लोकह्वागु धार्मिक सिरियल ‘रामायण’ य् सीताया भूमिका म्हितादीम्ह अभिनेत्री दीपिका चिखलिया नेपालय् वःगु दु।दीपिका म्हिगः येँ थ्यकः वःगु खः।

अभिनेत्री दीपिका सामाजिक संस्था जनजाति कल्याण आश्रमया शनिवाः जुइगु आर्मी अफिसर्स क्लबय् १४ क्वःगु वार्षिकोत्सवय् ब्बति कायेगु निति नेपाः वःगु खः।

रामानन्द सागर निर्देशन याःगु ‘रामायण’ य् चर्चित बलिउड अभिनेत्री दीपिकां अभिनय याःगु खः। वयकः भारतीय लोकसभाया पूर्वसांसद न खः।

गायक राजेशपायल राई व वया जहान साङबुङ राई दथुइ कानुन कथं सम्बन्ध विच्छेद जूगु दु।

चैत १५ गते काठमाडौं जिल्ला अदालतय् सम्बन्ध विच्छेद जूगु दु धका अदालतया सूचना अधिकारी चन्द्रप्रसाद पन्थीं जानकारी बिःगु दु।

न्यायाधीश पदमराज पाण्डेया एकल इजलासं सम्बन्ध विच्छेदया फैसला याःगु खः। गायक राई न सम्बन्ध विच्छेदया मुद्दा दायर याःगु खः।

अदालतं माम व काय् यात ५० लाख रुपैयाँ बिइत, नक्सालय् १ आना, १ पैसा, ३ दाम क्षेत्रफल दुगु छेँ कलाम्हेसित नाप काय् १८ दँ मदुतले लँय् १५ हजार बिया मानाचामल भरे यायेत आदेश बिःगु दु।

२०७८ साल असोज महिनाय् जक ब्याहा दर्ता याःगु खः।

ख्वपया महाकालि नृत्य कला परिषदया ग्वसालय् ख्वपय् नेवाः होलि महोत्सव ज्याझ्वः जूगु दु।

उगु ज्याझ्वलय् नेवाः कलाकारिता ख्यःया आपालं कलाकःमि मुना थवंथवय् रंग इला होलिया भिन्तुना देछागु ज्या जुगु खः।अथेहेतुं उगु ज्याझ्वलय् निर्देेशक विश्वास बज्राचार्यया बसन्तया बेला व निर्देशकं बालमुकुण्द प्रजापतिया दिलमाया निपु म्येया म्युजिक भिडियो पितब्वज्या नं जूगु खः।

परिषदया न्वकु ओमचरण अमात्यया सभाध्यक्षताय् जूगु उगु ज्याझ्वलय् कलाकारिता ख्यःया न्ह्यलुवाः आशाकाजी थकु मूपाहाँ कथं झायादीगु खः। ज्याझ्वलय् नेपालभाषाया न्हांपाम्ह सिने पत्रकार विजयरत्न असंबरे, कलाकार सुरेन्द्र तुलाधर, संगीतकार जुगल डंगोल, भक्तपुर लेडि जेसिजया पूर्व अध्यक्ष सबिका त्वायनाबासु, परिषदया मू सल्लाहकार ध्रुब नारायण श्रेष्ठ लगायत पिनिगु ब्बति दुगु खः।

सांगितिक ज्याझ्वलय् सरस्वति मानन्धर, कृष्ण महर्जन, मन्जिल शाक्य, जयलक्ष्मी सिद्धि बज्राचार्यपिन्स म्ये हालादीगु खः।

मतिना व रोमान्स दुथ्याकातःगु म्येया म्युजिक भिडियो “आखाँ झुम्न थाल्यो“ सार्वजनिक जूगु दु।

बरिष्ठ गायक गणेश थापाया सलय् सुदन लुईटेलया  शब्द, सुवर्ण कुमारया संगीतय् उगु म्युजिक भिडियो पिहावःगु खः।उगु म्युजिक भिडियोलय् कमल सिंह व स्नेहा जोशीं अभिनय याःगु खः।

सन्तोष तामाङ्गया छायाँकन, विजय राज भुर्तेलया सम्पादन व निर्देशनय् तयार जुगु खः।

नेवाः साधना कला केन्द्रपाखें बागमति भाईया नामं बिस्कं म्हसिका दुम्ह सुन्दरमान श्रेष्ठं च्वयादीगु अयला अप्वः त्वने मजिउ धइगु सामाजिक सन्देश ज्वना नेपालभाषाया न्हूगु म्ये “लहिना तयागु दु धाः” या म्यूजिक भिडियो प्रिमियर मंगलवाः रञ्जना सिनेप्लेक्सय् जूगु दु।

नानीशोभा महर्जनं हालादीगु उगु म्येया संगीतकार, एरेन्जर, मिसिङ व मास्टरि दिप तुलाधरं यानादीगु खः। उगु म्युजिक भिडियोय् सरस्वती मानन्धर, सुरेन्द्र श्रेष्ठ, मिरा डंगोल, राजेश श्रेष्ठ, सुद्धलक्ष्मी श्रेष्ठ, ताराराम मुनकःमि व बालकलाकार सुजी नेपाली, प्रेम कार्की व शोभा कार्कीपिन्सं अभिनय यानादीगु खः।

म्युजिक भिडियोय् समाः मिरा डंगोल, क्यामेरा, सम्पादन व कलरिङ राजेश शाक्यं यानादीगु खःसा नाजाम्ह निर्देशन पवन जोशीं यानादीगु खः।

मूपाहाँ कथं वरिष्ठ संगीतकार धन बहादुर गोपाली, विशिष्ट पाहाँपिं वरिष्ठ पत्रकार नेपालभाषाया न्हापांम्ह म्युजिक भिडियो निर्देेशक विजयरत्न असंबरे, सरिता महर्जन, येँ वडा नं १८ वडाध्यक्ष न्हुछेंकाजी महर्जन, साहित्यकार विक्रमभक्त नोशी व पौभा सायमि झायादीगु खः।