नेकपा एमालेया अध्यक्ष केपी शर्मा ओलीं अभिनेता राजेश हमालयात महानायकया सम्मान लःल्हाःगु दु।

म्हिगः छगु ज्याझ्वः दथुइ ख्वपय् प्यक्वःगु एपिक म्युजिक अवार्ड ज्याझ्वलय् ओलीं उगु सम्मान लःल्हाःगु खः।

अध्यक्ष ओलीं अभिनेता हमाल नाप म्येहालामि तीर्थकुमारी थापा व रत्न बेहोसीपिन्त न हनापौं लःल्हाःनादीगु खः।

उगु ज्याझ्वलय् ओलीया जहान राधिका शाक्य, चलचित्र निर्माता संघया अध्यक्ष नवल खड्का, अभिनेत्रीपि बसुन्धरा भुषाल व गौरी मल्लपिनिगु न ब्बति दुगु खः।

नेपाली फिल्म ख्यलय् अभिनेता हमालयात न्हापानिसे ‘महानायक’ कथं सम्बोधन याये धुकुगु खः।

नेपाल सरकारया चलचित्र विकास बोर्डया सल्लाहकार नियुक्त जुयादीगुलिं फिल्म बितरक गोपालकाजी कायस्थयात झीगु सः पुचः व सुकुन्दा फिल्म्सपाखें सम्मान याःगु दु ।

सुकुन्दा फिल्म्सपाखें निर्माण जुगु न्हूगु संकिपा “बहिदार बाबु” पितब्वज्या व गुँभ्वय् ज्याझ्वलय् फिल्म बितरक कायस्थयात हंगु खः। मूपाहाँ कथं झायादीम्ह कलाकार सुशील पोखरेलं उगु पोस्टरया उलेज्या यानादीगु खः ।

ज्याझ्वलय् झीगु सः पुचः पाखे राजु राजदेव बज्राचार्य व सुकुन्दा फिल्म्सपाखें बाशु शाहीं कायस्थयात मतिना या चिं देछानादीगु खः ।

उगु ज्याझ्वलय् नेपालभाषाया बरिष्ठ सिनेपत्रकार व झीगु सःया संरक्षक विजयरत्न असंबरें, सुकुन्दा फिल्मया बाशु शाही व मूपाहाँ पोखरेल पिन्सं नुगःखँ तयादीगु खः ।

संसार क्रिएसन्श नेपालया ग्वसालय् विश्वया दकले ताहाकःगु व तधंगु अवार्ड धका धयातःगु निक्वःगु नेपालभाषा स्टार म्युजिक अवार्डया प्रोमोसन कथं यलया खोनाय् ज्ञानोदय बालबाटिका स्कुलय् जूगु संसार अवार्ड कप फुटबल कासा व साँङ्गितिक ज्याझ्वलय् सरस्वति मानन्धर, किशोर शाही, कल्पना श्रेष्ठपिन्स थःथःगु प्रस्तुति न्ह्यब्वःगु खः ।

उगु ज्याझ्वलय् नेपाल सरकारया चलचित्र विकास बोर्डया सल्लाहकार नियुक्त जुगुलिं नांजाम्ह फिल्म बितरक गोपालकाजी कायस्थ व नेपाल चलचित्र संघया महासचिव फिल्म बितरक नरेन्द्र महर्जनयात संसार क्रिएसन्श नेपालयापाखें हःगु खः ।

संसार क्रिएसन्श नेपाल कजि स्वतन्त्रसंसार महर्जनया सभाध्यक्षताय् जुःगु उगु ज्याझ्वलय् प्रेमाहा महर्जनं खादाँ लःहाःगु खःसा बरिष्ठ सिनेपत्रकार विजयरत्न असंबरें स्वांमा क्वखाकादीगु नाप यल महानगरपालिका २१ वडाध्यक्ष रविन्द्र महर्जनं हना पौ देछाःगु खः।

नेपाल राष्ट्रिय खड्गी समाज येँ जिल्ला समितिया ग्वसालय् ‘स्वनिगःव्यापी नेवाः हुलाप्याखं कासा ११४३’ जुइत्यःथु दु।

ग्वसाः खलःपाखें जानकारी बिगु कथं नेपाल राष्ट्रिय खड्गी समाज येँ जिल्ला समितिं थ्वहे वइगु माघ १४ गते शनिवाः स्वनिगःया हुलाप् याखंम्वः मचातदथुइ तःजिगु कासा जुइत्यंगु खँ धाःगु दु । अडिसन राउण्ड ख्वपय् मेघा माध्यामिक विद्यालय देखापुखु, यलय् आदर्श कन्या निकेतन मङ्गलबजाः, येँय् जगतसुन्दर ब्वनेकुथि लखुतिर्थ व किपुली हिलटाउन सेकेण्डरी स्कुल १ वडा बाघभैरबय् जुइगु दु।

हुलाप्याखं कासाया कजि राजन शाहीया कथं थुगु कासाय् ब्वति कायेया नितिं स्वनिगः दुनेया मचातसें थःथःगु नां दर्ता यायेफइगु व थथे दुहाँ वःगु नांया कासामिपिनिगु अडिसन राउण्ड स्वनिगःया येँ, यल, ख्वपः व किपुली जुइगु जुउगु दुसा अडिसनपाखें फाइनल राउण्डया नितिं पीम्ह कासामि ल्यइगु खँ  धाःगु दु । फाइनल राउण्ड येँया बसन्तपुरय् दस अवतारया देगः न्ह्यःने जुइगु जानकारी नं ग्वसाः खलकं ब्यूगु दु ।

नेवाः लोक म्ये वा नेवाः आधुनिक म्येय् जक कासामिपिन्सं प्याखं हुले दइसा कासाय् सोलो डान्स जक मान्य जुइ पुचःया प्याखं मान्य मजुइगु खँ नं कासाया कजि राजन शाहीं जानकारी ब्यूगु दु । कासाय् न्हापनिसें न्यागुगु थासय् लाकेत ताःलापिन्त ट्रफिलिसें सिरपा बिइगु ग्वसाः दु । थुकिया नापनापं भेषभुषा, हाउभाउ, श्रृङ्गार, कोरियोग्राफी व प्रस्तुति या हलंज्वलं न्ह्यब्वयायात नं सिरपाः बिइगु ग्वसाः ग्वयातःगु दु ।

थ्व कासाय् ब्वति काये मंदुपिं झिंनिदँनिसें नीदँतकया विद्यार्थी वा मस्तयसं थ्वहे पुस मसान्ततकया दुने थःथःगु नां दर्ता याकेफइगु खँ ग्वसाः खलकं जानकारी बिउगु दु।

येँ महानगरपालिका १८ वडाया ग्वसालय् ताम्सीपाखा सडक महोत्सव तःजिक क्वचाःगु दु ।

नेपाल सम्वत ११४३ या लसताय् येँ मपा १८ वडा ज्याकुथिं भिन्तुना सनिल ज्याझ्वः अन्तर्गत शुक्रबाः ताम्सीपाखा महोत्सवया ग्वसाः ग्वःगु खः । महोत्सवय् थीथी नसाया लिसें हस्तकलाया ज्वलंया स्टलत दुगु खः ।

नसा स्टलय् यःमरि, वः, चतांमरि, समयबजि लिसेंया मौलिक परिकारत दुगु खःसा हस्तकलाया स्टलय् वडां ब्यूगु सीपमूलक तालिमया ब्वतिमि गृहिणीतय्सं उत्पादन याःगु हलंज्वलंत दुगु खः । महोत्सवय् थीथी कलाकारपिनिगु प्रहसनलिसें सांगितिक प्रस्तुति नं न्ह्यब्वःगु खः । महोत्सवया प्रमुख आकर्षण सुल्तान अफ स्ट्रीङ नामं म्हस्यूम्ह अनिल शाही जूगु खः । शाहीं गितार थाय्गुयालिसें म्ये नं हालादीगु खः ।

लिसें रोजी श्रेष्ठ, सरस्वती मानन्धर, गंगा महर्जन, दीपा महर्जन, लजना मानन्धर, सोनी राजभण्डारी, कृष्ण महर्जन, अनिल तुलाधर, सुरेश मानन्धरलिसेंया गायक कलाकारपिन्सं नं म्ये हाःगु खः ।

वडां न्हूदँया लसता लाकाः दँय्दसं भिन्तुना सनिल ज्याझ्वः यानावःगु दु । १८ वडा दुनेया थीथी थासय् ज्याझ्वः यानावनेगु ग्वसाः कथं थुगुसी ताम्सीपाखाय् सडक महोत्सव यानागु वडाध्यक्ष न्हुच्छेकाजी महर्जनं धयादिल ।