाकेत चरणबद्ध वार्ता व सहलह न्ह्यानाच्वंगु सन्दर्भय् थौं त्रिपक्षीय बैठक आह्वान यानागु धकाः धाःगु दु।

आः वइगु फागुन २१ गतेया निंतिं क्वःछिनातःगु निर्वाचनया मुक्कं वातावरण निर्माणया झ्वलय् सरकारं राजनीतिक दल, निर्वाचन आयोग, सुरक्षा निकाय व सम्बद्ध पक्षलिसें औपचारिक व अनौपचारिक वार्ता व स न्ह्याकाः वयाच्वंगु दु।

बागमती प्रदेश सरकारं मन्त्रालयया ल्याः क्वपालेगु तयारी याःगु दु। खर्च म्हो यायेगु व आर्थिक मितव्ययी जुइगु निर्णय याःगु प्रदेश सरकारं आः दूगु प्रदेश मन्त्रालयया ल्याः १४ गूलिं न्हय्गू यायेगु तयारी न्ह्याकूगु दु।

प्रमुख प्रतिपक्ष दल नेपाल कम्युनिष्ट पार्टी (माओवादी केन्द्रं) प्रदेश सरकारयात मन्त्रालयया ल्या क्वपालेत माग यानाः छुं दिं न्ह्यः ज्ञापन पौ लःल्हाःगु खः। प्रमुख प्रतिपक्षी दलया ज्ञापन लिपा छुं दिं न्ह्यः च्वंगु सत्तारुढ दल नेपाली कांग्रेस व नेपाल कम्युनिष्ट पार्टी (एमाले) संसदीय दलया मंकाः बैठकं प्रदेश सरकारया मन्त्रालय क्वपालेगु विषयय् सहमति जुइ धुंकाः सरकार मन्त्रालयया ल्या म्हो यायेगु गृहकार्यय् न्ह्यच्यूगु खः।

“सत्तारुढ दलया मंकाः बैठकय् मन्त्रालयया ल्याः क्वपालेगु सैद्धान्तिक सहमति जुइधुंकाः सरकारं छगू समिति हे दयेकाः थ्व विषयय् अध्ययन न्ह्याके धुंकूगु दु”, मुख्यमन्त्री इन्द्रबहादुर बानियाँं धयादिल, “मन्त्रालयया ल्या गुलि यायेगु? छु छु मन्त्रालय तयेगु ? छु छु मन्त्रालययात समायोजन यायेगु, कर्मचारी व्यवस्थापन गथे यानाः यायेगु लिसेंया विषयय् समितिं अध्ययन यानाच्वंगु दु ।” प्रदेश सरकारया मन्त्रालयत क्वपालेगु विषयय् दलत सहमत दूगुलिं मन्त्रालयया ल्याः क्वपालेगु विषयय् ठोस निर्णयय् वनेगु निंतिं जिमिसं प्रक्रिया न्ह्याकेधुंकूगु मुख्यमन्त्री बानियाया धापू दु।

खर्च म्हो यायेगु व सुशासन प्रदेश सरकारया प्रमुख प्राथमिकताय् लानाच्वंगुलिं मन्त्रालय व संरचनाया विषयय् दलपिंनाप सहलह यानाः मंकाः बिचाः निर्माण यानाः थुकियात तार्किक निष्कर्षय् थ्यंकेगु मुख्यमन्त्री बानियाँं धयादिल। “आःया परिस्थिति हिलावंगु दु, जिपिं मन्त्रालयया ल्याः क्वपालेगु धकाः जक मखु, गथे यानाः व्यवस्थापन यायेगु धयागुलिइ नापं केन्द्रित जुयाच्वनाःगु दु”, मुख्यमन्त्री बानियाँं धयादिल, “न्हापांगु चरणय् दलीय सहमति यायेगु व उकिया लिपा विज्ञपिनिगु छ्याताः कथं मन्त्रालयया ल्याः क्वपालेगु व व्यवस्थापन यायेगु लिच्वःकय् थ्यंकेगु जुइ”, मन्त्रालयया ल्याः क्वपालेगु विषय विशुद्ध प्रशासनिक सुधार व वित्तीय अनुशासन नाप स्वाःगु विषय जूगुलिं दलीय सहमतिइ हे लिच्वः थ्यंकेगु मुख्यमन्त्री बानियाँं धयादिल।