नेवाः संकिपा व कलाकारिताख्यलय् लोकह्वाम्ह पवन जोशीया निर्देशनय् यलया साँस्कृतिक नगर लुभुइ शुटिङ्ग जुउगु “छंगु जिगु मतिना“ बोलया छगू म्युजिक भिडियो छगू ज्याझ्वःया दथुइ लुभुइ हे पितब्वया जुउगु दु। मूपाहाँ कथं नेपालभाषाया न्हापांम्ह म्युजिक भिडियो निर्दशक विजयरत्न असंबरें उगु म्युजिक भिडियो पितब्वज्या यानादीगु खः।

ज्याझ्वलय् मूपाहाँ असंबरें संकिपा व कलाकारिख्यलय् न्याय् दँ बितेयानादी धुंकुम्ह पुलांम्ह कलाकःमि पवन जोशी थःम्हं हे च्वयादीगु थ्व म्येय् बारे न्ववानादिसे पवन जोशीया सकृयताया प्रशंसा न यानादिल। कृष्ण महर्जन व सरस्वति मानन्धरं हालातःगु उगु म्येय् अमर शाक्य व दिश्मा श्रेष्ठ शाक्यं अभिनय यानादीगुलि कोरियोग्राफि व समाज्या उमिशा पाण्डें यानादीगु खः।

कृष्णभक्त श्रेष्ठ केबिएस लुभुया परिकल्पनाय् तयार जुया च्वंगु थ्व म्येया सम्पादन व निर्दशनय् शैलेश श्रेष्ठं यानादीगु म्येय् अनिल तुलाधरं लसय् हनादीगु खः। म्युजिक भिडियो पितब्वज्याय् प्रकाशदिप श्रेष्ठ, निर्दशक बाशु शाही न विशेष उपस्थिति दुगु खः।

नेवाः फिल्म सोसाईटीया ग्वसालय् यलय् वृहत भिडियोग्राफी कार्यशाला क्वचाःगु दु । सोसाईटीं यलया स्कूल अफ फिल्म मेकिङय् स्वन्हुयंक भिडियोग्राफी सम्वन्धि कार्यशालाया ग्वसाः ग्वःगु खः ।

कार्यशालाय् विशेष यानाः ल्यायम्हतयत लक्षित यानागु सोसाईटीया नायः बिराजकाजी राजोपाध्यायं धयादिल । थज्याःगु ज्याझ्वलय् ल्यायम्हतयत दुथ्याकूसा थ्व ख्यलय् उमिगु सक्रियता नं अप्वयावनीगु खँय् राजोपाध्यायं विश्वास प्वंकादिल ।

‘ल्यायम्हतय् थःगु हे सोच, योजना दयाच्वनी तर लँपु मखनाच्वनेफु । थज्याःगु ज्याझ्वलय् ल्यायम्हतयत दुथ्याकाः झीगु संकिपा ख्यलय् नं दुकायेफइ व उमिगु सृजनशीलताया लबः मुक्कं ख्यःयात दइ’ राजोपाध्यायं धयादिल ।

वइगु श्रावण ६ गते सोसाइटीं कलाकार मुना ज्याझ्वः यायेत्यनागु व उगु हे ज्याझ्वलय् स्वंगू महत्त्वपूर्ण विषय घोषणा यायेत्यनागु जानकारी राजोपाध्यायं बियादिल ।

असार १९ निसें २१ गतेतक्क जूगु कार्यशालाय् मुक्कं झिम्हेसित प्रशिक्षक बिशाल राजभण्डारीं प्रशिक्षण बियादीगु खः ।

मंगलबाः जूगु कार्यशालाया समापन ज्याझ्वलय् आदिवासी जनजाति चलचित्र महासंघया नायः अमृत सुनुवारं सहभागीतयत दसिपौ लःल्हानादिल ।

ज्याझ्वलय् न्ववासें नायः सुनुवारं महासंघया हे पहलय् मातृभाषी संकिपाया निर्माण इजाजत कायेत चलचित्र विकास बोर्डय् छुं सहुलियत सुविधा कायेखंसां मातृभाषी संकिपाया नितिं सेन्सरलिसेंया प्रकृया अझं झन्झटं जाःगु धयादिल ।

मातृभाषी संकिपाया लागिं बिस्कं हे आदिवासी जनजाति चलचित्र सेन्सर बोर्ड गठन यायेत अथवा आःया सेन्सर बोर्डया संरचनाय् मातृभाषी संकिपाया लागिं बिस्कं ढाँचा दयेकेत थःपिन्सं माग यानावयागु सुनुवारं जानकारी बियादिल ।

सोसाईटीया निवर्तमान नायः लुःजः सिंहं कार्यशालाय् सयेकागु सीपयात छ्यलाः समुदाययात लबः बीत प्रशिक्षार्थीतयत इनाप यानादिल । 

सौगात मल्ल व सलोन बस्नेतया न्हुगु फिल्म “घनचक्कर“ असार १० गते रिलिज जुइत्यंगु दु।

थ्वहे झ्वलय् रिलिजया दिन न्ह्यःने वलिसे फिल्म ‘घनचक्कर’या  प्रचारप्रसार नं अप्वयेका हःगु दु। थ्व फिल्मया प्रचारया झ्वलय् तामाङ्ग व भोजपुरी भासं प्रमोशनल म्ये पितहःगु दुसाः प्रचारप्रसारया हे झ्वलय् छपु प्रमोशनल म्ये नेपालभाषां नं दयेका पितहःगु दु ।

उगु म्ये दुने फिल्मया मू कलाकार दथुया मतिना व धन या चक्कर यात क्यना तःगु दु। बिजेन श्रेष्ठया संगीत अले भुपेन्द्र बज्राचार्यं हालादीगु थ्व प्रमोशनल म्ये नं म्येहालामि भुपेन्द्र बज्राचार्यं हे च्वयादीगु खः। थ्व कमेडी फिल्मया निर्दशक जितेन्द्र राजोपाध्याय खः। थ्व स्वया हापा थः कतः कतः थः नांयागु नेवाः फिल्मया नापनापं म्युजिक भिडियो न दयेके धुंकुगु खः। थुगु फिल्मय् सौगात मल्ल, सलोन बस्नेत, सरोज खनाल, ममता प्रधान, कश्मिरा लामा, शिशिर भण्डारी, आशान्त शर्मा, ईश्वरी खड्का, कृष्णभक्त महर्जन, घनश्याम जोशी लगायतया अभिनय स्वयेदइ।

सुसन प्रजापतिं छायांकन थ्व फिल्मय् अर्जुन सिंहया बाखं, काजी लिम्बूया पटकथा व संवाद, अष्ट महर्जनया द्वन्द्व निर्देशन, प्रदीप श्रेष्ठ व साइमन राजवंशीया कोरियोग्राफी, विपिन आचार्य व देव कोइमीया संगीत अले मित्र गुरुङ्गं सम्पादन यानादीगु खः।

राजोपाध्याय समाजं वेद, धर्मलिसें साहित्य व थीथी विषयया सफूया मेला याइगु जूगु दु । स्वनिगःया आदिवासी द्यःब्रम्हू राजोपाध्यायतय् कुसा संगठन राजोपाध्याय समाजं सफू मेला ज्याझ्वः यायेत्यंगु खः ।

वइगु असार ३ गते शुक्रबाः येँया खुसिबुँस्थित नेपाः ब्यांक्वेटय् ‘पुस्तक मेला’ जुइत्यंगु खः । न्हिनसिया १२ताः इलंनिसें मेला न्ह्याइगु ग्वसाः खलकं न्ह्यथंगु दु ।

मेलाय् वेद, तन्त्र, संस्कृति, संस्कार आदिलिसें साहित्य व थीथी ख्यःलिसें सम्वन्धित सफू दइगु ज्याझ्वः कजि सुजित राजोपाध्यायं धयादिल। मेलाय् सफूत विशेष छ्यापनय् उपलब्ध जुइगु कजि राजोपाध्यायं धयादिल ।

उगु हे ज्याझ्वलय् ईतिहासविद् सह प्राध्यापक मदुम्ह गोबर्धन शर्मां च्वयादीगु ‘उपन्यासया चाकलय् गिरिजा’ नांया सफू बिमोचन जुइगु समाजं न्ह्यथंगु दु ।

महाकवि गिरिजा प्रसाद जोशीं च्वयादीगु थीथी उपन्यासया गोवर्धन शर्मां यानादीगु समालोचनायात मुंकाः सफूया रुपं पिथनेत्यनागु समाजया नायः संजय शर्मा राजोपाध्यायं धयादिल।

मदुम्ह शर्माया २०६५ सालया भाद्र १३ गते मदुगु खः । शर्मां थःगु जीवनकालय् च्वयातःगु समालोचनायात मुंकाः आः सफूया रुपं पिथनेत्यंगु खः ।

नांजाम्ह रेडियोकःमि, म्ये च्वमि व गायक सुरजबीर बज्राचार्यं च्वयादीगु बुदिंया भिन्तुना म्येया नेपाली संस्करण पितब्वज्या जूगु दु।

बज्राचार्यया नेपालभाषाय् अतिकं लोकंह्वागु बुदिंया भिन्तुना म्येया नेपाली संस्करणया पितब्वज्या भृकुटीमण्डपया बुद्धविहारय् ख्यालिजुजु वरिष्ठ कलाकार मदनकृष्ण श्रेष्ठया मूपाहाँसुइ जूगु खः।

भिक्षु कोण्डन्य महास्थविरया सभाध्यक्षताय् जूगु उगु कार्यक्रमय् वयकलं मैत्रीभावं जाःगु म्येया लोकार्पण ज्याझ्वः थःम्हेसिनं ग्वसाः ग्वयेखना तसकं लय्ता धका धयादिगु खः।

वयकलं थुगु म्येचा मेमेगु भाषाया दयकेगु निति थः व थुगु बुद्धविहारपाखें न्ह्याबलय् ग्वाहालि जुइ धका नं धयादिगु खः। ज्याझ्वलय् धर्मोदय सभाया मूछ्यान्जे सागरमान बज्राचार्य व पेजथ्री पाक्षिकया सम्पादक दर्शनवीर शाक्यं म्येया बारे थःथःगु नुगः खँ तयादिगु खः।

म्येच्वमि व म्येहालामि बज्राचार्यं लसकुस न्वचु तयेगु झ्वलय् नेपालभाषाय् अतिकं लोकंह्वानाच्वंगु “बुदिंया भिंतुना म्ये प्रति समाजं बिउगु साथ, हःपाः व तिबः दया हे थुकथं मेमेगु भाषं नं थ्व म्ये पिकायेगु पलाः न्ह्याकागु खँ कनादिल।

म्ये पितब्वज्या ज्याझ्वलय् संगीत संयोजक जुगल डंगोल, चेज होम एप्लायन्सेजया सुरेश मल्ल, म्येया सर्जक बज्राचार्यया अबु नामसंगिती गुरु हिरण्यवर्ण महाविहारया आजु चित्रवीर बज्राचार्य, युवक बौद्ध समूह, काठमाडौंया अध्यक्ष मदनबहादुर तुलाधर, बौद्ध महिला संघया उपाध्यक्ष बीना कंसाकार पाहाँ कथं विशेष उपस्थिति दुगु खः।