यल महानगरपालिका वडा १६ या कलाकार समितिया ग्वसालय् यलया जावलाख्यलय् म्युजिक भिडियो निर्माण कार्यशाला जूगु दु।

म्युजिक भिडियो नेपाः दुने जूगु दकले न्हापांगु कार्यशाला धका दावी याःगु थ्व कार्यशालाय् थ्यंमथ्यं स्वीम्ह म्युजिक भिडियोकःमिपिन्सं ब्वति काःगु खः। उगु ज्याझ्वलय् कलाकार समितिया कजि सुरजबीर बज्राचार्यं लसकुसयासे यलया १६ वडाया मू आज्जु धइगु शहरया भौतिक संरचनाया संरक्षणया नापनापं सामाजिक व सांस्कृतिक विकास नं खः धका धयादिलसा नेपाःदेय संस्कृतिया तःमिगु देश खः उकिसनं यल धइगु ललितकला या ज्वमदुगु दसु जुया च्वंगु शहर खः धका धयादिल।

वयकलं सांस्कृतिक उत्थानया झ्वलय् वडा १६ पाखें थीथी कथंया ज्या जुया च्वंगु व थौंकन्हे नेपालभाषाया संगीतख्यलय् म्युजिक भिडियो या तधंगु ल्हाः दयाच्वंगुलि थ्व ख्यःया बारे खँ ल्ह्वनेगु निंतिं थ्व कार्यशाला ग्वसाः ग्वयागु खः धका धयादिल।

ज्याझ्वलय् थ्व कार्यशाला या कजि संगीतकःमि नील शाक्यं ग्वसाः तालाकेत ग्वाहालि यानादीपिं सकसित सुभाय् देछासे कलाकार समितिपाखें नेवाः संगीतख्यःया सम्बर्द्धन या निंतिं ज्या यात निरन्तरता बिइगु खँ न्ह्यथना दिल। कार्यशालाय् प्रशिक्षक कथं झायादीम्ह नेपालभाषा म्युजिक भिडियोया न्हांपाम्ह निर्देशक व सिने पत्रकार विजयरत्न असंबरें संसारय् म्युजिक भिडियोया स्थिति व नेपालभाषाया संगीतख्यलय् म्युजिक भिडियोया थाय् बारे खँ न्ह्यथंसे म्युजिक भिडियोया अवधारणा व निर्देशन पक्षया जानकारी बियादिलसा मेम्ह प्रशिक्षक नांजाम्ह सिनेमाटोग्राफर सिद्धार्थ शाक्यं म्युजिक भिडियोया क्यामेरा पक्षया खँ व नांजाम्ह फिल्म एडिटर मानिकरत्न तुलाधरं म्युजिक भिडियोया सम्पादन पक्षयात कया प्रशिक्षण बियादीगु खः।

रत्नशोभा महर्जनया “यःमरि च्वामूस” ज्वःम्येया म्युजिक भिडियो पितब्वज्या जुगु दु। राजन राज सिवाकोटीया च्वसाय् व संगीतय् रत्नशोभायात राजन राज सिवाकोटिं हे सलय् साथ बियातःगु खः।

खस नेपाली भाय् व नेवाः भाय् ल्वाक्छ्याना चिनातःगु उगु म्ये संगीतकःमि शिवाकोटिं हे च्वयादीगु खःसा उकिया साहित्यकार रजनीमिलां नेवाः भाषं भाय हिलादीगु खः। येँया टेकुइ राणाकालिन तीन देवल थानय् जूगु थ्व म्येया पितब्वज्याय् ख्यालिजुजु मदनकृष्ण श्रेष्ठ मूपाहाँ झायादीगु खः।

अशोक कुमार माली व मनिराज लवटया न्ह्यब्वया व ए एन एन प्रोडक्शनया पिथना कथं पिहाँ वःगु उगु म्युजिक भिडियोलय् अशोक कुमार माली व तिमिला गोपालि लगायत आपालं कलाकार पिनिगु ब्वति दु।

कोरियोग्राफि राजन शाही, क्यामरा व सम्पादक सोहन मानन्धर, सृंगार सनमकुमार श्रेष्ठ व मिरा डंगोल पिन्सं यानादीगु खः।

‘नेपाःमि झी’ म्युजिक भिडियो महेशमान डंगोल ‘लँजुवाः’ नं च्वयादीगु छगु ज्याझ्वः दथुइ पितब्बज्या जुगु दु।

आइतवाः सिटिसि मलया सिनेप्लेक्सय् जूगु पितब्बज्याय् मूपाहां कथं वरिष्ठ गायक जुजुकाजी रंजित झाःगु खःसा बिशेष पाहाँ कथं वरिष्ठ संगीतज्ञ अमरराज शर्मा झायादीगुलि प्रकाश साय्मि व बिजयरत्न असंबरे समीक्षक कथं झायादीगु खः।

निल शाक्यया लसय् तयार जूगु थुगु म्येय् आशिष डंगोल, सजल महर्जन, कुञ्जनी महर्जन व यज्जु शिल्पकारं सः बियादीगु दु। राष्ट्रिय भावं जाःगु नेपालभाषा संगीत व रामकृष्ण खड्गीं निर्देशन यानादीगु खः। भूपेन्द्र बज्राचार्यं म्यूजिक एरेन्ज, रेकर्डिङ्ग व मिक्सिङ्ग फिरोज बज्राचार्यं, सम्पादन बालकृष्ण बंशीं यानादीगु खःसा संकिपाया छाँयाकन व कलरिङ्ग रक्की महर्जनं, ग्राफिक्सया ज्या राजन शाक्यं यानादीगु खः।

महेशमान डंगोलया सभाध्यक्षताय् जुगु उगु ज्याझ्वलय् लसकुस न्वचू रामकृष्ण खड्गीं बियादीगु खः। पाहांपिं जुजुकाजि रंजित, अमरराज शर्मा, प्रकाश साय्मि, विजयरत्न असंबरे, संगीतकार निल शाक्यपिंसं नुगः खँ तयादीगु ज्याझ्वःया संचालन संचारकःमि प्रमिला मानन्धरंं यानादीगु खः।

संजीप प्रधान न्हूगु म्येलिसें म्युजिक भिडियो पिहावःगु दु। म्येहालामि प्रधानं ‘स्टिम इन्जिन’ बोलयागु म्येया म्यूजिक भिडियो सार्वजनिक यानादीगु खः।

ताः ईया दिपा धुंकाः म्येहालामि प्रधानया न्हूगु म्ये सार्वजनिक जूगु खः।थौंकन्हय् अमेरिका च्वनाच्वंम्ह प्रधानं छुं दिं न्ह्यः नेपाल वःगु इलय् हे थ्व म्येया सुटिङ क्वचायेकादीगु खः। आः भिज्युअल एडिटिङ सिधयेकाः जुन १७ य् थःगु हे युट्युब च्यानलमार्फत थुगु म्यूजिक भिडियो सार्वजनिक यानादीगु खः।

म्यूजिक भिडियोलय् मोडल करिश्मा श्रेष्ठलिसें म्येहालामि प्रधान थम्हं नं अभिनय यानादीगु दु। सार्वजनिक थुगु म्ये च्वयेगु व लय् चिनेगु ज्या नं म्येहालामि प्रधानं हे यानादीगु खः।

म्येया सुटिङ काभ्रे जिल्लाया पलाँतिया न्ह्यइपूगु लुइ यानातःगु दु। भिडियोया छायांकन उत्सव दाहालं याःगु दुसा दृश्य सम्पादन विकास दाहालं याःगु खः। म्युजिक भिडियोया निर्देशन सुब्रत आचार्यं यानादीगु दु

‘आदिवासी जनजाति संकिपाया लागिं कथावस्तु छनौट’ विषयक कार्यशाला गोष्ठी यलय् न्ह्याःगु दु। नेवाः फिल्म सोसाइटीया ग्वसालय् प्यन्हुयंकया कार्यशाला गोष्ठी आइतबाः (असार ९) निसें यलया नुगलय् न्ह्याःगु खः।

आइतबाः छग ज्याझ्वःया दथुइ आदिवासी जनजाति चलचित्र महासंघया नायः पुर्खाजित राईं गोष्ठीया उलेज्या यानादिल। ज्याझ्वलय् न्ववासें महासंघया नायः राईं नेपालया मातृभाषी संकिपाया सुरुवात नेवाः संकिपा ‘सिलु’ पाखें जूगु लुमंकुसें आदिवासी जनजाति संकिपाया उत्थानया लागिं नेवाः समुदायया हे भूमिका महत्त्वपूर्ण जुइगुलिइ बः बियादिल।

‘नेवार समुदाय मदंक ह्यूपाः वइमखु धकाः गुथी विधेयकविरुद्धया आन्दोलनं नं प्रमाणित यायेधुंकल। आः मातृभाषी संकिपाया ख्यःया उत्थानया लागिं नं नेवाः समुदाय हे दनेमाः। नेवाः समुदाय मदंक झीगु विकास जुइमखु’ नायः राईं धयादिल। अथेहे, वरिष्ठ सिने पत्रकार विजयरत्न असंबरें मातृभाषी संकिपाकःमितयसं नाफा वा छुं नं कथं आर्थिक लबःया आशा मयाःसे समुदाय व मातृभाषाया उत्थानया हे लागिं थ्व ख्यलय् न्ह्यज्यानाच्वंगु धयादिल। ‘मातृभाषी संकिपाकःमितयसं संकिपा दयेकाः धेबा कमे यायेगु, छेँ दयेकेगु आशा याःगु मदु।

मांभाय् व समुदायया पहिचान स्थापित यायेत जानाच्वंपिं मातृभाषी संकिपाकःमितयत राज्यं संरक्षण यायेमाः’ असंबरेया धापू खः। नेवाः फिल्म सोसाइटीया नायः बिराजकाजी राजोपाध्यायं सकिपायात कथावस्तुं हे आदिवासी जनजाति संकिपा दयेकीगुलिइ बः ब्युसें भाषा, वसः व लोकेसनय् जक ध्यान बियां मगाइगु धयादिल।

अथेहे, फिल्म सोसाइटीया निवर्तमान नायः लुःजः सिंहं विचार विमर्श, सहलहं हे न्हूगु बिचाः पिथनाः नेवाः संकिपा ख्यःया उत्थानया लागिं नेवाः फिल्म सोसाइटी जानाच्वंगु धयादिल। असार ९ गते आइतबाःनिसें न्ह्याःगु कार्यशाला गोष्ठी वइगु असार १२ गते बुधबाः क्वचाइ।

कार्यशाला गोष्ठीया न्हापांगु दिनय् पेजथ्री बाःछिपौया सम्पादकलिसें सर्ट फिल्म निर्देशक व स्क्रीप्ट च्वमि दर्शनबीर शाक्यं आदिवासी जनजाति विषयवस्तुइ स्क्रीप्ट च्वयेबलय् बिचाः यायेमाःगु पक्षयाबारे खँ तयादीगु खः।

किपा बिक्रम खड्गी