अक्षयकुमारं म्हितूगु बलिउड संकिपा ‘सरफिरा’ शुक्रवाः रिलिज जूगु दु। तःधंगु बजेट व स्टार कलाकारया बाबजुद नं थ्व संकिपाया बक्स अफिसय् बांलाःगु प्रदर्शन याये मफुत।

संकिपा पिहावःगु न्हापांगु दिं २.५ करोड, शनिवाः ४.२५ करोड व आइतबाः ५.२५ करोड आम्दानी याःगु खः। थुकिं वाःया अन्त्यतक मुक्कं १२ करोड मुंकूगु दु। अक्षय थेंज्याःम्ह स्टारया निंतिं थ्व म्हो जक कमाइ खः।

लिपांगु इलय् अक्षयया दक्वं फिल्मत लगातार फ्लप जुया वनाच्वंगु दु । कमाई स्वयेबलय् ‘सर्फिरा’यात वयागु न्यागूगु फ्लप कथं कायेछिं। थगुने अक्षय ‘ओएमजी २’य् क्यामियो जुयाः म्हितूगु खःसा थ्व फिल्म नं हिट जूगु खः। तर थ्व संकिपाया मू भूमिका पंकज त्रिपाठीं म्हितूगु खः।

थ्व बाहेक अक्षयया दक्वं संकिपा बक्स अफिसय् फेल जुयावना च्वंगु दु। सन् २०२१ य् अक्षयया संकिपा ‘सूर्यवंशी’ तसकं हिट जूगु खः। तर अत्रंगी रे, बच्चन पाण्डे, सम्राट पृथ्वीराज, रक्षाबन्धन, कट्पुतल्ली (ओटीटीइ रिलिज जूगु), राम सेतु, सेल्फी, ओएमजी २, मिशन रानीगंज, बडे मियां छोटे मियां, आः सरफिरा थेंज्याःगु फिल्म फुक्कं फ्लप जूगु दु।

ओटीटीइ रिलिज जूगु ‘कटपुटल्ली’ व ‘ओएमजी २’ बाहेक ‘सरफिरा’ अक्षयया वंगु प्यदँया दुने न्याक्वःगु फ्लप संकिपा खः। अक्षयकुमारया मेगु संकिपा ‘खेल खेल में’ भदौ १५ गते रिलिज जुइत्यंगु दु । तर थ्व फिल्मया चर्चा तकं मजू।

थ्वहे दिनय् जोन अब्राहमया “वेद” व राजकुमार राव व श्रद्धा कपुरया “स्ट्री २” नं उकुन्हु हे रिलिज जुइत्यंगु दु, गुकिं यानाः फिल्मया व्यवसायय् लिच्वः लायेफु।

भारतीय संकिपा ‘कल्की २८९८ एडी’ हलियकं बक्स अफिसय् १००० करोड आम्दानी याःगु दु।

थुगु प्याखंपाखें लय्ताःम्ह निर्मातां प्रभासया पात्र कर्णया लुकया भिडियो सामाजिक संजालय् शेयर याःगु दु। भिडियोय् प्रभास कर्णया रुपय् खनेदूगु दु। वया फ्यानतय्सं नं थ्व लुकयात ययेकाच्वंगु दु। प्रभासलिसें थुगु संकिपाय् अमिताभ बच्चन, दीपिका पादुकोण, कमल हासन व दिशा पटानी मू भूमिकाय् दु।

सैकनिल्कया कथं संकिपां स्वंगूगु वालय् उलि रकम प्राप्त याःगु खः। थ्व संकिपां झिंछन्हुया दिं भारतय् ५.२ करोड आम्दानी याःगु उल्लेख यानातःगु दु। थुकिया नापनापं भारतय् संकिपाया आम्दानी ५४८ करोड थ्यंगु दु। प्रभासं म्हितूगु थुगु संकिपा व्यावसायिक कथं ताःलागु दु। लिपांगु इलय् वय्कःया संकिपात बक्स अफिसय् बांलाक न्ह्यानाच्वंगु मदु।

सन् २०१७ य् पिदंगु ‘बाहुबली २’ लिपा प्रभासया संकिपात नं सफलता काये फयाच्वंगु मदु। ‘सलार ः पार्ट वान’ जक बक्स अफिसय् हिट जूगु दु ।

‘कल्की’या बजेट ६०० करोड जूगु खँ धाःगु दु, गुगु आःतकया दकलय् थिकेगु भारतीय संकिपा खः। नाग आश्विनया निर्देशनय् दयेकूगु थुगु संकिपा दक्षिण भारतया तेलुगु भाषी राज्यय् बांलाक न्ह्यानाच्वंगु दु।

हिन्दी बाहुल्यता दुगु राज्यय् नं थ्व फिल्मया आम्दानी आकर्षक जूगु धाइ। तेलुगु संस्करणं १६ न्हु तक २५५ करोड आम्दानी याःगु दु । हिन्दी संस्करणं २३६ करोड कमे याःगु खः।

व्यापार विश्लेषक रमेश बालया कथं थुगु संकिपां विश्वन्यंकं १ हजार करोड आम्दानी याये धुकुगु दु। थ्वसिबें न्ह्यः थथे कीर्तिमान शाहरुख खानया निगू संकिपा ‘जवान’ व ‘पठान’याके याःगु खः।

भारतीय अर्बपति मुकेश अम्बानीया चीधिकःम्ह काय् अनन्त व गर्लफ्रेण्ड राधिका मर्चेन्ट दथुइ इहिपा जूगु दु।

मुम्बईलय् आइतबाः व सोमवाः भव्य रिसेप्सनया ग्वसाः ग्वःगु दु। उगु भ्वँजय् ३५ करोड अमेरिकी डलर खर्च जुइगु अनुमान याःगु खःसा हलिउड व बलिउडया स्टारतय्गु तक ब्बति दुगु खः।

इहिपा ज्याझ्वलय् सेलिब्रिटी जक मखु विदेशी धनी व व्यापारी, राजनीतिज्ञत नं सहभागी जूगु खः।

अम्बानीया इहिपा ज्याझ्वलय् हलिउड स्टार जोन सीना, किम कार्दशियन, म्येहालामि रेमालिसें भारतीय फिल्म ख्यःया सकल स्टारत नं ब्वति काउगु दु।

मोरक्कोया केन्जा लियाली विश्वया न्हापांगु मिस एआई जूगु दु। आर्टिफिसियल इन्टेलिजेन्स चार्टय् न्हापांगु थाय् त्याकूगु खः।

केन्जा लाइलं थःगु हे दयेकूगु मरियम बेसाया निंतिं २० हजार डलर अनुदान नं त्याकूगु खः। थ्व त्याकेधुंकाः केन्जां छगू अन्तर्वार्ताय् थःत मानवीय भावना महसुस यायेमफु तर थुकियात कयाः थः तसकं उत्साहित जुयागु दु धका धयादीगु दु।

वय्कःया इन्स्टाग्रामय् छगू लख ९० हजार स्वयां अप्वः फलोअर्स दुसा नसाः ज्वलं, संस्कृति, फेसन, सौन्दर्य व यात्रालिसे स्वापू दुगु पोस्ट नं दु।

त्याकेधुंकाः केन्जा लालीं धाःगु दु, “जिगु कुतः मोरक्कोया समृद्ध सम्पदायात क्यनेगु खः, गुकिं संस्कृति व प्रविधिया अद्वितीय मिश्रणयात क्यनाच्वंगु दु ।”

फिनिक्स एआईया सीईओ बेसां मोरक्कोया प्रतिनिधित्व गर्वया लिसें यायेगु अवसर जूगु धाःगु दु।

विश्वप्रसिद्ध कोलम्बियाली पप स्टार शाकिरा हाकनं थःगु जादू न्यंकेगु निंतिं तयार जूगु दु। सन् २०२४ या कोपा अमेरिकाया समापन ज्याझ्वलय् म्ये हालादीगु स्वयेखनीगु जूगु दु।

कनमेबोलं सार्वजनिक याःगु छगू विज्ञप्तिइ कासा इतिहासया पुलांगु कासा मध्ये छगू कोपा अमेरिका फाइनलय् ब्वति काइम्ह न्हापांम्ह कलाकार शकिरा जुइगु खँ न्ह्यथनातःगु दु। कनमेबोलया अध्यक्ष एलेजान्ड्रो डोमिंगेजं धाःगु दु, “शाकिरा छम्ह असाधारण दक्षिण अमेरिकी स्टार खः, गुम्हेस्यां विश्वयात हे अजूचायेका बिउगु दु, वयागु म्येत ग्रहया हरेक कुनाय् हालेगु व प्याखं ल्हुइगु याइ।” वय्कःया कला सीमापारया लखौं मनूतय्थाय् थ्यंगु दु।

वय्कःया माध्यमं कोपा अमेरिका २०२४ या मञ्चय् वय्कलं कासाय् जोश व एकताया सन्देश प्रवर्द्धन याइगु खँय् जिमिस भलसा कयागुदु। शाकिरां थःगु न्हूगु एल्बम ‘लास मुजेरेसया नो लोरान’ पाखें नोभेम्बरनिसें विश्व भ्रमणय् वनेगु तयारी यानाच्वंगु दु। उत्तर अमेरिकाय् वय्कःया १४ गू एरिना शो जुइगु ज्याझ्वः दु।