थःगु दक्वं दुःखयात सुचुकाः देय्या म्हसिका न्ह्यब्वयाच्वनीपिं नृत्यु निर्देशकतय्त समस्या जूबलय् सुनां छुं हे च्यूताः मक्यंगु सरोकारवालातय्सं धाःगु  दु ।

नृत्य निर्देशकतय् कुसा संगठन नृत्य निर्देशक संघ नेपालया प्यक्वःगु दँमुँज्याया वक्तापिन्सं न्ह्याबलें देय्या म्हसिका न्ह्यब्वयाः प्याखं हुलाच्वनीपिं कलाकारतय्त लकडाउनया इलय् सुनां वास्ता मयाःगु अनुभव न्यंकल । ‘सुनां नःमनः छकः न्यनेगुे मानवता नं खः, बन्दाबन्दीइ ज्या ठप्प जूबलय् सुनां हालखबर तक्क हे मन्यं, थ्व झी कमजोर जुयाच्वन धइगु दसु खः’ नृत्य निर्देशक बुद्ध लामाया धापू खः ।

संघया येँ कचा नायःतकं खःम्ह लामां थःपिन्सं ज्या याना च्वनागु स्कूल वा संस्थां न्यूनतम पारिश्रमिक तकं मबिलं नं गनं सु ंपाखें छुं हे पहल मजूगु धयादिल।वरिष्ठ नृत्य गुरु पूर्ण नेपालीं समाजय् थःगु उपस्थिती प्रभावकारी दयेकते सकलें संगठित जुयाः छधी जुयाः न्ह्याः वनेमाः गुलिइ बः बियादिल। हरेक स्कूलय् नृत्य विषयव नृत्य गुरु धाःसा माःगु तर पाठ्यक्रम विकास याय्गु योजना मदुगु नेपालीं धयादिल ।

संघया केन्द्रीय नायः भुवनदास श्रेष्ठं नृत्य निर्देशकतय् समस्या समाधान याय्त व क्षेत्रया वृहत्तर हितया लागिं फक्व याय्गु प्रतिवद्धता प्वंकादिल।ज्याझ्वलय् कलाकार नन्दिताराज वैद्य व समाजसेवी हसना शाक्ययात मानार्थ सदस्यता ब्यूगु खःसा संघया येँ, यल, ख्वप व चितवनमाय न्हूगु चयन जूगु कार्यसमितियात खादा क्वखा य्काः भिंतुना नं ब्यूगु खः।

सरकारनाप ‘विद्रोह’ याना सञ्चालन याना च्वंगु सिनेमा हल थुगु इलय् घाटां चले जुयाच्वंगु दु। सिनेमा हल खुले जुसा न्हुगु संकिपा रिलिज मजुया हल घाटाय् न्ह्याना च्वने माःगु दु। गुगु महिना तक सिनेमा हल बन्द जुया निगु अर्ब नोक्सानी जुगु धका हल सञ्चालक याःगु खःसा दर्शक अभावं हाकनं घाटाया सामाना याये माःगु दु।

नेपाःया हे तधःगु  मल्टिप्लेक्स क्यूएफएक्स चेनया प्रमुख कार्यकारी निर्देशक रोशन अडिगा न न्हगु संकिपा रिलिज मजुया हे हल घाटाय् सञ्चालक याना च्वने माःगु धका धाःगु दु । हलय् दर्शकय् हे मवया सो क्यान्सिल याये माला च्वंगु दु धका धाःगु खः। दर्शक कोरोना खःना ग्याःगु मखुसे न्हुगु संकिपा रिलिज मजुया दर्शक मवःगु खः धका वयकलं धयादीगु खः।

नेपाली चलचित्र निर्मातापिन्स धाःसा हलय् दर्शक वयेगु सुरु जुलकि जक थःपिनिगु संकिपा रिलिज यायेगु तयारी याये धका धाःगु दु। हलय् दर्शकपि अप्वोकेत हिन्दी वा अंग्रेजी संकिपा हे पिइ मालेगु बाध्यता दु धका हल सञ्चालपिन्स धाःगु दु।

लोकह्वाःम्ह कलाकार नाप निर्देशक पवन जोशीया निर्देशनय् लिपागु म्युजिक भिडियो सार्वजनिक जुगु दु। छ ल्यासे जुया वलः बोलया म्युजिक भिडियो सार्वजनिक जुगु खः।

मन हे थिइक अभिनय यायेगु याकेगु खुबी दुम्ह कलाकार व निर्देशक जोशीया निर्देशनय् उज्जला शाक्य, रुक्साना महर्जन, उत्तमरत्न शाक्यपिन्स बालाक्क अभिनय याःगु दु।उत्तम शाक्यं दयेकूगु व जोशीया निर्देशनय् राजेश शाक्य छायाँकन व सम्पादन याःगु खः।

उगु म्युजिक भिडीयोय् म्ये भुपेन शाक्य व उज्जला शाक्यं सः बियादीगु खःसा अमृतरत्न शाक्यं म्ये च्वयादीगुलि शिव शाही न लय् चिनादीगु खः। 

लकडाउनया इलय् यलया खपिन्छे त्वाः परिवार जानाः दयेकूगु नेपालभाषाया चीहाः संकिपा “मिसा व तिसा”या प्रेमियर शो जुल । योमरि पुन्हीया लसताय् पिथनेज्या जूगु थुगु संकिपाया पटकथा लोकंह्वाःम्ह कलाकार सुरज ब्यञ्जनकारं च्वयादीगु खःसा निर्देशन नं वय्कलं हे यानादीगु खः । हरि महर्जनं सिनेमाटोग्राफी व सम्पादन यानादीगु थुगु संकिपातय् बिन्की डंगोल, रबिसन महर्जन, किरण महर्जन, सरु महर्जन, शान्ति महर्जन व सानु महर्जनं अभिनय यानादीगु खः । पिक्स प्रोडक्शन स्टुडियो व आजु प्रोडक्शनया न्हापांगु न्ह्यब्वया थुगु चीहाः संकिपाः खपिन्छेँ भैलःलाछिइ क्यनेज्या जूगु खः ।

यल महानगरपालिका वडा नं ९ या वडा अध्यक्ष राजु महर्जन मूपाहाँसुइ जूगु ज्याझ्वलय विशेष पाहाँ कथं त्वाःया मूगुरु अष्टलाल महर्जन, चिच्याः मोतिलाल महर्जन, नेवाः पत्रकार राष्ट्रिय दबूया केन्द्रिय अध्यक्ष सुरजवीर महर्जन नापं वरिष्ठ सिने पत्रकार विजयरत्न असंबरे झायादीगु खः । ज्याझ्वः नातिभाई महर्जनया नायोसुइ जूगु खः ।

थूगु प्याखंनय् खपिन्छेँ त्वाःया स्थानीय कलाकार, निर्देशक, सिनेमाटोग्राफ, सम्पादन व मेकअफ, आर्थिक ग्वहालि नापं दक्वधैथें लोकेशन न उगु हे त्वाःयागु खः ।

थुगु संकिपा कलाकार सुरज ब्यञ्जनकारया न्हापांगु निर्देशित संकिपाः खः ।