Display Style:
Column Style
कलाकार रबिन्द्र शाहीं थः गुरुपिन्त हनिगु
लहनान्युज | ञंलागा द्धादशी ११३७ (सेप्तेम्बर १७ २०१७)
कलाकार रबिन्द्र शाहीं थःगु कलायात्रा नीन्यादँ क्यंगु लसताय् छगु तःजिगु ज्याझ्वः याइगु जूगु दु । वि.सं.२०४९ सालय् “ध्येबाया शक्ति”नांयागु प्याखनय् मिसा मचा जुया म्हिता थःगु कलायात्रा न्ह्याकादीम्ह शाहीं थःगु उगु ज्याझ्वलय् थःत कलाया लँपुइ न्ह्यायेत हःपाः व ज्ञान बियादीपिं निम्ह गुरुपिं रत्न श्रेष्ठ व प्रभाकार देव शर्मा पिन्त हनिगु जूगु दु ।
वयकपिं निम्ह गुरु मध्ये रत्न श्रेष्ठं वयकयात “ध्येबाया शक्ति” नांयागु प्याखनय् न्हापांखुशी म्हितकूगु व अनंलिपा अभिनय ख्यलय् आपालं ज्ञां ब्यूगु खःसा प्रभाकर देव शर्मां वि.सं.२०५९ सालं निसें थीथी विज्ञापन व टेलिफिल्मय् म्हितकूगु खः ।
थथे थःगु कलायात्रा ताःलाकेत तिबः , हःपाः व ज्ञां बियादीपिं निम्ह गुरुपिनिगु गुन लुमंका वयकपिन्त हनेत्यनागु धकाःपत्रकार सम्मेलन याना कलाकार शाहीं धयादीगु खः । वयकलं निम्ह गुरुपिन्त थःगु कलायात्राया वह दँ पूवंगु लसताय् थ्वहे असोज ६ गते थिमिया बहाखा बजारय् च्वंगु न्यू एभरेष्ट पार्टी पालेसय् जुइगु लसता ज्याझ्वलय् हनिगु खँ कनादीगु दु ।
उगु पत्रकार सम्मेलनय् नेपालभाषाया न्हांपाम्ह सिने पत्रकार विजयरत्न असंबरे , कलाकार सुरेन्द्र तुलाधरपिन्सं कलाकार शाहीया कलायात्राया बारे खँ कुलादीसे वयकया कलायात्रा नीन्यादँ पूवंगु लसताय् भिन्तुना नं देछानादीगु खः ।
नेपाःया संकिपा व संगीत ख्यलय् आपासिनं आपालं दँ बितेयाय् धुंकूसां थथे २५ दँ क्यंगुया लसताय् लसता ज्याझ्वः धाःसा सुनां याःगु खनेमदुनिसाः थ्वहे न्हापां खुशी खः ।
थ्व लसता ज्याझ्वःया ग्वसाःया भाला कलाकार स्वतन्त्रसंसार महर्जनया एम्स ईण्टरटेण्टमेण्टपाखें जुइगु जूगु दुसाः आराध्य लक्ष्मी खडगी , सुरज व्यञ्जनकार , राजेश श्रेष्ठ , डबल बहादुर शाक्य, नील शाक्य व रुपेन्द्र श्रेष्ठं पिन्स सांगितिक व सांस्कृतिक प्रस्तुनि नं न्ह्यःब्वइगु ज्याझ्वः दु धकाः कलाकार शाही धयादीगु दु ।
दशैं म्युजिकल फेस्टिभय् प्यम्ह कलाकःमिपिन्त हना
लहनान्युज | ञंलागा द्धादशी ११३७ (सेप्तेम्बर १७ २०१७)
मनोरञ्जनात्मक ज्याझ्वःया माध्यमं सामाजिक जनचेतना अभिबृद्धि याय्गु ज्या याना वयाच्वंगु संस्था ‘एम्स इन्टरटेन्टमेन्ट प्रा.लि.’या ग्वसालय् सांगितिक उत्सवकथं “दशैं म्युजिकल फेस्टभ २०१७” जूगु दु । यलया बागडोलय् जूगु उगु ज्याझ्वलय् यल महानगरपालिकाया मेयर चिरिबाबु महर्जनया मूपाहांकथं झायादीगु खः ।
उगु ज्याझ्वलय् नेपालभाषाया न्हापांम्ह सिने पत्रकार पत्रकार विजयरत्न असंबरे, लोकंह्वाम्ह कलाकार व निर्देशक सुरेन्द्र तुलाधर, नांजाःम्ह लय्चिनामि सुमन कपालीनापं
नेपालमण्डल टेलिभिजनया भाईकाजी महर्जन ‘नयन’पिन्त म्हतिं नगद ७ हजार ७ सय ७७ तका लिसें “विशेष दशैं म्युजिकल फेस्टिभ सम्मान” लःल्हाःगु खः ।
एम्स इन्टरटेन्टमेन्ट प्रा.लि.का संस्थापक नायः स्वतन्त्र संसार महर्जनया सभाध्यक्षताय् जूगु उगु ज्याझ्वःया संयोजन रुपेन्द्र श्रेष्ठं यानादीगु खः ।
आपालं कलाकार व कलाह्यमिपिनिगु उपस्थिति दुगु उगु ज्याझ्वलय् एम्स ईण्टरटेण्टमेण्टया आधिकारीक वेबसाइटया उलेज्या नं मूपाहां यल महानगरपालिकाया मेयर महर्जनं यानादीगु खः ।
ज्याझ्वलय् सलोना बज्राचार्य, रजनी खड्गी, अन्नु महर्जन, राजी महर्जन, बालकृष्ण प्रजापति व रुपेन्द्र श्रेष्ठ आदिपिन्सं हुलाप्याखं न्ह्यब्वयादीगु खःसा मचाम्ह म्येहालामि श्रजल महर्जन, मचाराजा महर्जन, सानुबाबु महर्जन, किशोर कुमार शाही, निशा देसार, सरिता शाही, सलिलसुन्दर तुलाधर, सुमन कपाली, रुपेश डंगोल, सुबिन श्रेष्ठ, एन्जेला सिंह श्रेष्ठ, अन्जन श्रेष्ठया नापनापं शिकाली ब्याण्ड व आपालं कलाकारपिन्सं थःथःगु सांगितिक देछा न्ह्यब्वयादीगु खः ।
‘बसन्त ऋतु’या शुटिङ्ग ७५ प्रतिशत क्वचाल
नृपेन्द्रलाल श्रेष्ठ | ञंलाथ्व एकादशी ११३७ (सेप्तेम्बर १६ २०१७)
धुँ देय् न्हापांगु सकिपा ‘बसन्त ऋतु’या शुटिङ्ग ७५ प्रतिशत क्वचाय् धुकुगु दु ।
संकिपाया निर्देशक पवन जोशी बिगु जानकारी कथं थुगु संकिपाया शुटिङ्ग मोहनी दुने क्वचायेकीगु जुइ धकाः लहनान्युजयात जानकारी बियादीगु दु ।
सकिपा ‘बसन्त ऋतु’या शुटिङ्ग वंगु ञंलाथ्व द्धादशी निसें न्ह्यागु खः ।
माँ संकिपाया शुभमूहुर्त
लहनान्युज | ञंलागा नवमी ११३७ (सेप्तेबर १४ २०१७)
माँ संकिपाया शुभमूहुर्त जुल लोकंह्वाःगु संकिपा ‘थःम्हं म्हूगु गाः’ दयेकूगु नाट्यश्वर फिल्मस् प्रा.लि.या ब्यानरं मेगु नेपालभाषाया संकिपा ‘मां’या शुभमूहुर्त याःगु दु । नगदेश लाछि, थिमिइ शुभमूहुर्त ज्याझ्वः जूगु खः ।
शुभमूहुर्त शटया नितिं मूपाहाँ मध्यपुर नगरपालिकाया मेयर मदनसुन्दर श्रेष्ठं क्यामेरा चाय्का (अन) यानादीगु खःसा, वरिष्ठ सिने पत्रकार विजयरत्न असंबरें क्लाय्प बियादीगु खः । निर्देशक पवन जोशीं निर्देशन बियादीगु शुभमूहुर्त शटय् नेपालभाषा संकिपा समाजया नायः सुरेन्द्र तुलाधरं नैंक्याः तछ्यानादीगु खः । कलाकारपिं शशिकला मानन्धर, रजनी खड्गी, सन्जु महर्जन व सुरज ब्यञ्जनकारपिन्सं थुगु शट बियादीगु खः ।
‘मां’ संकिपाया निर्देशक सुरेश खड्गी खःसा थुगु संकिपा रवि महर्जनं सह–निर्देशन यानादी । क्यामेराय् शैलेश महर्जन, बाखं व संवाद शंकर खड्गी, द्वन्द निर्देशन मनोज शाही, नृत्य निर्देशन विनोद बज्राचार्य व रविता महर्जनं यानादीगु थुगु संकिपातय् मेपिं कलाकारपिं किशोरकुमार शाही, भिन्तुना जोशी, सन्जु खड्गी, शंकर खड्गी, सुनीता ठाकुर श्रेष्ठ, राजिव महर्जन, साजन खड्गी, अर्जुन खड्गी, माणिक शाही, देवकुमारी खड्गी, उजय शाही, लक्ष्मीकमल शाही, मेलिशा खड्गी, दर्शन शाही, मैंया श्रेष्ठ, सगं कपाली, रिमिसा शाही, वैकुण्ठ ताम्रकार, जीवन के.सी., उमिषा पाण्डे च्वनादीगु खः ।
शुभमूहुर्त ज्याझ्वलय् थुगु नाट्यश्वर फिल्मस्या न्हापांगु संकिपा ‘थःम्हं म्हूगु गाः’या निर्देशक रविन्द्र शाही, नायः किशोरकुमार शाही, नकिंपिं रुविना महर्जन, मीरा माली, बाखं÷संवाद च्वमि शंकर खड्गी, सहायक निर्देशक रवि महर्जन, भेषभूषा लक्ष्मीकमल शाही व ब्यवस्थापक राजेन्द्र शाहीयात हंगु खःसा हङकङय् जूगु १६ देशया कासामिपिनिगु ब्वति दुगु अन्तर्राष्ट्रिय तेक्वान्डो प्रतिस्पर्धाय् न्हाप सिरपा त्याकाः नेपाःया नांतःम्ह थुगु संकिपाया बालकलाकार मेलिशा खड्गी, ग्वाहालिमिपिं प्रमोद अधिकारी, सन्जित रंजितकार, नवराज घिमिरेयात नं हंगु खः ।
च्वमि शंकर खड्गीं संकिपाया बारे कनादीगु थुगु शुभमूहुर्त ज्याझ्वलय् मूपाहाँ मध्यपुर नगरपालिकाया मेयर मदनसुन्दर श्रेष्ठ, पाहाँपिं वरिष्ठ सिने पत्रकार विजयरत्न असंबरे, नेपालभाषा संकिपा समाजया नायः सुरेन्द्र तुलाधर, नेवाः फिल्म सोसाइटीया नायः लूजः सिँह, निर्देशक आर्यम नकःमि, निर्देशक पवन जोशीं थःथःगु नुगःखँ तयादीगु खः ।
नाट्यश्वर फिल्मस्या नायः कलाकार किशोरकुमार शाहीया नायःसुइ जूगु थुगु ज्याझ्वलय् लसकुस छ्याञ्जे दर्शन शाहीं यानादीगु खःसा ज्याझ्वः सुरजवीर बज्राचार्र्यं न्ह्याकादीगु खः ।
चर्याप्याखं प्रशिक्षण ज्याझ्वः
लहनान्युज | ञंलाथ्व एकादशी ११३७ (सेप्तेबर १ २०१७)
महिला तथा बालबालिका कल्याण सेवा समाज, यलया ग्वसालय् यशोधर महाविहार बुबहालय् न्ह्यानाच्वंगु चर्याप्याखं प्रशिक्षण ज्याझ्वः क्वचाःगु दु ।
यल महानगरपालिका अन्तरगत गरीबी उन्मुख शहरी पुनरुत्थान नमूना परियोजनाया ग्वाहाली न्ह्यानाच्वंगु उगु प्रशिक्षण ज्याझ्वः वंगु चैत्रनिसें खुलातक चर्याप्याखं प्रशिक्षण बीगु ज्या जूगु खः । प्याखंया गुरुपिं माइला गुरुजु, हेमरत्न बज्राचार्य व मीना जोशीं प्रशिक्षण बियादीगु उगु ज्याझ्वलय् थ्यंमथ्यं ७०म्हेस्यां ब्वति कयादीगु खः ।
थ्वहे झ्वलय् “बज्रयानी चर्या गीत तथा नृत्य” सफूलिसें चर्याप्याखं सम्बन्धित बृत्तचित्र व चर्या म्येया सिडि नं बिमोचन जूगु खः । अथेहे प्रशिक्षण बियादीपिं गुरुपिं, प्रशिक्षार्थी व ग्वाहालि यानादीपिन्त सुभाय् पौलिसे दसिपौ नं लःल्हाःगु दु ।
संस्कृति संरक्षणलिसें चर्या प्याखंया ज्ञान न्हूगु पुस्तायात हस्तातरण याय्गु व नृत्य दक्षता विकास याय्गु तातुनां थुगु प्रशिक्षण ज्याझ्वः याःगु संयोजक प्रेरणा बज्राचार्यं जानकारी बियादीगु दु । जनमानसय् बोधिज्ञान प्रवाह याय्गु विशुद्ध व सशक्त माध्यमकथं न्हापा बोधिसत्वपिन्सं चर्याम्ये व चर्याप्याखं छ्यलीगु व थुकिया न्हापांम्ह रचनाकार, संगीतकार व गायक महामञ्जुश्री खः धइगु जनविश्वास दु ।
