निगूगु संस्करणया मिस युनिभर्स नेपाल २०२१ या उपाधि सुजिता बस्नेतं त्याकुगु दु ।

‘मिस युनिभर्स नेपालया उपाधि त्याकुगुलिसें वइगु डिसेम्बर १२ य् इजरायलय् जुइगु ७०क्वःगु ‘मिस युनिभर्स’ धेंधेंबल्लाय् सुजितां नेपाःया पाखें प्रतिनिधित्व याइगु जूगु दु । त्याकुमि बस्नेतं  १० गू लख तका सिरपाः व हीराजडित ताज चूलाकुगु दु ।

दरबारमार्गस्थित याक एण्ड यति होटलय् म्हिगः सनिलय् क्वचागु ‘मिस युनिभर्स नेपाल’ या निगूगु संस्करण अन्तर्गत १५म्ह प्रतिस्पर्धीयात लिउने लाका धेंधेंबल्लाया मू उपाधि त्याकुगु खः ।

ज्याझ्वलय्  नीना कान्त मण्डल फस्ट रनर अप जुल । अथेके  रक्षा उप्रेती सेकेन्ड रनरअप,  प्रतिक्षा महरा क्षेत्री थर्ड रनरअप व डा.केशु खड्का फोर्थ रनरअप घोषित जूगु खः ।

‘मिस युनिभर्स नेपाल’या थगुने जूगु न्हापांगु संस्करणया उपाधि आंशिका शर्मां त्याकुगु खः ।

८९ दँ दुम्ह म्येहालामि गुह्येश्वरी राज मानन्धरं हालादीगु परम्परागत दाफा म्येत सार्वजनिक जूगु दु ।

थौं येँय्  जूगु ज्याझ्वलय् वाङमय शताब्दी पुरुष सत्यमोहन जोशीयालिसें जनकवि दुर्गालाल श्रेष्ठ, वौद्ध विद्वान फणिन्द्र रत्न बज्राचार्य, चर्या गुरु यज्ञमान पति बज्राचार्यं मंकाः रुपमा मानन्धरं हालादीगु दाफा म्येया भच्र्युंअल एल्बमया विमोचन यानादिल ।

मानन्धरं हालादीगु ७पु दाफा म्येत सार्वजनिक याःगु खः । दक्वं म्येय् संगीतकःमि हरिशरण सायमिं संगीत संयोजन यानादीगु दु । सार्वजनिक जूगु दक्वं म्येत मानन्धरया हे युट्युब च्यानलमार्फत सार्वजनिक जूगु खः ।

ज्याझ्वलय् मानन्धरया म्ये ‘श्याम सुन्दर’ या म्यूजिक भिडियो नं सार्वजनिक याःगु खः ।

ज्याझ्वलय् नवासें शताब्दी पुरुष जोशीं देशय् कला व कलाकःमिया नामय् प्रज्ञा प्रतिष्ठान दयेकूसां उगु प्रतिष्ठानं वाद्यवादक, गुरु व कलाकःमितयत म्हमस्यूगु धयादिल ।

‘देयया अमूर्त सम्पदाया रुपय् दयाच्वंगु परम्परागत म्ये, संगीतया संरक्षणय् जनस्तरपाखें तःधंगु योगदान दु, गुह्येश्वरीं हे उलिमछि मेहनत यानाः दाफा म्येत मुंकाः पिकात, राज्यं छु यात ले ग्व ?’ जोशीं न्ह्यसः तयादिल ।

जनकवि दुर्गालाल, वौद्ध विद्वान फणिन्द्र रत्न, चर्या गुरु यज्ञमान पतिलिसें प्रा. डा. सिलु मानन्धर बज्राचार्य व प्रा. डा. पुष्कर बज्राचार्यं नेवाः समाजय् परम्परागत दाफा म्येया संरक्षणय् म्येहालामि मानन्धरया योगदानया बारे चर्चा यानादीगु खः ।

ज्याझ्वलय् जनकवि दुर्गालाल, वौद्ध विद्वान फणिन्द्र रत्न, चर्या गुरु यज्ञमान पतिलिसें दाफा गुरुपिन्त दोसल्लां न्ययेकाः सम्मान याःगु खः । 

चिराग फिल्म्सया ब्यानरय् दय्कूगु बुद्धकालीन नेपालभाषाया संकिपा घोषकया प्रिमियर बालाजुस्थित अष्टनारायण हलय् जूगु दु।

प्रिमियर शो न्ह्यः प्याखनय् दुथ्याःपिं कलाकार अअले प्राविधिकतय्त औपचारिक ज्याझ्वः यानाः सम्मान याःगु खः द। ज्याझ्वलय् येँ महानगर प्रमुख विद्या सुन्दर शाक्यं बुद्धधर्मया प्याखंत नेपालभाषां जक मखसें गैर नेवाः भासं नं डब यानाः बुद्धया हसनाया प्रचार याय्माःगु सुझाव बियादिल।

संकिपायात नेपाली भाषं डब याय्त येँ महानगरपालिका ग्वहालि यायेत नं तयार दुगु प्रतिवद्धता नं शाक्यं प्वंकादिल। भन्ते निग्रोघ महास्थवीरं घोषकया प्रसंग कुलादिसें बुद्धधर्मया प्रचारया निंतिं विहार निर्माण यानादीम्ह ब्यक्तित्वमध्ये छम्ह घोषक खःगु धयादिल। येँ महानगरपालिकाया उपप्रमुख हरिप्रभा खड्गी श्रेष्ठं नेपालभाषाया उत्थानया निंतिं स्थानीय तहलय् नेपालभाषां अध्यापन याकाच्वनागु खँ कुलादिसें नेपालभासाया संकिपा प्रदर्शन जूगु खँय् लसता प्वंकादिल।

प्याखंया पटकथा च्वमि दर्शनवीर शाक्यं बाखं च्वमि दिवंगत धर्मरत्न शाक्ययात लुमंकुसें वय्कःया कल्पनशीलतायात च्वछानादील। येँ महानगरपालिका १८ वडाया अध्यक्ष न्हुछेँकाजी महर्जनं स्तरीय प्याखं निर्माण यानावनेमाःगुलिइ बः बियादिल।

ललितपुर महानगरपालिका वडा १६ या ग्वसालय् थुगु वडा ब्यापि म्येहालामि व प्याखंहुलामिपिनिगु कासाया ग्वसाः ग्वःगु दु । येँयाःया लसताय् जूगु सांस्कृतिक ज्याझ्वः व ललितपुर महानगरपालिका १६ वडापाखें पुनःनिर्माण जूगु नागबहाःया गगन बाटिका उलेज्या ज्याझ्वःस थुगु कासाया घोषणा जूगु खः । १६ वडा कलाकार समितिं न्ह्याकीगु थुगु कासाय् ब्वति कायेत थःम्हं हालागु म्ये व प्याखं हुलागु भिडियो कलाकार समितिया इमेल kalakarsamiti16lmp@gmail.com य् छ्वयादीगु बाय् वडाय् दुथ्याकादीफइ धाःगु दु । थुगु कासाय् न्हाप लाःपिन्त २५/२५ द्वः, ल्यू लाःपिन्त १५/१५ द्वः, लियांल्यू लाःपिन्त १०/१० द्वः नगद सिरपानापं मेमेगु ल्वःवनापुसे सिरपाया जानकारीबिसें टप भ्यूज हःम्ह कलाकारयात नं सिरपा बीगु धाःगु दु । कासाया टप १० कासामिपिन्त कला यात्रा अझ धिसि धायेमा धकाः टे«निङ प्याकेजय् नं दुथ्याकीगु जूगु दु ।

थुगु कासाया समापन धाःसा ने.सं. ११४२ न्हूदँया लसताय् जुइगु सांस्कृतिक ज्याझ्वलय् जुइ । सिरपा त्याकादीपिनिगु नां घोषणानापं सिरपाः लःल्हायेगु ज्या जुइगु थुगु ज्याझ्वलय् वरिष्ठ कलाकार हनानापं १६ वडाया लोकंह्वाःपिं कलाकारपिंपाखें म्ये, हुलाप्याखं थें जाःगु प्रस्तुति नं दइ ।

१६ वडाया कलाकार समितिया दुजःपिं म्हसीकूसे थुगु हे समितिया न्हापांगु ज्याझ्वःकथं जूगु सांस्कृतिक ज्याझ्वलय् १६ वडाया लोकंह्वाःपिं कलाकारपिं भूपेन्द्र बज्राचार्य, नील शाक्य, सुरजवीर बज्राचार्य, सुलिन्द्र शाक्य, निर्मलरत्न शाक्य, अमर चित्रकार, अमोघवीर बज्राचार्य, भूषण बज्राचार्य, जितेन शाक्य, रेजिना बज्राचार्य, पद्म शाक्य, नदिम शाक्य, रेण्डर ब्याण्डं म्ये न्ह्यब्वयादीगु खः । अनुप शाक्य व सलोना बज्राचार्यं न्ह्याकादीगु थुगु ज्याझवलय् इम्पल्सपाखें निसिला शाक्य, दिया शाक्य, अर्चा बज्राचार्य, निभाः बज्राचार्य, हितेषा शाक्य, निष्ठा बज्राचार्यनापं प्रलिसा शाक्य, प्रतीक, समृद्धि, कृष्णा, प्रजीन, सोनिया, संयुक्ता शर्मा, साइरा महर्जनं हुलाप्याखं न्ह्यब्वयादीगु खः ।

थुगु ज्याझ्वःसिबें न्ह्यः गगन बाटिकाया उलेज्याया मूपाहां ललितपुर महानगरपालिकाया मेयर चिरिबाबु महर्जनं स्मार्ट सिटी दयेकेगु अभियानय् नागबहाःया गगन बाटिका दसू खः धयादिसें थुकिं थःनं उत्साहित जुयागु कनादिल । ज्याझ्वलय् लसकुस यासें १६ वडा अध्यक्ष निर्मलरत्न शाक्यं गगन बाटिका पुनःनिर्माण क्वचाःगुया लसता प्वंकूसें १६ वडाया हे मेगु सांस्कृतिक महत्वं जाःगु न्याखाचुक व इलांननि पुनःनिर्माण नं याकनं क्वचाइगु खँ कनादिल।

वय्कलं १६ वडाया कलाकारपिन्त तिबः जुइकथं समिति दयेकागु व थीथी ज्याझ्वः ग्वसाः ग्वयावनेगु नं कनादिल । थुगु ज्याझ्वलय् गगन बाटिका पुनःनिर्माणया संयोजक रविन्द्र शाक्यं थुगु पुनःनिर्माणय् योगदान यानादीपिनिगुबारे कनादीगु खःसा १६ वडा कलाकार समिति संयोजक सुरजवीर बज्राचार्यं वडाया ग्वसाःकथं थुगु समितिं याइगु थीथी ज्याझ्वःया खँ कँसे कलाक्षेत्र विकासया नितिं स्थानीय तहया तिबः दयेमाःगुपाखे ध्यानाकर्षण याकादिल ।