किपू नगरपालिकाया ग्वसालय् जुगु कीर्तिपुर सिंगिङ आइडल ११४२ क्वचाःगु दु।

किपूया पांगाय् च्वंगु कीर्तिपुर सिनेप्लेक्स हलय् जूगु उगु ज्याझ्वलय् किपू नगरपालिका ४ वडा सल्यानस्थानया प्रशान्त सुवेदी कीर्तिपुर सिंगिङ आइडल ११४२ जुइत तालागु दु। अथेहे किपू नगरपालिका ३ वडा कुतिसा त्वाःया अतुल मानन्धर ल्यू व किपू नगरपालिका ५ वडा पांगाया जोन महर्जन लियांल्यू लानाः कीर्तिपुर सिंगिङ आइडल ११४२ जुइत ताःलाःगु दु ।

कीर्तिपुर सिंगिङ आइडल ११४२ न्हाप, ल्यू व लियांल्यू लायेत ताःलाःपिंन्त किपू नगरपालिकाया प्रमुख रमेश महर्जनं ट्रफी व मेडल लःल्हानादीगु खःसा उपप्रमुख सरस्वती रिजाल खड्कां खादां न्ययेकाः दसिपौ, प्रशासकीय अधिकृत कृष्णप्रसाद सापकोटां सिन्हः तिकादीगु खःसा आइडलया कजि हरिशरण सायमिं स्वां देछानादीगु खः ।

कासाय् न्हाप लाःम्ह कीर्तिपुर सिंगिङ आइडल प्रशान्त सुवेदीयात नगद न्ययद्वः तका व ट्रफी, ल्यू लाःम्ह आइडल अतुल मानन्धरयात पीद्वः तका व ट्रफी व लियांल्यू लायेत ताःलाःम्ह आइडल जोन महर्जनयात स्वीद्वः तका व ट्रफी लःल्हाःगु खः।

दान्यहिरा सिरपाः छगू ज्याझ्वःया दथुइ लःल्हागु दु।

बुधवाः यलया बखुंबहाःया सत्यमोहन लोक साहित्य भवनय् उगु सिरपाः लःल्हाये ज्याय् ग्वसाः खलः नेपालभाषा एकेदेमिया चान्डलर कुलपति चित्तरञ्जन नेपालीया सभाध्यक्षताय् जुगु खः।

नेपालभाषा एकेडेमीया संरक्षक वाङ्गमय शताब्दि पुरुष अति विशिष्ट संस्कृतिविद् डा सत्यमोहन जोशी मूपाहाँ कथं झायादीगु उगु ज्याझ्वलय् दान्यहिरा सिरपाःया दाता यलया चाकुपातय् च्वनादीम्ह यज्ञरत्न धाख्वाः खः।

दान्यहिरा सिरपाः दुने दान्यहिरा जिवंकाःछी सिरपाः न्येद्वः (५० हजार) तका व हनापौ, दान्यहिरा सिरपाः नीन्याद्वः (२५ हजार) तका व हनापौ व दान्यहिरा विज्ञान प्रविधि सिरपाः नीन्याद्वः (२५ हजार) तका व हनापौ यानाः स्वंगू विधाया सिरपाः दुथ्याकातःगु दु।नेपालभाषा साहित्य व संगीत विधायात अतःगानाः पालंपाः दँय् दसं लःल्हानाः वयाच्वंगु थौं लःल्हाइगु दान्यहिरा सिरपाः झिन्हयक्वःगु (१७ क्वःगु) सिरपाः संस्करण खः।

थुगु दँय् साहित्य नापं दान्यहिरा विज्ञान प्रविधि सिरपाः नं लःल्हागु खः ।थुगुसिया दान्यहिरा जिवंकाःछी सिरपाः नांदंम्ह निबन्धकार भाजु तेजेश्वरबाबु ग्वंगःयात अले दान्यहिरा सिरपाः ‘थौंकन्हय्’ पत्रिकाया सम्पादक मयजु रुकमणी श्रेष्ठयात लःल्हइगु दु । अथेहे, दान्यहिरा विज्ञान प्रविधि सिरपाः परम्परागत प्रविधि विशेषज्ञ भाजु जगतवीर शिल्पकारयात लःल्हागु  दु।

ज्याझ्वलय् ग्वसाखलःया सदस्य सचिव नांजाम्ह आख्यानकार मल्ल के सुन्दरं लसकुस न्वचु तयादीगु खःसा सिरपाया दाता व सिरपा त्याकुमिपिंलिसेया वक्तापिन्सं नं नुगः खँ तयादीगु खः।

येँ महानगरपालिकां सञ्चारकःमि विराजकाजी राजोपाध्यायलिसे १०म्हेसित नगदनाप सुशासन पत्रकारिता सिरपा लःल्हाःगु दु ।

२७क्वःगु महानगर दिवसया लसताय् बुधवाः येँय् जूगु ज्याझ्वलय् वय्कपिन्त सम्मान याःगु खः ।

अथेहे नेपाल समाचारपत्र दैनिकया सुनील महर्जन, नयाँ पत्रिका दैनिकया शिवहरि घिमिरे, महानगर खबरयापाखें अजय खड्गी, नागरिक दैनिकं राजेन्द्र (नीलः) मानन्धर, स्थानीय खबरपाखें रञ्जित तामाङ, थाहा खबरया सञ्चिता आचार्य, क्लिकमान्डु डटकमया सोभित थपलिया, न्यूज एजेन्सीया अनिस अविरल व संस्थागत रुपय् ईलोहं प्रकाशनयात सिरपा देछाःगु खः ।

महानगरपाकिां बिइगु यानावःगु सेवा अले ज्याया विषययात जनतातक सूसुचित याःगु कदर यानाः सिरपा ब्यूगु खः ।

थ्वहेदथुइ परम्परागत धा, धिमे व नायखिं बाजाया गुरु अले ईन्द्रजात्राया लसताय् पिहाँवइगु पुलुकिसी, दिप्याखँ, लाखे, आकाश भैरव व श्री करुणामय पँयताः बाजा यानाः निसः व २५म्ह गुरुपिन्त न हंगु खः ।

भारतीय सुन्दरी हरनाज सन्धुं थुगुसीया मिस युनिभर्सया ताज पुइत ताःलागु दु ।

आइतबाः इजरायलया इलात शहरय् ग्वसाग्वःगु मिस युनिभर्सया ७० क्वःगु संस्करणया फाइनलय् ८०गू देय्या सुन्दरीपिंया धेँधेँबल्लाखय् न्हाप लाना पंजाबया मिसामचा सन्धुं ताज थःगु ल्हातय् लाकूगु खः ।

चण्डीगढया २१ सन्धुयात थौनेया मिस युनिभर्स एन्ड्रिया मेजां ताज पुइकाबिउगु खः । धेँधेँबल्लाखय् पाराग्युया नदिया फेरिरा ल्यू जुल धाःसा लियाल्यू दक्षिण अफ्रिकाया ललिला एम्स्वाने जुल ।

मिस युनिभर्सया उपाधि त्याकुमि हरनाज सन्धु स्वम्हम्ह भारतीय मिसा खः । थ्वसिबेंन्ह्यः १९९४ य् सुस्मिता सेनव व सन् २०००य् लारा दत्तं मिस युनिभर्सया ताल त्याकेधुंकूगु दु ।

जनप्रशासनय् स्नाकोत्तर यानाच्वम्ह सन्धुयात “मिसापिन्सं आः सामना यानाच्वंगु दबाबयात गुकथं नालेगु’ धैगु न्ह्यसःलय् “थौंकन्ह्यया मिसापिन्सं सामना यानाच्वंगु दकले तःधंगु दबाबया विषयल् उकि थम्ह हे गुलि विश्वास यायेगु धैगु विषय खः धासें थःयात मेपिनिलिसे तुलना मयासें जिगू नेता जि हे खः धैगु भलसाः लिसें न्ह्यावेनमा’ धाःगु खः ।
 

नेपालभाषाया न्हुगु म्युजिक भिडियो ट्री ईन्टरटेन्टमेन्टया ‘धाये मफुत’ छगु ज्यााझ्वः दथुइ पितब्बज्या जुगु दु।

उगु म्युजिक भिडियो पितब्बज्या ज्याझ्वलय् किपू नगरपालिकाया मेयर रमेश महर्जन मूपाहाँ व नेपाली फिल्मख्यःया नांजाम्ह स्टार शिव श्रेष्ठ विशेष पाहाँ कथं झायादीगु खः।

‘धाये मफुत’ म्युजिक भिडियो सः पिज्ज्वल नेपाली व अस्मिता परियारं बियातःगु खः।

दिनेश दर्शनधारी व यशोदा राईया निर्माणय् माइकल चन्दं निर्देशन याु उगु म्युजिक भिडियो दुने दिनेश दर्शनधारीया काय् देलविश दर्शनधारी, यशोदा राईया काय्  राज रोहन तुम्बाहाम्फेया नापनापं प्रथम कार्की, उषा उप्रेती, कविता नेपाली व स्मारिका ढकालपिन्स अभिनय याउगु खः।

दिपक नेपालीया च्वसां पिज्वःगु ‘धाये मफुत’ थुगु म्ये बाबुल गिरीं लसय् हनादीगु खः।