कार्म व मेनुका प्रधान अभिनित फिल्म ‘महानगर’या आधिकारिक पोस्टर सार्वजनिक याःगु दू।

छन्हु बहनि निम्ह अपरिचित मनू नापलाइगू व वया लिपा याःगू घट्नाक्रमयात कया दयकातःगु फिल्मय् मोहन राई न निर्देशन याःगु खः। सन् २०२१ य् कोलकता अन्तर्राष्ट्रिय फिल्म महोत्सवय् विश्व प्रिमियर जूगुलि ‘महानगर’ अमेरिकाय् ब्रुकलिन फिल्म फेस्टिभल, नेपाल अमेरिका अन्तर्राष्ट्रिय फिल्म फेस्टिभल, वासिङ्गटन डी.सी. साउथ एसियन फिल्म फेस्टिभल, स्पेनया एसियन फिल्म फेस्टिभल बार्सिलोना व नेपाःया पामे अन्तर्राष्ट्रिय फिल्म फेस्टिभल व नेपाल अन्तर्राष्ट्रिय फिल्म फेस्टिभल (निफ)य् अफिसियल स्क्रिनिङ जुइ धुकुगु खः।

नाप इण्डस भ्याली इन्टरनेसनल फिल्म फेस्टिभलय् न छनोट जूगु खः। ‘महानगर’ न निफय् राष्ट्रिय चलचित्रया क्याटगोरी उत्कृष्ट फिल्म, उत्कृष्ट पटकथा, अभिनय नाप निर्देशनय् अवार्ड न त्याकूगु खः सा नेपाल अमेरिका अन्तर्राष्ट्रिय फिल्म फेस्टिभलय् नेपाली पानोरामअन्तर्गत अनरेवल मेन्सन याःगू खः।

नेपाः व भारतय् छन्हु हे प्रदर्शन यायेगु तयारीइ दुगु संकिपा ‘प्रेमगीत ३’ या हिन्दी संस्करणया टिजर ट्रेलर रिलिज जूगु दु।

भारतीय फिल्म समीक्षकपिन्स् शनिबाः सुथय् हे सामाजिक सञ्जालपाखे टिजर रिलिज याःगू खः। टिजरं मुख्य पात्र प्रेम (प्रदीप खड्का) या चरित्रं म्ये वा राजगद्दीमध्ये छगू ल्ययेगू बाध्यता दुगु क्यनातःगु खः।

१ मिनेट ताःहाकगु टिजरय् प्रदीपयात माक्वः थाय् बिउगु खः। टिजरय् मतिना व रोमान्स नाप द्वन्द्वयात न प्राथमिकता बिःगू दु। च्वापू जाःगु मुस्ताङी दृश्य आकर्षक जू।

टिजरय् प्रदीपबाहेक कृष्टिना गुरुङ, शिव श्रेष्ठ, मनिष राउत, सुनिल थापा, लक्ष्मी बर्देवापि न दुथ्याकातःगू दु। छेतेन गुरुङ व सन्तोष सेन निर्देशित फिल्म नेपाः व भारतय् असोज ७ गते रिलिज यायेगु तयारी दू।

नेपाःया नांजाम्ह संगीतकार गोपाल योन्जनया ८० क्वःगु बुदिंया लसताय् नेवाः साधना कला केन्द्रं छगू सांगितिक ज्याझ्वःया वरिष्ठ संगीतकार राजु सिंहयात गोपाल योन्जन एचिभमेंट अवार्ड देछागु दु।

केन्द्रया संस्थापक बागमति भाइ सुन्दर मान श्रेष्ठया सभाध्यक्षताय् जूगु उगु ज्याझ्वलय् मूपाहाँ कथं निर्दशक प्रकाश सायमि झायादीगु खः।

ज्याझ्वलय् गायक रोजी श्रेष्ठ डंगोलं लसकुस यानादीगु खः सा इन्दिरा कलानिधि महाविद्यालयया कजि धनबहादुर गोपालि व भुषण खरेल नाप विश्व बल्लभं गोपाल योन्जन बारे थःथःगु खँ तयादीगु खः ।

अथेहे सांगितिक ज्याझ्वलय् म्येहालामि रोजी श्रेष्ठ डंगोल, शुद्ध लक्ष्मी श्रेष्ठ, राज गोपनलि, उत्तरा मानन्धर, शैलेश सिंह, देवेन्द्र मान सिंह, किशोर शाही, बिजय मानन्धर, सुरेन्द्र श्रेष्ठ, सतिश महर्जन, कैलाश भुसाल, माधव दाहाल, सिद्दार्थ श्रेष्ठ लगायतपिन्स गोपाल योन्जनया म्ये हालादीगु खः।

बलिउड अभिनेत्री तब्बु बुधबाः संकिपा भोलाया सुटिङ यायेगु झ्वलय् घाःपाः जूगु दु। भोलाय् तब्बुं उच्च प्रहरी अफिसरया भूमिका निर्वाह याउगु खः।

मिडिया रिपोर्टया कथः छगु दृश्यय् एक्सन यायेगु झ्वलय् घाःपाः जूगु खः। रिपोर्टया कथं तब्बु हैदरावादय् भोलाया छगू दृश्यया लागि जङ्गलय् ट्रक चले यानाच्वंगु खः।

फिल्मया सेटय् उपस्थित स्वास्थ्यकर्मी न तसकं घाःपाः मजुगु धका धाउगु दु। तब्बुयात घाः जुइवं फिल्मया निर्देशक अजय देवगनं भोलाया सेटपाखे वयात डिस्चार्ज याउगु खः।

नेपालय् प्रदर्शन जुइ धुकुगु संकिपा ‘चपली हाइट ३’ अस्ट्रेलियाय् रिलिज जुइगु दु।

वइगु भदौ २५ गते (सेप्टेम्बर १०)य् सिड्नीइ संकिपा प्रदर्शन जुइत्यःगु खः। निर्माता अर्जुन कुमारया कथं बाबा एजुकेसन कन्सल्टेन्सी व आरकेएस अस्ट्रेलियां संकिपायात रिलिज यायेत्यःगु खः।

सिड्नी नाप ब्रिसबेन, एडिलेड, तास्मानिया राज्यय् संकिपा क्यनेत्यःगु खः। कोरोना महामारीया कारण प्रभावित जूगु संकिपा वंगु शुक्रबाः नेपालय् हाकनं रिलिज जुगु खः।

स्वस्तिमा खड्का, महेश त्रिपाठी, सुपुष्पा भट्ट लगायतपिनिगु मुख्य भूमिका दुगु संकिपातय् थ्रिलर जनरा याउगु खः।