भरतपुर महानगरपालिकाया मेयर पदय् रेनु दाहालं राजीनामा बिया हाकन उम्मेदवार जुइ न्ह्यः महानगरपाखे थीथी मनूतयेत लाखौं रुपैयाँ वितरण याउगु दु।

चैत १८ गते नगर कार्यपालिकाया ६४ क्वःगु दकलय् लिपागु बैठकं निर्माण सम्पन्न मजुगु आयोजना, थः निकटया नेता कार्यकर्ता लगायतपिन्त लाखौं रकम इउगु दु।

महानगरया नगर कार्यपालिकाया लिपागु बैठकय् माइन्यूट हे याना उपचार खर्चया नामय् थीथी मनूतयेत ६ लाख ५५ हजार रुपैयाँ बिइगु निर्णय याउगु खः।

उगु रकम कम्ति न १० हजारनिसे १ लाख रुपैयाँ तक इउगु खः। २१ म्हेसित वितरण याउगु रकम विवरणय् ५० हजार स्वया अप्पो उपचार खर्च बिउगु खः।

बैठकया निर्णय नम्बर १८ य् उल्लेख जुगु रकम वितरणय् वडास्तरीय वार्षिक बजेटपाखे विनियोजन जुगु विपन्न परिवारयात ग्वाहालि शीर्षकं वडापाखे हे सिफारिस जुगु कथं इनागु धका उल्लेख याउगु खः।

 येँ महानगरपालिका नेकपा (एमाले) पाखे उम्मेदवार चुनावी एजेण्डानाप मतदातापिनिगु छेँ छेँ वनेगु सुरु जुगु दु।

चुनावी घोषणापत्र नाप उम्मेदवारपिनिगु छेँ खना मतदातापि उत्साहित जुगु दु। गुलि मतदातापिन्स उम्मेदवारपि त्याये धुका न छेँ वया जनतापि दथुइ सुझाव बिउगु दु। मेयर–उपमेयरया उम्मेदवार वडाध्यक्ष व सदस्यपि थौं वडा–४ या धुम्वाराहीइ छेँ छेँ वःगु खः।

मेयरया उम्मेदवारया केशव स्थापित मतदाताया छेँ पूर्व कायममुकायम प्रधानन्यायशीध दीपकराज जोशीया निवासय् थ्यकूगु दु। जोशी धयादीगु दु, ‘केशव जिमि पुलाम्ह पासा खः। भोत कायेगु निति जिगु छेँ न थ्यकूलि जि तसकं लय्ता,’ वयकलं धयादीगु दु, ‘केशव विकासप्रेमी नेता खः । येँ थप समृद्ध दयकेत केशवयात जिगु भिंतुना दु।’

जोशीं उपमेयर पदया उम्मेदवार सुनिता डंगोलयात क्यना दयादीगु दु– ‘एमाले न अनुभवी व युवापुस्ताया मिले याना टिम दयकूगु दु। जिकय् अनुभव दु, सुनितानाप युवा पुस्ताया ग्वाहालि, येँ थप व्यवस्थित व आहा ! धाकेगु कथं थ्व बाहेक मेगु टिम दु ला? धका न्ह्यसः तयादीगु खः।

जनतानाप प्रत्यक्ष स्वागू पार्टी जुगुलि एमाले येँ महानगर कमिटीं न्हिन्हि सुथय् बहनि घर–दैलो ज्याझ्वः यानाच्वनागु धका महानगर कमिटीया अध्यक्ष निर्मल देउलां लहनान्युजयात बियादीगु दु।

नेकपा एमालेया अध्यक्ष केपी शर्मा ओलीं एमाले न स्वंगु तहया सरकारय् पुनस्र्थापित जुइ धका धयादीगु दु।

आसन्न स्थानीय तह निर्वाचन व निकट भविष्यय् वइगु संसदीय निर्वाचनपाखे एमाले सरकारय् पुनस्र्थापित जुइगु व  राष्ट्र अभिभारा पूरा यायेगु धका धयादीगु दु।

अन्तर्राष्ट्रिय मजदुर दिवसया लसताय् भिंतुना सन्देश बिइगु झ्वलय् ओलीं अथे धयादीगु खः। संवैधानिक संस्थायात असंवैधानिक रुपं दुरुपयोग याना नेकपा एमालेयात सरकारपाखे हटे याउगु दाबी यानादीसे ओलीं धयादीगु दु, ‘थुकिइ सम्मानित, सुरक्षित श्रम जीवन, स्वस्थ नागरिक, सीपयुक्त नागरिक, मर्यादित ज्या व सामाजिक सुरक्षापाखे केन्द्रित जिमिगु पलाखय् अवरोधयात।’

‘वइगु स्थानीय तहया व निकट भविष्यय् जुइगु संसदीय निर्वाचनपाखे जनताया बालागु समर्थन सहित नेकपा (एमाले)यात स्वंगु हे तहया सरकारय् पुनस्र्थापना यासे जिमिगु राष्ट्रया थुगु अभिभारायात पूरा याइ,’ ओलीं धयादीगु दु।

थुगु दँया युगकवि सिद्धिचरण श्रेष्ठ सिरपा हास्यव्यंग्यय् ख्यलय् क्रियाशील संस्था सिस्नुपानी नेपालयात लल्हाइगु जुगु दु।

म्हिगः शनिबाः च्वंगु युगकवि सिद्धिचरण प्रतिष्ठानया बैठकय् उगु निर्णय याउगु खः। प्रतिष्ठानया अध्यक्ष कवि वैरागी काइलाया अध्यक्षताय् च्वंगु बैठकय् वंगु स्दँया सिद्धिचरण पत्रकारिता पुरस्कार न घोषणा याउगु दु।

प्रतिष्ठनका सदस्य डा. फणिन्द्र निरौलाया कथं ओखलढुंगाया पत्रकार गजुरधन राई, भोजपुरया पारस नेपाल व येँपाखे लहना मिडियायात सिद्धिचरण पत्रकारिता पुरस्कार घोषणा याउगु दु।

युगकवि सिद्धिचरण श्रेष्ठया सम्पादन व प्रकाशनय् निजी ख्यःपाखे न्हापागु न्हिपौं पत्रिका ‘आवाज’ प्रकाशन जुगु खः। नेपाली पत्रकारिता ख्यलय् श्रेष्ठया योगदान दुगु कारण हरेक दँय् प्रतिष्ठानं युगकविया नामय् पत्रकारिता पुरस्कार लल्हाना वयाच्वंगु खः।

२००७ फाल्गुण ८ गते निजी ख्यःपाखे प्रकाशित नेपाःया दैनिक पत्रिका ‘आवाज’ प्रकाशित जुगु खः। युगकवि सिद्धिचरण पत्रकारिता पुरस्कार दँय् लल्हाना वयाच्वनागु खँ धका कविया काय् रविचरण श्रेष्ठं जानकारी बियादीगु दु।

श्रेष्ठया कथं पुरस्कारया ल्यःज्या डा. मोहन लोहनीया संयोजकत्वय् कवि शैलेन्द्र साकार सदस्य दुगु समितिं यानादीगु खः धका धयादीगु दु।

स्थानीय तहया चुनावय् थःपिं त्याना वनीगु अवस्थाय् नेवाःतय्गु मंकाःगु अडान पौ कथं ज्या यायेत तयार दु धकाः किपुलिइ क्रियाशिल जुयाच्वंगु प्रमुख पार्टीया नेतानिसें उम्मेदवारपिन्सं प्रतिबद्धता प्वंकादीगु दु।

एमालेया किपू नगर समितिया अध्यक्ष राधाकृष्ण बस्नेत, एमालेपाखें मेयर उम्मेदवार जुयादीम्ह केशरत्न बज्राचार्य, उपमेयरया उम्मेदवार जुयादीम्ह विन्दु महर्जन, नेपाली कांग्रेस किपू नगर समितिया उपसभापति रजिता महर्जन गौतम, कांग्रेसया चुनाव चिं कया उपमेयरय् उम्मेदवार जुयादीम्ह जसपाया नेतृ सुनिता महर्जन शाक्य, माओवादी केन्द्रपाखें मेयर उम्मेदवार जुयादीम्ह प्रा. डा. शिवशरण महर्जन लगायतपिन्सं नेवाः मंकाः पौयात कया उगु कथं प्रतिबद्धता प्वंकादीगु खः।

थःपिं चुनावयु त्याइगु अवस्थाय् नेवाः मंकाः अडान पौयात कार्यान्वयन यायेगु नितिं एकीकृत समाजवादीया उम्मेदवार नापं नेतापिं, नेपाल मजदुर किसान पार्टीया उम्मेदवार नाप. नेतापिन्सं नं प्रतिबद्धता प्वंकादीगु खः।

शुक्रवाः नेवाः देय् दबू किपू नगर समितिं सांस्कृतिक बाजा गाजा सहित जुलुस पिकया किपुलिइ क्रियाशिल जुयाच्वंगु थीथी राजनीतिक पार्टीया ज्याकुथिइ हे वना नेवाः मंकाः अडान पौ लःल्हाःगु इलय् राजनीतिक दलया नेता नापं उम्मेदवारपिन्सं उगु कथंया प्रतिबद्धता प्वंकादीगु खः।

देय् दबू स्वनिगः विशेष प्रदेशं तयार याःगु झिंच्यागू बुँदा नापं किपूया सन्दर्भयात कया थप स्वंगू बुँदा दुथ्याका मुक्कं नीछगू बुँया अडान पौ देय् दबू किपू नगर समितिया अध्यक्ष बुद्धिलाल ज्यापु, देय् दबू येँ जिल्लाया नायो धनबहादुर महर्जन व देय् दबू स्वनिगः विशेष प्रदेशया अध्यक्ष श्रीकृष्ण महर्जनं मंकाः कथं लःल्हनादीगु खः।

उगु कथंया अडान पौ लःल्हायेगु ज्या निरन्तर रुपं थाय् थासय् जुइ धकाः स्वनिगः विशेष प्रदेशया अध्यक्ष महर्जनं धयादीगु दु । किपुलिइ लःल्हाःगु अडान पतिइ किपूया सन्दर्भय् दुथ्याकूगु स्वंगू बुँदा थुगु कथं दुः

क) त्रिभुवन विश्व विद्यालय व किपूया समुदायया दथुइ २०७२ सालं जूगु सम्झौता याकनं कार्यान्वयन यायेमाः।

नापं किपू नगरपालिकाया नियम कथं नक्सा पास मयासे कानुनयात हाचांगाया त्रिविपाखें भवनत दयेकेगु ज्या यानाच्वंगुुलिं कानुनया दायराय् हयेमाः ।

ख) किपू नगर दुनेया सार्वजनिक जग्गात भागाधिकार थीथी संघ संस्थापाखें यानाच्वंगु दु । अज्वःगु संस्थापाखें सामाजिक दायित्व व किपूवासीपिन्त लाभ बिइगु कथं ज्या यानाच्वंगु खने मदु । उकिं अज्वःगु संस्थायात आम्दानीया हिस्सा सामाजिक दायित्व कथं किपू नगरवासीया नितिं ज्या याकेमाः ।

ग) किपू नगरपालिका वडा नं. १ लागा लाय्कूया गुरु योजना दयेकेमाः । नापं तलेजु द्यःछेँ नापं देगः नेवाः वास्तुकला कथं पुनःस्थापित यायेमाः ।