राजु मानन्धरया च्वसाय् व सज्जु मानन्धरया सलय् अडियो व भिडियो म्येचा छन्त नापलाये सातकिया पितब्वज्या छगु ज्याझ्वः दथुइ जनकवि दुर्गालाल श्रेष्ठं बिमोचन यानादीगु खः।

मूपाहाँ जनकवि श्रेष्ठं त्वाःदेवाय् मत च्याका ज्याझ्वःया उलेज्या यानादीगु ज्याझ्वलय् गणेश कुमारी मानन्धर फाउण्डेशनया ग्वसालय् जुउगु खः। खुपु म्ये व म्येया भिडियो दुथ्यागु थ्व म्येचालय् सज्जु मानन्धर, निशा देशार व रत्नशोभा महर्जनं म्येय् हालादिगु खः।

नांजाम्ह संगीतकःमि जुगल डंगोलं लसय् व बाजं ग्वसाः ग्वयादीगु म्येया भिडियोत धाःसा सुरेन्द्र मानन्धर, राजेन्द्र डंगोल, सुरोज महर्जन लगायतया अलग अलग निर्देशक पिन्सं निर्देशन यानातःगु खः।

दिलबहादुर मानन्धरया सभाध्यक्षताय् जूगु खः ज्याझ्वलय् सांसद जीवनराम श्रेष्ठ, नेवाः देय् दबुया अध्यक्ष पवित्र बज्राचार्य, जुजुकाजि रन्जित, बरिष्ठ सिनेपत्रकार विजयरत्न असंबरे पाहाँ कथं झायादीगु खः।

नेपाःया न्हापांगु समावेशी म्युजिक अवार्ड राष्ट्रिय समावेशी म्युजिक अवार्ड २०२२ (निम अवार्ड) सिरपाःया धेंधेंबल्लाखय् लाःपिन्त छगू ज्याझ्वःया दथुइ मनोनयनया दसिपौ लःल्हाःगु दु।

उगु ज्याझ्वलय् गोकर्णेश्वर नगरपालिकाया मेयर सन्तोष चालिसे मूपाहाँ कथं झायादीगु खः। चलचित्र कलाकार संघया उपाध्यक्ष मोहन निरौलाया सभाध्यक्षताय् जुउगु ज्याझ्वलय् ग्वसाः खलःया नायः माधवराज खरेलं लसकुस न्वचु तसें नेपाः देय् धइगु साँगितिक व साँस्कृतिक विविधतां जाःगु देय् जुउगुलिं नेपाः दुनेया थीथी भाय् दुथ्याकाः समाबेशी म्युजिक अवार्ड न्ह्याकागु खँ न्ह्यथनादिल।

ज्याझ्वलय् वरिष्ठ पत्रकार शान्तिप्रिय, भरत बम्जन, नेपालभाषाया दकले न्हापांम्ह म्युजिक भिडियो निर्देशक लिसें बरिष्ठसिने पत्रकार विजयरत्न असंबरे तुलाधरया न उपस्थिति दुगु खः।

नेपाःया न्हापांगु समावेशी अवार्डया रुपय् म्हसीका दूगु राष्ट्रिय समावेशी म्युजिक अवार्डया न्याक्वःगु संस्करणया सिरपाःया निंतिं उत्कृष्ट धलखय् लाःपिनिगु मनोनयन धलः सार्वजनिक याःगु खःसा पावर इन्टरनेशनल मिडिया नेपालया ग्वसालय् जुयावयाच्वंगु समावेशी म्युजिक अवार्डय् स्वदेशगान, गजल, आधुनिक, पप, लोकपप व लोकदोहारीया नापनापं नेपाःया थीथी भाय् कथं काँठे, डेउडा, मैथली, थारु, तामाङ, नेपालभाषा लगायतया भाषाभाषीपिनिगु सहभागी दुउगु खँ पिम नेपालया महासचिव अले अवार्ड ज्याझ्वःया संयोजक कमला जोशीं जानकारी बियादिल ।

थ्वहे चैत्र २० गते जुइगु समावेशी म्युजिक अवार्डय् देय् दुनेया आपालं कलाकारपिनिगु भव्य सहभागिता दइगु खँ अवार्ड आयोजक समितिया निर्देशक राजन थापां कनादिल ।

हरिसिद्वि जलय् छगू तःजिगु ज्याझ्वःया दथुइ स्वपू म्येया पितब्वज्या जूगु दु।

शिलाचह्रे, स्वाँया वासना व छंगु रुप खना बोलया स्वपू थी थी म्येया म्युजिक भिडियो पितब्वज्याय् नेपालभाषाया न्हापांम्ह म्युजिक भिडियो निर्देशक सिनेपत्रकार विजयरत्न असंबरे मूपाहाँ कथं झायादीगु खः।

जलया नांजाम्ह तबला गुरु निरन्जन महर्जनया सभाध्यक्षय् विशेष पाहाँपिं समता संगीत साधना केन्द्रया तुलसी महर्जन, हरिसिद्वि भजन मण्डलया सचिदानन्द महर्जन, समाजसेवी महेन्द्र श्रेष्ठ व मंगल महर्जन, जिवित जल्मी लगायत पितब्वज्या जूगु म्येया म्येहालामिपिं अशोक महर्जनं व राजेन्द्र महर्जन पिन्सं नुगः खँ तयादीगु खः।नुगः खँ तयेगु झ्वलय् मूपाहाँ असंबरें नेपालभाषाया सांगितिक व साँस्कृतिक ख्यलय् हरिसिद्वि जलया कलाकःमि पिनिगु ज्वमदुगु योगदान दु धका धयादिसे आःया कलाकारिता आर्थिक समृद्धिया निंतिं जुइमाल धका धयादिल।

ज्याझ्वलय् पितब्वज्या जुगु स्वपू म्ये मध्ये शिलाचह्रे, पाहाँचह्रे बोलया म्ये म्येहालामिपिं अशोक महर्जनं व राजेन्द्र महर्जन पिन्सं हालातःगु खःसा विष्णु जल्मीं  च्वयादीगु खः। उगु म्येय् निरन्जन महर्जन कुमारीया संगीत संयोजन, किपालुमि रबिन डंगोल, निर्देशन व सम्पादन बी के जल्मीं यानादीगु खःसा विश्वनाथ महर्जन, विक्रम महर्जन लगायतया कलाकारपिन्सं म्हितातःगु दु।

स्वांया वासना म्ये अशोक महर्जन काकें हालातःगु खःसा म्येच्वमि कृष्णराम महर्जन,संगीत निरन्जन महर्जन कुमारी, किपालुमि व सम्पादन बी के जल्मी,कोरियोग्राफि व निर्देशन सुरज नापित खःसा थुके किशोर चिपालु व रोजिना सुवालया अभिनय दु।

छंगु रुप खना बोलया म्ये राजेन्द्र महर्जन व दिपा महर्जनं हालातःगु खःसा म्ये च्वमि व लय चिनामि निरन्जन महर्जन कुमारी,किपालुमि व छ्याय्फ्वायकःमि सोहन मानन्धर, कोरियोग्राफि आराध्य लक्ष्मी खडगीं यानादीगु थ्व म्येय् राजु महर्जन, आराध्य लक्ष्मी खडगी व पूर्णकाजी ज्यापु या नापनापं कलाकार मोडल व कोरियोग्राफर आराध्यो लक्ष्मीया मां सुर्जलक्ष्मी अबु राम खडगी अले मचा कलाकारपि समर्पण गमाल व रोजिशा बलामि पिन्सं अभिनय यानादीगु व थुकिया निर्देशन जितेन्द्र महर्जनं यानादीगु खः।

नांजाम्ह पौभा च्वमि साहित्यकार प्रेममान चित्रकारं च्वयादीगु “जित स्वया मिखा भाय् याना“ म्येया म्युजिक भिडियोया पितब्वज्या छगू ज्याझ्वःया दथुइ जुगु दु।

मदुम्ह स्रष्टा प्रेममान चित्रकारं थौंसिबें झिंन्यादँ न्ह्यः च्वया रेकर्ड यानादीगु थुगु म्ये थौंकन्हेया नांजाम्ह संगीतकःमि जिवित जल्मीं लसय् हनादीगु खःसा वयकलं हे एरेन्ज नं यानादीगु खःसा समा पूजाबिकल शाही, छायांकन÷सम्पादन  बाबुकाजी जल्मी “बिके जल्मी“ याना दीगु खः।

जुजुकाजि रन्जित व संगीता शाक्यं म्ये हालादीगु खः। म्येच्वमि कथं नांजाम्ह यल वडा ल्याः १६ या वडा अध्यक्ष निर्मलरत्न शाक्य मूपाहाँसुइ न्ह्याःगु पितब्वज्या ज्याझ्वः गिफ्ट नेपालया ग्वसालय् जुगु खः।

ग्वसाखलःया कजि कलाकार व मोडल शोभा महर्जनया सभाध्यक्षय् जुगु उगु ज्याझ्वः भिक्षु तपस्वीधम्म महास्थविर भन्ते पाखें पवित्रं परित्राण पाठ याना शुरु याःगु खः। ज्याझ्वलय् उगु म्युजिक भिडियोया निर्देशक रामकृष्ण खडगीं लसकुस न्वचु तयेगु झ्वलय् म्युजिक भिडयो निर्माणयात कया छुं छुं खँ कुलादिल।

अथेहे, बरिष्ठ सिनेपत्रकार विजयरत्न असंबरें म्येयात कया समिक्षा यानादिगु खः। ज्याझ्वलय् संगीतकार जिवित जल्मी, म्येहालामि जुजुकाजि रन्जित, स्वर्गिय प्रेममान चित्रकारया जहान विद्या चित्रकार, पाहाँ सुरेन्द्र तुलाधर व मूपाहाँ निर्मलरत्न शाक्यपिन्सं मदुम्ह चित्रकारं च्वयादीगु “जित स्वया मिखा भाय् याना“ म्येया बारे थःथःगु नुगःखँ तयादीगु खः।