निर्वाचन आयोगं पालिका चुनावया लागि उम्मेदवारी बिउगु दल नाप स्वतन्त्र कथं मनू तयेगु निति थौं चुनाव चिं लल्हाइगु जुगु दु।

चुनावी कार्यतालिका कथं आयोगं हे चुनाव चिं लल्हाइगु जुगु दु।

आयोगं पालिका चुनावया लागि दर्ता जुगु दलपिन्स उमिगु थःगु हे चिं दइसा स्वतन्त्र उम्मेदवारया लागि आयोगं चिं लल्हाइगु जुगु दु।

कांग्रेसया शीर्ष नेतापिनिगु इनाप व चेतावनीया बाबजुद भरतपुर महानगरपालिका मेयरया स्वतन्त्र उम्मेदवार जगन्नाथ पौडेलं थःगु मनोनयन लितकाउगु मदु।

थौं शुक्रवाः बहनि ५ बजे तक उम्मेदवारी लितकायेगु लिपागु दिं न पौंडेलं उम्मेदवारी लितकाउगु मदु। उम्मेदवारी लितकायेगु ई क्वचाय्वं हे कोण सभाय् सम्बोधन यासे थःम्हेसिया उम्मेदवारी लित मकायउगु धका धाउगु खः।

पौडेलयात ह्यकेगु निति गृहमन्त्री बालकृष्ण खाण व राज्यमन्त्री उमेश श्रेष्ठ चितवन वःगु खः। वयकः राष्ट्रिय सभाया सदस्य जुइ धुकुम्ह खः। ७० दँ दुम्ह पौडेल वरिष्ठ अधिवक्ता न खः।

नेपाल कम्युनिष्ट पार्टी (एमाले) यल महानगरपालिका मेयर, उपमेयर, वडाध्यक्ष व वडासदस्य पदया उम्मेदवारपिन्स थौं निसे घरदैलो अभियान शुरु याउगु दु।

महानगरयात लालकिल्ला दयकेगु योजना ज्वना उम्मेदवारपि चुनावी घरदैलो शुरु याउगु खः। थौं यलया वडा नं ७ व ८ च्यासलं अभियान शुरु याउगु मेयर पदया उम्मेदवार हरीकृष्ण व्यञ्जनकारं धाउगु दु।

वयकलं धयादीगु दु– “थुगु पटक महानगरपालिकाय् एमाले न विजय हासिल याइगु निश्चित जुइ धुकुगु दु। जिमिगु पार्टीया नेतापि विजय जुइ धुका थुगु थाय्या ख्वा हे हिलेगु जुइ। नकतिनि हे देशय् न्यूनिकरण जुया वनाच्वंगु कोरोना महामारीं याना जनताया हितय् तक थीथी ज्या यायेगु योजना एमाले के दु।”

कला व संस्कृतिं जाःगु  थुगु महानगरपालिकाय् थीथी सम्भावना मालां जनतायात रोजगारी प्रदान यायेगु लक्ष्य थःपिके दु धका धयादीगु खः।

नेकपा माओवादी केन्द्रया येँ महानगरपालिका वडा–१३ या वडाध्यक्ष उम्मेदवार रामशरण डंगोल नेकपा (एमाले) प्रवेश याउगु दु।

नेकपा (एमाले)पाखे येँ महानगरपालिकाया मेयर उम्मेदवार केशव स्थापितं सिन्ह टिका एमाले प्रवेश याकूगु खः। पार्टी प्रवेशनाप छगु विज्ञप्ति जारी यासे नेकपा माओवादीं गठबन्धनया नामय् उम्मेदवार ल्ययेगु निति नातावाद, कृपावादयात जक प्राथमिकता बिउगुलि असन्तुष्टि प्वकूगु खः।

‘जि २०४३ सालनिसे निरन्तर वामपन्थी आन्दोलनय् सक्रिय जुया वयाच्वनाम्ह व  वामपन्थी आन्दोलनया माध्ययमपाखे जक देय् समृद्ध याये फइ धइगु जिगु भलसा याइम्ह जि खः,’ वयकलं जारी याउगु विज्ञप्तिइ धाउगु दु,’ ‘जिगु जीवनया महत्वपूर्ण व उर्जाशील ई जि वामपन्थी आन्दोलनय् हे सक्रिय जुया च्वनागु खँ लुमसे वःगु दु।’

वयकलं जारी याउगु विज्ञप्तिइ ०६२–०६३ निसे तत्कालिन नेकपा माओवादी केन्द्रय् सक्रिय जुयाच्वना जि माओवादी केन्द्रय् जिल्ला कमिटी सदस्य व येँ महानगर कमिटीइ महत्वपूर्ण जिम्मेवारी कःघाना च्वनागु खः।

नेकपा माओवादी केन्द्रं येँया चन्द्रागिरि नगरपालिकाया मेयर व उपमेयर निम्हेसिया थःपिनिगु पदपाखे उम्मेदवारी फिर्ता काउगु दु।

मेयर उम्मेदवार दिलबहादुर श्रेष्ठ व उपमेयर उम्मेदवार रुपा महर्जनं उम्मेदवारी लितकाउगु दु। सत्ता गठबन्धनया केन्द्रपाखे वःगु निर्देशन कथं थःपिन्स उम्मेदवारी लितकयागु धका महर्जनं धाउगु दु।

चन्द्रागिरिइ नेपाली कांग्रेसपाखे मेयर पदय् घनश्याम गिरी व उपमेयर पदय् राष्ट्रिय जनमोर्चाया रोशन दानी उम्मेदवार बिउगु खः।