Display Style:
Column Style
रोजिनयात‘मिष्टर भर्सटालिटी अफ द इयर’ अवार्ड
नृपेन्द्रलाल श्रेष्ठ | बछलागा द्धितिया ११३९ (मे २० २०१९)
फेसन कोरियोग्राफरलिसें संचारकःमि रोजिन शाक्ययात येँय् ग्वःसा ग्वःगु नेशनल युथ लिड अवार्डस् २०१९ अन्तर्गत ‘मिष्टर भर्सटालिटी अफ द इयर’ अवार्डपाखें सम्मानित याःगु दु ।
फेशन शोलिसें राष्ट्रिय व अन्तर्राष्ट्रिय सौन्दर्य कासाया कोरियोग्राफी, नेपालभाषाया समाचार वाचन, फेशन पत्रकारिता, ज्याझ्वः न्ह्याकामि, फेसन नापं टुरिजम् एण्ड हस्पिटालिटी कलेजय् ब्वंकेगु, पर्सनालिटी ग्रुमिङ्गलिसेया ख्यलय् मदिक्क सक्रिय जुयाच्वंगुलिं उगु ख्यलय् यानादीगु ज्यायात कदर यासें शाक्ययात उगु अवार्डपाखें सम्मानित याःगु खः ।
राष्ट्रिय युवा परिषद् नेपालया सहकार्यस ग्लोबल लिड नेटवर्कं उगु ज्याझ्वः याःगु खः । थजाःगु हे विधाय् थ्व स्वयां न्ह्यः अप्रिल ७, २०१८य् मलेसियाया क्वालाम्पुरय् च्वंगु ‘द प्यालेस अफ गोल्डेन हर्सेस’ होटलय् जूगु ‘द इन्टरनेशनल प्रेस्टिज ब्राण्ड अवार्ड’ ज्याझ्वलय् नं वेष्ट अन्तरप्रिनर विधा अन्तर्गत ‘इन्टरप्रिनर इन मल्टी टास्क पर्सनालिटी अवार्ड’पाखें रोजिन सम्मानित जूगु खः ।
२५६३ क्वःगु बुद्ध जयन्तीया लसताय् “बुद्ध लुइके”
सुरज, लहनान्युज | बछलाथ्व स्वांया पुन्ही ११३९ (मे १८ २०१९)
म्येहालामि गंगा महर्जनया भजन म्येचाः “बुद्ध लुइके” पितब्वज्या जूगु दु । २५६३ क्वःगु बुद्ध जयन्तीया लसताय् नेपालभाषा एकेडमी हलय् जूगु ज्याझ्वलय् जनकवि दुर्गालाल श्रेष्ठया मूपाहाँसुइ उगु म्येचाः पितब्वज्या जूगु खः ।
गंगा महर्जनपाखें भजन म्ये न्ह्यब्वःसें न्ह्याकूगु थुगु ज्याझ्वलय् लोकगायक रत्न बेहोशी बज्राचार्य, म्येच्वमि वि.नन्द वैद्य, लोककवि राजभाई जकःमि, नेवाः एफ.एफ.पाखें ज्याझ्वः न्ह्यब्वयाच्वंगु अनिक मिडियाया संरक्षक श्रीराम महर्जन पाहांकथं झायादीगु खः ।
थुगु म्येचाकलय् दुथ्याःगु म्येय् रत्न बेहोेसी बज्राचार्य (निपु), अनागारिका श्रद्धाचारी (छपु), वि.नन्द वैद्य (छपु), पवन जोशी (छपु), क्रान्ति शाही (छपु) खःसा लसय् चिनादीपिं अनिल तुलाधर (स्वपु), रत्न बहोशी बज्राचार्य (निपु) , सुरेन्द्र श्रेष्ठ (छपु) खः । संगीत संयोजन यानादीपिं जूगल डंगोल, सुरेन्द्र श्रेष्ठ व सुरेन्द्र श्रेष्ठं यानादीगु खःसा म्ये आर्टोम्यूज रेकर्डिङ स्टुडियो, सूर मेलोडी, अन्नपूर्ण स्टुडियोय् रेकर्ड जूगु खः ।
नेवाः एफ.एम. १०६.६ मेगाहर्जया ग्वसालय् न्ह्याःगु थुगु ज्याझ्वः एफ.एम.या प्रवन्ध निर्देशक श्रीकृष्ण महर्जनया सभापतित्वय् न्ह्याःगु खःसा ज्याझ्वः सुरजवीर बज्राचार्यं न्ह्याकादीगु खः ।
म्येहालामि महर्जन नेवाः एफएमया ज्याझ्वः न्ह्याकामि नं खः ।
बुद्ध शान्ति पार्क समितिपाखें सम्मान
नृपेन्द्रलाल श्रेष्ठ | चौलागा दशमी ११३९ (अप्रिल २९ २०१९)
नवपरासीया गैडाकोटय् दय्काच्वंगु बुद्ध शान्ति पार्क निर्माण समितिं सामाजिक कथं थीथी क्षेत्रय् योगदान बियादीपिन्त हंगु दु ।
कीर्तिपुर नगरपालिका ६, चोबाहालय् ग्वसाः ग्वःगु उगु ज्याझ्वलय् येँ महानगरपालिका–१२या वडाध्यक्ष विकास डंगोल मूपाहाँकथं झायादीगु खःसा अभिनेता नापं निर्देशक पवन जोशी विशेषपाहाँकथं झायादीगु खः ।
थ्यं मथ्यं ६०म्ह थीथी ब्यक्ति विशेषपिन्त मूपाहाँ डंगोल व विशेष पाहाँ निर्देशक जोशीं हनेज्या याःगु खः । उगु ज्याझ्वःस थीथी साँस्कृतिक ज्याझ्वः नं जूगु खः ।
थसिइ संकिपा नखः
लहनान्युज | चौलागा दशमी ११३९ (अप्रिल २९ २०१९)
सुकुन्दा फिल्म प्रोडक्शनपाखें ग्वसाः ग्वःगु ‘संकिपा नखः’ यलया पुलांगु नेवाः बस्ती थसि (सिद्धिपुर)इ वंगु सञ्चरवाः व आइतवाः निन्हुयंकं जूगु दु ।
उगु संकिपा नखःया उलेज्या महालक्ष्मी नगरपालिकाया प्रमुख रामेश्वर श्रेष्ठं यानादीगु खःसा ग्वसाः खलःया कजि संकिपा निर्देशकलिसें च्वमि व कलाकार बासु शाहीया सभाध्यक्षताय् क्वचाःगु खः ।
अथेहे, झिदँ झिंन्यादँ न्ह्यःनिसें मदिक्क नेवाः संकिपा दय्का वयाच्वंगु सुकुन्दा फिल्म प्रोडक्शनया ग्वसालय् जूगु महोत्सवय् निर्देशक रविन्द्र शाहीं दयकूगु शर्ट फिल्म ‘मू’ व वय्कःया हे निर्देशनय् दय्कूगु ‘थःम्हं म्हूगु गाः’ क्यनेज्या जूगु खः ।
संकिपा क्यनेगु हे झ्वलय् बासु शाहीया निर्देशन व च्वसाय् दय्कूगु ‘वाःया दुने जाकि दु’, सुरेन्द्र मानन्धरं दय्कूगु शर्ट फिल्म ‘नेवाः झी नेवाः हे जुइ’ क्यन ।
थ्व हे झ्वलय् उगु संकिपा नखलय् सुकुन्दा फिल्म प्रोडक्शनया दकलय् न्हापांगु नेवाः संकिपा ‘मतिना’या नायः रविन्द्र शाहीयात विशेष सम्मान नं लःल्हाःगु खःसा आराध्यलक्ष्मी खड्गी, माणिक शाही, धर्म मानन्धर, सरस्वती मानन्धर, सजना शाक्य, रमि महर्जन, किशोर खड्गीलिसें आपाल कलाकारपिन्सं सांगीतिक व साँस्कृतिक ब्वज्या न्ह्यब्वयादीगु खः । ज्याझ्वः सुरेन्द्र मानन्धर व रजनी खड्गीं न्ह्याकादीगु खः ।
थसिइ निन्हु यकं सकिपा नखः जुइगु
लहनान्युज | चौलागा षष्ठी ११३९ (अप्रिल २५ २०१९)
ने.सं. ११३९ चौलागा अस्तमि व नवमीया दिं जुइगु उगु संकिपा नखः सुकुन्दा फिल्म प्रोडक्शनया ग्वसालय् जुइ त्यःगु खः ।
उगु संकिपा नखःया उलेज्या शनिवाः कुन्हु नेपालमण्डल टेलिभिजनया नायः रमेश महर्जनं यानादीगु धका ग्वसाः खलःया कजि संकिपा निर्देशक कलाकार बासु शाहीं लहनान्युजयात जानकारी बियादीगु दु ।
अथेहे, झिदँ झिंन्यादँ न्ह्यःनिसें मद्दिक्क नेवाः संकिपा निर्माण यानाः वयाच्वंगु सुकुन्दा फिल्म प्रोडक्शनया ग्वसालय् जुइत्यंगु थसि नेवाः संकिपा नखः ११३९ य् निर्देशक रविन्द्र शाहीं निर्माण याःगु शर्ट फिल्म ‘मू’ व वय्कःया हे निर्देशनय् निर्माण जूगु ‘थःम्हं म्हूगु गाः’ क्यनेज्या जुइगु जूगु दु ।
संकिपा क्यनेगु हे झ्वलय् बासु शाहीया निर्देशन व च्वसाय् निर्माण जूगु ‘वाःया दुने जाकि दु’ संकिपा नं क्यनीगु ग्वसाः दुसा सुरेन्द्र मानन्धरं निर्माण याःगु शर्ट फिल्म ‘नेवाः झी नेवाः हे जुइ’ क्यनीगु याइ ।
थ्वहे झ्वलय् उगु संकिपा नखतय् सुकुन्दा फिल्म प्रोडक्शनया दकले न्हापांगु नेवाः संकिपा ‘मतिना’या हिरो रविन्द्र शाहीयात विशेष सम्मान लःल्हाइगु खँ नं ग्वसाः खलकं जानकारी ब्यूगु दु ।
