Display Style:
Column Style
जनजाति संकिपाया बिस्कं सेन्सर बोर्ड
लहनान्यूज सम्वाददाता | कौलागा षष्ठी ११३६ (अक्टोबर २१ २०१६)
आदिवासी जनजाति चलचित्र महासंघया नायः अमृत सुनुवारं सिलु संकिपालिसें न्ह्याःगु नेपाःया जनजाति संकिपाया इतिहास थौं ३०दँ पुलेत्यनं नं आःतक्क जनजाति संकिपाकःमितयत राज्यं स्वइगु बेक्वःगु मिखा मपाःनिगु धयादीगु दु ।
हलिं नेवाः गुथि, किपुल्चा कचाया नितिं सिनेग्राफिक्सपाखें दयेकेत्यंगु संकिपा स्वय्नगुया भिंगु साइतया ज्याझ्वलय् नायः सुनुवारं जनजाति संकिपा ख्यःयात मछिंगु कथंया सेन्सर नीतिइ जनजाति संकिपा वनेमफूगु कारणं राज्यं जनजाती संकिपाकःमितयत पहिचान बीमफूगु नायः सुनुवारया धापू खः । लिसें सुनुवारं थःपिन्सं महासंघपाखें जनजाति संकिपाया नितिं बिस्कं हे सेन्सर बोर्ड गठन यायेत थःपिन्सं चलचित्र विकास बोर्डमार्फत संचार मन्त्रालययात ज्ञापन पौ बीधुनागु जानकारी नं बियादिल ।
नायः सुनुवारया धापू कथं थःपिन्सं गृह व संचार मन्त्रालयपाखें छम्ह, छम्हलिसें महासंघ, सम्बन्धित जातीय समुदायया मातृसंस्था व जातीय संकिपाकःमि संस्थापाखें छम्ह छम्ह यानाः न्याम्हेसिया सेन्सर बोर्डया नितिं महासंघं माग याःगु खः । थुकिया नितिं सकल आदिवासी जनजाति संकिपाकःमिपिं छधी जुयाः न्ह्याःवनेत वयकलं आव्हान यानादिल ।
सिनेग्राफिक्सया नायः लिसें संकिपा स्वयनगुया निर्देशक अमृतमान महर्जनया सभानायकय् जूगु ज्याझ्वलय् नेपाल चलचित्र कलाकार संघया नायः रामकेशर बोगटि, नेवाः फिल्म सोसाईटीया नायः लुःजः सिंह, वरिष्ठ सिने पत्रकार विजयरत्न असंबरे, हलिं नेवाः गुथिया केन्द्रिय नायः शान्तप्रकाश श्रेष्ठलिसें नं संकिपाया सफलताया भिन्तुना देछासें जनजाति संकिपा ख्यःया उत्थानया नितिं सकल संकिपाकःमिपिं छधी जुइगुया पले मदुगु खँय् बः बियादिल ।
- स्वयनगुया भिं साइत क्वचाल
थौं ख्वनाया कार्यविनायकय् छगू ज्याझु्वः यासें संकिपा ‘स्वयनगु’या भिं साइत याःगु खः ।
भिं साइतया नितिं वरिष्ठ सिने पत्रकार विजयरत्न असंबरें निर्देशन यानादिल सा नेवाः फिल्म सोसाईटीया नायः लुःजः सिंहं क्यामेरा रोल यानादिल । आदिवासि जनजाति चलचित्र महासंघया नायः अमृत सुनुवारं क्लाय्प बियादीगु खःसा नेपाल चलचित्र कलाकार संघया नायः रामकेशर बोगटिं नैंक्याः तछ्यानादिल ।ज्याझ्वलय् मू पाहां कलाकार संघया नायः बोगटि, विशेष पाहां आदिवासी जनजाति चलचित्र महासंघया नायः सुनुवारलिसें पाहांपिं लुःजः सिंह, बिजयरत्न असंबरे, हलिं नेवाः गुथि, केन्द्रया नायः शान्तप्रकाश श्रेष्ठयात नेवाः पहलं ह्याउँ सिन्हः तिकाः, कोखा कोखायेकेगुलिसें ख्येँय् सगं बियाः दबुलिइ लसकुस याःगु खः ।
ज्याझ्वःया उलेज्या कलाकार संघया नायः बोगटिं त्वाःदेवाय् मत च्याकाः यानादिल ।
न्हूगु पिदनेत्यंगु संकिपाया निर्देशन भाजु अमृतमान महर्जनं यानादीत्यंगु दुसा निर्माता गोपालकृष्ण नकर्मी खः । संकिपाय् रनेन्द्र महर्जन, भिन्तुना जोशी, सुशीला तण्डुकार, अन्नपूर्णेश्वरी श्रेष्ठ, नारायणदेबी प्रधान, लक्ष्मी गिरि, सुरज ब्यन्जनकार, सुरेश स्थापितलिसेंया कलाकारपिं दुथ्यानाच्वंगु दु ।
संकिपाया सूटिङया ज्या वइगु कौलागा अष्टमि (कार्तिक ७) निसें न्ह्याइगु निर्देशक महर्जनं लहनान्यूजयात जानकारी बियादीगु खः ।
हाइकुया न्हूगु आयाम पिदन
सुधीर ख्वबिपाखें | कौलागा षष्ठी ११३६ (अक्टोबर २१ २०१६)
हाइकुयात कयाः च्वयातःगु सफू ‘हाइकुया न्हूगु आयाम, न्हूगु दिशा’ सार्वजनिक जूगु दु ।
डा. आनन्द जोशीं च्वयादीगु सफूया उलेज्या नेवाः न्ह्यलुवा पद्मरत्न तुलाधरं यानादिल । यलय् क्वचाःगु छगू ज्याझ्वलय् तुलाधरं सफूया उलेज्या यानादीगु खः ।
रुबरिक येँ व कुतः पिकाकः ख्वपपाखें पिदंगु उगु सफूया उलेज्या ज्याझ्वलय् बिमल ताम्राकारं लसकुस न्वचु बिसें नेवाः भायया विकासय् साहित्यं तःधंगु भूमिका म्हिताच्वंगु दुगु धयादिल । सफूया समीक्षा यासें प्रा. नर्मदेश्वर प्रधानं नेवाः साहित्य ख्यलय् नं हाइकुं थाय् दयेका वनाच्वंगु खँ कुलादिल ।
नेवाः न्ह्यलुवा नरेशबीर शाक्यं साहित्य ख्यलय् ल्यायम्हतयत आकर्षित यायेत बिचाः यायेमाःगु खँ न्ह्यथनादिल ।
ज्याझ्वः प्रा. डा. कुन्जिनी जोशीया सभापतित्वय् क्वचाःगु खः ।
स्वयनगु दयेकीगु जुल
लहनान्यूज सम्वाददाता | कौलागा पञ्चमी ११३६ (अक्टोबर २० २०१६)
नेपालभाषाया न्हूगु संकिपा स्वयनगु दयेकीगु जूगु दु ।
हलिं नेवाः गुथि किपुल्चाया ग्वाहालिया निम्तिं सिनेग्राफिक्सया ब्यानरय् दयेकेत्यंगु संकिपा स्वयनगुया मूहुर्त थ्व हे कौलागा षष्ठी (कार्तिक ५) शुक्रबाःया दिनस ख्वनाया कार्यविनायकय् यायेत्यंगु दु । शुक्रबाः सुथय् १०ः३०ताः इलय् अन छगू ज्याझ्वः यासें संकिपाया मूहुर्त यायेत्यंगु खः ।
न्हूगु दयेकेत्यंगु संकिपा स्वयनगुयात पुलांम्ह सिनेकःमि अमृतमान महर्जनं निर्देशन यानादीत्यंगु दुसा पटकथा व संवाद नं भाजु महर्जनयागु हे खः । संकिपाया निर्माता गोपालकृष्ण नकर्मी खः ।
संकिपाय् निर्देशक भाजु महर्जन थः हे कलाकार नं खःसा वयकःलिसें भिन्तुना जोशी, अन्नपूर्णेश्वरी श्रेष्ठ, नारायणदेवी प्रधान, सुरेश स्थापित, लक्ष्मी गिरीलिसेंया कलाकारत दुथ्याः ।
समयबजिं ‘भिन्तुना’ बिल
लहनान्यूज सम्वाददाता | कौलाथ्व पारु ११३६ (अक्टोबर १, २०१६)
मोहनीया लसताय् ईमेज च्यानलया समयबजि ज्याझ्वलं भिन्तुना कालबिल ज्याझ्वःया ग्वसाः ग्वःगु दु ।
नेवाःया लिसें नेपाःया संगीत ख्यलय् नांजाःपिं कलाकारलिसें पत्रकारतय् दथुइ समयबजिं भिन्तुना कालबिल याःगु खः । ज्याझ्वलय् नांजाःपिं म्येहालामिपिन्सं थःथःगु म्ये न्ह्यब्वयादीगु खः ।
भिन्तुना ज्याझ्वलय् माणिक शाही, ज्योति घिमिरे, भीम तुलाधर, विनु मानन्धर, सरस्वती मानन्धर, अन्जन श्रेष्ठलिसेंया कलाकारपिन्सं म्ये न्ह्यब्वयादीगु खः । अथे हे मोडल आराध्यलक्ष्मी खड्गीं हुलाप्याखं न्ह्यब्वयादीगु खः ।
ज्याझ्वःया सकल ब्वतिमिपिन्त समयबजि पुचःपाखें ह्याउँ सिन्हः तिकेगु लिसें ह्याउँगु कोखा कोखायेकाः भिन्तुना देछाःगु खः ।
एम्स इन्टरटेण्टमेण्टया म्यूजिक मस्ती
लहनान्यूज सम्वाददाता | ञलागा औंशि, ११३६ (सेप्टेम्बर ३०, २०१६)
मोहनिया लसता लाकाः यलय् म्यूजिक मस्ती ज्याझ्वः जूगु दु ।
एम्स इन्टरटेण्टमेण्ट व जाह्वलाख्यःया भिन्तुना थकाली एण्ड नेवारी रेष्टुरेण्टया ग्वसालय् म्यूजिक मस्ती ज्याझ्वः जूगु खः ।
ज्याझ्वलय् कलाकार राज गोपाली, कृष्ण महर्जन, अन्जन श्रेष्ठ, दबल शाक्य, बुद्ध पुतुवारपिन्सं म्ये हालादीगु खःसा आराध्य लक्ष्मी खड्गीं हुलाप्याखं न्ह्यब्वयादीगु खः ।
ज्याझ्वः, न्ह्याकूपिं समयबजिया सुरेन्द्र मानन्धर व रजनी खड्गीं ख्यालिखँ लिसें सायरी न्यंकाः स्वकुमिपिन्त न्ह्यइपुकूगु खः ।
