Display Style:
Column Style
पवन जोशीया न्हुगु म्युजिक भिडियो पिहावयेगु तयारी
शोभा श्रेष्ठ | कौलाथ्व द्धादशी ११४०,कार्तिक १२ बुधवाः
लोकलयय् आधारित नेपालभाषा तसकं लोकह्वाःगु म्ये राजमति कुमतिया फिमेल भर्सनय् म्युजिक भिडियो तयार जूगु दु।
न्हुगु पुस्ताया न्हुगु सोच कथं लोकह्वाःम्ह कलाकार नाप निर्देशक पवन जोशीया निर्देशनय् राजमति कुमतिया फिमेल भर्सनया म्युजिक भिडियो तयार जूगु दु।
मोहनिया इलय् नेपाःया ऐतिहासिक थाय् किपूलि उगु म्युजिक भिडियोया छायाँकन जुगु खः।
थुगु राजमति कुमति म्येया म्युजिक भिडियो याकनय् पिहावइगु धका निर्देशक जोशी लहनान्युजयात कनादिगु दु।
थुगु म्येयात अगिना तण्डुकारया सः व अनिल तुलाधरं संगीत संयोजन यानादिगु खःसा छायाँकन व सम्पादन राजेश शाक्यं याःगु खः।
म्युजिक भिडियोलय् दृष्टि जोशी, अगिना तण्डुकार व रोशन शाक्यं अभिनय याःगु खः।
आराध्योलक्ष्मीया जमाना मभिं स्व
लहानान्युज | कौलाथ्व द्धादशी ११४०,कार्तिक १२ बुधवाः
चर्चितम्ह हुलाप्याखंमिया रुपय् थःगु बिस्कं म्हसिका दुम्ह कलाकार आराध्योलक्ष्मी खड्गीं आपालं म्युजिक भिडियोया मोडल जुया म्हिते धुकुगु दु।
आराध्योलक्ष्मीया गुलिखे म्युजिक भिडियोया हुलाप्याखंनय् निर्देशन न याये धुकुगु दु। छम्ह डान्स कोरियाग्राफर जुया हुलाप्याखंया निर्देशक कथं आपालं म्युजिक भिडियोलय् ज्या यानादी धुंकुम्ह कलाकःमि आराध्योलक्ष्मीं थःगु हे निर्देशनय् दयेकुगु “जमाना मभिं स्वया” नांयागु म्युजिक भिडियो याकनं हे पिदनिगु लँंपुइ थ्यःंगु दु।
थुगु म्युजिक भिडियो तधःगु बजेटय् “जमाना मभिं स्वया” या कोरियोग्राफर व निर्देशक आराध्योलक्ष्मी थम्हं हे मू मोडल कथं म्हिताच्वंगु थुगु भिडियोखय् नेवाः संकिपाख्यलय् तसकं लोकंह्वाःम्ह नेवाः सुपरस्टार कथं म्हसिकादुःम्ह रुपेन्द्र श्रेष्ठ थक्वाःयात नं मेन रोलय् स्वयइगु दइगु जुगु दु।
थुकिइ मेपि कलाकार चिरीबाबु महर्जन, रमेश पौडेल, राजकुमारी श्रेष्ठयात नं स्वयेदइ । बुदिंया भिन्तुना म्येकासाय् सिरपा त्याकूपिं रोबिन्सन कंसाकार व सुमन मानन्धरं थुगु म्हे हालादीगु खः।
थुगु म्ये नांजाम्ह सन्चारकःमि व संगीतकःमि लोकंह्वाम्ह गायक सुरजबीर बज्राचार्यं च्वयादीगु खः ।
“जमाना मभिं स्वया”या म्युजिक भिडियोया सिनेमाटोग्राफि व एडिटिंगया ज्या नांजाम्ह कलाकःमि सोहन मानन्धरं यानादीगु खःसा लोकंह्वाःम्ह संगीतकःमि जुगल डंगोलं थ्व म्ये लसय् हनादीगु खः । छगु फिचर फिल्मया प्रचार याये थें हे प्रचार याना च्वंगु “जमाना मभिं स्वया”या म्युजिक भिडियोया छुं न्हि न्ह्यः तिनि पोस्टर पिकाःगु खः
हिरोइन् जूपिं “मिस नेपाल”
लहानान्युज | कौलाथ्व द्धादशी ११४०,कार्तिक १२ बुधवाः
– विजयरत्न असंबरे
बलिउड धकाः धयातःगु हिन्दीसंकिपाख्यलय् ब्यूटी कन्टेस्ट त्याका वःपिं हिरोइनत यक्व दु । तर कलिउड धकाः धयातःगु खस नेपाली संकिपाख्यलय् धाःसा थथे ब्यूटी कन्टेस्ट त्याका वःपिं हिरोइन त उलि मदुनि । खय्तला नेपालय् थजाःगु ब्यूटी कन्टेस्ट शुरु जूगु नं उलि मदुनि । दकलय् सकलय् न्हापांगु ब्यूटी कन्टेस्ट धइगु हे सन् १९९४य् मिस नेपालया नामं जूगु खः। हिडन ट्रेजरया ग्वसालय् जुया वयाच्वंगु थ्व कासा आःतक नीस्वक्वः जुइधुंकल ।
सन् १९९४य् जूगु दकलय् न्हापांगु कासाय् “मिस नेपाल” जुइत ताःलाःम्ह रुबी राणा खः । अलय् रुबी राणा हे न्हापा संकिपाय् पलाः न्ह्याकूम्ह न्हापांम्ह “मिस नेपाल” खः । थौं स्वयां नीदँनीन्यादँ न्ह्यः राजेश हमाललिसे “अनमोल” नांयागु संकिपा म्हितूगु खःसा वधुंकाः सुनिलदत्त पाण्डेलिसे “भुतुक्कै भएँनि” नांयागु संकिपा म्हितल । तर थ्व निगुलिं संकिपां स्वकुमिया नुगः त्याके मफुत । अनंलिपा वं मेगु हे लजगाः ज्वन । रुबी राणां लिपांगु इलय् वयाः“अन्तराल”संकिपाया लुखां हाकनं छक्वः संकिपाय् ‘ईण्ट्रि’ यात । अलय् “आधी बाटो” व “शिशा” नांयागु संकिपा नं म्हितल, तर सपोर्टिंग रोलय् रि–ईण्ट्रि जुइत याःगु कुतः नं ताःलाय् मफुत ।
थुकथं दकलय् न्हापांम्ह मिस नेपालया संकिपा यात्रा ताःमलातसा आः थगुनेया मिस नेपाल निकिता चण्डकं नं संकिपापाखे पलाः न्ह्याकाः मिस नेपालतय्गु संकिपा यात्रायात निरन्तरता बीगु ज्या याःगु दु । खय्तला निकितां म्हितेगु धकाः क्वःछ्यूगु “रानी महल”संकिपायात कयाः उलि बांलाःगु खँ पिहाँ वयाच्वंगु मदु, अय्सां निकिताया नं हिरोइनजुइगु ईच्छा दु धइगु खँ थुकिं क्यंगु दु । थथे कलिउडय् हिरोइन् जूपिं मिस नेपालतय्गु यात्रा स्वय्गु खःसा उलि ताःलाःगु धाःसा खनेमदु । आःतक मुक्कं नीस्वम्ह मय्जुपिं मिस नेपाल जुइधुंकलसा उकी गुम्हेसिनं कलिउडय् दुहाँ वनेगु कुतः याःगु खनेदु ।
अजुचायापुसेच्वंगु खँला छु धाःसां मिस नेपाल हे जुइत ताःलाःपिं बाहेक मेमेगु ब्यूटी कन्टेस्ट त्याकूपिं वा मिस नेपालय् ब्वति कयाः मेमेगु उपाधि त्याकूपिं धाःसा संकिपाय् दुहाँ वःगु उलि खनेमदु । उकी मध्ये सन् १९९७य् झरना बज्राचार्य ‘मिस वल्र्ड नेपाल’ जूगु इलय् फस्र्ट रनर अप जूम्ह मिनाक्षी वन्दना शर्मा छम्हेसिनं हे जक संकिपाय् अभिनय याःगु दु, तर खस नेपाली संकिपाय् मखु, हिन्दी टेलिसिरीयलय् ।
मिनाक्षीं भारतय् “हम फिर मिलेंगे”, “करीना करीना”, “कीट्टो” नांयागु छुंछुं हिन्दी टेलिसिरीयल म्हितल, तर वयागु पलाः नं अन क्वातुइ मफुत । मिनाक्षी फस्र्ट रनर अप जूबलय्‘मिस वल्र्ड नेपाल’ जूम्ह झरना बज्राचार्यकलिउडय् जक मखुसे बलिउडय् तक नं हिरोइन जुइगु कुतः यात । नेपालय् शुटिंग जूगु हिन्दी संकिपा “लभ ईन नेपाल”य् तकं म्हितूम्ह झरनाया न कलिउड यात्रा सुथांलात न त बलिउड यात्रा हे ।“हतियार” नांयागु संकिपाय् डेब्यू याःम्ह झरना बज्राचार्यं “शुभकामना”, “कोही मेरो”, “सिउँदोको सिन्दुर”, “भाइटिका”, “संजीवनी” थेंजाःगु झिगू झिंन्यागूति संकिपा म्हितल, तर हिट हिरोइन्या दर्जा काय् मखं ।
उकिसनं झरनाया “सेफ ल्याण्डिङ्ग” ,“रंगीन मनशाय” व “दिदी बहिनी”थेंजाःगु संकिपा पिहाँ हे वय् मफुबलय् वयात कयाःसंकिपा दय्कीपिं हे मदया वन । झरनां लिपा वना “सेफ ल्याण्डिङ्ग” संकिपाया निर्माता राहुल अग्रवाललिसे इहिपाः यानाः जीवनया सेफ ल्याण्डिङ्ग यात ।
आःतकया दुने मिस नेपाल जूपिं मध्ये रुबी राणा,सुमी खड्का, झरना बज्राचार्य, मलिना जोशी, सृष्टि श्रेष्ठ धुंकाः आः वयाः निकिता चण्डकं कलिउडय् हिरोइन जुइगु कुतः यातसा मेपिन्सं थथे कुतः मयाः । खय्त ला सन् २००२या मिस नेपाल माल्भिका सुब्बां हिरोइन् जुइगु कुतः मयागुला मखु, तर वं म्हितूगु न्हापांगु संकिपा “गुडबाई काठमाण्डौ” नांयागु संकिपा रिलिज हे मजूबलय् वयागु हिरोइन् जुइगु ईच्छा अथेहेतुं लात । मेम्ह मिस नेपाल सुमी खडकां नं “ग्रहण” नांयागु संकिपाया लुखां थःत हिरोइनया रुपय् न्ह्यब्वय्गु कुतः यात । थ्व संकिपाया बनेज्या ताःमलात । अनं लिपा भुवन के.सी. थेंजाःम्ह नांजाःम्ह स्टारं सुमीयात “सुपरस्टार” संकिपाय् हिरोइन् दय्कल । थ्व संकिपा नं फ्लप जूबलय् सुमी खड्काया यात्रा दित ।
कलिउडय् थ्व दँबदँ न्ह्यः खनेदय्क वःपिं निम्ह मिस नेवाः धइपिं मलिना जोशी व सृष्टि श्रेष्ठ खः । सृष्टि श्रेष्ठयात थःगु न्हापांगु संकिपा “गाजलु”स अनमोल के.सी. थेंजाःम्ह लोकंह्वाम्ह हिरोया हिरोइन् जुइगु ह्वःताः चूलात । संकिपा नं सुपर हिट हे जुल । तर वयागु मेगु संकिपा धाःसा पिदंगु मदुनि । थौंकन्हय् सृष्टि थःगु फिल्मी क्यारियर स्वयां कलिउडया हिरो सौगात मल्ललिसेया यःत्यःया यात्राय् न्ह्याः वनाच्वंगु खनेदु । अथेहेतुं मलिना जोशीं नं सन् २०१३य् “ऋतु”संकिपापाखें न्ह्याकूगु यात्रा “झुम्की”, “संरक्षण”, “लीला”व “द वीनर”थेंजाःगु आपालं संकिपातक थ्यंकूसां वयागु पलाः नं आःतक थातय् लाय्फूगु मदुनि ।
थुकथं न्ह्यानाच्वंगु ‘मिस नेपाल’तय्गु हिरोइन् जुइगु यात्रा आःतक उलि ताःलाःगु खनेमदुनिसा कलिउडय् थःगु पलाः न्ह्याकूपिं मेमेपिं मध्ये माल्भिका सुब्बां लिपा वनाः‘फिल्म प्रोड्यूसर’कथं“हाउ फन्नी”संकिपाय् लाय् तःगु खनेदतसा रुबी राणां लिपा वनाः क्यारेक्टर आर्टिस्ट जुइगु तकं कुतः यात । थुपिं बाहेक जेनिशा मोक्तान, उषा खड्गी, ईशानी श्रेष्ठ नं संकिपालिसे स्वापू तःपिं ‘मिस नेपाल’ खः । आपासिनं थः मिस नेपाल जुइधुंकाःसंकिपाय् स्वापू क्वातुकेत स्वःगु खनेदुसा सन् २०१३या मिस नेपाल ईशानी श्रेष्ठं धाःसा थः मिस नेपाल जुइ स्वयां यक्व हे न्ह्यः मचाबलय् हे बाल कलाकारया रुपय् कलिउडय् पलाः न्ह्याकूगु खः ।
एक्शन स्टारया रुपय् नांजाःम्ह शिव श्रेष्ठया मू भूमिका दुगु “लक्ष्मण रेखा” नांयागु संकिपाय् बाल कलाकार जुयाः म्हितूम्ह ईशानी श्रेष्ठं उगु दँय् नेपाल चलचित्र संघं ग्वसाः ग्वःगु “मोशन पिक्चर एवार्ड”य् ‘बेस्ट चाईल्ड आर्टिस्ट’या सिरपाः तकं त्याकेत ताःलाःगु खः । अथेहे तुं सन् २००९या मिस नेपाल जेनिशा मोक्तानंआर्यन सिग्देल व नम्रता श्रेष्ठ दुगु “मेरो एउटा साथी छ” नांयागु संकिपाय् साइड रोल म्हितूगु खःसा सन् २०००या मिस नेपाल उषा खड्गी नं कलिउडय् ईण्ट्रि जुइत्यंगु दु । उषा धाःसा हिरोइन्, साइड हिरोइन् वा छुं नं कथंया आर्टिस्ट जुया मखुसे छम्ह ‘फिल्म प्रोडुसर’ जुयाः कलिउड दुहाँ वय्त्यंगु खः । खय्तला उषा खड्गीं छुं छुं म्यूजिक भिडियो व विज्ञापनय् म्हितूगु दु, तर संकिपाय् धाःसा कलाकारया रुपय् मखुसे प्रोड्युसरया रुपय् पलाः न्ह्याकेत्यंगु खः ।
पूर्व मिस नेपाल उषा खड्गीं दय्केत्यंगु संकिपाया नां “आउँदै जाँदै” खः । थ्व संकिपाया निर्देशक मेपिं सुं मखुसे उषाया हे जहान जि.पि.तिमल्सिना खः। छम्ह सञ्चारकःमिया रुपय् नांजाःम्ह जि.पि. तिमल्सिनाया संकिपा निर्देशकया रुपय् न्हापांगु पलाःकथं न्ह्याइगु थुुगुसंकिपाया पलाः धाःसा आःतकया दुने औपचारिक घोषणा ज्याझ्वः स्वयां अप्वः न्ह्याःवंगु मदुनि । थुकथं स्वय्बलय् नेपाःया संकिपा ख्यलय् मिस नेपालपिन्सं न्ह्याकूगु छुं नं कथंया पलाः उलि ताःलाःगु मदुनि।
सुमन मानन्धरया ‘भुतुमालि’ पिदन
सुरज, लहनान्युज | काैलाथ्व सप्तमी ने.सं. ११४० (कार्तिक ७, २०७७) शुक्रवाः
भुतुमालि ब्वःथें ब्वइच्वंगु थ्व झीगु जीवन
पपू चकंकाः ब्वइ थ्व गुबले धायेमफु सुनां नं
भुतुमालिइ जीवन दर्शनया बर्णनं जाःगु सुमन मानन्धरया लोकंह्वाःगु म्ये ‘भुतुमालि’या म्यूजिक भिडियो सार्वजनिक जूल । प्रदीप खड्गीया सम्पादन व निर्देशनय् दयेकूगु थुगु म्येय् सरीता बज्राचार्य, रुजन महर्जन, रिग्या महर्जन, लूनिभाः मानन्धर, निश्मा महर्जन व प्रविशा महर्जनं म्हितादीगु खःसा थुगु म्यूजिक भिडियोया कोरियोग्राफी नं कलाकार सरीता बज्राचार्यं हे यानादीगु खः । रकि महर्जनं छायाँकन यानादीगु थुगु म्यूजिक भिडियोय् वय्कःयात अमन महर्जनं ग्वाहालि यानादीगु खः ।
प्रकाश दीपं च्वयादीगु थुगु म्ये जूगल डंगोलं लसय् चिनादीगु खःसा संगीत संयोजन नं वय्कलं हे यानादीगु खः ।
नेपालभाषा बूदिं तजिलजिया लसताकथं सकसिनं ययेकूगु ‘बूदिंया भिंतुना म्ये’ व थुकिया कासा ‘चेज बूदिंया भिंतुना म्ये कासा’या उत्कृष्ट ५ म्ह कासामी लाःम्ह सुमन मानन्धरया थुगु म्ये उगु हे कासाया सिरपा म्ये खः ।
आर्टोम्यूज रेकर्डिङ स्टुडियोया न्ह्यब्वया ‘सिरपा’ म्येचाः ने.सं. ११४० चिल्लाथ्व एकादशीया दिनय् पिदंगु खः ।
भिडियाे स्वयेत क्लिक यानादिसँ ।
बूदिंया भिंतुना म्ये मंगलधूनया लसय् सुरजवीर बज्राचार्यं च्वयादीगु, हालादीगु व जूगल डंगोलं संगीत संयोजन यानादीगु खःसा थुगु म्येया कासा पेजथ्री बाःछिपौया ग्वसाः व चेज टिभीपाखें प्रयोजित खः ।
सुरजवीरया हे च्वसाय् व जुगल डंगोलया लसय् सुमन मानन्धरं रोविनसन कंसाकारनाप हालादीगु ज्वःम्ये ‘जमाना मभिं स्व’ नं याकन हे पिदने त्यंगु दु ।
बुद्ध भजन प्रतिभा मालेज्याय् अगिना व सुशील न्हाप
लहानान्युज | अनलागा १० ११४०,असोज २६ सोमवाः
बुद्ध शान्त पार्क निर्माण समितिया ग्वसालय् नेपालभाषा व नेपाली बुद्ध भजनया माध्यमं अनलाइनपाखें जुयाच्वंगु प्रतिभा मालेज्याया त्याकामिपिं घोषित जूगु दु । नेपाली बुद्ध भजन विधा शनिबाः येँय् क्वचाःगु लिपांगु धेंधें बल्लाखय् अगिना तण्डुकार न्हाप लात सा रेशम थापा ल्यू व कल्पना श्रेष्ठ लियांल्यू लात । त्याकामिपिन्त शहरी विकास राज्यमन्त्री रामवीर मानन्धरं ट्रफि लःल्हानादिल । अथे हे, प्रा. सुवर्ण शाक्यं दसिपौ लःल्हानादिल ।
नेपाली बुद्ध भजन अन्तर्गतया प्रतिभा मालेज्याय् मुक्कं सच्छिम्हेसिनं ब्वति काःगु खःसा अनलाइन माध्यमं जूगु धेंधें बल्लाःया थीथी चरणं त्यानावयाः लिपांम्ह १० तक्क थ्यनेत ताःलाःपिं टप टेन दथुइ लिपांगु धेंधें बल्लाः जूगु खः । उगु हे ज्याझ्वलय् कासा ज्वःछि दक्कले आपाः एसएमएस चूलाकूपिं निम्ह व युट्युबय् दक्कले आपाः भ्यूज वःपिं निम्हलिसें कासाया दक्कले ज्याथःम्ह छम्ह व जिथिम्ह छम्ह लिसें दक्कले क्वकालिम्ह मचा कासामियात तकं सिरपाः ब्यूगु खः ।
ज्याझ्वलय् वरिष्ठ गायिका रमना श्रेष्ठ, प्रा. सुवर्ण शाक्य लिसें नं वौद्ध ख्यलय् धेंधें बल्लाः वा कासा मजुइगु तर ईकथं न्ह्याःवनाः प्रतिभा मालेगु ज्या धाःसा बांलाःगु बिचाः तयादिल ।
शुक्रबाः क्वचाःगु नेपालभाषा बुद्ध भजनया प्रतिभा मालेज्याय् धाःसा सुशील शाही न्हाप लात सा मन्जिल शाक्य ल्यू व प्रतिमा बज्राचार्य लियांल्यू लायेत ताःलात । वय्कः त्याकामिपिन्त नं शहरी विकास राज्यमन्त्री मानन्धरं हे ट्रफि लःल्हानादीगु खःसा उद्योगपति, समाजसेवी धर्मबहादुर शाक्यं दसिपौ लःल्हानादिल । न्हाप लाःम्ह शाहीयात समाजसेवी शाक्यं व्यक्तिगत थःगुपाखें ५द्वः तका नं बियादीगु खः । नेपालभाषा बुद्ध भजन विधा अन्तर्गत नं दक्कले आपाः एसएमएस मत चूलाकूपिं निम्ह व युट्युबय् दक्कले आपाः भ्यूज वःपिं निम्हेसित सिरपाः ब्यूगु खः ।
नेपालभाषा विधापाखें धाःसा मुक्कं सच्छि व ४०म्हेसिया ब्वति दुगु खः । निन्हुया हे धेंधें बल्लाखय् वरिष्ठ संगीतकारद्वय डबल शाक्य व अनिल तुलाधर, वरिष्ठ गायिका रमना श्रेष्ठ, लोककवि राजभाई जकःमि व वरिष्ठ लेखक, निर्देशक पवन जोशी दुथ्याःगु निर्णायक मण्डलं त्याकामि ल्यःगु खः ।
नुगः खँ तयेगु झ्वलय् शहरी विकास राज्यमन्त्री रामवीर मानन्धरं कासाया ग्वसाः खलः बुद्ध शान्त पार्क निर्माण समितिं देवघाटय् दयेकाच्वंगु पार्कया लागिं थम्हं फक्व ग्वाहालि यायेगु प्रतिवद्धता प्वंकादिल । बुद्धया शान्तिया हसना व महान वाणीयात अन्तर्राष्ट्रिय जगतय् प्रचार यायेगु ज्याय् ग्वाहालिया लागिं संघ, प्रदेश व स्थानीय सरकारलिसे थम्हं समन्वय यायेगु राज्यमन्त्री मानन्धरं धयादिल ।
बुद्ध शान्त पार्क निर्माण समितिं देवघाटय् ३० रोपनी जग्गाय् १६ फिट तःधिकःम्ह बुद्ध मूर्तिया नापं पञ्चबुद्ध तकं स्थापना यानाः ध्यान कक्षलिसेंया बुद्ध शान्त पार्क दयेकेज्यायात न्ह्याकातःगु दु ।
