नेपाल राष्ट्र बैंकं उपदान लिसें पेन्सन कोषय् दूगु ३ अर्ब ३० करौड तका ध्यबा बैंक लिसें वित्तीय संस्थाय् लगानी याइगु जूगु दु।

केन्द्रीय बैंकं सुचं पाखें ३६६ न्हुया निंतिं उगु ध्यबा लगानी यायेत्यनागु धाःगु खः। राष्ट्र बैंकं क, ख व ग वर्गया बैंक लिसें वित्तीय संस्थाय् उगु ध्यबा लगानी यायेत्यनागु धाःगु खः।

बैंक लिसें वित्तीय संस्था सञ्चालनय् वःगु म्होतिं निदँ पूवंगु, बैंकपाखें क्वःछिनातःगु न्यूनतम कूल पुँजीकोष कायम यानातःगु, निष्क्रिय त्यासा मुक्कं त्यासाया ८ प्रतिशत व खुद निष्क्रिय त्यासा अनुपात ३ प्रतिशत हाचांमगाःगु शर्त पूवंकूगु जुइमाःगु धयातःगु दु।

बैंक लिसें वित्तीय संस्थां थ्वहे असोज ३० गते थःम्हेस्यां कायेमःदूगु व उगु ध्यबा कायेगु निंतिं प्रस्ताव याःगु व्याजदर नापं न्ह्यथनाः आवेदन बिइमाःगु सुचंनय् धयातःगु दु।

प्रधानमन्त्री लिसें मन्त्रिपरिषदया ज्याकुथिं प्रधानमन्त्री सुशीला कार्कीया नामं ल्हापं मुंकेगु बाय् मुंकेत हःपाः बिइगु गतिविधि जूगु खनेदुसा अज्याःगु ज्या यात कानुनी दायराय् हयेगु प्रस्त याःगु दु।

छुं व्यक्ति बाय् पुचलं प्रधानमन्त्री कार्की व प्रधानमन्त्री ज्याकुथिया नां स्वानाः थीथी परियोजना, कोष बाय् सामाजिक ज्याया निंतिं धकाः ल्हापं म्हयेगु ज्या यानाच्वंगु विषयय् थःपिंनिगु ध्यानाकर्षण जूगु धाःगु दु। प्रधानमन्त्री लिसें मन्त्रिपरिषद् ज्याकुथिया सहसचिव लिसें प्रवक्ता रविलाल शर्माया कथं प्रधानमन्त्री लिसें प्रधानमन्त्री ज्याकुथिपाखें छुं कथंया ल्हापं बाय् ग्वाहालि सङ्कलनया निंतिं सुयातं अनुमति मबियागु धाःगु दु।

थुजाःगु भ्रामं जाःगु ज्याय् भलसा मयायेत नापनापं सुनां अजाःगु ज्याया निंतिं इनाप याःसा पूवंकं लिचिलेत नापं प्रवक्ता शर्मां विज्ञप्तिपाखें इनाप यानादीगु दु। प्रधानमन्त्रीया नां छ्यलाः ल्हापं म्हयेगु यानाच्वंगु बाय् सुयातं ल्हापं म्हयेत घ्वाःना च्वंगु सिइदुसा उजाःगु ज्यायात कानुनी दायराय् हयेत स्थानीय प्रहरीयात खबर बिइत नापं विज्ञप्तिइ इनाप यानातःगु दु।

इजरायलय् हमासं नियन्त्रण कयातम्ह धका धाम्ह विपिन जोशी जीवित मदुगु धका इजरायलया सेनाया अधिकारीं धाःगु दु।

इजरायलया सेना आईडीएफया छम्ह अधिकारीं इजरायलया स्थानीय ई कथं थौ सुथया ७ः३० बजे विपिन जीवित मदुगु धका औपचारिक जानकारी ब्युउगु दु।

अमेरिकाया कुतलय् इजरायल व हमास दथुइ युद्धविराम जुइ धुका थौ हमासं नियन्त्रण कयतःपिनिगु नां सार्वजनिक याउगुलि विपिनया नां मदु।

प्रधानमन्त्री सुशीला कार्कीं नेपाल राष्ट्र बैंकपाखें पिकाना च्वंगु नेपाली नोटय् नेपाल संवत् न्ह्यथने फइगु धयादीगु दु। राष्ट्रिय विभूति सङ्खधर साख्वाः प्रतिष्ठान, मध्यपुरथिमि, ख्वपया प्रतिनिधिमण्डलं नेपाल संवत् ११४६ या लसताय् मध्यपुरथिमिया राष्ट्रिय विभूति शङ्खधर साख्वाःया झ्वाताय् माल्यार्पणया निंतिं मू पाहाँया निंतिं ब्वनापौ बिइगु झ्वलय् वय्कलं थूगु खँ धयादीगु खः।

प्रधानमन्त्री कार्कीं अर्थ मन्त्रालयपाखें नेपाल राष्ट्र बैंकया गर्भनरनाप सहलह यानाः सरकारं नेपाली नोटय् नेपाल संवत् छ्यलेगु बारे सहलह यायेगु धयादिल। प्रतिष्ठानया नायः ज्ञानराम श्रेष्ठया नेतृत्वय् वंगु पुचःनाप वय्कलं न्यासःया नोट छापे जुइत विधिवत् कथं वने धुंकूगुलिं आः पिथने ल्यं दनीगु नोटय् नेपाल संवत् छ्यलेफइगु बारे सहलह यानाः निर्णय यायेगु धयादीगु प्रतिष्ठानया नायः श्रेष्ठं धयादिल।

नेपाल संवत् नेपाःया मौलिक संवत् जूगु न्ह्यथनादिसें प्रधानमन्त्री कार्कीं नेपाल संवत् व राष्ट्रिय विभूतिबारे विशेष चिउता बियादीगु खः। वय्कलं नेपाल संवत्या न्हू दँया दिं शङ्खधर साख्वाःया झ्वाताःखय् माल्यार्पण यायेगु ज्याझ्वलय् ब्वति कायेगु धकाः वय्कलं धयादिल।

थनया दमक नगरपालिका–५ धनेश्वर देगःया पूर्वपाखे च्वंगु लुखा सत्तिक बेवारिसे अवस्थाय् ३०३ राइफल लुइकूगु दु।

स्थानीयवासीतय्सं थौं सुथय् बन्दुक लुइकागु धकाः इलाका प्रहरी ज्याकुथि दमकय् खबर याये धुंकाः प्रहरी निरीक्षक नवीन राईया कमाण्डय् वंगु पुचः घटनास्थल थ्यंकूगु खः।प्रहरी नायब उपरीक्षक खगेन्द्रबहादुर खड्काया कथं लूगु उगु ल्वाभः वंगु भदौ २४ गतेया जेनजी प्रदर्शनया झ्वलय् ज्याकुथिं लुटे यानाः यंकूगु ३०३ राइफल म्यागजिन जूगु पुष्टि जूगु दु।

उगु ल्वाभः माःगु कानुनी प्रक्रिया पूवंकाः इलाका प्रहरी ज्याकुथि दमकय् तयागु धकाः वय्कलं धयादिल।