Display Style:
Column Style
भुतुमालि ब्वयेथें म्येया म्युजिक भिडियो पिहावल
लहनान्युज | तछलागा आमै ११३९ (जुलाई २ २०१९)
थौं मंगलवाः नेपालमण्डल टेलिभिजन, व नेवाः एचडी टेलिभिजन व नेपाः च्यानलय् भुतुमालि म्येया म्युजिक भिडियो पितब्बज्या जुगु दु ।
उगु म्युजिक भिडियो बरिष्ठ निर्देशक पवन जोशी व स्वतन्त्र संसार महर्जनया मंकाः कथं निर्देशनयाना दिगु खः । थुगु नेपालभाषाया न्हूगु म्यूजिक भिडियो ‘भुतुमालि ब्वयेथें...’ बोलया म्येया
म्यूजिक भिडियो दकलय् न्हापां स्वंगू टेलिभिजन च्यानलय् प्रसारण जुइत्यंगु खः ।
थुगु म्यूजिक भिडियोलय् कलाकार रुक्सना महर्जन व राजेश नकःमि अभिनय याःगु खः । थुगु म्ये निर्देशक पवन जोशी हे च्वयादिगु खःसा संगीतकार अनिल तुलाधरया लय् मचाराजा महर्जन व पूजा सुनुवारं म्ये हालादीगु खः ।
संसार क्रियशनं न्ह्यब्वःगु थुगु म्येया म्यूजिक भिडियोया छायांकन व सम्पादन सोहन मानन्धरं यानादीगु दुसा कोरियोग्राफी प्रेमा महर्जनं यानादीगु खः ।
कीर्तिलक्ष्मी असार १३ गते निसे देँय् न्यक पिहावइगु
लहनान्युज | तछलागा पारु ११३९ (जुन १८ २०१९)
नेवाः कलाकार व प्राविधिक तयेगु सहभागिता दुगु फिल्म आः तक च्यारिटी शोलय् जक लिकुना च्वंगु खः । याकन हे थ्वहे वइगु असारया १३ गतेनिसे देय् न्यंकं रिलिज जुइ छगु पत्रकार सम्मेलन यासे निर्देशक प्रदिप खड्गी जानकारी बियादिगु खः ।
नेपाःया ईतिहासया छगु हाकुगु पाना कथं कयातःगु पृथ्वीनारायणं कीर्तिपुर त्याकूगु घटनाया ज्वलन्त लु कःघाना तःगु थ्व फिल्म नेपाली फिल्मया स्वकुमिया निंतिं न्हूगु सवाः जुइगु खँया दावी निर्देशक प्रदिप खडगीं याःगु दु ।
वयलं नेपाःया इतिहासय् नुगः क्वसाःपिनिगु निंतिं थ्व “कीर्तिपुर ": द लिजेण्ड अफ कीर्तिलक्ष्मी ” अध्ययनय् छगु न्हूगु पलाः जुइ धका वय्कलं दावी तक यानादिगु दु । कीर्तिलक्ष्मी यात छम्ह काल्पनिक पात्रया रुपय् जक मखसे छम्ह ऐतिहासिक वीराङ्गना धका नाले धुंकुगु अवस्था दुसाः कीर्तिपुरया युद्ध पार्कय् कीर्तिलक्ष्मीया झ्वाताः तकं तइगु जूगु दु ।
थ्व ल्याखँ थ्व छगु स्वयेबहगु फिल्मया रुपय् सकसिनं यकिगु आश न थुगु फिल्म पुचलं याना च्वंगु दु । थ्व फिल्म रिलिजया दिन न्ह्यःनि वःलिसे थ्व फिल्मया पुचलं थुकिया प्रचार प्रसारया ज्या नं अप्वयेका हःगु दु ।
उगु पत्रकार सम्मेलनय् थ्व फिल्मया हिरोइन हिसिला महर्जनं थः नं किपूया म्ह्याय्मचा जुगुलिं मचाबले निसें किपू वीराङ्गना कीर्तिलक्ष्मीयाबारे न्यना वयागुलिं थःयात थ्व रोल म्हिते खना तसकं हे गर्वताःगु खँ कनादिल ।
अथेहे,पत्रकार सम्मेलनय् थ्व फिल्मया कलाकारपिं मदनदास श्रेष्ठ,लक्ष्मी गिरी,विनोद श्रेष्ठ व एसराज गराचलगायत सिने पत्रकार विजयरत्न तुलाधर“असंबरे” व फिल्मया निर्देशक प्रदिप खडगी अले निर्माता मध्ये अनन्तकुमार श्रेष्ठपिन्सं नं नुगः खँ तयादीगु खः ।
स्वनिगलय् करण श्रेष्ठ क्रेजीया रिच ईन्टरटेंटमेंट व स्वनिगलं पिने एफडी कम्पनीं वितरण याइगु थ्व फिल्मया निर्माण धाःसा फोकस पिक्चर्सया निंतिं प्रेम शाही,अनन्तकुमार श्रेष्ठ व वीरेन्द्र ताम्रकार जाना यानादीगु खः ।
स्वक्वःगु नेपाल अन्तराष्ट्रिय फिल्म फेष्टिभल जुइगु
लहनान्युज | तछलाथ्व द्धादशी ११३९ (जुन १४ २०१९)
नेपाल चलचित्र तथा सांस्कृतिक प्रतिष्ठानं स्वक्वःग नेपाल अन्तराष्ट्रिय फिल्म फेष्टिभल २०२० याये त्यःगु दु ।
उगु फिल्म फेष्टिभल थ्व हे वइगु फेबु्रअरी १३ निसे १७ तक येँय् जुगु धका छगु पत्रकार सम्मेलन याना जानकारी बिगु खः ।
अथेहे उगु फेस्टिभलय् ब्बति कायेगु लागि फिल्मकःमि थ्व हे जुन १५ देखि अक्टोबर ३० तक आवदेन बिइ फइगु धका ग्वसाः खलः पाखे धाःगु दु ।
राष्ट्रिय व अन्तर्राष्ट्रिय फिचर व डकुमेन्ट्री फिल्म नाप थुगु दँय् एनिमेसन व बृत्तचित्रया विधा थपे यानागु दु धका जानकारी न बिगु दु ।
अन्तर्राष्ट्रिय प्रतिष्पर्धा अन्तर्गत सर्वाेत्कृष्ट फिचर फिल्म यात १५ सय अमेरिकी डलर नगद नाप गौतम बुद्ध अवार्ड, सर्बोत्कृष्ट बृत्तचित्रयात १ हजार डलर नाप माउन्ट एभरेष्ट अर्वाड, सर्बोत्कृष्ट एनिमेटेड चलचित्रयात ७ सय ५० डलर नगद मञ्जुश्री अवार्ड, सर्बोत्कृष्ट लघु चलचित्रयात ५ सय डलर नगद नाप बागमती अर्वाड बिइगु जुइ धका पत्रकार सम्मेलन पाखे जानकारी बिगु खः ।
अथेहे नेपाली प्रतिष्पर्धाया अन्तर्गतय् उत्कृष्ट फिचर फिल्मयात १ लाख नगद नाप पुरस्कार, उत्कृष्ट सर्ट फिल्मयात नगद ५० हजार पुरस्कार व सर्ट मध्यपाखे उत्कृष्ट फिल्म निर्देशकयात टफि प्रदान याइगु जुइ धका धाःगु खः । नाप फिचरफिल्म पाखे उत्कृष्ट निर्देशक, लेखक, छायाकार, अभिनेता व अभिनेत्रीयात टफि बिइगु जुइ धका न धाःगु खः ।
तःजिक क्वचाल स्वयम्भूराजया सांगीतिक सनिल
सुरज, लहनान्युज | ने.सं. ११३९ तछलाथ्व पञ्चमी (८ जुन, २०१९), शनिवाः |
“जुजु वेयर्स ओ प्रिय लिफः स्वयाः” वरिष्ठ म्येहालामि स्वयम्भूराज शाक्यया सांगीतिक सनिल झःझः धाय्क क्वचाल ।
रेकर्डिङया नितिं रेकर्डिङ स्टुडियो सहज व सुलभ मजूबलय् मातं क्वथाय् प्रविधि व प्राविधिक च्वनाः अले च्वत कोथाय् वाद्यवादक व म्येहालामि रेकर्ड याःगु लोकंह्वाःगु “ओ प्रिय लिफः स्वयाः” म्येया नामं थुगु ज्याझ्वः न्ह्याःगु खः । मतिना म्येचाःया थुगु म्ये म्येहालामि शाक्यनाप सपनाश्री नं हालादीगु दु ।
स्वंगू दशकया दुने सृजना जूगु लोकंह्वाःगु १४ पु म्ये थुगु ज्याझ्वलय् न्ह्यब्वयादीम्ह म्येहालामि स्वयम्भूराजं रतन अति हे जि यःम्ह, जिके नं भतिचा माया, छं मुसुं न्हिला स्वःसा, अय् मयजु थन छकः स्व, मुसुक्क न्हिला हुँ, भिंंद्यः गुथियागु मूसःगु अय्ला, ओ प्रिय लिफः स्वयाः, घण्टाघरया क्वय्, वया ला छ थन माया मदुम्ह, जात्राया हुलय्, मिलेजूम्ह पासाया इहिपाया भ्वय् वना म्ये न्यंकादीगु खः । रेडियो नेपालय् स्वर परीक्षा उत्तीर्ण जुइधुंकाः रेकर्ड जूगु न्हापांगु म्ये “तिमीलाई मैले चिनेर पनि”, माइतीघर संकिपाया “नमान लाज” व नारायण गोपालया जीवनय् गुबलें छकःसां म्ये नं वय्कलं न्यंकादिल ।
ज्याझ्वलय् संगीता शाक्य, नीशा देसार, चन्द्रमान शाक्य ज्वःम्येय् साथ बियादिलसा स्वयम्भूराज शाक्यं लसय् हनादीगु लोकंह्वाःगु म्ये “घण्टाघरया क्वय्” सुमन कपाली व नीशा देसारं न्यंकादिल । भूपेन्द्र बज्राचार्यया संयोजनय् अनुप दास, ज्योति घिमिरे, रविन कार्कीढली, लक्ष्मी डंगोल, गौतम श्रेष्ठ, तेज श्रेष्ठ, सम्पूर्ण लामा, इन्द्रमान सिँहं वाद्यवादनय् साथ बियादिल ।
ज्याझ्वलय् दुर्गालाल श्रेष्ठ, किरण खरेल, वंशीधर बज्राचार्य, शक्तिमोहन पराजित, शाक्य सुरेन, चन्द्रमान शाक्य, तीर्थ माली, शान्त शाक्य, किर्ति श्यामसुन्दर जोशी, निर्मलरत्न शाक्य, नील शाक्य, राजेशमान सिंह, अमर चित्रकारं च्वयादीगु अले म्येहालामि स्वयम्भूराजनापं विजयसिँह मुनाल, तीर्थ माली, श्यामसुन्दर जोशी, चन्द्रमान शाक्य, विरेन शाक्य, इन्द्र ब्यञ्जनकार, सुमन कपाली, राजेशमान सिंहं लसय् हनादीगु म्ये थ्वःगु खः ।
दर्शकया नितिं प्रवेश निःशुल्क ग्वसाः ग्वःगु थुगु ज्याझ्वःया मू प्रायोजक जुजु वेयर्स, सह–प्रायोजक सम्झना लेब्ररेटोरी क्लिनिक प्रा.लि., हौगः, यल व होटल सारा श्री प्रा.लि, लुम्बिनी खःसा सर्पोटर २४ क्यरेट ज्वेलरी, मानभवन, जावलाखेल व यल वेयर्सनापं आपालंसिगु तिबः व ग्वाहालि दुगु ग्वसाःखलकं जानकारी ब्यूगु दु । ज्याझ््वः संचारकर्मी सुरजवीर बज्राचार्यं न्ह्याकादीगु खः ।
मंगल इन्टरटेनमेन्ट (लिटिल स्टार रेकर्डस्) या ग्वसालय् जूगु थुगु ज्याझ्वः म्येहालामि स्वयम्भूराजया जन्म जूगु त्वाः यलया हःखाय् जूगु खःसा ज्याझ्वः मदन थापाया मयूर हुलाप्याखं न्ह्यब्वःसें न्ह्याःगु खः । ज्याझ्वलय् ज्योति घिमिरे, अनु शाक्य व प्रियंका शाक्यं नं म्ये न्यंकादीगु खः ।
ज्याझ्वः नेपाः च्यानल (डिस होम ११२ च्यानल), नेपालमण्डल टेलिभिजन, नेवाः टिभी एचडी टिभी व युट्युबपाखें प्रत्यक्ष प्रशारण जूगु खः ।
रेडियो नेपालया विशिष्ट श्रेणीया म्येहालामि स्वयम्भूराज शाक्य थीथी सिरपा व सम्मानं छाय्पियातःम्ह म्येहालामि खः । तिब्बत, श्रीलंका, बंगलादेश, साउदी अरेबिया, जापान, हङकङ, बैंङ्ककय् सांगीतिक ज्याझ्वलय् ब्वति कयादी धुंकूम्ह स्वयम्भूराजया ५ गू म्येचाः पिदनेधुंकूगु दुसा ३०० पु मल्याक म्ये पिदनेधुंकूगु दु ।
थुगु ज्याझ्वः स्वयम्भूराज शाक्यया प्यक्वःगु याकः सांगीतिक सनिल खः ।
नेवाः प्याखं “लिबाय् धुंकाः” विहिबाः गुण सिनेमाय् क्यनीगु
ने.सं. ११३९ तछलाथ्व चतुर्थि (७ जुन, २०१९), शुक्रवाः |
नेवाः संस्कृति ख्यालः नेवाः संकिपातय् दुथ्याकाः न्ह्यब्वयेगु गुणं जाःम्ह राजेशमान सिंहया निर्देशनय् संकिपा “लिबाय् धुंकाः” वइगु ३० गते विहिबाः पिदनी । थुगु संकिपाया न्हापांगु शो गुण सिनेमा, ग्वार्कोय् सनिलया ५ बजे जुइ । भाजु सिंहं थुगु संकिपातय् मतिना, ख्यालिन्हिंलि, एक्सन व सस्पेश दुथ्याकाः रोचक शैलीं “लिबाय् धुंकाः मिखा चायकां छुं फाइदा मदु” धइगु सन्देश बियागु कनादीगु दु ।
अडियो भिडियो स्टेशन प्रा.लि.या पिथना थुगु संकिपातय् वरिष्ठ कलाकार आशाकाजी थकु, नारायणदेवी प्रधान, मञ्जु श्रेष्ठ, आर.एल. महर्जन, आराध्यालक्ष्मी खड्गी, सुरज श्रेष्ठ बकंफुसुलु, भिमसेन रिसाल, कुमार कार्की, उत्तम खत्री, रामराजा भाम, मोहिद्दिन खान, देवकुमारी खड्गी, मैया श्रेष्ठ, आश्मा देशार, राजेश श्रेष्ठ, राजेश महर्जन, भेष महर्जन, प्रविण शाक्य, राकेश खड्गीलिसें निर्देशन राजेशमान सिंहं नं अभिनय यानादीगु दु ।
थुगु संकिपाया बाखं, पटकथा, संवाद, व म्ये नं निर्देशक सिंँहं हे च्वयादीगु दुसा वय्कलं कीर्ति श्यामसुन्दर जोशी व पीयूष कायस्थनाप सम्पादन नं यानादीगु दु । पाश्र्व संगीत बीरेन शाक्यं तयादीगु थुुगु संकिपातय् दुथ्याःगु म्ये सानुबाबु महर्जन, सुमन कपाली व रत्नशोभा महर्जनं हालादीगु दु । बीरेन शाक्य व सुमन कपालीं संगीत तयादीगु म्ये बिट्स रेकर्डिङ स्टुडियो व हिसि रेकर्डिङ स्टुडियाय् म्ये रिकर्ड जुगू खः ।
शंकर महर्जनं छायाँकन यानादीगु थुगु संकिपातय् आराध्यालक्ष्मी खड्गीं कोरियोग्राफी नं यानादीगु दु सा राजन शाक्य व पीयूष कायस्थं भिएफएक्स यानादीगु दु । द्वन्द निर्देशन सुरज श्रेष्ठं यानादीगु खः ।
निर्देशक राजेशमान सिंहया थ्व सिबें न्ह्यः बकंफुसुलु, भद्रगोल, हिसिमदु, चन्द्रमान पिदनेधुंकूगु दु ।
