Display Style:
Column Style
बलिउड कलाकार ओम पुरी मन्त
लहनान्यूज | पोहेंलाथ्व अष्टमि ११३७ (जनवरी ६ २०१७)
हिन्दि संकिपा ख्यः बलिउड व पुलांम्ह व नांजाःम्ह कलाकार ओम पुरी थौं सुथय् मन्त ।
६६दँयाम्ह पुरी थौं सुथय् थःगु हे छेँया किचन फ्लोरय् मृत अवस्थाय् लूगु खः । हृदयघातया हुनिं वयकः मदुगु न्ह्यथंगु दु ।
ताः ई न्ह्यःनिसें हिन्दि संकिपा लिसें रंगमंचय् सक्रिय कलाकार मदुम्ह पुरीं १०० स्वयां आपाः संकिपाय् अभिनय यानादीगु दु । लिसें वयकः निक्वःतक्क भारतया राष्ट्रिय सिरपाःपाखें सम्मानित जूगु दु ।
मदुम्ह पुरीं आक्रोश, अर्ध सत्य, गुप्त, चाची ४२०, मालामाल विक्लि, चाइना गेट लिसेंया संकिपाय् ज्वःमदुगु अभिनय यानादीगु दु । मराठि भायया घासीराम कोतवाल संकिपापाखें थःगु अभियनय यात्रा न्ह्याकादीम्ह वयकःया दक्कले लिपांगु संकिपा घायल रीटर्न खः ।
वयकःया परीवारय् वयकःलिसे बायेधुंकूम्ह वयकःया जहान नन्दिता व काय् इशान दु ।
लोकंव्हाःम्ह म्येहालामि जर्ज माइकल मन्त
लहनान्यूज | थिंलागा त्रयोदशि ११३७ (डिसेम्बर २६ २०१६)
लोकंव्हाःम्ह पप म्येहालामि जर्ज माइकल ५५दँया बैंशय् मन्त ।
मदुम्ह जर्ज माइकलया मेनेजर माइकल लिपमायनं हर्टफेलया हुनिं वयकःया मृत्यु जूगु न्ह्यथंगु दु । वयकःया मृत्यु थःगु हे छेँ अक्सफोर्डसायरय् जूगु धाःगु दु ।
थःगु सांगितिक करीअरय् वयकःया १० करोड स्वयां नं आपाः एल्बम विक्रि जूगु दु । लिसें फ्रिडम, केयरलेस व्हिसपर वयकःया तसकं लोकं व्हाःगु म्येत खः ।
सन् २०१४य् पिदंगु सिम्फोनिका वयकःया लिपांगु म्येचाः खः ।
वंगु प्यंगू दशक न्ह्यःनिसें अंग्रेजी पप म्ये ख्यलय् सक्रिय म्येहालामि जर्ज माइकलया सांगितिक यात्रा व्हाम नांया सांगितिक पुचलं जूगु खः ।
वयकःया सांगितिक पुचः व्हामया लास्ट क्रिसमस धइगु म्ये नं अतिकं लोकं व्हाः । संजोग हे धायेमाः वयकःया मृत्यु नं क्रिसमसया हे दिनय् जुल ।
समयबजिया ६००ब्व हन
लहनान्यूज | थिंलागा एकादशि ११३७ (डिसेम्बर २४ २०१६)
इमेज च्यानलया लोकंव्हाःगु नेपालभाषाया ज्याझ्वः समयबजिया ६००ब्वया लसता ज्याझ्वः थौं येँय् क्वचाःगु दु ।
ज्याझ्वलय् नेपालभाषाया संगीत ख्यलय् ताः ई न्ह्यवनिसें मदिक्क योगदान बिया वयाच्वनादीगुलिं संगीतकःमि भाजु अमरराज शर्मा राजोपाध्याययात हंगु खः । उगु हे ज्याझ्वलय् न्हापांगु मिसा राष्ट्रिय शारीरिक सुगठन कासाया त्याकामिलिसें विश्व मिसा शारीरिक सुगठन कासाय् लियांल्यू लायेत ताःलाःम्ह ननिता महर्जनयात नं हंगु खः ।
सम्मानित निम्हेसितं इमेज ग्रुप अफ कम्पनीजया नायः आर.के.मानन्धरं दोसल्लां न्ययेकाः हनापौ लःल्हानादिलसा कम्पनीया ल्यू नायः मोहनचन्द्र सिंहं मतिनाया चिं लःल्हानादिल ।
समयबजि ज्याझ्वलय् ग्वाहालि याना वयाच्वंपिं कलाकारपिन्त नं ज्याझ्वलय् खादां न्ययेकाः हंगु खः । कलाकारपिन्त कम्पनीया नायः आर.के.मानन्धरं खादां न्ययेकेगुलिसें मतिनाया चिं नं लःल्हानादिल ।
ज्याझ्वलय् थीथी कलाकार व म्येहालामिपिन्सं थःथःगु न्ह्यब्वया नं न्ह्यब्वःगु खः । ज्याझ्वलय् अमरराज राजोपाध्याय, भुपेन्द्र बज्राचार्य, अन्जन श्रेष्ठलिसें नं म्ये हाःगु खःसा थीथी कलाकारपिन्सं हुलाप्याखं नं न्ह्यब्वःगु खः ।
यलय् रत्न बेहोसियात तःजिक हन
लहनान्यूज | थिंलागा चतुर्थी ११३७ (डिसेम्बर १७ २०१६)
कलाकार परिषदं थौं यलय् कलाकार रत्न बेहोसियात तःजिक हंगु दु ।
परिषदं यलय् कलाकार रत्न बेहोसि हना सनिल ज्याझ्वःया ग्वसाः ग्वयाः वयकःयात हंगु खः । ज्याझ्वलय् सम्मानित बेहोसियात ख्यालि जुजु मदनकृष्ण श्रेष्ठं हनादीगु खः ।
ज्याझ्वलय् ख्यालि जुजु मदनकृष्ण श्रेष्ठं बेहोसियात दोसल्लां न्ययेकेगुया लिसें तपुलिं पुकाः, फेता चिकेगुया नापं हनापौ व तका लःल्हानाः हनादिल । परिषदपाखें सम्मानित बेहोसियात २५द्वः तका लःल्हाःगु खःसा ज्याझ्वलय् उपस्थित थीथी व्यक्ति व संघसंस्थापाखें नं स्वतःस्फूर्त रुपं नगद लःल्हाःगु खः ।
हना धुंकाः थःगु नुगः खँ तयेगुया नापं बेहोसिं म्ये नं हालाः न्यंकादीगु खः । व धुंकाः मदनकृष्ण श्रेष्ठया म्ये लिसें सांस्कृतिक ज्याझ्वः न्ह्याःगु खः ।
सांस्कृतिक ज्याझ्वलय् म्येहालामि स्वयम्भुराज शाक्य, अमरराज शर्मा राजोपाध्याय, सानुबाबु महर्जन, निशा देसारलिसें नं म्ये हालाः न्यंकादीगु खः । लिसें कलाकारपिन्सं हुलाप्याखं नं न्ह्यब्वःगु खःसा राजेशमानसिंया निर्देशनय् घ्याँस्ट्रिक ख्यालः अले वाद्यवादन तक नं न्ह्यब्वःगु खः ।
हना ज्याझ्वः स्वयां न्ह्यः कलाकारपिन्सं बेहोसिया हे म्ये हालाः ज्याझ्वः न्ह्याकूगु खः । थुगु प्रस्तुतियात आपाः हे स्वकुमिपिन्सं न्हूगु कथंया तायेकाः ययेकूगु खः ।
*परिषदपाखें २५द्वः तका सिरपाः लःल्हाःगु जुइमाःथाय् अन्यथा जुयाच्वंगुलिं भिंकागु जुल । (सं.)
जितेन्द्रया ‘लज्जावती’ बजारय्
लहनान्यूज | थिंलागा तृतीया ११३७ (डिसेम्बर १६ २०१६)
पत्रकारलिसें साहित्यकार जीतेन्द्र रसिकं च्वयादीगु खुगूगु उपन्यास ‘लज्जावती’ थौं विमोचन जूगु दु ।
साहित्यिक समाजं थौं ख्वपय् ग्वसाः ग्वःगु छगू ज्याझ्वःया दथुइ प्रा.डा.देवीप्रसाद सुवेदीं सफूया विमोचन यानादिल । सफूया उलेज्या यासें प्रा.डा. सुवेदीं थुगु उपन्यासं वर्तमान समाजयात प्रतिविम्वित यासें चरितार्थ याःगु धयादिल ।
नुगः खँ तयेगु झ्वलय् उपन्यास च्वमि रसिकं थम्हं विशेष यानाः आध्यात्मिक, सांसारिक व आधुनिक यानाः स्वंगू कथंया मानव चेतना व ज्याखँयात चित्रण यानाः उपन्यास रचना यानागु धयादिल । रसिकं नेपाली समाज व मानव सभ्यताया थेसिस् व एन्टिथेसिसया टसलं पिदंगु सिन्थेसिसया रुपं जीवन व जगतयात लज्जावती उपन्यासय् चित्रण यानागु धयादिल ।
उपन्यासया समीक्षा यासें प्रध्यापक लिसें समालोचक भगवानचन्द्र ज्ञवालीं वर्तमान समाजय् जुइगु अपहरण, दण्ड, प्रेम थुज्वःगु विषय कःघानाः उपन्यासयात जीवन्त दयेकूगु धयादिल । कान्तिपुर न्हिपौया वरिष्ठ पत्रकार दामोदर न्यौपानें प्रकृति, द्घन्द व प्रेमया त्रिकोणात्मक विषययात साहित्यय् कःघाःगुलिं उपन्यास बांलाःगु बिचाः तयादिल ।
साहित्यकार रसिकया थ्व न्हापांगु उपन्यास खः । थ्वयां न्ह्यः वयकःया गजल मुना सफू, मचा बाखं मुनालिसेंया न्यागू सफू पिदनेधुंकूगु दु ।
