Display Style:
Column Style
तःजिक क्वचाल संकिपा नखः
लहनान्यूज | कछलाथ्व अष्टमि ११३७ (अक्टोबर २८ २०१७)
नेपाली संकिपा ख्यःया आमा धकाः म्हस्यूम्ह, नेपाःया न्हापांगु संकिपा ‘आमा’य् आमाया भूमिका म्हितूम्ह कलाकार चैत्यदेवी सिंहयात नेवाः फिल्म सोसाईटिं तःजिक हंगु दु ।
नेवाः फिल्म सोसाईटीं येँय् ग्वसाः ग्वःगु निन्हुयंकंया संकिपा नखः ज्याझ्वः ‘निक्वःगु ल्ँक् संकिपा नखः’या समापन समारोहस कलाकार सिंहया लिसें वरिष्ठ कलाकर्मी ख्यालिजुजु मदनकृष्ण श्रेष्ठया ल्ँक् संकिपा सम्मान ११३७ पाखें हंगु खः ।
संगीत, नाट्य, संकिपाया माध्यमं मदिक्क नेपालभाषा साहित्य, कला ख्यःया लिसें मुक्कं नेपाःया हे कला ख्यलय् ब्यूगु योगदानयात च्वछासें ख्यालि जुजु श्रेष्ठयात हंगु खः ।
आमा संकिपाया मू पात्र आमाया भूमिका म्हितेगुया लिसें नेपाःया न्हापांगु रंगीन संकिपाया नापं नेपाःया न्हापांगु आदिवासी जनजाति सम्वद्ध विषयस दयेकूगु संकिपा कुमारीया मुख्य नकिं कथं म्हितादीम्ह व लोक सेवा आयोगया जाँच पास यानाः सहायक निर्देशकया नियुक्ति चूलानाः नेपाःया न्हापांम्ह मिसा निर्देशक जुइत ताःलाःम्ह कलाकारया रुपं कलाकार चैत्यदेवी सिंहयात हंगु खः ।
सम्मानित व्यक्तित्वद्वययात खादां न्ययेकाः, हनापौ व करुणामयया रथया ढाँचाय् दयेकातःगु हनाचिं लिसें हंगु खः । वरिष्ठ गायक प्रेमध्वज प्रधान व जनगायक भृगुराम श्रेष्ठं सम्मानितद्वययात हनापौ व हनाचिं लःल्हानादिल ।
‘जितः कलाकार दयेकूगु नेवाः ख्यलं हे खः’
नुगःखँ तयेगु झ्वलय् सम्मानित वरिष्ठ कलाकार मदनकृष्ण श्रेष्ठं थःत थौं मदनकृष्ण दयेकूगु हे नेवाः ख्यलं हे खः धयादिल । मुनासःया ज्याझ्वलय् थःगु ख्यालि न्ह्यब्वया लिसें म्ये न्ह्यब्वया वँवं हे थः थौं मदनकृष्ण जूवःगु वयकःया धापू खः।
मेम्ह सम्मानित वरिष्ठ कलाकार चैत्यदेवी सिंहं संकिपा ख्यलय् थःगु इतिहासयात लुमंकाः ब्यूगु थुगु हनां थम्हं गौरवान्वित महसूस यानागु धयादिल ।
आदिवासी जनजाति चलचित्र महासंघया नायः अमृत सुनुवारं राज्यया संकिपा सम्बन्धि नीति आदिवासी जनजाति मैत्री मजूबलय् जनजाति संकिपाकःमिपिन्सं समस्या फयेमालाच्वंगु धयादिल । आदिवासी जनजाति चलचित्र सेन्सर बोर्ड गठनया लागीं थःपिन्सं राज्ययात सः तया वयाच्वनागु नायः सुनुवारया धापू खः ।
सोसाईटीया नायः लुःजः सिंहं नेवाः संकिपाकःमिपिन्सं थःगु संकिपाय् नेवाः पहः क्यनेमाःगु खँय् बः बियादिल । आधुनिक समाज क्यंसां उकी दुने नं ज्यूथाय् छिंथाय् तक्क नेवाः तजिलजि, नेवाः परम्परा क्यनेमाःगु खँय् वयकःया बः खः।
आः नेवाः फिल्म सोसाईटीपाखें नेवाः कलाकारपिनिगु डाइरेक्टरी पिथनेगु योजना नं नायः सिंहं उगु हे ज्याझ्वलय् सार्वजनिक यानादिल ।
‘तापलय्’ पब्लिक च्वाइस जुइत ताःलात
कछलाथ्व सप्तमि शुक्रबाः व अष्टमि शनिबाः यानाः निन्हुयंकं नेपाल पर्यटन बोर्डय् जूगु संकिपा नखलय् ताःहाकःगु, चीहाकःगु यानाः मुक्कं ८ संकिपा क्यंगु खः ।
क्यान्सर ल्वय्या हुनिं मदुम्ह कलाकार रामशेखर नकःमियात श्रद्धान्जलि कथं वयकलं हे निर्देशन यानादीगु ‘पःखाः’ धाःसा विशेष प्रदर्शनीया रुपं क्यंगु खः ।
मेगु ७ संकिपा मध्ये दर्शकया भोटया लिधंसाय् नेपाल सांस्कृतिक उत्थान परिषदया व्यानरय् दयेकातःगु संकिपा ‘तापलय्’यात पब्लिक च्वाइस अवार्ड ब्यूगु खः ।
नेवाः फिल्म सोसाईटीं थ्वयां न्ह्यः थगुने तिनि सुनसरीया धरानय् न्हापांगु संकिपा नखःया ग्वसाः ग्वःगु खः । थगुने उत्सवया रुपय् ग्वसाः ग्वःगु संकिपा नखः थुगुसी धाःसा महोत्सवया रुपं येँय् याःगु खः ।
“मुसुमुसु न्हिला”या निगु गु ब्बः पिहा वइगु
लहनान्युज | कौलागा त्रयोदशी ११३७ (अक्टुवर १७ २०१७)
नेवाः कलाकारिता ख्यलय् सकृय कलाकार रुपेन थक्वाः श्रेष्ठ “मुसुमुसु न्हिला” म्येया म्युजिक भिडियोया युट्युबय् स्वकुमि ल्याः छगू लखसिबें अप्वः थ्यंगु दु ।
आःतकः थुगु “मुसुमुसु न्हिला” म्येया म्युजिक भिडियो युट्युबय् छगू लख व झिंस्वद्वलं स्वया अप्व स्वकुमिपिन्सं स्वय्धूंकुगु दु ।
थुगु म्येय् कलाकार मय्जु रजनी खड्गीं नाप कबिन्द्र तण्डुकार , लेखबहादुर मोक्तान , बलबहादुर माझि लगायतया कलाकारपिन्सं नं अभिनयलय् साथ बिगु दु ।
थुके मुख्य याना रुपेन व रजनीया अभिनय प्रस्तुति तसकं हे धिसिला गु नि दर्शक तयेसं तसकंं यकुगु दु ।
थुगु म्युजिक भिडियोया कोरियोग्राफि राजन शाहीं याःगु खःसा म्येया म्युजिक एरेन्जर अञ्जन श्रेष्ठ खः । थ्वः म्युजिक भिडियोया क्यामेरापर्सन व भिजुअल एडिटर सोहन मानन्धर खः ।
“मुसुमुसु न्हिला”या निगु गु ब्बः न्हुदँ या लसताय् थ्व हे वइगु लक्ष्मी पुजा कुन्हु पिहावइगु धकाः रुपेन थक्वाः श्रेष्ठं लहनान्युजयात जानकारी बियादिगु दु ।
रोजी डंगोल श्रेष्ठया ‘यच्चुगु सर्गः’ म्येचाः पिदन
लहनान्युज | कौलागा एकादशी ११३७ (अक्टुवर १५ २०१७)
म्येहालामि रोजी डंगोल श्रेष्ठया सलय् नेपालभाषाया यच्चुगु सर्गः म्येचाः पितब्यज्या जूगु दु । नेपाल पर्यटन बोर्डय् जूगु ज्याझ्वलय् वरिष्ठ म्येहालामि प्रेमध्वज प्रधान व जगमोहन वामिं म्येचाः पितब्वज्या यानादीगु खः । पूर्णकाजी ज्यापुं च्वयादीगु म्ये, जुगल डंगोलं लसय् हनादीगु खःसा वय्कःया हे संगीत संयोजनय् थुगु म्येचाः पिदंगु खः ।
थुगु म्येचाकलय् ‘मस्यू जितः छुजू, छुजू’, ‘यच्चुगु सर्गः’, ‘चुलि जाया वइगु’ दुथ्याःसा मदनकृष्ण श्रेष्ठनाप ‘मोहनि तया ला’ व सानुबाबु महर्जननाप ‘मतिना फसं’ ज्वःम्ये दुथ्याः । आर्टोम्यूज स्टुडियोय् रेकर्डिङ्ग जूगु म्येचाःया पिकाकः म्येहालामि मय्जु रोजीया जहान बालचन्द्र श्रेष्ठ खः ।
म्येचाः पितब्वज्याया मूपाहाँ रक्षामन्त्री भिमसेनदास प्रधानं म्येचाः पिथनेतः तिबः बियादीपिं, ग्वाहालि यानादीपिन्त मतिनाया चिं देछासें हनादीगु खःसा थःगु नुगः तय्गु झ्वलय् वय्कलं म्ये नं हालाः न्यंकादीगु खः ।
ज्याझ्वलय् सुरोज महर्जनं निर्देशन यानादीगु शंकर महर्जनया छायाँकन, सनम श्रेष्ठं समा यानादीगु व म्येहालामि रोजीनापं सुरमा डंगोल, प्रमोद महर्जन, प्रदिका महर्जन, श्रिया महर्जन, श्रृष्टि शाक्य, रिलिमा महर्जनं अभिनय यानादीगु ‘मस्यू जितः छुजू छुजू’ या म्यूजिक भिडियो नं क्यंगु खःसा रोजीं थुगु म्येचाकलय् दुथ्याःगु ‘चुलि जायावइगु’ म्ये न्यंकादीगु खः ।
ज्याझ्वलय् नेपाल संगीत तथा नाट्य प्रज्ञा प्रतिस्थानया प्राज्ञ परिषद् दुजः माधव प्रधान, लोकगायक रत्न बहोशी, वरिष्ठ म्येहालामि जुजुकाजी रंजित, संगीतकार राजु सिँह, वरिष्ठ फोटोग्राफर राजभाई सुवाल, वरिष्ठ सिने पत्रकार विजयरत्न असंबरे, म्येच्वमि वि. नन्द वैद्य पाहाँकथं दबुलिइ च्वनादीगु खः । म्येचाकलय् दुथ्याःगु म्येया समालोचना वरिष्ठ संगीतज्ञ धनबहादुर गोपालीं यानादीगु खः ।
सुरजवीर बज्राचार्यं न्ह्याकादीगु म्येचाः पितब्वज्याय् पाहाँपिन्त ब्याज देछायेगु ज्या म्येहालामि मय्जु रोजीया म्ह्याय् अन्तरा मानवी श्रेष्ठं यानादीगु खः सा ज्याझ्वः ग्वसालय् ग्वाहालि नेपाः डान्स एकेडेमीं याःगु खः ।
संकिपा नखःया टिकट व ट्रफि सार्वजनिक
लहनान्यूज | कौलागा एकादशी ११३७ (अक्टोबर १५ २०१७)
नेवाः फिल्म सोसाईटीं वरिष्ठ संकिपाकःमिद्वय चैत्यदेवी सिंह व मदनकृष्ण श्रेष्ठयात तःजिक हनीगु जूगु दु ।
सोसाईटीं ग्वसाः ग्वयेत्यंगु निक्वःगु संकिपा नखः व हना ज्याझ्वः ‘निक्वःगु ल्न्क् संकिपा नखः व ल्ँक् संकिपा सम्मान ११३७’स वयकःपिं निम्ह संकिपाकःमियात हनेत्यंगु खः । सोसाईटीं थौं यलय् पत्रकार सम्मेलनया ग्वसाः ग्वयाः सिंह व श्रेष्ठयात हनेत्यनागु जानकारी ब्यूगु खः ।
सोसाईटीं नेपाःया न्हापांगु संकिपा ‘आमा’य् आमाया भूमिका म्हितादीम्ह लिसें न्हापांगु रंगीन संकिपा कुमारीया मू नकिं चैत्यदेवी सिंहं संकिपा ख्यःयात बियादीगु योगदानयात च्वछासें सम्मान यायेत्यनागु न्ह्यथंगु दु ।
लिसें नाट्य, संगीत लिसें संकिपा मार्फत निरन्तर रुपं नेपालभाषा, कला, साहित्य ख्यःयात योगदान बियादीम्ह ख्यालि जुजु, वरिष्ठ कलाकःमि मदनकृष्ण श्रेष्ठयात नं हनेगु सोसाईटीं धाःगु दु । सम्मानित निम्हं कलाकःमिपिन्त विशेष गां न्ययेकाः, हनापौ व हना चिं कथंया ट्रफि लिसें हनेगु नखः कजि बिजेन्द्र बज्राचार्यं धयादिल ।
उगु हे ज्याझ्वलय् सम्मानया ट्रफिलिसें महोत्सवया टिकट नं सार्वजनिक याःगु खः । वरिष्ठ सिने पत्रकार, चलचित्र निर्देशक लिसें नेपालभाषाया न्हापांम्ह सिने पत्रकार विजयरत्न असंबरें ट्रफि व टिकट सार्वजनिक यानादिल ।
करुणामयया रथ जात्राया झ्वलय् करुणामययात विराजमान याकीगु रथया ढाँचाय् महोत्सवया ट्रफि दयेकूगु दु । थःगु न्ह्याग्गुं ज्याखँ वा ज्याझ्वः मार्फत नेपालया मौलिक संस्कृतिया पहिचान नं न्ह्यब्वया वनेगु आज्जुं थुगु ट्रफि दयेकागु सोसाईटीं न्ह्यथंगु दु ।
ज्याझ्वलय् सोसाईटीया दुजः आभाष धरानन्द राजोपाध्यायं उगु रथ व करुणामयया बारे जानकारी न्ह्यब्वयादिल ।
नुगःखँ तयेगु झ्वलय् वरिष्ठ सिने पत्रकार विजयरत्न असंबरें थुगु संकिपा नखः मार्फत नेवाः फिल्म सोसाईटीं आमा संकिपाया आमा चैत्यदेवी सिंह खः धइगु सुलाच्वंगु तथ्ययात न्ह्यःने हःगुलिइ लसता प्वंकादिल । लिसें सोसाईटीं अध्ययन, अनुसन्धान, वहस यानाववं संकिपा ख्यलय् थज्याःगु हे सुलाच्वंगु मेमेगु तथ्ययात नं न्ह्यःने हयेमाःगुलिइ बः बियादिल ।
व हे कथं सिने पत्रकार श्याम स्मृतं राज्यं नेवाः लिसें मेमेगु आदिवासी जनजाति संकिपाया लागिं मेगु सुविधाया नापं संकिपा क्यनेगु हलया नं व्यवस्था यानाबीमाःगुलिइ बः बियादिल । पत्रकारतय् न्ह्यसःया लिसः ब्युसें सोसाईटीया नायः लुःजः सिंहं आः नेवाः संकिपा नं प्रकृया पूवंकाः सम्बन्धित निकायस दर्ता जुया वनेमाःगु धासें दर्ता मयाःसे संकिपा दयेकेगु ज्या जुयाच्वंबलय् संकिपाकःमिपिं राज्यपाखें सुविधां छखे लानाच्वंगु नायः सिंहया धापू खः ।
थःपिन्सं आदिवासी जनजाति चलचित्र महासंघ मार्फत राज्ययाके बिस्कं हे आदिवासी जनजाति चलचित्र सेन्सर बोर्डया माग याना वयाच्वनागु सिंहं जानकारी बियादिल । लिसें नायः सिंहं आः सोसाईटीपाखें नेवाः संकिपाकःमिपिनिगु डाइरेक्टरी पिथनेगु तयारी न्ह्याकेगु नं धयादिल ।
सोसाईटीं थ्व हे कछलाथ्व सप्तमी शुक्रबार व अष्टमि शनिबार ( कार्तिक १० गते शुक्रबार र ११ गते शनिबार) या दिनस भृकुटिमण्डपस्थित नेपाल पर्यटन बोर्डय् संकिपा नखःया ग्वसाः ग्वयेत्यंगु दु । निन्हु यंकं जुइगु संकिपा नखलय् ९ संकिपा क्यनेत्यंगु दु ।
जापानय् फ्यूचर अफ एशिया अवार्ड त्याकेत ताःलाःगु संकिपा ‘पःखाः’ विशेष न्ह्यब्वयाया रुपय् क्यनीसा मेगु च्यागू संकिपा मध्ये छगूयात दर्शकया भोटया लिधंसाय् ‘स्वकुमि ल्यज्या सिरपाः’ (पब्लिक च्वाइस अवार्ड) बीगु नं सोसाईटीं न्ह्यथंगु दु । पब्लिक च्वाइस अवार्ड त्याकामियात दसिपौ लिसें ट्रफि लःल्हाइ ।
आशिष्माया म्हगस 'लाखेभाजु'या घोषणा
लहनान्यूज | कौलागा षष्ठी ११३७ (अक्टुवर ११ २०१७) |
कलाकार आशिष्मा नकःमिं थःगु डि्रम प्रोजेक्ट नेपालभाषाया संकिपा 'लाखेभाजु' दयेकेगु घोषणा यानादीगु दु । घोषणा समारोहया ग्वसाः ग्वयाः वय्कलं थुगु संकिपा निर्माणया घोषणा यानादीगु खः ।
नकिं मय्जु नकःमिया सभापतित्वय् जूगु घोषणा समारोहय् लसकुस यासें वय्कलं थःगु अभिनय यात्राया शुरुवात नेपालभाषा ख्यलं जूगु लुमंकादिल । नेपालभाषा व खस नेपाली भाषाया कला ख्यलय् थःत उत्तिकं माया याइपिं दर्शक दुगु धयादीसें 'लाखेभाजु' संकिपायात नं उकथं हे माया दइगु भलसा वय्कलं प्वंकादिल ।
थुगु ज्याझ्वःया मूपाहाँ संस्कृतिविद् डा.चुन्दा बज्राचार्यं थुगु ज्याझ्वलय् न्वंवासें लाखे संस्कृतिया बारे कनादीगु खःसा संस्कृतिइ संकिपा दयेकेबलय् संस्कृतिया अपब्याख्या जुइकथंया ज्या जुइमज्यूगुपाखें नं सचेत यानादिल । थुगु ज्याझ्वलय् मूपाहाँ बज्राचार्यं त्वाःदेवाय् मत च्याकाः संकिपाः घोषणा जूगु संकेत जुइवं लाखे प्याखं पिदंगु खः ।
आर्यम नकःमिं च्वयादीगु व निर्देशन यानादीगु थुगु संकिपाया परिकल्पनाकार प्रदीपकुमार उदय खःसा नरेन्द्र महर्जन, गोपालकाजी कायस्थ, चिजकुमार श्रेष्ठ (युरोप), सुन्दर राजभण्डारी (युएसए), दिपक श्रेष्ठ(युके) थुगु संकिपाया निर्मातापिं खः । संकिपा ५० लखया तका लगानीइ दयेकेत्यंगु खः ।
घोषणा समारोहय् परिकल्पनाकार उदयं नेपालभाषा संकिपाप्रति न्हापा झुकाव मदुगु व लिपा संकिपा स्वयेधुंकाः थःत यःगु हुनिं खस नेपालीभाषाया संकिपातं नेपालभाषाया संकिपातय् नं दुहां वयागु खँ कनादिल । थुगु संकिपा मेगु भासं नं दयेकेफइगु खः तर जिमिगु मतिइ नेवाः संकिपा दयेकेगु खः, नेवाः संकिपा ख्यलय् छगू तँसा तनेगु खः" धयादिल ।
सुरजवीर बज्राचार्यं न्ह्याकादीगु थुगु ज्याझ्वलय् च्वमि अले निर्देशक आर्यम नकःमिं संकिपाया बारे खँ कँसे कलाकार म्हसीकादीगु खः ।
थुगु संकिपाय् कलाकारपिं आशिष्मा नकःमि, सोदित मानन्धर, मदनदास श्रेष्ठ, नगीना जोशी, गणेशराम लाछी, हृदयप्रसाद मिश्र, कृष्णभक्त महर्जन, नारायणदेवी प्रधान, प्रकाश श्रेष्ठ, अन्नपूर्णेश्वरी श्रेष्ठ, रुपेन श्रेष्ठ, सुरज व्यञ्जनकार, भोगेन्द्र मानन्धर, अकलमान महर्जनपिं दुथ्याः ।
संकिपाया घोषणा समारोहय् निर्माता गोपालकाजी कायस्थं सुभाय् न्वचु बियादीगु् खःसा नेपालभाषाया न्हापांगु संकिपा सिलुया नाय: जय श्रेष्ठ, कुमारी संकिपाया नकिं मय्जु चैत्यदेवीयात हनेज्या याःगु खः ।
थुगु संकिपाया क्यामेरा पर्सन सुसन प्रजापति, संगीत मनराजा नकःमि व म्येच्वमिपिं भीमबहादुर नकःमि, दुर्गालाल श्रेष्ठ, आर्यम नकःमिपिं खःसा नृत्य निर्देशक भूवन श्रेष्ठं यानादी । निर्माण नियन्त्रककथं अर्जुनप्रसाद पाखरेल, कला निर्देशककथं खड्गबहादुर तामाङ (सन्तोष) पिन्सं भालाकयादीगु दुसा ड्रेस सुवोध लामा, भान्छा जेठा दाईपिन्सं स्वयादी ।
