Display Style:
Column Style
जामनः गुभाजुया ट्रेलर व म्येचाया पितब्वज्या
लहनान्युज | कौलाथ्व षष्ठी ११३७ (सेप्तेम्बर २६ २०१७)
नेपालभाषाया संकिपा “जामनः गुभाजु”या ट्रेलर छगु ज्याझ्वःया दथुइ पितब्वज्या जूगु दु ।
नांजाम्ह संगीतकःमि गोल्डेन भ्वाइस अफ नेपाल प्रेमध्वज प्रधान व नांजाम्ह ख्यालःकःमि गणेश साय्मिपिं निम्ह मूपाहाँ कथं झायादीगु उगु ज्याझ्वः येँया आशिर्वाद कलेजया कम्पाउण्डय् जूगुु ज्याझ्वलय् नेपाःदेय्या इतिहासय् मल्लकालिन छम्ह पुलाम्ह तान्त्रिक गुभाजु कथं प्रसिद्धम्ह जामनः गुभाजुया बाखंया लिधंसा कया दय्कूगु “जामनः गुभाजु”या म्येचा व पोस्टरया नं पितब्वज्या जूगु खः ।
उगु ज्याझ्वलय् थ्व संकिपा दयेकेत ज्वमदुगु योगदान बियादीपिं यज्ञमान पनि बज्राचार्य, डा.नरेशमान बज्राचार्य, शान्तरत्न बज्राचार्य, सरोज बज्राचार्य, सबिन बज्राचार्य, बीरेन्द्र मानन्धर, पूर्णकाजी ज्यापु, आशिर्वाद कलेजया ध्रुबनारायण मानन्धर, संगीतकार बालकुष्ण बंशी, थ्व संकिपाया च्वमि व मूपात्रय् अभिनय यानादीम्ह सुशील राजोपाध्याय, केशरीदेबी श्रेष्ठ या नापनापं थुगु संकिपाया निर्मातापिं राजेन्द्रभक्त श्रेष्ठ व वीरन्द्रभक्त श्रेष्ठ अले थ्व संकिपाया निर्देशक रवि साय्मिया मां व अबु पूर्णकुमारी मानन्धर व धर्मनारायण मानन्धरपिं विशिष्ट पाहाँ कथं झायादीगु खः ।
थुगु संकिपाय् सुशील राजोपाध्यायं जामनः गुभाजु जुया म्हिता च्वंगु दुसाः थुके सञ्चारकःमि व साहित्यकार पुष्कर भक्त माथेमां जुजु प्रताप मल्ल जुया म्हिता दीगु खः । सुरज व्यञ्जनकार, अमिता जोशी,अन्नपुर्णेश्वरी श्रेष्ठ, संघरत्न शाक्यया नापनापं आपालं कलाकारतसें म्हिता तःगु थ्व “जामनः गुभाजु”या सह निर्देशक रवि महर्जन खःसा निर्देशक रवि साय्मि खः ।
ट्रेलर व म्येचा पितब्वज्या ज्याझ्वःया लसताय् “जामनः गुभाजु”या सकलें कलाकार , प्राविधिक व ग्वाहालिमिपिन्त मूपाहाँपिं प्रधान व साय्मिं सुभाय्पौया लिसें जामन गुभाजुया चिं कथं ट्रफी नं लःल्हागु खः ।
अमेरिकन बाबु मेड ईन नेपालया प्रोमो नेपालय्
लहनान्युज | कौलाथ्व पंचमी ११३७ (सेप्तेम्बर २५ २०१७)
अमेरिकाय् दय्कूगु खस नेपाली भाषाया संकिपा अमेरिकन बाबु मेड ईन नेपाल या प्रोमो व निपु म्ये थौं नेपालय् पितब्वज्या जूगु दु । थौं सोमबार लाजिम्पाटय् जूगु छगु ज्याझ्वःया दथुई उगु संकिपाया न्हापागु पोस्टरया उलेज्या मूपाहाँ वरिष्ठ सिने पत्रकार विजयरत्न असंबरे व विशिष्ट पाहाँ नामी पत्रिकाया सम्पादक नारायण राईं मंकाः कथं यानादिगु खः ।
अथेहेतुं मूपाहाँ असंबरें प्रोजेक्टरया स्वीच अन याना थ्व संकिपाया प्रोमो व निपु म्येयात हलिंन्यंकं क्यनेकथं शुरु यानादिल । थ्व संकिपाया मिडिया संयोजक वरिष्ठ संचारकःमि श्याम स्मृतं न्ह्याकादीगु थौंया ज्याझ्वलय् निर्माता मञ्जु राना मगरं, मेम्ह निर्माता राजेश गुरुङ्गया किजा नबीन गुरुङ्गं थ्व संकिपायाबारे खँ कनादिगु खः ।
उगु ज्याझ्वलय मूपाहाँ वरिष्ठ सिने पत्रकार असंबरें थ्व संकिपां अमेरिकाय् च्वनावया च्वंपिं नेपालीतय्गु बाखंयात स्यलाक्क क्यनि धइगु आश दु धकाः धया दिल । मेमेपिं पाहाँपिं नारायण राई व च्यांग्बा लगायतं नं अमेरिकन बाबु मेड ईन नेपाल यात कया थःथःगु नुगः खंतसे भिन्तुना देछाना दीगुखः ।
छगु करोड दा लाय् तूगु थ्व संकिपा आः वइगु सन् २०१८या जनवरी अमेरिकाय् क्यनेज्याः न्ह्याइगु खँ नं उगु ज्याझ्वलय् जानकारी ब्यूगु खः । थ्व संकिपाया निर्देशक ईश्वर थापा खःसा थुके नन्दिता के.सी., बाबु बोगटीया नापनापं इसान ढकाल, प्रबेश उप्रेती पाउल, प्रियंका गैर, अञ्जली लामा, राजेश गुरुङ्ग, रघु गिरी, सम्झना उप्रेती, कृष थापा आदी थेंज्यापिं अमेरिकाय् च्वना च्वंपिं नेपाली कलाकार तयेगु अभिनय स्वय् दइगु जूगु दु ।
थ्व संकिपाया निर्माण ड्रिम्स गेट नेपालया निंतिं राजेश गुरुङ्ग, सम्झना उप्रेती व मञ्जु राना मगरं यानादीगु खः ।
पेजथ्री नेपालभाषा पिपल्स च्वाइस अवार्ड क्वचाल
लहनान्युज | कौलाथ्व चौथी ११३७ (सेप्तेम्बर २४ २०१७)
पेजथ्री नेपालभाषा पिपल्स च्वाइस अवार्ड स्वंगुगु संस्करण थौं छगु ज्याझ्वः दथुइ येँय् क्वचागु दु । ने.सं. ११३३ निसें ने.सं. ११३७ तकः पिहावंगु बांलागु म्ये, एल्बम, म्यूजिक भिडियो व सकिपायात सिरपा लःल्हायेगु ज्याझ्वः जुगु खः ।
उगु ज्याझ्वलय् नेपालभाषा संगीत ख्यलय् निरन्तर योगदान बियावयाम्ह संगीतकर्मी विष्णु जल्मियात न पेजथ्री लाइफटाइम एचिभमेन्ट अवार्डपाखें सम्मानित याःगु खः । संगीत ख्यःया च्यागु विधा, म्यूजिक भिडियो ख्यःया न्ह्यःगु व सकिया ख्यःया झिंच्यागु विधाय् बांलागुयाते पिपल्स अवार्ड बिगुखः ।
संगीत विधाय् सिरपा त्याकेत ताःलापि थुकथ दु ।
दकले बांलागु मिजं सः सानुबाबु महर्जन ( भिंगु कर्म), दकले बांलागु मिसा सः दीपा महर्जन (खालिगु भ्वंतय्), दकले बांलागु संगीत जुगल डंगोल (म्हिगः च्हान्ह्य्), दकले बांलागु संगीत संयोजन भुपेन्द्र बज्राचार्य (जिगु बैशं धाल), दकले बांलागु ज्वःम्ये रत्न शोभा व शिवराज (लिक्क च्वना), दकले बांलागु म्ये च्वमि नातीबज्र बज्राचार्य (छंगु माया), दकले बांलाम्ह नव प्रतिभा विरज महर्जन (तुयु तुयु), दकले बांलागु एल्बम ऋतुया लसं पिजवःगु सः
म्युजिक भिडियोय् सिरपा त्याकूपिं थुकथं दु ।
दकले बांलाम्ह मिजं मोडल सुरज व्यञ्जनकार (छंगु लिक्क च्वनेजक दःसा), दकले बांलाम्ह मिसामोडल रजनी खड्गी (मुुसुमुसु न्हिला), दकले बांलाम्ह क्यामेरापर्सन शैलेश डंगोल (न्ह्यने मदुसां), दकले बांलाम्ह सम्पादक बालकृष्ण बंशी (चागः मालां), दकले बांलाम्ह हुला प्याखं स्यनामि सुनिता राजभण्डारी (लिक्क च्वना), दकले बांलाम्ह निर्देशन राजन शाही (छंगु लागिं हे जि), दकले बांलागु म्युजिक भिडियो छंगु लागिं हे जि ।
संकिपा ख्यःलय् सिरपा त्याकूगुु थुकथ दु ।
दकले बांलागु स्कृनप्ले सुरेन्द्र तुलाधर(अंश), दकले बांलागु सम्बाद आर्यम नकःमि (तुयुमति), दकले बांलागु सम्पादन सोहन मानन्धर(तिनतिकः महाबिकः), दकले बांलागु कोरियोग्राफी भुवन श्रेष्ठ (म्हुतुसीया लाली,अंश), दकले बांलाम्ह बाल कलाकार नस्वाः जोशी (थ्वला ग्यानापु स्टायल), दकले बांलाम्ह क्यामेरापर्सन सोहन मानन्धर(तिनतिकः महाबिक), दकले बांलाम्ह एक्शन डाइरेक्टर राजेन्द्र खड्गी (अंश), दकले बांलागु म्ये (ओ एस टी) तिनतिकः महाबिकः( तिनतिकः महाबिकः)
सुरजबीर बज्राचार्यया बुन्हिया म्ये पितब्बज्या
नृपेन्द्रलाल श्रेष्ठ | कौलाथ्व तृतिया ११३७ (सेप्तेम्बर २३ २०१७)
लोकंह्वाम्ह म्येहालामि व सञ्चारकःमि सुरजबीर बज्राचार्यं थः तिरी मय्जु रमा बज्राचार्यया बुन्हिया लसता लाका छपु न्हूगु नेवाः भाय्या बुन्हि हना म्ये सार्वजनिक यानादीगु दु । उगु म्येचाः सुरजबीर बज्राचार्यया अबुजु चित्रबीर बज्राचार्य , संगीकार बदन शर्मा , थुगु म्येया संगीत संयाेजक जुगल डंगाेल , नेवाः पत्रकार राष्ट्रिय दबूया नायः श्रीकुष्ण महर्जनपिन्सं मंकाः कथं बिमोचन यानादीगु खः ।
नेपालभाषाया संगीत ख्यलय् बुन्हि हनेबले हालेगु म्येया अभाव जुयाच्वंगु वाःचाय्का पिथनादीगु थ्व बुन्हि म्येया च्वमि नं सुरजबीर बज्राचार्य हे खः ।
सञ्चारकःमि व बाखँ च्वमि मय्जु मीना बज्राचार्यं विमाेचन ज्याझ्वः न्ह्यः सांस्कृतिक ज्याझ्वः न्ह्याकादीगु खःसा न्हू पहलं ग्वसाः ग्वयातःगु विमाेचन ज्याझ्वः सुरजवीरं हे न्ह्याकादिल । पारिवारिक माहाैल ब्वलंकूसें न्ह्याकूगु थुगु विमाेचन ज्याझ्वःया बारे ब्वनातःपिन्सं बांलाक मस्यूगुलिं थुगु विमाेचन ज्याझ्वः ग्वसाः ब्वनातःपिं सकसिनं तसकं न्ह्याइपु तायेकूगु खः । सांस्कृतिक ज्याझ्वलय् आराध्य लक्ष्मी खडगीया हुला प्याखँया लिसे सुरज व्यञ्जनकार, अमर चित्रकार, सानुबाबु महर्जनपिन्सं न म्येहालादीगु खः ।
म्ये न्यनेगु नितिं क्वय् लिंकय् क्लिक यानादिसँ ।
कलाकार ज्ञानेन्द्र ईशारायात हन
लहनान्युज | कौलाथ्व तृतिया ११३७ (सेप्तेम्बर २३ २०१७)
कलाकार ज्ञानेन्द्र ईशारा महर्जनयात वय्कःया योगदानया कदर यासे “यल सम्मान–२०७४” लःल्हाःगु दु । यल ईण्टरटेण्टमेण्ट प्रा.लि. व हामीलाई सम्झनोस् नेपालया मंकाः ग्वसालय् वंगु सञ्चरवाः जूगु ज्याझ्वलय् कलाकार महर्जनयात उकथं हंगु खः ।
वय्कःयात हनापौ लिसें नीद्वःतका दां नेपाल चलचित्र कलाकार संघया वरिष्ठ उपाध्यक्ष कलाकार सानु ताम्रकारं लःल्हानादीगु खःसा कलाकार महर्जन म्ह मफयाः उपस्थित जुयामदीगुलिं उगु सम्मान वय्कःया चीधिकःम्ह म्ह्याय् समिना महर्जनं लःल्हाना कयादीगु खः ।
अथेहेतुं कलाकार ज्ञानेन्द्र ईशारायात आर्थिक ग्वाहालिकथं कलाकार मय्जु लक्ष्मी गिरीं नं द्वःछि तका दां लःल्हानादीगु खः ।
अथेहे उगु ज्याझ्वलय् संकिपा ‘साइको’या कलाकार प्राविधिक व ग्वाहालिमिपिन्त पाहांकथं झायादीम्ह वरिष्ठ सिनपत्रकार विजयरत्न असंबरें मतिनाया चिं लःल्हानादीगु खः ।
सेफ्स होटेल तालिम केन्द्रया दीलिप कुमार महर्जनया सभाध्यक्षताय् न्ह्याःगु उगु ज्याझ्वलय् ज्याझ्वःया संयोजक व “साइको”या च्वमि व निर्देशक गौतम तण्डुकार, लायन टंकनाथ ढकालपिन्सं थःथःगु नुगः खँ तयादीगु खःसा कलाकारपिं गौतमरत्न तुलाधर, किशोर शाही, जय श्रेष्ठ पाहांकथं झायादीगु खः ।
ज्याझ्वलय् कलाकार महर्जन व मेपिं अनाथ, असहाय व विपन्न मस्तय्गु ग्वाहालि जुइकथं नेवाः संकिपा ‘साइको’या च्यारिटी शो लिसें सांस्कृतिक ब्वज्या नं जूगु खः ।
