नेवाः संकिपामिपिनिगु संस्था नेवाः फिल्म सोसाइटीया न्हुगु नेतृत्वय् बिराजकाजी राजोपाध्याय यात सर्वसम्मतं ल्यःगु दु।

कलाकार शोभा महर्जनया गिफ्ट नांयागु बुटिकया सभाकक्षय् जुउगु सोसाईटीया च्वाक्वःगु साधारण सभा व निक्वःगु अधिवेशनं भाजु राजोपाध्याययात अध्यक्ष पदय् सर्वसम्मत ल्यःगु खः। अधिवेशनं राजोपाध्यायया नेतृत्वय् ११म्ह दुजः दुगु न्हूगु ज्यासना पुचः सर्वसम्मतं ल्यःगु खः। सर्वसम्मतं निर्वाचित सोसाइटीया न्हूगु ज्यासना पुचलय् न्वकु दर्शनबीर शाक्य, मूछ्यान्जे आभास राजोपाध्याययात ल्यःगु खः।

अथेहे, छ्यान्जे रोहन श्रेष्ठ, दाँभरीं सुनिता श्रेष्ठया नापनापं खुम्ह दुजलय रुपेन्द्रकुमार श्रेष्ठ, राजन शाही, राकेश प्रधानाङ्ग, बिशाल राजभण्डारी, कृष्णशोभा महर्जन व रोजिना सुवालयात सर्वसम्मतं ल्यःगु खः ।

ल्यःज्या जुइसिबें न्ह्यः जुउगु साधारण सभाया उलेज्या ज्याझ्वः सोसाइटीया नायः लुजः सिंहया सभानायसुइ जुउगु खःसा ज्याझ्वलय् आदिबासी जनजाति चलचित्र महासंघया नायः अमृत सुनवार मूपाहाँ कथं झायादीगु खःसा विशेष पाहाँ कथं सिने पत्रकार विजयरत्न तुलाधर, थाईल्याण्डया निंतिं नेपाःया पर्यटन दुत चिरन शाक्य, नांजाम्ह संकिपा कलाकार राजेन्द्रमान शाक्यपिन्सं नेवाः संकिपाया थीथी पक्षयात कुलादिल।

उलेज्याझ्वः धुंकाया बन्द सत्रय् सोसाइटीया आर्थिक व बार्षिक प्रतिवेदन नं न्ह्यब्वःगु खः।

येँ महानगरपालिका १८ वडाध्यक्ष न्हुच्छे काजी महर्जनया च्वसां पिज्वःगु निपु म्येया म्यूजिक भिडियोया प्रिमियर जूगु दु।

१८ वडाया सभा हलय् जुगु उगु ज्याझ्वः प्रिमियर जूगु निपु म्ये मध्ये छपू खस नेपाली भाषाया किन दुख्न थाल्यो बोलया खसाः मेगु नेपाल भाषाया बुदिंया भिन्तुना बोलया म्ये खः। म्ये च्वमि न्हुच्छे काजी महर्जनया सभाध्यक्षताय् जुगु उगु ज्याझ्वलय् येँ महानगरपालिकाया मेयर मेयर विद्या सुन्दर शाक्यजु मूपाहाँ कथं झायादीगु खः।

मूपाहाँ मेयर शाक्य नाप साहित्यकार बालकृष्ण सजिव, नांजाम्हः कलाकार सविन शाक्य पाहाँ कथं झायादीगु खः। प्रिमियर जूगु किन दुख्न थाल्यो म्येय् स वियादीम्हः राजेन्द्र शाक्य खःसा लय् चिनामि अनिल तुलाधर खः।वरिष्ठ निर्देशक पवन जोशीया निर्देशनय् रविना शाक्य, राजेन्द्र कुमार महर्जन ‘राजी किपू’ अले न्हुच्छे काजी महर्जन व राजेन्द्र शाक्य पिन्सं अभिनय यानादीगु दु।

अथेहे बुदिंया भिन्तुना म्येया लय् चिनामि रिता महर्जन खःसा थुकिइ सः वियादीपिं संगिता शाक्य व रिता महर्जन खः। सम्पादन व निर्देशन सुरेन्द्र महर्जनं यानादीगु थुगु म्यैया किपालुमि शैलेश श्रेष्ठ लुभु खः। थुगु म्येय् म्ये च्वमि स्वयं न्हुच्छे काजी महर्जनया नाप नापं अनिस महर्जन, रेनुसा महर्जन, अनिना महर्जन, लिजला श्रेयसी, सानुछोरी अले सानुमैयाँपिन्सं अभिनय यानादीगु दु।

वडा सदस्य शोभा महर्जनं न्ह््याकादीगु थुगु प्रिमियर ज्याझ्वलय् म्यूजिक भिडियोया निर्देशकपिं पवन जोशी व सुरेन्द्र महर्जन थः थःगु नुगः खँ तयादिल।

संसार क्रियाशन व संसार अनलाईन टिभीया ग्वसालय् जूगु संसार अनलाईन सिङ्गिङ स्टार अवार्ड २०२०–२१ या फस्ट रनरअप अमोघवीर बज्राचार्ययात यल महानगरपालिका वडा १६ पाखें भिंतुना देछात । वडा भवनय् जूगु ज्याझ्वलय् १६ वडा बूबहाःया म्येहालामि बज्राचार्यंयात खादां न्ययेकाः भिंतुना पौ देछाःगु खः । भिंतुना पौ देछाःसें अध्यक्ष निर्मल रत्न शाक्यं “वडाया कलाकारपिनिगु उत्साहं सम्पूर्ण वडा हे उत्साहित जुइगु” धयादिसें “उगु उत्साह व लसता बियादीम्ह कलाकारयात नं वडापाखें औपचारिकरुपं भिंतुनापौ देछानाः हनेगु परम्परा न्ह्याकागु” खँ कनादिल ।

वय्कलं वडा १६ या कलाकार समिति नीस्वनागु खँ न्ह्यथसेंं थःगु कला व प्रतिभां समाजय् योगदान बीगु, थःगु जन्मस्थानयात गौरवान्वित याइपिं १६ वडाया कलाकारपिन्त वडां तिबः जुइगु ज्या न्ह्याकेगु उद्देश्यं समिति नीस्वनागु खँ नं न्ह्यथनादिल । थुगु ज्याझ्वःया ग्वसाः ग्वःगु १६ वडाया कलाकार समितिया संयोजक सुरजवीर बज्राचार्यं ल्यू लाकादीम्ह म्येहालामि अमोघवीरयात भिंतुना देछाःसें छम्ह कलाकारया सफलतायात वडां थःगु सफलताकथं नालेगु परम्परा न्ह्याकूगुलिइ लसता प्वंकादिल । १६ वडा कलाकार समितिपाखें येँयाःया लसताय् वइगु शनिवाः यलया नागबहालय् जुइगु सांगीतिक÷सांस्कृतिक ज्याझ्वलय् १६ वडाया कलाकारपिं उत्साहित जुइगु मेगु ज्याझ्वःया उद्घोष जुइगु खँ न्ह्यथनादिल । भिंतुनापौ लःल्हाना कयादिसें थः अतिकं लय्ताःगु खँ कनादीम्ह अमोघवीरं थःत अझ सक्रिय जुइतः, मेहनत यायेत थुगु भिंतुना देछायेगु ज्याझ्वलं हःपा ब्यूगु खँ कनादिल ।

१६ वडाया अमोघवीरं ल्यू सिरपा त्याकादीगु थुगु कासाय् इलामया आश्विन प्रधान न्हाप लाःगु खःसा आश्रय रञ्जित लियांल्यू लाःगु खःसा १६ दँ क्वय्य् कासामिपिं दथुइ जूगु प्रतिस्पर्धाय् धाःसा प्राप्ति तामाङ न्हाप, रितु श्रेष्ठ ल्यू व झरना खनाल लियांल्यू लाःगु खः ।  

 

नेपालभाषाया म्युजिक भिडियो ख्यलय् बीग बजेट म्युजिक भिडियो एल्बम कथं बय्बय् जूगु “ल्ववन“या निर्देशक देवकुमार श्रेष्ठ हाकनं छक्वः नेपालभाषाया म्युजिक भिडियो ख्यलय् खनेदयेक वगु दु।

थुगु पालय् म्येहालामि÷च्वमि÷लय चिनामि भेष महर्जनया हेभि रक म्ये “हाल हाल “या म्युजिक भिडियो ज्वना वंगुु दु। उगु म्ये नाइस टेलिभिजनया “झीगु सः“नेवाः ज्याझ्वःलय् मङ्गलबाः प्रिमियर जुइगु दु। हेभि रक म्ये कथं तयार जुगु “हाल हाल“या टिभि प्रिमियर मङ्गलबाः छगु ज्याझ्वः दथुइ पितब्बज्या जुगु खः।

म्ये च्वमि निर्मलरत्न शाक्यया बीग बजेट “ल्ववन“या म्युजिक भिडियो निर्देशक देवकुमार श्रेष्ठया निंतिं थ्व “हाल हाल“ या म्युजिक भिडियो छगू हाथ्या खः धका स्वीकार याना दिगु खः। अप्वः याना म्येया म्युजिक भिडियो कि मतिनाया बाखं दया च्वनि कि देश व भाषा भक्ति या खँ दया च्वनि थुके थौंया युगय् हुलमुलय् तना च्वंम्ह मनूया खँ न्ह्यब्वयेगु कुतः जुया च्वंगु दु ।

म्युजिक भिडियोया किपालुमि÷सम्पादक अमर चित्रकार यागु खः ।

समाजसेवी, महिला उद्यमी नाप गायिका सकुना श्रेष्ठ मलेकुया न्हापागु प्रस्तुती तिजया म्ये “माईतीको आँगनमा” सार्वजनिक जुगु दु।

“माईतीको आँगनमा” बोलया शब्द÷ संगीत एच.बि.सुनार, सः सकुना श्रेष्ठ मलेकु व मञ्जु उपासनापिन्स बिगु खः। अथेहे ऐरेन्ज साहस शाक्य, स्टुडियो एकोष्टीक नेपाल, मोडेल शिल्पा पोख्रेल व अञ्जु सुनार, अतिथी कलाकारय् रमा थपलिया व देशभक्त खनाल, डाईरेक्टरय् उत्तम “शिशिर” कोरियोग्रोफिइ सुबोल थापा व मेकपय् सपना लम्साल यागु खः।

अथेहे बजार व्यवस्थापनया संयोजन बाँपीझ्याला मिडिया प्रा.लि. व व्यवस्थापनय गायिका सकुना श्रेष्ठ थःगु संस्था समकालिन एकता समाज नेपाल दोलखा काठमाण्डौं यागु खः।