Display Style:
Column Style
‘ड्याड्, सन् एण्ड मम्’पाखें हना ज्याझ्वः
लहनान्युज | ञंलाथ्व एकादशी ११३७ (सेप्तेबर १ २०१७)
नेपालभाषाया टेलिसिरियल ‘ड्याड्, सन् एण्ड मम्’ सच्छिब्व पूवंगु लसताय् छगू हना ज्याझ्वः याःगु दु ।
मुभि एण्ड मोर प्रा.लि.या प्रमुख आर्यन नकःमिया सभाध्यक्षताय् जूगु उगु ज्याझ्वलय् मूपाहां लिसें ख्यालिजुजु मदनकृष्ण श्रेष्ठ, विशेष पाहां मल्ल के.सुन्दर, पाहांपिं कलाकार हिसिला महर्जन, जय श्रेष्ठ, सविन शाक्य, नेपाल टेलिभिजनया प्रबन्ध निर्देशक भाइकाजी महर्जन ‘नयन’, नेवाः देय् दबूया नायः नरेश ताम्रकारपाखें टेलिसिरियलया कलाकार, ग्वाहालिमि, च्वमि, प्राविधिक, विज्ञापनदातालिसें पत्रकारपिन्त हनेगु ज्या जूगु खः ।
अथेहे नेपाःया संकिपा ख्यलय् योगदान बिया वयाच्वनादीपिं कलाकारपिं आशिष्मा नकःमि, भिन्तुना जोशी, राजु महजर्न, अन्नपूर्णेश्वरी श्रेष्ठ, अर्णेश्वरी श्रेष्ठ शिल्पकार, श्यामसन्दर शिल्पकार व क्यामरापर्सन सोहन मानन्धरयात विशेष हनेज्या याःगु खः ।
धुँदेय् प्रोडक्सनया न्हापांगु संकिपा ‘बसन्त ऋतु’ भिंसाइत
लहनान्युज | ञंलाथ्व सप्तमी ११३७ (अगष्ट २८ २०१७)
धुँदेय् प्रोडक्सनया न्हापांगु संकिपा ‘बसन्त ऋतु’ थौं सोमवाः मूपाहाँ किपू नगरपालिकाया मेयर रमेश महर्जनं नँक्या तःछ्याना भिंसाइत यानादीगु खः।
काष्ठमण्डप टेलिभिजनया कार्यकारी र्निदेशक नविन जोर्शी क्लाप बियादीगु खःसा नेपालमण्डल टेलिभिजन कार्यक्रम प्रमुख जितेन्द्र महर्जन क्यामराया स्वीच अन याना भिं मुहूर्तया शट यानादीगु खः ।
उगु संकिपा ‘बसन्त ऋतु’ भिंसाइत ज्याझ्वलय् कलाकारपिं किशोर चिपाल, अनु महर्जन, राजेन्द्र महर्जन, शोभा महर्जन, सुरेश महर्जन व सोनिका हेकापिन्सं भिं मुहूर्त शटय् अभिनय यानादीगु खः ।
कीर्तिपुरया हिलसाइड होटलय् जुगु उगु भिंसाइत ज्याझ्वलय् विशेष पाहाँ कथं गोपालकाजी कायस्थ, किपू वडा ल्याः १० या वडाध्यक्ष अमन महर्जन, जय महर्जन श्रेष्ठ, नेवाः पत्रकार राष्ट्रिय दबूया नायः श्रीकृष्ण महर्जन व बरिष्ठ सिनेपत्रकार विजयरत्न असंबरे उपस्थित जुयादीगु खः ।
उगु संकिपाया निर्देशक व च्वमि पवन जोशींं ‘बसन्त ऋतु’ संकिपा केवल मनोरञ्जनया नितिं जक मखुसे सामाजिक रुपान्तरणया नितिं दसू कथं दयेकेगु धकाःं बियादीगु खः । राजेश शाक्यया क्यामेरा, गुज्ये मालाकारया संगीतलिसें रामभक्त महर्जन रमझम व चन्देश्वर महर्जनया म्ये रचना यानादीगु खः।
‘बसन्त ऋत’ या भिं मुहर्त १२ गते जुइगु
नृपेन्द्रलाल श्रेष्ठ | ञंलाथ्व पंचमी ११३७ (अगष्ट २६ २०१७)
धुं देय् प्रोडक्सनया न्हापांगु संकिपा ‘बसन्त ऋत’ या भिं मुहर्त थौं हे वइगु १२ गते सोमवाः (ञंलाथ्व सप्तमी) कुन्हु जुइगु दु । किपूया मेयर रमेश महर्जनया मूपाहाँ सुइ उगु ज्याझ्वः जुुइ दु ।
नां जाः म्ह र्निदेशक पवन जोशीया च्वसाय् व र्निदेशनय् दयेकेत्यगु उगु संकिपा समाजय् ब्बलनां च्वंगु बाखंया लिधंसाय् यथार्थ घटनायात कया दयेके त्यःगु खः । उगु संकिपालय् गुज्ये मालाकारया संगीत संयोजनयु जुगु खःसा राजेश शाक्यं छाँयाकन यानादी ।
उगु संकिपालय् कलाकारपि किशोर महर्जन, अनु महर्जन, राजेन्द्र महर्जन, शोभा महर्जन, सुरेश महर्जन, अंजली शाक्य, शुशिल महर्जन, रुक्साना महर्जन, लक्ष्मीकमल शाही, लक्ष्मीकुमार महर्जन, अगिना तुलाधर, रोजी श्रेष्ठ व श्याम शाही पिन्सं म्हितादीगु खः ।
पेजथ्री अवार्डया नामांकन सार्वजनिक जुइगु
लहनान्यूज | अनलाथ्व तृतीया ११३७ (अगष्ट २४ २०१७)
पेजथ्री पिपल्स च्वइस अवार्ड ११३७या नामांकन सार्वजनिक जुइगु जूगु दु ।
वइगु ञलाथ्व दशमी (भाद्र १६)कुन्हु येँया खुसिबुँस्थित नेपाः व्यांक्वेटय् छगू ज्याझ्वः यासें अवार्डया नामांकन सार्वजनिक यायेत्यंगु खः । व हे नामांकन ज्याझ्वलय् लाइफ टाइम एचिभमेन्ट अवार्डया नं घोषणा जुइगु अवार्ड ज्याझ्वः कजि दर्शनवीर शाक्यं धयादीगु दु ।
कजि शाक्यं पेजथ्री अवार्डया मू ज्याझ्वःया मिति नं नामांकनया दिनय् घोषणा यायेगु जानकारी बियादिल । थुगुसीया नामांकनय् छुं छुं प्राविधिक खँय् हिलाबुला यायेमाःगु वाध्यता लिसें अवसर नं वःगु वय्ंकलं धयादीगु दु ।
थुगुसी पेजथ्री अवार्डया स्वक्वःगु संस्करण जुइत्यंगु खः । थ्वयां न्ह्यः अवार्डया न्हापांगु संस्करण ने.सं. ११३०य् व ने.सं. ११३३य् निगूगु संस्करण जुइधुंकुगु दु ।
थुगुसीया स्वक्वःगु पेजथ्री अवार्डया घोषणा जेठ २७य् जूगु खःसा असार १० तक्क नां दुथ्याकूगु खः । नेवाः संकिपा, म्युजिक भिडियो व संगीत ख्यःयात दुथ्याकाः थुगु अवार्ड लः ल्हाइगु खः ।
मुक्कं कला ख्यः हे सरीताया ग्वाहालिइ
लहनान्यूज | गुंलागा द्वादशी ११३७ (अगष्ट १९ २०१७)
थःगु स्येँ दान बियाः अबुया जीवन रक्षा याःम्ह सरीता महर्जनया ग्वाहालिया नितिं नेपाः डान्स एकेदमिया ग्वसालय् सांगितिक ज्याझ्वः ‘होप’ येँय् जूगु दु ।
ज्याझ्वलय् नेपाःया नांजाःपिं कलाकारपिन्सं थःथःगु न्ह्यब्वया न्ह्यब्वःगु खः । ज्याझ्वलय् कमल के. क्षेत्री, तुनाबेल थापा, बि–एट ब्यान्डया लिसें नेपाल आइडल ज्याझ्वलं चर्चिम जूम्ह केन्जल मेहेर श्रेष्ठं थःथःगु सांगितिक न्ह्यब्वया न्ह्यब्वःगु खः ।
अबुया स्येँ प्रत्यारोपणलिसें थःगु नं वासः याकेगु लिसें जलास्येँ ल्वचं पिडित थः मांया डाइलोसिस याकेगु झ्वलय् आर्थिक समस्या फयाच्वंम्ह सरिताया ग्वाहालिया नितिं सकल कलाकारलिसें मुक्कं कला ख्यः हे छधी जूगु खः । ज्याझ्वलय् सकलसिनं सरिताया नितिं थःथःगु ख्यलं ग्वाहालि ब्यूगु खः ।
ज्याझ्वलय् थःगु न्ह्यब्वया न्ह्यब्वःपिं कलाकारपिन्सं नं पारिश्रमिक मकाःसे योगदान ब्यूगु खः । उकिया लिसें सामाजिक उद्देश्यं याःगु ज्याझ्वःया लागिं क्लब डेजाभुं थाय् व नेपाः म्यूजिकं ध्वनि उपकरण (साउन्ड सिष्टम) नं सितिकं बियाः ग्वाहालि याःगु ज्याझ्वः कजि रीना महर्जनं जानकारी बियादिल ।
ज्याझ्वःया टिकट मीगु लिसें विज्ञापन आदिं मुनीगु दक्वं धेबा सरीता महर्जनयात हे लःल्हायेगु ज्याझ्वः व्यवस्थापक गम्भीरमान सिंहं धयादिल । छुं विज्ञापनया लिसें टिकटया नं भचा भचा मुंके ल्यं दनिगु धेबा मुंकाःलि याकनं हे उगु धेबा सरितायात ब्यूवनेगु व्यवस्थापक महर्जनया धापू खः ।
समाजय् वइगु छुं नं कथंया समस्याय् कलाकारत छधी जुयाः न्ह्याःवंसा समाधानतक्क थ्यने फइगु हसना थुगु ज्याझ्वलं बीत स्वयागु नेपाः डान्स एकेदमिया नायः रोहिया महर्जनं धयादिल ।
