पेजथ्री नेपालभाषा बाःछिपौपाखें बूदिंया भिंतुना म्ये कासाया घोषणा याःगु दु । थुगु म्ये सुरजवीर बज्राचार्यं मंगलधूनया लसय् च्वयाः हालादीगु खः । जुगल डंगोलया संगीत संयोजनय् तयार जूगु थुगु म्ये थौंकन्हे अतिकं लोकं ह्वानाच्वंगु दु । थुगु म्ये अझ यक्वःसिनं न्यनेमा, बूदिंया सगं बीबलय् व हनाज्याझ्वलय् थ्ययेमा, न्यंकेमा, हालेमा ,हायेकेमा धइगु तातुनां थुगु म्येया कभर (ट्रयाकय् थःगु सलं हालेगु) कासाया ग्वसाः ग्वयागु पेजथ्रीया दर्शनवीर शाक्यं कनादीगु दु ।

नेवाः तजिलजिया रसं प्याःगु थुगु म्येयात अझ ब्यापक यायेगु तातुनां गोल्मा कम्पनी प्रा.लि., आर्टोम्यूज रेकर्डिङ स्टुडियोया ग्वाहालिइ थुगु म्येया कभर म्ये कासा न्ह्याकूगु खः । थुगु कासाय् कासामिपिन्सं थःगु सलय् बूदिंया भिंतुना म्ये हालाः मोबाइल भिडियो रेकर्ड यानाः YouTube बाय् Facebook य् अपलोड यानाःलि उकिया लिङ्क फेसबुक पेज Budinya Bhintuna Mye Kasa (https://www.facebook.com/Surajbir123/) य् अपलोड यायेखतं कासामिकथं नां दुथ्याइ । उकी आधिकारिक नां, थायबाय् व फेसबुक आइडी नं दुथ्याकेमाः । इफेक्ट दुगु म्ये दुमथ्याइगु लिसें नियम अखः गुगुं म्ये दुथ्यात धाःसा उकियात थुगु कासां पितनेगु नं ग्वसाः खलकं धाःगु दु । बूदिंया भिंतुना म्येया लिरिकल (शब्द सहित) भिडियो व काराओके ट्रयाक Songs Nepal पाखें  YouTube व Budinya Bhintuna Mye Kasa (https://www.facebook.com/Surajbir123/)   फेसबुक पेजय् नं अपलोड जुयाच्वंगु दु । ट्रयाक जक मखःसे गुगुं बाजं थानाः हाला रेकर्डेड भिडियो अपलोड जूगु नं मान्य जुइगु ग्वसाः खकलं कंगु दु ।

माघ ८ गते तक दुथ्याःगु म्ये दथुइ न्हाप लाःम्हेसित जुगल डंगोलया लय् व संगीत संयोजनय् सुरजवीर बज्राचार्य च्वयादीगु म्ये छपु आर्टोम्युज रेकर्डिङ्ग स्टुडियों रेकर्ड यानाबीगु व गोल्मा कम्पनी प्रा.लि.पाखें २४ इञ्चया चेज लिड टिभी देछायेगु नं न्ह्यथंगु दु । छम्हसिबें अप्वः बांलापिं म्येहालामिपिं कासाय् लूसा निर्णायकपिनिगु क्वछिनाकथं छगू कलेक्सन एल्बम हे नं पिथने फइगु संगीतकार जुगल डंगोलं कनादिलसा यक्व स्वकुमिपिन्सं स्वःगु (views दुगु) भिडियोयात नं सिरपा बीगु विषय सहलह जुयाच्वंगु नं वयकलं कनादिल ।

सुरजवीर बज्राचार्यं थः तिरिमय्जु रमा बज्राचार्यया बूदिं ने.सं. ११३८ कौलाथ्व तृतीया खुन्हु थुगु म्ये पिथंगु खः । भाजु बज्राचार्यं थः तिरिमय्जुया जन्मदिं लाकाः नेपालभाषाया संगीत ख्यलय् द्यछाःगु थुगु बूदिंया भिंतुना म्ये थौंकन्हे अँग्रेजी भाय्या ह्याप्पी बर्थ डे टुयु धकाः हालेगु चलनया थासय् नेवाः म्यें हे थाय् कायमा धइगु तातुना दयेकूगु भाजु बज्राचार्यं कनादीगु खः ।
 

संगीतकार मनराजा नकःमिया गुंगूगु म्येचा: ज्वभनया रङ्ग पिदन । ज्याझ्वलय् पाहाँपिं पूर्व मुख्य सचिव, पूर्व निर्वाचन आयुक्त व केशू भजन ज्ञान गुथिया संयोजक केशवराज राजभण्डारी, वरिष्ठ म्येहालामि  जुजुकाजी रंजित, स्वयम्भूराज शाक्य, संगीतकार जुगल डंगोल, वरिष्ठ सिनेपत्रकार विजयरत्न असंबरे, ललितपुर मलया अध्यक्ष नेपाल डंगोल, संगीतकार हरिशरण साय्मि, पिकाकः पुचः दुजः भाईकाजी महर्जन नयन, निर्मलरत्न शाक्य, संगीतकार मनराजा नकःमिनाप सभानायः मंगल महर्जन व मूपाहाँ ज्यापु समाजया यलया नायः प्रेम महर्जनं ज्वभनया रङ्ग म्येचाः ब्वया थुगु म्येचाः पिदंगु घोषणा यानादिल ।

नीशा देसारं त्रि लोचनं च्वयादीगु द्वाल्खा भाय्या ‘जि द्वाल्खाया मिसा मचा’ म्ये न्यंकाः न्ह्याःगु ज्याझ्वलय् सरीता शाहीं नातिबज्रं च्वयादीगु म्ये ‘छं ब्यूगु मतिना’ न्ह्यब्वयादीगु खःसा ज्याझ्वलय् दिपिका बलामीं दुर्गालाल श्रेष्ठं च्वयादीगु हाय रे वाउँ चुलि’ म्ये न्यंकादीगु खः । मुक्कं १६ पु म्ये दुथ्याःगु थुगु म्येचाकलय् कविता जोशीया सलय् तबः मरुयां च्वसां पिज्वःगु म्ये ‘ज्वभनया रङ्ग’,  सरीता शाहीया सलय् मेगु छपु दुथ्याःगु म्ये दुर्गालाल श्रेष्ठं च्वयादीगु ‘स्वां न्हिल मुसुक्क’ खःसा सतिष महर्जनया सलय् आनन्दरत्न बज्राचार्यं च्वयादीगु ‘छंगु ख्वलां हे काल’, मंगल महर्जनया च्वसाय् मदनकृष्ण श्रेष्ठया सलय् ‘हिसि दुम्ह मचा’, सतिष महर्जन व निशा देसारया सलय् चन्देश्वर महर्जनं च्वयादीगु ‘धारे दाइचा’ रत्नशोभा महर्जनया सलय् प्रकाशलाल जोशीं च्वयादीगु ‘चमेलिस्वां थें’, सानुबाबु महर्जन, सुलिन्द्र शाक्य, सरीता शाही, रत्नशोभा महर्जन, आयुस्ना, श्रेया, रीभाना, श्रजल महर्जनया पुचलं मंगल महर्जनया च्वसां पिज्वःगु ‘जिमि अजा अजि (जंक्व म्ये), सरीता शाही व सुलिन्द्र शाक्यया सलय् आनन्दरत्न बज्राचार्यं च्वयादीगु ‘किजापूजा’, सतिष महर्जन व रत्नशोभा महर्जनया सलय् प्रकाशलाल जोशीं च्वयादगिु ‘जिगु थ्व अजः मिखा’, मदनकृष्ण श्रेष्ठया सलय् दुर्गालाल श्रेष्ठं च्वयादीगु ‘स्वरे व मचां थः’, सानुबाबु महर्जन, सुलिन्द्र शाक्य, सुरेन्द्र व मनराजा नकःमिया सलय् निर्मलरत्न शाक्यं च्वयादीगु ‘झीपिं पासा मिलेजुयाः’, मदनकृष्ण श्रेष्ठ, पवित्र कसाः व पुचःया सलय् हिदानया म्ये दुथ्याःसा धिर सुवालं च्वयादीगु मदनकृष्ण श्रेष्ठ व आयुस्ना नकःमिं हालादीगु ‘खिउँथाय् जिमिसं’ म्ये दुथ्याः । म्येचाकलय् दुथ्याःगु म्येया संगीत संयोजक व रेकडिष्ट हरिशरण साय्मि, बालकृष्ण वंशी, विनोद गुरुङ, जिवित जल्मी, संजय श्रेष्ठ, वीरेन शाक्य, बुद्ध साय्मि, भूपेन्द्र बज्राचार्य, सञ्जय खड्गी, विजेन श्रेष्ठ व सुरेन्द्र श्रेष्ठ खः । हरिशरण साय्मिं प्रिमास्टरिङ यानादीगु म्येचाः भाईकाजी महर्जन ‘नयन’, सुरज महर्जन, मोहन शाक्य, निर्मलरत्न शाक्य, मंगल महर्जन दुगु पुचलं पिथंगु खःसा म्येचाःया देवः किपाः राजभाई सुवालं कयादीगु खः ।
पितब्वज्या ज्याझ्वः सुरजवीर बज्राचार्यं न्ह्याकादीगु खः ।