Display Style:
Column Style
संगीतकार रत्न बेहोसियात हनीगु
लहनान्यूज सम्वाददाता | कछलागा षष्ठी ११३७ (नोभम्बर २० २०१६)
यलया कलाकार परिषदं वरिष्ठ संगीतकःमि रत्न बेहोसियात हनीगु जूगु दु ।
वइगु थिंलागा चतुर्थिकुन्हु छगू सांगितिक ज्याझ्वःया ग्वसाः ग्वसें परिषदं वयकःयात हनेत्यंगु खः । ‘कायमचा ल्यायम्ह जूगु स्वयेबलय्, राजमहलया न्ह्यइपु बजारय्’ लिसें आपालं लोकं व्हाःगु म्येत च्वयेगु लिसें लय् चिनेगु व हालेगु ज्या यानादीम्ह बेहोसियात नेवाः संगीत ख्यलय् ताः ई न्ह्यःनिसें मदिक्क बिया वयाच्वनादीगु योगदानयात च्वछासें हनेत्यंगु खः ।
सांगितिक ज्याझ्वलय् नेवाः संगीत ख्यलय् लोकं व्हाःपिं कलाकारतयगु नं न्ह्यब्वया दइगु ग्वसाः खलकं न्ह्यथंगु दु । ज्याझ्वलय् स्वयम्भुराज शाक्य, अमरराज शर्मा, सानुबाबु महर्जन, निशा देशारं लिसें नं थःथःगु सांगितिक न्ह्यब्वया न्ह्यब्वयेत्यंगु दु ।
यलया अग्नि पार्टि प्यालेसय् याइगु ज्याझ्वःया टिकटया मू द्वःछि तका तयातःगु दु ।
भृगुरामया बुदिं सांगितिक रुपं हन
लहनान्यूज सम्वाददाता | कछलागा पंचमि ११३७ (नोभम्बर १९ २०१६)
जनगायक भृगुराम श्रेष्ठया ८४दँया बुदिं थौं छगू सांगितिक ज्याझ्वः यासें हंगु दु ।
थौं श्रीघः ज्ञानमाला, नःघः व मेत्तागार दलुया मंकाः ग्वसालय् येँय् छगू सांगितिक ज्याझ्वःया ग्वसाः ग्वयाः जनगायक श्रेष्ठया बुदिं हंगु खः । उगु हे ज्याझ्वलय् धम्मावति गुरुमामं भाजु श्रेष्ठयात कसागां न्ययेकाः बुदिंया भिन्तुना देछासें हनादिल ।
ज्याझ्वलय् म्येहालामि श्रेष्ठं थीथी ज्ञानमाला भजन लिसें थःगु मेमेगु आधुनिक म्येत नं हालाः न्यंकादीगु खः । ज्याझ्वलय् पूर्णबहादुर शाक्यं तँसा कथं बोधिमाला म्ये हालाः न्यंकादीगु खः ।
ज्याझ्वलय् ब्वतिमिपिन्सं जनगायक श्रेष्ठया नेपालभाषा व बौद्ध संगीत ख्यलय् योगदानया चर्चा याःगु खः ।
श्रेष्ठया आःतक्क स्वचाः याकः म्येचाः लुमन्तिइ, इलं हाःगु म्ये व रागमि नुगलय् पिदनेधुंकूगु दु ।
हलिं नेवाः म्ये कासा लिज्यात
लहनान्यूज सम्वाददाता | कछलागा दुतिया ११३७ (नोभम्बर १६ २०१६)
हलिं नेवाः दबू नेपाः देय् मू कवःया ग्वसालय् थ्व हे वइगु पोहेंलाथ्व चतुर्थी ११३७ (पौष १८ २०७३)य् जुइगु धयातःगु ‘हलिं नेवाः म्ये कासा’ लिज्याइगु जूगु द ।
दबू नेपाः कवलं थौं येँइ् पत्रकार सम्मलेनया ग्वसाः ग्वयाः आः थुगु कासा वइगु सिल्लागा १४ ११३७ (फेब्रुअरी २५ २०१७)य् जुइगु जानकारी ब्यूगु खः ।
पत्रकार सम्मलेनय् नेपाः कवःया नायः पुष्कर माथेमां नेपाः पिनं कासाय् ब्वति काये मंदुपिनिगुपाखें धें धें बल्लाःया लागिं माःगु तयारी लिसें लिपांगु धेंधें बल्लाःया लागिं नेपाः थ्यंकः वयेत नं थःपिन्त यक्व हे इनाप वःगुलिं कासायात लिछ्यायेमाःगु धयादिल । लिसें नायः माथेमां नेपाः दुनं नं स्वन्ति व न्हूदँया लकस दथुइ तयारीया लागिं ई मगाःगु धकाः कासा लिछ्यायेत इनाप वःगु जानकारी नं बियादिल ।
कवःया मू छ्यान्जे रश्मिला प्रजापतिं लिपांगु धेंधें बल्लाःया लागिं नेपाः दुनेया कासामित ल्ययेत पोहेंलागा पारु ११३७ (जनवरी १३ २०१७) कुन्हु ल्यज्या जुइगु धयादिल । अथे हे नेपाः पिनेयापिनिगु लागिं स्काइप अडिसन पोहेंलागा ८ व ९ ११३७ (जनवरी २० व २१ २०१७)या दिनय् ल्यज्या (अडिसन) जुइगु कनादिल ।
पत्रकारतयगु न्ह्यसःया लिसः ब्युसें मू छ्यान्जे प्रजापतिं थुगु धेंधें बल्लाखय् हलिंन्यंकनं न्ह्याम्ह नं कलाकारं नेपालभाषाया म्ये हालाः ब्वति कायेफइगु धयादिल । धेंधें बल्लाखय् त्याकामिपिन्त मुक्कं १ लख तकाया सिरपाः इनीगु धाःगु दु ।
‘त्यो समय त्यो परिवेश’ विमोचित
लहनान्यूज सम्वाददाता | कछलाथ्व पंचमि ११३७ (नोभम्बर ५ २०१६)
न्हूजः गुथिं कविराज दशरथमान सिंहं च्वयाद्यूगु सफू ‘त्यो समय, त्यो परिवेश’ या थौं येँय् उलेज्या याःगु दु ।
गुथिं थौं येँय् ग्वसाः ग्वःगु छगू ज्याझ्वःया दथुइ मन्त्रीपरिषदया पूर्व नायः व पूर्व प्रधानन्यायधिस खिलराज रेग्मीं सफूया उलेज्या यानादिल ।
जीवनया ताः ई आयूर्वेद चिकित्सा पेशाय् बियादीम्ह पाल्पा तानसेनया सिंहं थम्हं खनागु, भोगे यानागु व न्यनागु खँयात थःगु कृतिइ थाय् बियागु धयादिल ।
सफूया पिकाकः न्हूजः गुथिया नायः सूरबहादुर श्रेष्ठं सफुतिइ न्ह्यथनातःगु सिंहया अनुभव भावी पुस्ताया लागिं प्रेरणादायी जुइगु धयादिल । लिसें नायः श्रेष्ठं सफुतिं तत्कालीन पाल्पा तानसेनया परिवेश थुइकेत, सीकेत ग्वाहालि याइगु धयादिल ।
‘शंखधरया बाखं’ लन्डनय् क्यन
लहनान्यूज सम्वाददाता | कछलाथ्व पंचमि ११३७ (नोभम्बर ४ २०१६)
नेपाःया न्हापांगु एनिमेटेड संकिपा “शंखधरया बाखं“ (द लेजेन्ड अफ् शंखधर) या न्हापांगु क्यनेज्या लन्डनय् जगु दु ।
न्हूदँ नेपाल संवत् ११३७ या लसताय् लन्डनया गीनफोडर टाउन हलय् प्रवासी नेपाःमितय् दथुइ ‘शंखधरया बाखं’या प्राइभेट भ्युइङ् याःगु खः । संकिपा क्यनेज्या ज्याझ्वलय् निर्देशक संयुक्त श्रेष्ठं संकिपाया बारे स्वकुमिपिन्त कनेगुलिसें अन्तक्र्रिया नं याःगु ख ।
११३७दँ न्ह्यःया प्राचीन नेपालया ऐतिहािसक पृषभूिमइ दयेकातःगु थुगु संकिपां नेपालया राष्ट्रिय विभूित शंखधर साख्वालं गुकथं नेपाल सम्वत न्ह्याकल धइगु क्यनातःगु दु । ख्वप व येँया सामाजिक स्वापुतिइ आधारित संकिपाय् २०७२ बैसाख १२या तःभुखाचं येँयात लाकूगु लिच्वःलिसे नं लनातःगु दु ।
वइगु १७ डिसेम्बर २०१६य् ग्वाहालि नांया संस्थां नेपालय् रिलिज यायेत्यंगु दु । संकिपा २०१६या दुने बेलायतया लन्डनय्, अमेरिकाया वाशिंगटन डिसिइ व २०१७य् मिडिल ईष्ट व थीथी युरोपेली शहरय् क्यनेज्या जुइगु निर्देशक श्रेष्ठं लहनान्यूजयात जानकारी बियादीगु दु ।
४५द्वः पाउन्डया लागतय् दयेकूगु संकिपाया मुख्य निर्माता संयुक्त श्रेष्ठ खःसा सह निर्माताय् शशिधर मानन्धर, लोचन मानन्धर, महन्त श्रेष्ठ, बेबिना माली, सुशील प्रजापति, राकेश तुलाधर, राजु मृगेन्द्र जोशी, बिमल व गंगा कक्षपति, शशि महाजु, सचेतन तुलाधर, रितादेवी सिंह, भूपेन्द्रमान शाक्य व बिजय बज्राचार्य खः ।
संकिपाया पुचः म्हसिका
यन्त्रकला स्टुडियोजया ब्यानरय् दयेकूगु संकिपाया च्वमि व निर्देशक संयुक्त श्रेष्ठ खः । एनिमेशन टोलीइ संयुक्त श्रेष्ठया लिसें अंजना शेष्ठ व नियुक्त श्रेष्ठ दु अले सहायक एनिमेटरय् विज्ञान प्रजापति व प्रंजल कक्षपति दु ।
मौलिक नेपाली कलाकािरता व बाखंशैली लिनातःगु धाःगु संकिपाय् ख्यालिजुजु मदनकृष्ण श्रेष्ठ, राजाराम पौडेल, किरण केसी, मदनदास श्रेष्ठलिसें नं डबिङ यानादीगु दु । संगीत विश्व शाहिं बियादीगु खःसा निशा देसारं म्ये हालादीगु व सुनिता राजभण्डारीं नृत्य निर्देशन यानादीगु खः ।
