नेपालभाषाया संकिपा व म्यूजिक भिडियो ख्यलय् दकले तःधंगु अवार्ड नेपालभाषा स्टार म्यूजिक भिडियो अवार्ड्सया निक्वःगु संस्करणय् लहना मिडियायात नं सम्मान याइगु जूगु दु ।

अवार्ड ज्याझ्वलय् संसार तेज स्मारक कला सम्मानपाखें लहना मिडियायात सम्मान यायेत्यंगु खः । थुगु सम्मान थुगुसी थप याःगु खः ।

थुगु सम्मानय् लहना मिडियालिसें मेपिं प्यम्ह कलाकःमिपिन्त सम्मान यायेत्यंगु दु । वरिष्ठ पत्रकार श्याम स्मृत, वरिष्ठ निर्देशक पवन जोशी, वरिष्ठ संगीतकार लिसें तबला बादक मनराजा नकःमि व वरिष्ठ गायिका निशा देसारयात नं थुगु सम्मानपाखें सम्मान यायेत्यंगु दु ।

शनिबाः किपुलिइ जूगु अवार्डया नोमिनेसन व पदक लःल्हायेगु ज्याझ्वलय् थुगु सम्मानलिसें मेमेगु सम्मानपाखें नं सम्मानित जुइत्यंपिन्त खादां न्ययेकाः ब्वनापौ लःल्हाःगु खः ।

उगु हे ज्याझ्वलय् संसार सप्तरंगी कला सम्मानं सम्मानित जुइत्यंपिं न्हयम्ह कलाकःमिपिन्त नं खादां न्ययेकाः ब्वनापौ लःल्हाःगु ख ।

संसार सप्तरंगी कला सम्मानपाखें थुगुसी वरिष्ठ संगीतकःमि रत्न बेहोशी, कलाकार नगीना जोशी, सुशील राजोपाध्याय, गायक पवित्र कसाः, संगीतकार गोविन्द ह्यूमत, संगीतकार लिसें संगीत संयोजक जुगल डंगोल, निर्देशक, कलाकार लिसें संगीतकःमि रामकृष्ण खड्गीयात सम्मान यायेत्यंगु दु ।

उगु हे ज्याझ्वलय् मुक्कं ३२ क्याटगरी दुने नोमिनेत जूपिन्त नं दसिपौ व पदक लःल्हाःगु खः ।

प्रत्येक क्याटगरीया नोमिनेसनय् झिम्ह÷झिम्हेसित दुथ्याकूगु दुसा देशभक्ति व भजन संगीतया विशेष क्याटगरीइ झिंन्याम्ह नोमिनेसनय् लाःगु दु ।

सम्मानया हे झ्वलय् थौंकन्हय् तसकं चर्चित म्ये ‘सालुगु गाचा’ यात विशेष सम्मान याइगु जूगु दु ।

सालूगु गाचा म्येया म्यूजिक भिडियो निर्माण पुचः कुटुपुखु भजन खलः, वाद्यवादक लक्ष्मीप्रसाद डंगोल, रचनाकारलिसें संगीत सर्जक बिबेन्द्र डंगोल, संगीत संयोजक रोजमान महर्जनलिसें अवार्डय् दुथ्याःगु खोकनाया छगू जक पुचः नित्यनाथ भजन खलःयात खोकना प्रतिभा कला सम्मान बीत्यंगु खः ।

अथे हे, अवार्डया नितिं दर्ता जूगु म्येमध्ये दकले अप्वः म्यूजिक भिडियो निर्देशन व कोरीयोग्राफी याःम्ह आराध्यलक्ष्मी खड्गी, दकले अप्वः म्ये अपलोड जूगु युट्युब च्यानल ज्योति म्यूजिक व युट्युबय् दकले अप्वः स्वःगु म्ये राजमति कुमति (महिला भर्सन) यात नं विशेष सम्मान याइगु जूगु दु ।

थुगुसीइ अवार्डय् लाइफ टाइम अचिभमेन्ट अवार्ड ख्यालि जुजु तकं धाइम्ह वरिष्ठ कलाकार मदनकृष्ण श्रेष्ठयात बीगु जूगु दु ।

ज्याझ्वलय् न्ववासें अवार्डया ग्वसाः खलः संसार क्रिएशन्सया क्रिएटिभ डाइरेक्टर स्वतन्त्र महर्जनं संसारय् दकले तःधंगु व दकले ताःहाकःगु अवार्ड ज्याझ्वः कथं विश्व रेकर्ड कायम यायेगु थःपिनिगु कुतः न्हापांगु संस्करणय् पूमवंसां थुगुसी निगूगु संस्करणय् सफल दयेकेगु कुतः यायेगु धयादिल ।

‘जिमिसं नेपालया नामय् छगू विश्व रेकर्ड कायम यायेत स्वयागु खः तर, न्हापांगु संस्करणय् कोरोना महामारी व लकडाउनया हुनिं पूवमन । आः थ्व कुतःयात मूर्त रुप बीत जिपिं न्ह्यज्यानागु दु’ क्रिएटिभ डाइरेक्टर महर्जनया धापू खः ।

कला ख्यः व कलाकःमिया सम्मान व हःपाःया लागिं ग्वसाः ग्वयागु अवार्ड ज्याझ्वलय् म्ये रचनानिसें म्यूजिक भिडियो प्रोडक्सनतक्कया ज्याय् हरेक विधा व क्षेत्रय् अवार्ड बीत स्वयागु महर्जनं धयादिल ।

संसार क्रिएशनया संस्थापक प्रेमाहा महर्जनं अवाडया लागिं मुक्कं ८५ म्ये दर्ता जूगु जानकारी ब्युसें नेपालभाषाया कला क्षेत्रयात गति बीत अवार्ड ज्याझ्वः यानागु धयादिल ।

अवार्ड वितरणया मू ज्याझ्वः वइगु माघ २९ गते येँया कमलादीस्थित येँया कमलादीइ प्रज्ञा भवनय् जुइत्यंगु दु । थ्वयां न्ह्यः अवार्डया प्रचारात्मक ज्याझ्वः कथं पुस ३० गते ज्ञानोदय स्कूल ख्वनाय् संसार अवार्ड कप फुटबल नं जुइत्यंगु दु ।

बरिष्ठ सिनेपत्रकार विजयरत्न असंबरेयात सगरमाथा कला पत्रकारिता रजत सम्मान देछाःगु दु ।

सहारा एप व अर्थ नेपालया मंकाः ग्वसालय् प्यक्वःगु सगरमाथा म्युजिक अवार्ड २०७९ सिरपाः ज्याझ्वः जुगु खः। उगु ज्याझ्वलय् तोखा नगरपालिकाया मेयर प्रकाश अधिकारीं हनापौं व नायः पुरुषोत्तम बस्नेत, सिरपाः ज्याझ्वःया कजि मनोज थापा, विशिष्ट अभिनेत्री भुवन थापां खादा क्वखायेका हनापौ व नगद सिरपाः लःल्हाःगु खः ।

ज्याझ्वलय् वरिष्ठ म्येच्वमि श्रीपुरुष ढकालयात सगरमाथा कला लाइफटाइम एचिभमेंट अवार्डं लःल्हागु खःसा संकिपा व कला पत्रकारिता ख्यलय् याःगु योगदान कदरयासे ल्हाः न्ह्याकाः वयाच्वनादीपिं कृष्ण भट्टराई व नेमिश गौतमयात सगरमाथा कला पत्रकारिता सम्मान देछाःगु खः ।लुमंकेबहःजू, सम्मानित बरिष्ठ सिने पत्रकार विजयरत्न असंबरे नेवाः अनलाईनन्यूज डटकमया संरक्षक खः ।

नेपालभाषाया संकिपा व संगीतख्यलय् मदिक्क पलाः न्ह्याका वयाच्वंम्ह कलाकार स्वतन्त्रसंसार महर्जनं थः अबु तेजबहादुर महर्जनयात लुमंका सम्मान निस्वंगु दु ।

नेपालभाषाया संकिपा व संगीतख्यलय् दकले ताहाकःगु व दकले अप्व विधाय् सिरपा बिइगु ज्याझ्वः कथं बयबय् जुउगु नेपालभाषा स्टार म्युजिक भिडियो अवार्डया निक्वःगु संस्करणय् देछायेगु क्वछिउगु थ्व सम्मानया नां संसार तेजकला सम्मान धका छूगु दु।

थुगुसिइ न्हापांखुसिइ देछाइगु उगु संसार तेजकला सम्मानया निंतिं न्याम्ह कलाह्यःमि ल्यःया वयकपिनिगु नां नं घोषणा याये धुंकुगु दु। नेपालभाषाया नापनापं नेपाःया हे संकिपा ख्यलय् नांजाम्ह पवन जोशीयात थुगु सम्मान देछाइगु जुगु दु । निशा देसार नाप पत्रकार श्याम स्मृतयात नं थुगु संसारकला सम्मान लःल्हाइगु जुगु दुदेछाइगु जुउगु दुसाः नेपालभाषाया पत्रकारिता ख्यलय् बिस्कं पहःया संस्था लहना मिडियायात नं थुगु संसारतेज कला सम्मान देछाइगु जुगु दु।

तेजकला सम्मान लगायत मेमेगु नं सम्मान व सिरपा देछाइगु नेपालभाषा स्टार म्युजिक भिडियो अवार्डया निक्वःगु संस्करण याकनं हे जुइगु खँ दुसाः उगु सिरपा ज्याझ्वःया थीथी विधाय् ब्वति कया टप टेन विधाय् थ्यंकेत ताःलापिन्त थ्व हे वइगु पुष १६ गते शनिवाः छगू तःजिगु ज्याझ्वःयाना दसिपौ लःल्हाइगु जुगु दु ।

नेपालभाषाया संकिपा ‘तिबः’ दयेकीगु जूगु दु । शनिबाः येँया खुसिबुँइ छगू ज्याझ्वः यासें संकिपाया शुभमुहुर्त याःगु खः।

शुभमूहुर्त धुंकाः न्ववासें निर्माता सरजु रंजित व समितां सामाजिक परिवेसय् आधारित संकिपाय् मनोरंजनया पक्षयात समयसापेक्ष न्ह्यब्वय्गु कुतः जुइगु धयादिल।

वाइल्ड वुल्स प्रोडक्सन, अमर चित्रकार व सुबिना चित्रकारयाय पोष्ट प्रोडक्सनय् दय्केत्यंगु संकिपाया बाखं ओम शंकर श्रेष्ठं च्वयादीगु दुसा निर्देशन वरिष्ठ सिने निर्देशक रवि साय्मिं यानादीत्यंगु दु।

संकिपाय् सुशील राजोपाध्याय, आशाकाजि थकु, संघरत्न शाक्य, पुस्करभक्त माथेमा, कृष्णभक्त महर्जन, सरस्वती मानन्धर, मैयाँ मुनिकार, सुनिता ठाकुर, कन्चन तुलाधर, गङ्गा महर्जन, बिज्ञान पक्का, मनोज महर्जन, हसना महर्जन, रेइना महर्जनलिसेंया कलाकरया भूमिका दु ।

अथे हे, राजेन्द्र महर्जन, ओम शंकर श्रेष्ठ सुशील राजोपाध्यायया रचनाय् शिव शाही व भुपेन्द्र बज्राचार्यं संगीत बियादी । म्येय् सरजु रंजित व सतिस महर्जनं सः बियादीत्यंगु दु ।

उदयपुर जिल्लाय् च्वना पत्रकारिता यानावया च्वम्ह नेपाल आदिवासी जनजाति पत्रकार महासंघ (फोनिज)या संघीय सदस्य गजेन्द्र राईयात २०७९ मंसिर ९ गते समाचार च्वंगु विषययात कया नेपाल प्रहरीं ज्वना ‘साइबर क्राइम’ या मुद्दा न्ह्याकूगुलि फोनिजं गम्भीर ध्यानाकर्षण याःगु दु।

समाचार व समाचारनाप स्वाउगु विषयय् सम्बन्ध तइगु विषय स्वइगु निकाय प्रेस काउन्सिल नेपाः दय्क न प्रहरीं समाचार च्वंगु विषय पत्रकार राईयात ज्वःगु सम्बन्ध हे मदुगु ‘साइबर क्राइम’ या मुद्दा न्ह्याकूगु प्रेस नाप अभिव्यक्ति स्वतन्त्रताय् प्रहार याःगु धका धासे उगु पलाःया भत्र्सना याःगु दु।