Display Style:
Column Style
बलिउकया कामुक अभिनेतृ सन्नि लियोन
लहनान्यूज | सिल्लाथ्व एकादशि ११३७ (फेब्रुअरी ७ २०१७)
बलिउडया सन् २०१६ या दकलय् अप्वो कामुक अभिनेतृ छगू मत सर्बेक्षण कथं पूर्व क्यानेडियन पोर्नस्टार सन्नि लियोनया नां न्ह्यने वःगु दू ।
उगू भारतया अनलाइन मत सर्बेक्षणय् निगु थासय् दिपिका लागू दू । थूगु दँ २०१६ या दकलय् अप्वो कामूक बलिउडया अभिनेतृ सू खः धकाः न्ह्यसः न्यंगु खः ।
अथेहे स्वंगु निसें झीगु तकः छसि कथं ज्याकलि फर्नान्डिज, प्रियका चोपडा, ऐश्वर्या राय बच्चन, अनुष्का शर्मा, सोनम कपूर, कृति सेनन, करिना कपूर, व नरगिस फाखरी पिन्त ल्यगू खः ।
धिरेन शाक्य नेवाः म्यूजिक भिडियोलय्
लहनान्यूज | सिल्लाथ्व एकादशि ११३७ (फेब्रुअरी ७ २०१७)
खस संकिपा ख्यलय् तकं लोकं व्हाःम्ह कलाकार धिरेन शाक्य नेवाः म्यूजिक भिडियोलय् खनेदइगु जूगु दु ।
कलिउडया नांजाःम्ह हिरो शाक्यं ध्रुवलाल ताम्रकार व रीता महर्जनं हालादीगु ‘न्ह्यलय् ज्वलय्’ म्येय् मोडल कथं म्हितादीगु खः । थुकी शाक्यलिसे थौंकन्हय् नेवाः म्यूजिक भिडियो ख्यलय् व्यस्तम्ह मोडल आराध्यलक्ष्मी खड्गीं अभिनय यानादीगु दु ।
थः मचाबलय् निसें स्वयाच्वनाम्ह वरिष्ठ कलाकारलिसे नापं ज्या यायेखंगुलिइ थः तसकं उत्साहित दुगु खड्गीं प्रतिक्रिया बियादीगु दु ।
सुमन कपालीं लय् तयादीगु म्ये राजेशमान सिंहं च्वयादीगु खःसा म्यूजिक भिडियोया निर्देशन व दृश्य सम्पादन तक नं सिंह भाजुं हे यानादीगु दु । क्यामेराया ज्या धाःसा शंकर महर्जनं यानादीगु खः ।
थुगु म्यूजिक भिडियो थौं बहनी नेपालमण्डल टेलिभिजनय् रिलिज जुइगु धाःगु दु ।
नृत्य निर्देशन संघय् भुवन श्रेष्ठ
लहनान्यूज | सिल्लाथ्व दशमि ११३७ (फेब्रुअरी ६ २०१७)
हुलाप्याखं निर्देशकपिनिगु संस्था नृत्य निर्देशन संघ नेपालया नायकय् नृत्य निर्देशक भुवन श्रेष्ठयात ल्यःगु दु ।
येँय् क्वचाःगु संघया प्रारम्भिक साधारण सभां श्रेष्ठया अध्यक्षताय् १३ दुजःया पूर्ण कार्यसमिति गठन ल्यःगु खः । न्हूगु कार्यसमितिइ न्हापांम्ह न्वकुलिइ कलाकार संजय शर्मा राजोपाध्याय व ल्यू न्वकुलिइ प्रदिप श्रेष्ठयात ल्यःगु खः ।
मू छ्यान्जेय् नृपध्वज खत्रीयात ल्यःगु साधारण सभां ज्ञानबहादुर महर्जनयात छ्यान्जे व रबि राना मगरयात ल्यू छ्यान्जे ल्यःगु दु ।
दांभरिं भावना कार्कीयात ल्यल सा ल्यू दांभरिं कथं शारदा सोति शर्मायात ल्यल । दुजलय् याम गुरुङ, शम्भु शाही, केशव कोइराला, ऋषिकेश श्रेष्ठ व रोहिया महर्जनयात ल्यःगु दु ।
२०७३ श्रावण २६ गते जि.प्र.का, येँय् दर्ता जुयाः तदर्थ समितिपाखें न्ह्यानाच्वंगु संघं संघया ज्याकुथिइ प्रारम्भिक साधारण सभा यानाः पूर्ण कार्यसमिति गठन याःगु खः ।
गीतकार खरेल सम्मानित
लहनान्यूज | सिल्लाथ्व चतुर्थी ११३७ (जनवरी ३१ २०१७)
अन्तर्राष्ट्रिय नेपाली साहित्य समाज नेपाल च्याप्टरं राजधानीइ छगू विशेष ज्याझ्वःया ग्वसाः ग्वसें वरिष्ठ गीतकार किरण खरेलयात हंगु दु ।
समाजं गीतकार खरेलयात २१द्वः तका राशि व हनापौलिसें राष्ट्रकवि माधव प्रसाद घिमिरे म्ये सिरपापाखें हंगु खः । नेपाली साङ्गीतिक ख्यःयात ज्वः मदुगु कालजयी म्ये बियाः सङ्गीत ख्यःयात च्वन्ह्याकेत महत्वपूर्ण योगदान ब्यूगु धासें खरेलयात हंगु खः ।
ज्याझ्वःया मू पाहां राष्ट्रकवि माधवप्रसाद घिमिरें देयया समृद्धिया लागिं सकसिके एकताया भावनाया आवश्यकता दुगु धयादिल । राष्ट्रकवि घिमिरें साहित्यं बहुजातीय, बहुभाषिक, बहुधार्मिक व बहुसांस्कृतिक देयया पहिचान जिवन्त दयेकूगु बिचाः तयादिल ।
ज्याझ्वलय् नेपाल प्रज्ञा–प्रतिष्ठानया कुलपति गङ्गाप्रसाद उप्रेती, नेपाल सङ्गीत तथा नाट्य प्रज्ञा प्रतिष्ठानया उपकुलपति शम्भुजित बास्कोटा, सिरपाःया संस्थापक प्राज्ञ लिसें वरिष्ठ गीतकार उन्नती बोहरा शीला, समाजया न्वकू रामबाबु सुवेदी, व सम्मानित व्यक्तित्व खरेललिसें नं देशय् साहित्य ख्यलं फया वयाच्वंगु थथ्याःक्वथ्याःयात कयाः नवानादीगु खः ।
लहनां प्रेमध्वजयात हनीगु
लहनान्यूज | पोहेंलागा सप्तमि ११३७ (जनवरी १९ २०१७)
लहना मिडियां गोल्डन भ्वाइस अफ नेपाल धकाः म्हस्यूम्ह वरिष्ठ म्येहालामि प्रेमध्वज प्रधानयात हनीगु जूगु दु ।
थौं येँय् पत्रकार सम्मेलन यानाः लहना मिडियां थ्व हे वइगु पोहेंलागा आमै (माघ १४) शुक्रबाःया दिनय् येँय् ‘यूएफओ भिन्तुना सनिल’ ज्याझ्वःया ग्वसाः ग्वयाः वरिष्ठ म्येहालामि प्रधानयात हनेगु धाःगु खः । प्रधानयात दोसल्लां न्ययेकाः हनापौ लिसें ५१,१११ तका राशिलिसें हनेगु पत्रकार सम्मेलनय् जानकारी ब्यूगु खः ।
पत्रकार सम्मेलनय् बिस्कं कथंया सम्मान कथं कलाकारपिनिपाखें सांगितिक सम्मान नं देछायेगु धाःगु खः । उकिया लिसें गोल्डन भ्वाइस भाजु प्रधानं ज्याझ्वलय् म्ये नं हालाः न्यंकादीगु धाःगु दु ।
भारतया संकिपा ख्यःया प्रतिष्ठित फिल्मफेयर अवार्डया न्हयक्वःगु संस्करणय् भ्वाइस अफ नेपाल, प्रेम साहव नामं स्टेजय् आमन्त्रण जूगु ईयात नं पत्रकार सम्मेलनय् लुमंकूगु खः । लिसें उगु हे इलय् थःत भारतय् हे च्वनेत तःक्वः हे याःगु इनापयात छखे तयाः मातृभुमिइ हे लिहांवयाः प्रधानं निरन्तर रुपं नेपाली संगीत ख्यलय् बियाच्वनादीगु योगदानयात च्वछासें वयकःयात हनेत्यनागु धाःगु खः ।
न्हूदँ नेपाल सम्वत ११३७ या लसताय् यायेत्यंगु ज्याझ्वलय् लोकंव्हाःपिं कलाकारपिनिपाखें सांगितिक न्ह्यब्वया नं न्ह्यब्वइगु धाःगु दु ।
ज्याझ्वलय् लोकंव्हाःपिं म्येहालामिपिं भीम तुलाधर, ज्योति घिमिरे, जेम्स प्रधान, निशा देसार, सुरजबीर बज्राचार्य, एन्जिला सिं, भुपेन्द्र बज्राचार्य, अन्जन श्रेष्ठ, पंकज राजोपाध्याय, सुलिन्द्र शाक्यं म्ये लिसें आराध्यलक्ष्मी खड्गीं हुलाप्याखं न्ह्यब्वयादीगु धाःगु दु ।
स्रष्टा व कलाकारया सम्मानया परम्पराया निरन्तरता कथं हे थुगु ज्याझ्वः यायेत्यनागु ग्वसाः खलकं धाःगु दु । लिसें देयया न्हाय् तइपिं कलाकारपिनिगु सम्मान यायेमफूगु राज्यया नितिं जनस्तरपाखें जुइगु थुकथंया सम्मानपाखें राज्यं नं सयेका कायेमाःगु पत्रकार सम्मेलनय् धाःगु खः ।
ज्याझ्वः वइगु पोहेंलागा आमै (माघ १४) शुक्रबाःया दिनस येँ खुसिबुँया विनायक मल्टि भेन्यूस न्हिनसिया ३ः३०ताः इलय् जुइगु जूगु दु ।
