लुँ तोलां थौं च्यासः थहावंगु दु। लुँ तोलां थौं च्यासः थहावनां ९६ हजार १०० रुपैयाँ न कारोबार जुगु दु धका नेपाल सुनचाँदी व्यावसायी महासंघं धाउगु दु।

अथेहे वहः धाःसा थौं स्थिर जुगु दु। वहः तोलां थौं १ हजार २१० रुपैयाँ हे कारोबार जुगु दु धका महासंघं धाउगु दु।

नेपालगन्जं येँया लागि ब्बःगु श्री एयरया जहाज करिब १५ मिनेटय् हे आपतकालीन अवतरण याउगु दु।

ब्बःगु १५ मिनेटय् हे आपतकालीन अवतरण याउगु खः। ९ बजे जुया १५ मिनेटय् ब्बयेमाःगु जहाज ९ः४५ य् ब्बःगु खः। जहाजय् कुँ खनेदयेवं आपतकालीन अवतरण याउगु खः।

श्री एयरया प्रवक्ता अनिल मानन्धरं जहाजय् प्राविधिक समस्या खनेदुगुलि अवतरण यायेमाःगु खँ धका धाउगु दु। वयकलं आः चेकजाँच जुयाच्वंगु दु धका धयादीगु खः।

गुंपुन्हि व सापारु नखः गुकथं हनेगु बिषया सहलह ज्याझ्वः जुग दु। थुगुसी पारु तिथि तुत जुयाच्वंगु कारणं निन्हु अलग अलग हे हनेमाःगु नखः गुकथं हनेगु धइगु खँय् विवाद पिहां वःगु खः।

थ्वहे झ्वलय् नेपाल परम्परागत बौद्ध धर्म संघया प्रा.डा. नरेशमान वज्राचार्यं साउन २७ गते शुक्रवाः कुन्हु गुंपुन्हि हनाः वयां कन्हय् कुन्हु २८ गते शनिवाः सापारु हनेमाःगु निष्कर्ष न्यंकादीगु दु । पञ्चाङया पात्रोय् २७ गते पुन्हि व पारु निगुलिं तिथि लाःगु जुयाः गुंपुन्हि व सापारु वकन्हु हे छन्हुं हनेमाः धकाः च्वयातःगु दु ।

तर प्रा.डा. वज्राचार्यं उकथं नखः हनेगु व्यवहारिक मजूगु कारणं दुतिया हे तिथि लाःगु खःसां सापारु २८ गते शनिवाः हे हनेमाः धयादीगु दु । नेपाल परम्परागत बौद्ध धर्म संघ, वज्राचार्य अध्ययन मण्डल व नेवाः देय् दबू येँ महानगर समितिया मंकाः ग्वसालय् उगु सहलह ज्याझ्वः जूगु खः ।

येँय् जनबहालं नं उकथं हे निन्हुयंकं गुंपुन्हि व सापारु हनेगु धकाः निर्णय याये धुकुगु दु ।

थौं न्हिनय् मन्त्रिपरिषदया बैठक च्वनिइगु जुग दु। बैठक न्हिनय् १ बजे सिंहदरबारय् च्वने त्यःगु दु।

थौंया बैठकं प्रतिनिधि सभा व प्रदेश सभा निर्वाचनया मितिबारे निर्णय याइगु सम्भावना दु। सरकारया प्रवक्ता ज्ञानेन्द्रबहादुर कार्की न थौंया मन्त्रिपरिषद बैठकं निर्वाचनया मितिबारे निर्णय जुइ धका धयादीगु दु।

सरकारं वइगु मंसिर ४ गते प्रतिनिधिसभा व प्रदेश सभा निर्वाचन यायेगु तयारीइ दु। चुनाव मंसिर ४ य् निर्वाचन यायेगु बारे बुधबाः सत्ता गठबन्धनया बैठकय् सहमति जुगु खः।

निर्वाचन आयोगं धासा सरकारयात मंसिर २ गते चुनाव यायेगु सुझाव बिउगु खः।

मकवानपुरय् डेङ्गुया बिरामीपि अप्पोगु दु। कोरोना संक्रमणया बिरामीपि अप्पोगु दु धका जिल्ला स्वास्थ्य कार्यालय मकवानपुरं धाउगु दु।

साउनया १५ दिं जक २८ म्ह डेङ्गु ल्वय्या संक्रमणपि जुगु दु धका कार्यालयया सूचना अधिकारी लक्ष्मण घिमिरे न धाउगु दु। हेटौँडा उपमहानगरपालिका–४ व ५ य् उगु ल्वयया बिरामी खने दुगु धका धाउगु दु।

मकवानपुरया १० स्थानीय तहमध्ये हेटौँडा उपमहानगरपालिकाय् यक्को बिरामी दु धका धाउगु दु।