लाेकंह्वाःम्ह म्येहालामि रत्नशोभा महर्जनं येँया राष्ट्रिय सभा गृहय् जूगु ज्याझ्वलय् थःगु लाेकंह्वाःगु म्ये न्यंकादिल । 'रत्नं भयब्यूगु यइपुगु सः' नांगु थुगु ज्याझ्वलय् पूर्णकाजी ज्यापुया एकल रचना व संगीतकार व संगीत संंयोजक जूगल डंगोलया एकल संगीतय् सृजना जूगु म्ये म्येहालामि रत्नशाेभां न्यंकादीगु खः ।

रत्नशाेभां थः मदुम्ह मांयात लुमंकूसें च्वयादीगु अले मनराजा नकःमिं लसय् हनादीगु म्ये बाजं सः बिना न्यंकाः ज्याझ्वः न्ह्याकादिल । अनंलि जनकवि दुर्गालाल श्रेष्ठया हनाय् वयकलं च्वयादीगु 'कँ न स्वां जुइ' म्ये न्ह्यब्वसें थुगु ज्याझ्वः कथंहनायंकूगु खः । ज्याझ्वलय् निर्मलरत्न शाक्य च्वयादीगु, मनराजा नकर्मीं लसय् चिनादीगु, जिवित जल्मीं संगीत संयाेजन यानादीगु लाेकंह्वाःगु म्ये 'लिक्क वया जितः धाल वं' नं तँसाकथं न्ह्यब्वःगु खः ।

स्वयम्भू वना पासा मुनां ज्ञानमाला भजन खलः, स्वयम्भू नीस्वंगु ८१ दँ क्यंगुया लसताय् थुगु ज्या्झ्वः याःगु खः । ज्याझ्वलय् येँ महानगरपालिकाया मेयर विद्यासुन्दर शाक्यं ज्ञानमाला भजन मुनाया २१ गूगु संस्करण सार्वजनिक यानादिलसा ज्ञानमाला भजनया अभियानय् ४१ दँ न्ह्यःनिसें याेगदान यानाच्वनादीम्ह पुण्य शाक्ययात नीन्याद्वः तकानापं ज्ञानमाला मंगलहेरा सिरपा नं लःल्हाःगु खः ।

संगीतकार डंगोलया हे संयोजकत्वय् १६ म्ह वाद्यवादकपिंनाप म्येहालामि रत्नशाेभां न्ह्यब्वःगु म्येय् सानुबाबु महर्जन, सतिष महर्जन, दीपा महर्जन, सुमन कपाली व वरिष्ठ कलाकार मदनकृष्ण श्रेष्ठं साथ बियादीगु खः । म्येहालामिपिं पूर्णकाजी ज्यापुं लाेकंह्वाःगु 'कन्हेनिसें न्वँतुइमखु' न्यंकादीगु खःसा म्येहालामिपिं जुजुकाजी रंजित, माणिक शाही, रोजी डंगोल श्रेष्ठ, सोनी राजभण्डारी, सरीता महर्जनया सः नं ज्याझ्वलय् थ्वःगु खः ।

ज्याझ्वलय् रुपेन श्रेष्ठ थक्वाः, निकी महर्जन, आराध्यलक्ष्मी खड्गी, श्रृष्टि महर्जनं हुलाप्याखं न्ह्यब्वयादीगु खः ।

थुगुसीया मिस काठमाडौं नेवाः किण्डरगोर्डेन २०१९ खुदँ दुम्ह रेवती महर्जनं त्याकलसा मास्टर काठमाडौं नेवाः किण्डरगोर्डेन २०१९ नं खुदँ दुम्ह निर्भेस श्रेष्ठं त्याकल ।

नेवाः भासं अाखः ब्वंकाः वयाच्वंगु काठमाडौं नेवाः किण्डर गार्डेन, खुसिबुँया ब्वमिपिं दथुइ जूगु धेधेबल्लाय् बेष्ट पर्सनालिटी सम्मान महर्जन, बेष्ट डे्रस अक्षता ताम्राकार,  बेष्ट स्पोकन मुखू महर्जन, बेष्ट नेपालभाषा लूजः महर्जन, बेष्ट वक तेन्जिङ येवाङ बज्राचार्य, बेष्ट पर्फमर सम्येक श्रेष्ठाचार्य, बेष्ट स्माइल सेसु महर्जन, बेष्ट एनरजेटिक अरोशा महर्जनं त्याकूगु खः ।

बज्र कला कुञ्जया नायः चर्या अभियन्ता चन्द्रमान मुनिकारया मूपाहाँसुइ जूगु उगु प्रतिस्पर्धाय् चलचित्रकर्मी रवि साय्मि, म्येहालामि व पत्रकार सुरजवीर बज्राचार्य व पत्रकार रेखा शाक्य निर्णायक जुयादीगु खः ।

हसना महर्जनया कजिसुइ न्ह्याःगु ज्याझ्वलय् स्कुलया निर्देशक राजेन्द्र महर्जनं थःगु नुगःखँ तयेगु झ्वलय् मातृभाषा शिक्षा बीगु लकस ब्वलनाच्वंसां राज्यं थःगु जिम्मेवारीकथं ज्या मयाः धयादिल । वयकलं १२५ सिबें अप्वः भाय् दुगु नेपालय् मुस्किलं १० भाय् नं लाेप जुइगु चिन्तां मुक्तगु दइमखु धयादिसें मातृभाषा शिक्षाय् राज्य तिबः बीमा धयादिल ।