Display Style:
Column Style
विशिष्ट क्षमताया दसु “शुरुवात” पिदन
लहनान्यूज | थिंलाथ्व एकादशि ११३७ (डिसेम्बर १० २०१६)
हलिंन्यंक विश्व मानव अधिकार दिवस हनाच्वंगु इलय् यलय् बिस्कं कथंया क्षमता न्ह्यब्वसें अपांग सेवा संघ बुंगया ग्वसालय् शुरुवात म्येचाःया विमोचन जूगु दु ।
दृष्टिविहिन कलाकार केशव बादीयासलय् पिदंगु म्येचाःया ख्यालि कलाकारद्वय मदनकृष्ण श्रेष्ठ, हरिवंश आचार्य लिसें अधिकारकःमि अले पत्रकार रविन्द्र मिश्रं म्येचाः “शुरुवात”या मंकाः रुप विमोचन यानादिल । म्येचालय् सुमन तामांग, येवन थापामगर व बिमल पुर्कुटीया सः नं सहायक कथं दुथ्यानाच्वंगु दु ।
ज्याझ्वलय् दृष्टिविहिन कलाकार केशव बादीं एल्बमया सन्देशमूलक म्ये “साधारण मानिस” न्ह्यब्वयादीगु खः । अपांग सेवा संघय् आवद्ध अपांगता समस्या जूपिं विद्यार्थीतय्सं पुचलय् फ्युजन संगीत नं न्ह्यब्वःगु खः ।
थीथी कथंया अपांगता समस्या जूपिनिगु पुचलं अर्केष्ट्राया शैलीइ सांकेतिक भाय्, गायन व संगीतया न्ह्यब्वयालिसें राष्ट्रिय गानपाखें ज्याझ्वः न्ह्याकूगु खः । ज्याझ्वःया उलेज्या स्वम्ह विशिष्ट ब्यक्तित्वपिं मह जोडि व पत्रकार मिश्रं त्वाःदेवाय् मत च्याकाः यानादिल ।
करीव १९दँ न्ह्यः अपांग सेवा संघया स्थापना याःम्ह संस्थापक नायः दयाराम महर्जनं ज्याझ्वलय् लसकुस यानादीगु खः । श्रेष्ठं अपांगता जूपिं नं समाजया ब्व खःगु धासें बिमोचित एल्बमं अपांगता समस्या जूपिनिगु क्षमतायात स्वयेगु दृष्टिकोणयात हिलेत ईल्वहं जुइमा धकाः कामना यानादिल ।
उगु हे ज्याझ्वलय् संघया संरक्षकया भूमिका म्हिता वयाच्वनादीम्ह समाजसेवी रमेश महर्जन अले संघय् दुपिं मस्तयत साँगितिक प्रशिक्षण पाखें योगदान बिया वयाच्वनादीम्ह तबलाबादक लिसें संगीत प्रशिक्षक लक्ष्मी प्रसाद डंगोलयात कदरपौलिसें हंगु खः ।
म्येचालय् दुथ्याःगु “हामीलाई अपांग भनि...” म्येया म्यूजिक भिडियो नं क्यंगु ज्याझ्वलय् समाज कल्याण परिषद, बाल कल्याण समिति, रोटरी लिसें थीथी संघसंस्थाया प्रतिनिधीतयगु उपस्थिती दुगु खः । सन्देशमूलक म्येचाः शुरुवातय् ८ म्ये व २ म्यूजिक भिडियो दुथ्याः ।
सांस्कृतिक ज्याझ्वःलिसें बेहोसियात हनीगु
लहनान्यूज सम्वाददाता | थिंलाथ्व तृतीया ११३७ (डिसेम्बर २ २०१६)
वइगु थिंलागा चतुर्थी (पुष २ गते) शन्चरबाःया दिनय् कलाकार परिषदं वरिष्ठ संगीतकःमि रत्न बेहोसियात यलय् तःजिक हनीगु जूगु दु ।
ज्याझ्वःया जानकारी बीत थौं नेवाः पत्रकार राष्ट्रिय दबू यल जिल्लाया समन्वस जूगु पत्रकार सम्मेलनय् थिंलागा चतुर्थीया दिनय् वरिष्ठ कलाकार रत्न बेहोसि बज्राचार्य हना सनिल ज्याझ्वःया ग्वसाः ग्वयाः बेहोसियात हनेगु जानकारी ब्यूगु खः । बेहोसियात ख्यालि जुजु मदनकृष्ण श्रेष्ठपाखें तपुलिं पुइकाः, दोसल्लां न्ययेकाः तका व हनापौलिसें हनेगु जानकारी नं पत्रकार सम्मेलनय् ब्यूगु खः ।
निब्वय् न्ह्यब्वइगु ज्याझ्वः दुने हना ज्याझ्वः ब्वय् कलाकार बेहोसिया परीचयात्मक भिडियो प्रोफाइल नं क्यनीगु धाःगु दु ।
ज्याझ्वःया निगूगु ब्वय् धाःसा म्येहालामि अमरराज शर्मा, स्वयम्भुराज शाक्य, निशा देसार, सानुबाबु महर्जनलिसें नं थःगु सांगितिक न्ह्यब्वया न्ह्यब्वइगु धाःगु दु । लिसें कृष्णभक्त महर्जन, आराध्यलक्ष्मी खड्गी, इश्वर जोशी, मिलेश तण्डुकार, मिलन तण्डुकार, मोहन व्यन्जनकार, संजय शर्मा राजोपाध्याय लिसेंया कलाकारपिनिपाखें ख्यालः, हुलाप्याखं, वाद्यवादन न्ह्यब्वइगु जूगु दु ।
थौंया पत्रकार सम्मेलनय् नेवाः पत्रकार राष्ट्रिय दबूया केन्द्रिय न्वकूलिसें कलाकार परिषद तदर्थ समितिया दुजः सुरजबीर बज्राचार्यं सम्मानित जुइम्ह कलाकार रत्न बेहोसि बज्राचार्यया बारे व ज्याझ्वःया बारे कनादीगु खः ।
ज्याझ्वलय् पत्रकार दबूया न्वकू बज्राचार्य, कलाकार रत्न बेहोसि, नेवाः पत्रकार राष्ट्रिय दबू यल जिल्लाया नायः सुरज व्यन्जनकार व पत्रकार दबू यल जिल्लाया छ्यान्जे राजेश बज्राचार्यं पत्रकारपिन्सं न्यंगु न्ह्यसःया लिसः बियादिल ।
मतिनाया थीथी सवाः पिदन
लहनान्यूज सम्वाददाता | थिंलाथ्व तृतीया ११३७ (डिसेम्बर २ २०१६)
अमेरीकाय् च्वना वयाच्वनादीम्ह नेवाः म्येहालामि शिवराज जोशीया नेपालभाषाया याकः म्येचाः ‘मतिनाया थीथी सवाः’ थौं विमोचन जूगु दु ।
गजराज जोशी ट्रष्टया ग्वसालय् थौं टोखाय् जूगु ज्याझ्वलय् शताब्दि पुरुष संस्कृतिविद् डा. सत्यमोहन जोशीं म्येचाःया विमोचन यानादिल । म्येचाःया विमोचन संस्कृतिविद् डा. जोशीलिसे जनकवि दुर्गालाल श्रेष्ठ, संस्कृतिविद् गणेशराम लाछि व वरिष्ठ म्येहालामि रमेश ताम्राकारं मंकाः रुपं यानाद्यूगु खः ।
ज्याझ्वःया उलेज्या ज्याझ्वःया मू पाहां डा. जोशीं त्वाःदेवाय् मत च्याकाः यानादिल । डा. जोशीलिसें जनकवि श्रेष्ठ व म्येहालामि ताम्राकारं नेपाःया दक्कले न्हापांम्ह अन्तर्राष्ट्रिय धावक गजराज जोशीया किपाय् स्वां देछानाः श्रद्धान्जलि नं प्वंकूगु खः ।
ट्रष्टया दुजः दिपकराज जोशीं लसकुस यानादिल सा सुभाय् अनिल जोशीं देछानादिल ।
ज्याझ्वः ट्रष्टया नायः ध्रुवराज जोशीया सभानायकय् जूगु खः ।
‘नोबल सिरपाःया जालय् बिचाः यायेमाः’
नुगः खँ तयेगु झ्वलय् संस्कृतिविद् डा. सत्यमोहन जोशीं आः नेवाः संगीतकःमिपिन्सं नं नोबल पुरस्कारयात बिचाः यानाः अन्तर्राष्ट्रिय स्तरया श्रृजनाय् ध्यान बीमाःगु धयादिल । संगीत धयागु छुं नं भाय् म्वाःगु सकसिगु मंकाः भाय् जूगुलिं थुकिया माध्यमं हलिमय् नेवाःयात म्हसिके फइगु जोशीया धापू खः ।
मेमेगु जातीय समुदाय दुने तःमिपिन्सं थःगु समुदायया नितिं लगानी यानाच्वंगु दुगु अवस्थाय् नेवाःतय् धाःसा अथे खनेमदुगु धासें नेवाःतयके जातीय गौरव व सचेतना म्ह्वः जुयावंगु जोशीं धयादिल । थःगु समुदायया उत्थानया लागिं आर्थिक ल्याखं सम्पन्न नेवालं थम्हं फूगु वा खंगु थासय् लाय् तये फयेकेमाःगु खँ नं जोशीं कुलादिल ।
भाय् म्वाकेमाः धकाः भाषण बीपिन्सं हे थःथःगु छेँय् नेवाः भाय् ल्हायेगु त्वःता वनाच्वंगु धकाः जोशीं दुःख प्वंकादिल । भाय् धयागु हे जातीया म्हसिका जूगुलिं हलिंया न्ह्यागु कुनय् वंसां, न्ह्याग्गु भाय् ल्हाःसां थःगु मांभाय् त्वःते मज्यूगुलिइ जोशीं बः बियादिल ।
जनकवि दुर्गालाल श्रेष्ठ, म्येहालामि रमेश ताम्राकार, संस्कृतिविद् गणेशराम लाछिं म्येचाःया सफलताया भिंतुनादिल ।
म्येचालय् दुथ्याःगु म्येत नेपालय् लिसें अमेरीकाय् नं रेकर्डिङ यानागु म्येहालामि शिवराज जोशीं कनादिल । आः स्वस्थानीया बाखनय् आधारीत नेवाः म्ये दयेकेगु बिचाः यानाच्वनागु नं जोशीं जानकारी बियादीगु दु ।
शंखधर नेपालय् क्यन
लहनान्यूज सम्वाददाता | कछलागा द्वादशि ११३७ (नोभम्बर २६ २०१६)
नेपाःया दक्कले न्हापांगु एनिमेसन संकिपा ‘शंखधरया बाखं’ नेपालय् न्हापांगु शो क्यनेज्या जूगु दु ।
थौं येँय् शंखधरया बाखं क्यँसें संकिपा नेपालय् नं रिलिज याःगु खः । संकिपाया दक्कले न्हापाुं प्रिमियर शो धाःसा बेलायतय् जूगु खः ।
संकिपा क्यनेज्याझ्वलय् संकिपा दयेकेत लिसें प्रचार प्रसारय् ग्वाहालि याःपिन्त सुभाय् पौ नं देछाःगु खः ।
यन्त्रकला स्टुडियोया ब्यानरय् दयेकूगु संकिपाया धकिं बाखं च्वयेगु लिसें दृश्य सम्पादन व निर्देशनया ज्या नं संयुक्त श्रेष्ठं यानादीगु खः । संकिपाया निर्माता नं श्रेष्ठ हे खः ।
नेपाल संवतया प्रवर्तक शंखधर साख्वाःया बाखनय् आधारीत संकिपाया एनिमेशनया ज्या संयुक्त श्रेष्ठलिसें अन्जना श्रेष्ठ व नियुक्त श्रेष्ठं यानादीगु खः ।
म्येहालामि रुवि जोशी मन्त
लहनान्यूज सम्वाददाता | कछलागा एकादशि ११३७ (नोभम्बर २५ २०१६)
नेपाली सांगीतिक ख्यःया पुलांम्ह म्येहालामि रुबी जोशी थौं मन्त ।
वयकलं हालादीगु ‘तिम्रो पनि माया लाग्छ, उनको पनि माया लाग्छ’, ‘सितलुमाथि नि सितलु भयो नि’, ‘उकाली ज्यानको चिप्लेटी ढुङ्गा कान्छी म ट्याङट्याङ’लिसेंया म्येत नेपाःया संगीत ख्यलय् अतिकं लोकं व्हाः ।
उस्ताद विष्णुलाल जोशीया काय कथं वयकः वि.सं. २००१ असार २५ गते येँया डिल्लीबजारय् बूगु खः ।
