नेपालभाषाया मेगु छगु न्हूगु म्युजिक भिडयो पितब्वज्या जूगु दु। नेवाः एचडी टिभिइ छगू ज्याझ्वःया दथुइ पुलांम्ह म्ये हालामि पुष्पनारायण मानन्धरं हाला तःगु “थौं जिं छन्त म्हगसय् खना” बोलया म्येया म्यूजिक भिडियो पितब्वज्या जूगु खः।

माननधरं न्येयदँ न्ह्यः च्वगू वय्कलं हे लय् तयादीगु थुगु म्ये न्यय्दँ न्ह्यः हे पिदने धुंकुगु म्ये खःसा आः वया न्हू कथं रेकर्ड जूगु खः।

म्येया पितब्वज्याय् येँ महानगर वडा नं. १३ वडाया अध्यक्ष ध्रुवनारायण मानन्धर मूपाहाँ नेपालभाषाया न्हापांम्ह म्यूजिक भिडियो निर्देशक विजयरत्न असंबरे व नेवाः टिभी एचडीया नविन जोशीं मंकाः कथं पितब्वज्या यानादीगु खः।

सुरेन्द्र मानन्धरं निर्देशन यानादीगु थुगु म्ये आयुष महर्जनं छायाँकन यानादीगु खःसा इन्द्र मानन्धरं सम्पादन यानादीगु खः। अथेहे भूपालमान सिंहं संगीत संयोजनय् , म्ये किरण जोशी, सुजना बज्राचार्य, पुष्प नारायण मानन्धर, राधिका मानन्धर, विमला मानन्धर व ध्रुव कपाली पिन्सं अभिनय याना तःगु दु।

कीर्तिपुर सिङ्गिङ आइडल–११४२ या अडिशन राउण्ड क्वचाःगु दु। किपू नगरपालिकाया ग्वसालय् जुयाच्वंगु थुगु ज्याझ्वलय् मुक्कं १९ म्हेसि नं ब्वति काउगु दु।

ब्वतिकापिन्स छ्वयाहःगु म्ये अडिशन राउण्ड अन्तर्गत “कीर्तिपुर सिङ्गिङ आइडल–११४२” यूट््युव च्यानलय् अपलोड जूगु खः। नेपाल संवत् ११४२ न्हूदँया लसताय् किपू नगरपालिकां ग्वसाः ग्वःगु कीर्तिपुर सिङ्गिङ आइडल–११४२ न्हूदँ (म्हपुजा) निसें अडिशन राउण्ड अन्तर्गत यूट््युव च्यानलय् अपलोड याःगु खः।

अडिशन राउण्डय् दुथ्याकूपिनिगु फुक्कसियागु म्ये नं निर्णायक (जज)पिंसं स्वयेधुंकूगु दुसा दुथ्याकूपिं सकसितं खाराओके (ट्राय्कय्) हायेकेगु ग्वसाः खलःया कजि हरिशरण साय्मि जानकारी बियादीगु दु। थुगु खाराओके राउण्डं उत्कृष्ट झिम्ह ल्यइगु जूगु दु ।

ल्यःपिं झिम्हेसित माः कथं तालिमया व्यवस्था जुइगु व वयांलिपा छगू  खुला ज्याझ्वःयासें न्हाप, ल्यू व लियां ल्यू ल्ययेगु ग्वसाः खलकं जानकारी ब्यूगु दु । धेंधें बल्ला कासाय् न्हाप, ल्यू व लियां ल्यू लाःम्हेसित छसि कथं न्यय् द्वः, पीद्वः, व स्वीद्वः दांलिसें दसिपौ व ट्रफि लःल्हाइगु।

शनिबाः क्वचाःगु नेवाः मस्तय्गु प्रतिभामूलक धेँधेँबल्लाखय् थुगुसी सामाखुसीया १०दँया आर्या श्रेष्ठ मिस लिटिल नेवाः नेपाल ११४१ जुइत ताःलाःगु दु ।

नेपाःया हे तःधंगु मौलिक सांस्कृतिक धेँेधेँबल्ला मिस नेवाःया ग्वसाः खलः नेप्लिज फेसन होमं जमलया राष्ट्रिय नाचघरय् ग्वसाग्वःगु थुगुसीया मिस लिटिल नेवाः नेपाल ११४१ या उपाधि आर्या श्रेष्ठ जूगु खः । आर्यां उपाधि लिसें फोटोनेनिक व पब्लिक च्वाइस अवार्ड तकं थःगु यायेत ताः लाःत ।

ज्याझ्वलय् मू निर्णायक अशोक बाबु श्रेष्ठं न्यंगु “नेवारी कला, संस्कृति व संस्कार छाय् महत्वपूर्ण जुई” धैगु न्ह्यसःलय् “तजिलजि धैगु मनुपिन्सं दयेकातःगु छगू घटक ख, गुगु मानव सभ्यता व उपिनिगु म्हसिकाया अस्तित्वया नितिं दयेकोतःगु खः । थुकिइ झिसं न्ववायेगु भाषा, झिसं न्येकेगु जात्रा व नखः, झिगु समाजय् नालाच्वंगु भेषभूषा रीतिरिवाज थे्र जाःगु मूर्त व अमूर्त सम्पदा दुथ्यानाच्वंगु दु । यदि संस्कृति मदल धाःसा मनुपिनिगु थःगु समुदाय व समाजय् सामाजिक म्हसिका दइमगु” धैगु लिसः बिया निर्णायकपिनिगु नुगः त्याकूगु खः । वय्कयात उपाधि लिसें ध्येबा २५द्वः नं लःल्हागु दु ।

अथेहे १३क्वःगु संस्करणया मिस लिटिल नेवाः नेपाल प्रतियोगिताय् प्रनिधि फस्टर रनर्रअप लिसें सोसियल वेलफेयर एम्बेस्डर चिफ, रिकृष्ण डंगोल सेकेन्ड रनर्सअप व नयना शाक्य मिस ट्यालेन्टया उपाधि त्याकूगु दु । उपिन्सं १५द्वः व १०द्व ध्येबाया सिरपा तकं त्याकूगु दु । अथेहे सिचु मानन्धर मिस ट्यालेन्ट फस्ट रनर्सअप व सारिका श्रेष्ठ मिस ट्यालेन्ट सेकेन्ड रनर्सअप लिसें वेष्ट स्माइल ल्यःगु दु ।

नेवाः मस्तयेगु आत्मविश्वास, बुद्धि लिसें नेवारी तजिलजि, भाषा व कलाया बारे ज्ञान बिइगु एवं लःल्हायेगु मू आज्जुं दँयेंदसं मिस लिटिल नेवाः नेपालया ग्वःसाग्वया वयाच्वंगु दु ।

ज्याझ्वःया मू पाहाँ येँ महानगरपालिकाया मेयु विद्यासुन्दर शाक्यं थुजागु ज्याझ्वलं नेवाः संस्कार व संस्कृतियात म्वाकातयेत बः बिइगु धयादिल । ज्याझ्वःया मिस नेवाः या फस्ट रनर्सअप प्रिया तण्डुकार व चार्मिङ पर्सनालिटि प्रजिता श्रेष्ठया कोरियोग्राफी व रोजिन शाक्यया संचालनय् क्वचाःगु खः ।

 

नेपालय् निजी ख्यःपाखें संकिपा दयेकेन्ह्यःया शाही नेपाल चलचित्र संस्थानया “सिन्दुर संकिपा निसें नेपाली चलचित्रय् म्ये हालादिम्ह सुष्मा श्रेष्ठ अर्थात् पुर्णिमा, नेवाः कूलय् जन्म जुयादिम्ह छम्ह ल्वकं ह्वाम कलाकार खः ।

वय्कलं जूनी, तिलहरी, सिमाना, अवतार, चेलीबेटी चोखो माया, सन्तान कन्यादान थें जाःगु सलंस नेपाली संकिपातय् थःगु सः बियादिगु दु । वय्कलं ११दँ निसें हे हिन्दी संकिपालय् म्ये हालादिगु ५०दँ सिबें अप्वः दयेधुंकुगु दु ।

नेपाःया तसकं ल्वकंह्वाम्ह गायक नारायणगोपाललिसें न्हापांगु युगल म्ये हालादिम्ह पूर्णीमां बलिउडया महान गायक मोहम्मद रफी, मुकेश, किशोर, कुमार सानु लिसे तकं म्ये हालादिगु दु । आरडी बर्मनया संगीतय् “बालिका बधू” या म्ये “बडे अच्छे लगते हो....” वय्कया तसकं ल्वकं ह्वाःगु म्ये खः धाःसा आरडी बर्मनया संगीतय् क्या हुवा तेरा वादा..... वय्कया लुमंकेबःगु मये खः ।

राजकपूर निर्देशित संकिपा धरमकरमय् वय्कलं मुकेशलिसे ‘इक दिन जब बिक जाए’ धाःगु म्ये हालादिगु खः धाःसा मोहम्मद रफी व सुमन कल्याणपुरलिसे सन् १९६९ नोभेम्बरय् अन्दाज फिल्मया नितिं शंकर जयकिशनया संगीतय् हैना बोलो बोलो धाःगु म्ये हाला मचा म्ये हालामिखय् नां जाःगु खः । ५२दँय न्ह्य रेकर्ड जूगु थ्व पूर्णीमाया न्हापांगु म्ये खः । पूर्णीमाया सन् १९५९ सेम्टेम्बर ६ तारिखय् भारतया मुम्बईया दादरया डाक्टर पाटकर अस्पतालय् बूगु खः ।

पूर्णीमां थः छेँजया विरोधया बाबजुद फेनोग्राफरया रेकर्डिस्टया काय् हरिश चन्द्रलिसे इहिपा यानादिगु खः । थ्व इहिपा हे वय्कयात अभिशाप सावित जुल । वय्कया भाःतया छेँ अपमान, बेइज्जत व शोषण बाहेक छुं नं मन्त । वय्कयात थः मिजं मदूगु ईलय् छेँ अपमानितकथं छेँ पिथना हल । व लिपाः गर्भवती पुर्णीमा थःछें लिकसं बालं च्वना बेरोजगार भाःतलिसे च्वन, थ्व ईलय् गर्भवती नं जुल ।

सन् ९०या दशकय् पूर्णीमा बलिउडया छम्ह नां जाम्ह म्ये हालामि जुलयादिल । चने कि खेत में, तू तू तारा, शाम है धुआँ धुआँ, सरकाइलो खटिया थें जाःगे म्ये पाखें वय्क प्रख्यात जुयादिल । अन्नू मल्लिकया संगीतय् माँ फिल्या बरसात में जब आयेगा सावन का महिना धाःगु म्ये तसकं चर्चित जुल ।

थ्वहे ईलय् टिप्स कम्पनीया रमेश तुर्रानीसितलिसें छगू एल्बमन पिकाःगु खः । नां, दाम व ख्याति घय्पुनां निम्हम सन्तानयाया जन्म बिल । वय्कया छम्हेसियागु कमाई नं थः भाःत निम्ह काय्पिन्त लःहिना न्ह्यनाच्वन ।

ईं न्ह्यना हे वन वय्कया काय्पिनिगु नं इहिपा नं जूल । थम्हेसिन म्ये हाला हे मेगु छेँ नं दयेकल । तर छन्हु वय्कया भाःतं वय्कलं कमय् यानातःगु ध्येबा दक्वः थःगु नामय् यात । न्हूगु छेँ नं श्रीमान व काय् भौ मिलेजुया काय्धुंकल । छन्हू थः काय् भौ, भात मिलेजुया वय्कया छेँ पिथनाहल । थौं पूर्णीमा बम्बई छम्ह नातेदारया छेँ शरणार्थी कथं च्वनाच्वनादिगु दु ।

छम्ह म्ये हालामिया हैसियतं वय्कलं कमेयानादिगु छगः ध्येबा नं वय्कयाके मदु । न्हापांगु लकडाउन् वय्कल थःगु छेँ हे पिहाँवयेमाःगु खः । निगूगु लकडाउनय् वय्क हाकनं ज्याया नितिं झाःगु दु । भाःत व काय्पिंविरुद्ध मुद्दा तकं तयादिगु दु । 

प्रकाश सायमीया फेसबुकपाखे

नेपालभाषाया ऐतिहासिक संकिपा ‘राजमति’या हिरो मणि राजलवट व हिरोइन हिसिला महर्जनं अभिनय यानातःगु नेपालभाषाया दोहरी म्ये ‘वयेगु जुल’ म्येया म्यूजिक भिडियोया पितब्वज्या जूगु दु।

यल थसिइ जूगु ज्याझ्वलय् अनिल महर्जन व  सरस्वती महर्जनं हालादीगु म्ये ‘वय्गु जुल’या म्यूजिक भिडियो सन्त निरंकारी मण्डल नेपालया न्वकू कृष्ण बहादुर पन्थं पितब्वज्या यानादिल । म्येया संगीत संयोजक निरञ्जन महर्जनं नेवाः संगीत ख्यलय् दोहोरी म्येया परम्परा तनावंगु धासें थुगु म्येलिसें नेवाः समुदाय दुने हाकनं दोहोरी म्येया परम्पराया थालनी जुइगु आशा प्वंकादिल।

नेपालभाषाया न्हापांम्ह सिने पत्रकार विजयरत्न असंबरें नेपालभाषाया संगीत क्षेत्रय् कलाकःमितय्सं प्रतिफलया आश मयाःसे निरन्तर रुपं पलाः न्ह्याकाच्वंगुया प्रशंसा यासें आः थुगु क्षेत्रय् पेशागत रुपं हे न्ह्याःवनेमाःगु ई वःगु बिचाः तयादिल । नेवाः फिल्म सोसाइटीया नायः लिसें संचारकःमि बिराजकाजी राजोपाध्यायं उद्योगी व्यापारी वर्गं थःगु वार्षिक नाफाया छुं प्रतिशत नेवाः कला क्षेत्रया नितिं धकाः फ्याय्फुसा थुगु क्षेत्रया उत्थानया नितिं तःधंगु ग्वहालि व योगदान जुइगु धयादिल।

भिंतुना न्वचु बीगु झ्वलय् फरक प्रसङ्गय् नवासें महालक्ष्मी नगरपालिका ६ वडाया वडाध्यक्ष बासुदेव महर्जनं वडां सिद्धिपुरया मूध्वाखा दय्काच्वनागु व नेवाः संग्रहालय दय्केत गृहकार्य जुयाच्वंगु जानकारी बियादिल।