Display Style:
Column Style
सुमनाया अजूचायापूगु थ्रीडि कला
लहनान्यूज सम्वाददाता | कछलाथ्व दुतिया ११३७ (नोभम्बर १ २०१६)
स्वन्तिया झ्वलय् थीथी थासय् कलाकारततय् थीथी कथंया मन्दः दयेकेगु ज्या न्ह्यानाच्वंगु इलय् ६ तगिमय् ब्वनाच्वंम्ह सुमना बज्राचार्यं अजूचायापूगु थ्रीडि आर्ट यानाः ब्वज्या याःगु दु ।
फसिक्यबयाम्ह थौंकन्हय् बसुन्धराय् च्वनाच्वंम्ह ६ तगिमय् ब्वनाच्वंम्ह सुमना बज्राचार्यं येँया बसन्तपुलिइ गाःहितिया ४०X४० वर्ग इन्चया थ्रीडि आर्ट दयेकूगु खः । उगु थ्रीडि आर्टयात स्वयेबलय् धात्थें हे त्वाथः थें खनेदइ, गुगु वास्तविकताय् धाःसा त्वाथः मखु ।
छखें स्वयेबलय् उगु आर्ट गाःहितिया क्वय् कुहांवनाच्वंगु त्वाथः थें खनेदइसा मेखें स्वत धाःसा देगःया च्वय् थहांवनाच्वंगु त्वाथः थें खनेदइ । थम्हं थज्याःगु थ्रीडि आर्ट गनं तालीम कयागु मखसें यूट्युबय् स्वयाः हे सयेकागु मचा कलाकार बज्राचार्यं लहनान्यूजयात कनादिल ।
मूलरुपं पेन्सिलं दयेकेगु आर्टयात सुमनां छुचुं व ह्यंग्वाःचुंया ग्वाहालिं दयेकूगु श्रृजना स्वयेत बसन्तपुलिइ तःधंगु हे ल्याखय् मनूत मुंगु खः । गुलिखे स्वकुमिपिन्सं क्वथ्याःया लिसें हे क्वथ्याः नं खनेदइगु थुगु आर्टं जीवन दर्शन क्यनाच्वंगु विश्लेषण तकं याःगु खः ।
थः म्ह्यायया थज्याःगु श्रृजनशिलतायात कयाः सुमना बज्राचार्यया अबुजु निर्मल बज्राचार्यं थम्हं गौरव महसूस यानागु धयादिल ।
राजेन्द्रया ‘पहिचान यात्रा’ सार्वजनिक
लहनान्यूज सम्वाददाता | कौलागा आमै ११३६ (अक्टोबर ३० २०१६)
प्रधानमन्त्री पुष्पकमल दाहालं नेपाल सम्वतयात व्यवहारीक रुपं राष्ट्रिय सम्वतया थाय् बीकेत थम्हं फक्व कुतः यायेगु धयादीगु दु ।
थौं येँय् कोरस फिल्म्स स्टुडियोया ग्वसालय् येँय् क्वचाःगु संघीय समाजवादी फोरम नेपालया ल्यू नायः राजेन्द्र श्रेष्ठया याकः म्येचाः ‘पहिचान यात्रा’या उलेज्या ज्याझ्वलय् प्रम दाहालं न्हापाया कार्यकालय् थम्हं हे नेपाल सम्वतयात राष्ट्रिय सम्वत घोषणा यानागुलिं थुगु सम्वतलिसे थःगु दुग्यंगु स्वापू दुगु धयादिल । संविधान संशोधन मार्फत नेपाःया आदिवासी जनजाति, दलित, उत्पीडनय् लाःगु पुचः सकसिगु भावना व सः कःघाइगु संविधान दयेकेगु ज्याय् थः जानाच्वनागु दाहालया धापू खः ।
कोरस फिल्म्स स्टुडियोया नायः राजन राईया सभानायकय् जूगु ज्याझ्वलय् प्रम दाहालं श्रेष्ठया याकः सः दुथ्याःगु म्येचाःया उलेज्या यानादिल । ज्याझ्वलय् नेता श्रेष्ठं पहिचानया आन्दोलनय् थःगु सांगितिक पलाः कथं म्येचाः पिथनागु धासें म्येचाःयात आन्दोलनया हे छपलाः खः धयादिल ।
ज्याझ्वलय् श्रेष्ठं म्ये छपु हालाः नं न्यंकादीगु खः ।
थौं पिदंगु म्येचालय् जनकवि दुर्गालाल श्रेष्ठ, राजभाइ जकःमि, विक्रम सुब्बा, राजन राई लिसेंया च्वसायात न्ह्यू बज्राचार्य, राजन राई, हरि थापा व श्रेष्ठ थम्हं हे नं लय् बियादीगु दु । म्येचालय् मुक्कं च्यापु म्ये दु ।
संजयया न्हापांगु ‘कुतः’ पिदन
लहनान्यूज सम्वाददाता | कौलागा आमै ११३६ (अक्टोबर ३० २०१६)
संजय महर्जनया याकः सलय् ‘कुतः’ म्येचाः थौं यलय् उलेज्या जूगु दु ।
एनएस म्यूजिकया ग्वसालय् यलय् जूगु छगू ज्याझ्वःया दथुइ वरिष्ठ संगीतकःमि रत्न बेहोशी बज्राचार्य, वरिष्ठ संगीतकःमि अमरराज शर्मा राजोपाध्याय, संगीतकःमि नारायण बहादुर महर्जन, म्येहालामि सानुबाबु महर्जनं मंकाः रुपं म्येचाःया उलेज्या यानाद्यूगु खः ।
ज्याझ्वलय् म्येचाःया समीक्षा यासें थःगु नुगःखँ तयेगु झ्वलय् वरिष्ठ संगीतकःमि अमरराज शर्मा राजोपाध्यायं राज्यया विभेदकारी नीतिं यानाः नेवाः भासं वा थःगु मांभासं म्ये हालीपिं कलाकारत ल्यूने लानाच्वंगु खँ तयादिल । उकथं हे रत्न बेहोसिं न्हापांगु पलाः धुंकाः आः निगूगु पलाः छीबलय् अझ अप्वः मेहनत यानाः अझ बांलाःगु म्ये पिकायेत म्येहालामि महर्जनयात छ्याता बियादिल ।
ज्याझ्वलय् म्येचाः पिथनेत प्रायोजन यानाः, लय् तयाः, म्ये च्वयाः व बाजं ग्वसाः व रेकर्डिङया ज्याय् ग्वाहालि याःपिन्त मतिनाया चिं नं देछाःगु खः । लिसें उगु हे ज्याझ्वलय् म्येचालय् दुथ्याःगु छपु ज्वःम्ये म्येहालामि महर्जन व दिपा महर्जनं हालाः न्यंकूगु खः ।
थौं उलेज्या जूगु म्येचालय् मुक्कं न्यापु म्ये दुथ्याःसा व मध्ये छपु ज्वःम्ये खः । म्येचाःयात एनएस म्यूजिकं बजारय् हःगु खः ।
राजेन्द्र श्रेष्ठया ‘पहिचान यात्रा’ पिदनीगु
लहनान्यूज सम्वाददाता | कौलागा त्रयोदशि ११३६ (अक्टोबर २८ २०१६)
संघीय समाजवादि फोरम नेपालया सह अध्यक्ष राजेन्द्र श्रेष्ठया याकः सलय् नेपालभाषाया म्येचाः ‘पहिचानया यात्रा’ पिदनीगु जूगु दु ।
नेता श्रेष्ठया प्यंगूगु याकः म्येचाःकथं पिदनेत्यंगु थुगु म्येचालय् विशेष यानाः झीगु हक अधिकारया सःयात हे थाय् बियागु वयकलं धयादीगु दु । थःगु पहिचानया आन्दोलनया झ्वलय् हे छगू मेगु पलाः कथं थुगु म्येचाः पिथनेत्यनागु नेता श्रेष्ठं लहनान्यूजयात धयादिल ।
थ्वयां न्ह्यः, श्रेष्ठया जिगु मन क्यासेटचाः, जिगु मन सिडिचाः व जिगु जिन्दगी म्येचाः पिदनेधुंकूगु दु ।
वइगु कौलागा आमै लक्ष्मीपूजाया दिनस येँय् छगू ज्याझ्वः यासें थुगु म्येचाः विमोचन जुइगु श्रेष्ठं जानकारी बियादीगु दु ।
तंकालिया फोटो सूट क्वचाल
लहनान्यूज सम्वाददाता | कौलागा सप्तमि ११३६ (अक्टोबर २२ २०१६)
बज्र क्रिएसनया ब्यानरय् दयेकेत्यंगृ नेपालभाषाया संकिपा तंकालिया प्रचारया ज्या तच्वःगु दु ।
संकिपाया पोष्टर लिसें मेमेगु प्रचारया ज्वलंया नितिं थौं संकिपाया फोटो सूट क्वचाःगु दु । फोटो सुटया नितिं फोटाग्राफर नृपेन्द्रलाल श्रेष्ठं किपा कयादीगु खःसा संकिपाया निर्देशक शैलेस डंगोलं हे निर्देशन यानादिल ।
संकिपाया नकिंपिं सगुना बज्राचार्य, रजनी खड्गी व सुरेश महर्जनया किपा काःगु खः । फोटो सुट यलया आल्कोहितिइ याःगु खः ।
थुगु फोटो सुटया किपात याकनं हे थुगु लहनान्यूज डट कमपाखें हे सार्वजनिक यायेगु निर्देशक डंगोलं धयादीगु दु ।
