वरिष्ठ संगीतकार गुज्य मालाकारया याकः संगीत ज्याझ्वः याइगु जुइगु दु।

इन्द्रेणी सांस्कृतिक समाज (इसास) या ग्वसालय् थ्व हे वइगु ३२ गते शुक्रवाः याकः संगीत ज्याझ्वः जुइत्यंगु खः। इसासं वंगु आइतवाः छगू पत्रकार सम्मेलनयानां ज्याझ्वलय् संगीतकार मालाकारं झिंन्हय्पु म्ये न्ह्यब्वइगु जानकारी बिउगु खः।

ज्याझ्वःयाबारे जानकारी बिसें इसासया अध्यक्ष बीरप्रसाद भन्सारीं गुपु म्ये बाजं ग्वसाः सहित न्ह्यब्वयेगु व च्यापु म्ये ट्रायकय् हालीगु खँ कनादीगु खः।

उगु ज्याझ्वलय् गायकपिं जुजुकाजी रंजित, वीरप्रसाद भन्सारी, सत्यनारायण मानन्धर, सतीश महर्जन, मथुरा महर्जन, दीपा महर्जन, रत्नशोभा महर्जन, मीना महर्जन, रानीशोभा महर्जन, रोजी डंगोल श्रेष्ठ, गंगादेवी महर्जन, स्वस्ती महर्जन, वीरमाया महर्जन, मोहनशोभा महर्जन, प्रमिला महर्जन, रफेला महर्जनया लिसें गुज्य मालाकारया सः थ्वइ।

पत्रकार सम्मेलनय् वरिष्ठ संगीतकःमि मालाकारया परिचय बियादिसें अध्यक्ष भन्सारीं वय्कलं ४३ दँ न्ह्यः जनकवि दुर्गालाल श्रेष्ठया रचनाय् संगीत तयादीगु छपु लसकुस म्ये नं न्ह्यब्वयेगु खँ कनादीगु खः।

ज्याझ्वः किपूया बर्खाहितिइ च्वंगु केएनएस किचे ब्यांक्वेटय् जुइसा थुकी टिकटया मू द्वःछि तका तयातःगु दु। ज्याझ्वः लिपा ब्यलिया नं व्यवस्था जुइगु जानकारी बिउगु दु।

गायक सतीश महर्जनया सलय् हालातःगु म्ये ‘सलिंचाय्’या म्यूजिक भिडिओ सिथिनखः कुन्हु पिहावइगु जूगु दु।

मगन इन्टरटेनमेन्टया यूट्यूब च्यानलय् न्हिनसिया ५ ताः इलय् रिलिज जुइत्यःगु खः। आर. मानन्धरं च्वयादिगु उगु म्येया म्यूजिक भिडिओलय् मू कलाकार राष्ट्रिका शाक्य व रजिन महर्जन दुसा सहयोगी कलाकार व मचा कलाकारपिं नं दुथ्याः।

वरिष्ठ गायक जुजुकाजी रञ्जितया ‘छंगु म्हगः गुलि बांलाः’ व रत्नशोभा महर्जनया ‘वया मां जि’ मगन इन्टरटेनमेन्टया न्ह्यब्वया खः। निगुलिं म्यूजिक भिडिओनं स्वकुमिपिनि दथुइ बांलाःगु छाप त्वःतेत सफल जूगु दु।

‘छंगु म्हगः २’ कथं प्रस्तुत ‘सलिंचाय्’ म्यूजिक भिडिओनं नं बांलाःगु प्रभाव लाकीगु भलःसा काये थाय् दु।

वैवाहिक बलात्कारसम्बन्धी मुद्दाय् नेपाल आइडल विजेता रवि ओडं प्रहरीइ आत्मसर्मपण याःगु दु।

कञ्चनपुरया कृष्णपुर नगरपालिकाया ओडं बिहीवाः इलाका प्रहरी कार्यालय झलारीइ थः हे उपस्थित जूया जिल्ला प्रहरी कार्यालयया प्रहरी नायब उपरीक्षक उमेश जोशीं धाःगु दु। जोशीया कथं रवियात जिल्ला अदालतं न्यान्हुया म्याद थप याना अनुसन्धान जुयाच्वंगु दु।

नेपाल आइडल सिजन २ या विजेता ओडविरूद्ध वैवाहिक बलात्कार व अप्राकृतिक मैथुनया द्धपनय् वया जहानं वंगु चैत २० गते उजुरी बिःगु खः। प्रहरीं उगु हे दिं जिल्ला अदालतपाखे ओडया नामय् पक्राउ पुर्जी जारी याःगु खः। ओड सांगीतिक ज्याझ्वलय् ब्बति कायेगु निति देय् पिने जुगुलि ज्वने मफुगु खः।

बलिउड सुपरस्टार सलमान खानया न्हुगु संकिपा ‘सिकंदर’ य् अभिनेत्री रश्मिका मन्डन्ना म्हितीइगु जुगु दु।

सकिपाय् रश्मिका निर्माता साजिद नाडियावालां च्वंगु दु, ‘जिमिसं रश्मिकायात ‘सिकन्दर’ संकिपाय् सलमानया अपोजिटय् लसकुस याये। निम्हेसिगु अन–स्क्रिन जादु स्वयेत लँ पियाच्वनेत थाकुया च्वंगु दु।’

सिकंदरय् ल्यःज्या जुइ धुकां रश्मिकां च्वंगु दु, ‘यक्को ई लिपा छिकपिन्स जित मेगु प्रोजेक्टया बारेय् न्यना च्वनादीगु खः। थन छगु अज्जु चाइपु। सिकन्दरय् छगु ब्बः जुइ दया जिं सुभाय् बियाच्वना।’ अथे हे थ्व हे दथुइ सामाजिक सञ्जालय् सलमानया छपाः किपा भाइरल जूगु दु। थुगु संकिपा ‘सिकंदर’ या सेट खः व सलमानं थुगु संकिपाया सुटिङ सुरु जुइ धुकल।

अय्न थुगु सम्बन्धय् आःतक छु न आधिकारिक घोषणा जुगु मदुनि। थुगु संकिपाय् सलमान व रश्मिका न्हापां नापं ज्या याये त्यःगु खः। थुकियात ‘गजनी’ व ‘हलिडे’ थे जाःगु संकिपा निर्देशन याये धुकुम्ह एआर मुरुगादासं निर्देशन यायेत्यःगु खः। साजिद नाडियाडवाला थुगु संकिपाया निर्माता खः। थुगु दँय् हे इदय् रिलिज जुइ।

निर्माता साजिद नाडियाडवालानाप सलमानं ‘जुडवा’, ‘मुझसे शादी करोगी’ व ‘किक’ थे जाःगु हिट संकिपाय् ज्या याय् धुकुगु दु। ‘सिकंदर’ स्वया न्हापा मुरुगादास व सलमानं सन् २०१४ य् रिलिज जुगु न्हापां ‘जय हो’ य् नाप ज्या याय् धुकुगु दु। उगु संकिपाया च्वपि मुरुगादास खः।

नेपालभाषा म्युजिक भिडियो ख्यलय् थौंकन्हे न्हियान्हिथं धइथें न्हू न्हूगु म्ये पिहाँवया च्वंगु दु। थ्वहे झ्वलय् छगू ज्याझ्वःया दथुइ छपू म्येया पितब्वज्या जूगु दु।

ताः ई न्ह्यः निसें गायन ख्यलय् पलाः न्ह्याका च्वनादीम्ह सुमन बज्राचार्यं हालादीगु उगु “लँय् वइम्ह” म्येया म्युजिक भिडियो पितब्वज्याय् सन्चारकःमि रामकृष्ण खडगी मूपाहाँ व नेपालभाषा म्युजिक भिडियो ख्यःया न्हापांम्ह निर्देशक विजयरत्न असंबरे विशिष्ट पाहाँ कथं झायादीगु खः।

उगु ज्याझ्वलय् लोकंह्वाम्ह म्येहालामि निशा देसार, सन्चारकःमि स्वतन्त्रसंसार महर्जन, क्यामेरोर्सन शंकर महर्जन लगायत विशेष पाहाँ कथं झायादीगु खः। सचिका चिना, ङेङापा झ्याःया दरबार लगायत आपालं बाँबांलागु म्युजिक भिडियो दयेकादी धुंकुम्ह विश्वास बज्राचार्यया निर्देशनय् तयार जूगु उगु भिडियोया कोरियोग्राफि व मू मोडल जुया उपासना शाक्यं ज्या यानादीगु खः।

म्येया च्वमि व लय् चिनामि फिरोज बज्राचार्य खःसा किपालुमि व सम्पादन आकृष्ट शाक्य खःसा विशुम राज शाक्यं मोडलिग याःगु खः। मूपाहाँ रामकृष्ण खडगीं गायक सुमन बज्राचार्य छुं ई सुलं च्वने धुंका आः हाकनं संगीतख्यलय् खनेदयेक वःगु धइगु वयकया संगीतख्यः प्रतिया मतिना खः धका धयादिगु खः।