सत्ता गठबन्धनया बैठकं महानगरपालिका व उपमहानगरपालिकाया प्रमुख व उपप्रमुख पदय् बागी उम्मेदवारी तत्काल लित कायेगु निर्णय याउगु दु।

थौं प्रधानमन्त्री निवास बालुवाटारय् च्वंगु गठबन्धनया शीर्ष नेतापिनिगु बैठकं उगु निर्णय याउगु दु।

केन्द्रय जुगु सहमति विपरीत गठबन्धन दलपाखे दर्ता जूपिन्स उम्मेदवारी लित मकासा सम्बन्धित दलं कारबाही यायेगु निर्णय न बैठकं याउगु दु।

नाप न्यागु दलीय गठबन्धन स्वयापिने मेमेगु दलनाप तालमेल तत्काल खारेज यायेगु निर्णय न बैठकं याउगु दु।

जल तथा मौसम विज्ञान विभागं देयन्यक पहाडी क्षेत्रय् नँ न्याना वा वइ धका धाउगु दु।

विभागं वइगु स्वन्हुनिसे मौसमया पूर्वानुमान यासे आइतबाः चान्ह्य तक देय् थीथी भचा वा वइ धका धाउगु दु।

प्रदेश १, मधेश, बागमती व गण्डकी प्रदेशया छु छु थासय् व बाँकी प्रदेशया पहाडी भूभागय् २४ घन्टा तक वर्षा जुइ धका विभागं धाउगु दु।

आः देय्या पहाडी भूभागय् स्थानीय वायु व पश्चिमी वायुया प्रभाव दुगुलि भचा सामान्य बदली जुगु धका विभागं स्पष्ट याउगु दु।

थौं शुक्रबाः लुँ तोलां १२ सय रुपैयाँ थहावंगु दु।

अथेह वहः धासा थौं न स्थिर जुगु दु धका नेपाल सुनचाँदी व्यवसायी महासंघं धाउगु दु।

थौं छापावाल लुँ तोलां ९९ हजार २ सय रुपैयाँ व तेजावी लुँ ९८ हजार ७ सय रुपैयाँ तोके याउगु दु।

सत्ता गठबन्धनया बैठक प्रधानमन्त्री निवास बालुवाटरय् सुरु जुगु दु। मंकाः उम्मेदवारविरुद्ध वःगु बागी उम्मेदवारबारे छलफल यायेत थौं न्यागु दलीय गठबन्धनया बैठक बालुवाटारय् सुरु जुगु दु।

बैठकय् गठबन्धनं बिउगु उम्मेदावरीविरुद्ध वःपि बागी उम्मेदवारीबारे छलफल जुयाच्वंगु दु धका छम्ह नेता धाउगु दु। उम्मेदवारी लित कायेगु थौं लिपागु दिं खः। गठबन्धनया उम्मेदवारविरुद्ध देयन्यक बागी उम्मेदवारी बिउगु दु।

गठबन्धनया १४ बैशाखय् च्वंगु बैठकं बागी उम्मेदवारी फिर्ता लित कायेकिगु व गठबन्धन दुनेया दलं एमालेनाप याउगु तालमेल खारेज जुइगु चेतावनी बिउगु खः।

चितवनया भरतपुर महानगरपालिकाया मेयर पदय् नेपाली कांग्रेसपाखे बागी उम्मेदवार बिउम्ह जगन्नाथ पौडेलयात नेतापिन्स ह्यकेगु कुतः जुयाच्वंगु दु।

थ्व हे झ्वलय् गृहमन्त्री बालकृष्ण खाँण व प्रधानमन्त्री नाप मन्त्रिपरिषद कार्यालयया राज्यमन्त्री उमेश श्रेष्ठं नेपाली कांग्रेस चितवनया नेतापि छलफल याउगु दु।

सेन्ट्रल पाम होटलय् मन्त्रीपि नाप कांग्रेस जिल्ला सभापति राजेश्वर खनाल व पूर्व जिल्ला सभापति कृष्णलाल सापकोटा दथुइ छलफल जुयाच्वंगु दु। सापकोटा वागी उम्मेदवार पौडेल प्रस्ताव खः।

थौं उम्मेदवारी लितकायेगु लिपागु दिं खः। अथे जुगुलि न्ह्याथे यानासा पौडेलयात ह्यकेगु व गठबन्धनपाखे रेनु दाहालयात मंकाः उम्मेदवार दयकेगुलि नेतापि लगे  जुगु दु। मन्त्री खाँण न थौं न कुतः यानाच्वंगु दु।

गृहमन्त्री खाँण व राज्यमन्त्री श्रेष्ठं बिहीबाः पौडेलया हे निवासय् वना उम्मेदवारी लितकायेगु निति इनाप याउगु खः। तर, पौडेलं आः लिहावने फइमखु धका लिसः बिउगु खः।