जुजुभाइ तुलाधरया सलय् थ्वःगु छपू न्हूगु म्येया म्युजिक भिडियो पिहावःगु दु ।

” मन त्यासा काये धुंसेंलि” धका धागु थ्व म्येया च्वमि नं वयक तुलाधर थःहे खः । येँया सिडिसि हलय् जूगु पितब्वज्याय् जुगु ज्याझ्वलय् तुलाधरया संगीतख्यलय् न्ह्यानावगु पलाःयात कया सकसिनं लसता प्वंकुगु खः।

ज्याझ्वलय् नेपालभाषाया न्हापांम्ह म्युजिक भिडियो निर्देशक विजयरत्न असंबरें म्येहालामि तुलाधर उमेरं थकालि जूसां म्ये ल्याय्म्ह पुस्तायात ध्यानय् तया पिकागुयात च्वछाया दिसे मन त्यासा काये धुंसेंलि म्येया म्युजिक भिडियो ल्याय्म्हसु दु धका गु खः।

ज्याझ्वलय् रामकृष्ण खडगीं निर्देशक सुरेन्द्र तुलाधरया थ्व कुतः नाप मेमेगु म्युजिक भिडियो न बाँलागु खँ कनादिल । सुरेन्द्र तुलाधरया निर्देशन यानादीगु खः।

लुभुइ “गालय् वन” संकिपाया क्यनेज्या जुगु दु।

केबिएस लुभुया सभाध्यक्षताय् जुगु ज्याझ्वलय् मूपाहाँ धिरेन शाक्य, वरिष्ठ कलाकार नरेन्द्र थापा, देवेन्द्र मान जोशी, संकिपाया निर्देशक संयुक्त स्थापित, पुरुषोत्तम पक्का चकलेट, किरन जोशी व शोभा श्रेष्ठपिनिगु नं विशेष उपस्थिति दुगु खः ।

नीन्यादँ न्ह्यःतक तसकं लोकंह्वाःगु टेलिसिरियल हिजो आजका कुरा’ सिरियलया आः संकिपातय् खनेदयेक जूगु दु। पन्त फिल्म प्रोडक्शनया न्ह्यब्वया कथं तयार जुउगु ‘हिजो आजका कुरा’ (द मुभि) संकिपाय् सन्तोष पन्त मेन रोलय् खने दइ।

उकिया नापनापं तसकं लोकंह्वाःम्ह कलाकार सबिन शाक्य नं थ्व संकिपातय् छगू बिस्कं भुमिका ज्वना वःइगु जुगु दु।

वरिष्ठ हास्यकलाकार सन्तोष पन्तया मू भूमिका दुगु थुगु संकिपातय् रमा थपलिया, सबिन शाक्य, मंजु श्रेष्ठ नाप चर्चित कलाकारपि जयन्द लामा, लक्ष्मी भुषाल, निरन्जन अर्याल, रमेश अधिकारी, कमला रेग्मी, रिचा शर्मा, रिमा बिश्वकर्मा, दिव्यदेव पन्त, केके अधिकारी, साकार पन्त, अनुष्का अधिकारी, जेविका कार्की, विनायक कुइकेलपिन्स अभिनय याःगु दु।

पन्त फ्लिम प्रोडक्सनया ब्यानरय् निर्माण जूगु थुगु संकिपातय् छायांकनमा रवि सायमी, सम्पादन÷कलर÷ग्राफिक्सय् बिनय कंसाकार, पाश्र्वत संगीतय् भुपेन्द्र बज्राचार्य, साउण्ड मिक्सिंग बिजु बज्राचार्य याःगु दु।

जुनु श्रेष्ठं हालादिगु नेपालभाषाया न्हुगु म्ये लुमंका च्वना जिं, जिगु नुगलय्, समा याना, मन जिगु उइं जुल म्ये दुथ्याका ”जुनु” म्युजिक भिडियो एल्बम पितब्बज्या जूगु दु।

छगु ज्याझ्वः दथुइ वरिष्ठ ख्याली जुजु मदनकृष्ण श्रेष्ठ व बरिष्ठ म्येहालामि दिप श्रेष्ठं मंकाः कथं पितब्बज्या यानादीगु खः।

थुगु एल्बमय् जि शाह, जनकवि दुर्गालाल श्रेष्ठ, बद्रि वेदना, सरला श्रेष्ठ व गोविन्द ह्यूमतपिन्त च्वयादीगु दिपेन्द्र मान सिंह, गोविन्द ह्यूमत, अनिल शाहीपिन्स लय् तयादीगु खः। जिवित जल्मी म्युजिक एरेन्ज यानादीगु खः।

गीतकार व यल महानगरपालिका वडा नम्बर १६ या वडाध्यक्ष निर्मलरत्न शाक्यया ‘लिक्क वयाः’ नांया म्युजिक भिडियोया प्रिमियर शो जूगु दु।

करिब १३ दँ लिपा बजारय् वःगु नेपालभाषाया म्ये ‘लिक्क वयाः’ वःगु म्यूजिक भिडियो निर्माण जूगु धका ग्वसाः खलकं जानकारी बिःगु दु । लबिम मलय् छगु ज्याझ्वः दथुइ यल महानगरपालिकाया प्रमुख चिरिबाबु महर्जनं पित ब्बज्या यानादीगु खः।

प्रमुख महर्जनं सङ्गीतय् छु न भाय् दइमखु धका धयादीसे लोकह्वाःगु म्येयात अन्तर्राष्ट्रियकरण यायेमाः धका बःबियादीगु खः। ज्याझ्वलय् निर्देशक प्रकाश साय्मी, वरिष्ठ सङ्गीतकार मनराजा नकर्मी, कलाकार हिसिला महर्जन, गीतकार निर्मलरत्न शाक्य, गायिका रत्नशोभा महर्जन व गायिका दीपा महर्जनपिन्स थःथःगु बिचाः तयादीगु खः।

उगु म्युजिक भिडियोय् वरिष्ठ सङ्गीतकार मनराजा नकर्मीया सङ्गीतय् रत्नशोभा महर्जनं सः बियादीगु खः। देवकुमार श्रेष्ठ निर्देशन यानादीगु म्युजिक भिडियोय् कलाकार मणिराज लवट व हिसिला महर्जनं अभिनय यानादीगु खः।