लडाकु समूह न गाजा क्षेत्रय् बन्धक दयकातम्ह नेपाःया विपीन जोशी जीवित दुगु न्हुगु धलखय् दुगु नां सार्वजनिक याःगु दु।

थ्व स्वया न्ह्यः पिकागु नां सार्वजनिक यागुलि जोशीया नां मदुगु खः। २ सय ५१ म्ह मध्ये गाजाय् आःतक ४८ म्ह बन्धकपि दु। उकि मध्ये गुलिसित स्याये धुकुगु अनुमान दु।

जोशीयात निदँ न्ह्यः सन् २०२३ अक्टोबर ७ तारिखय् आक्रमण शुरु जुइ लच्छि न्ह्यः नेपालं इजरायल वःगु खः।

लुँ तोलां थौ स्वद्धः थहावंगु दु। लुँ तोलां स्वद्धः थहावना थौ २ लाख ३८ हजार तका न कारोबार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

लुँया भाः न्हिया न्हिथं थहावना च्वंगु खःसा वंगु शुक्रवाः जक ४ हजार २ सय तका कुहावःगु खः।अथेहे वहः तोलां न थौ ४० तका थहावःगु दु, वहः तोलां पीतका थहावना थौ ३ हजार १ सय २५ तका न कारोबार जुयाच्वंगु दु धका महासङ्घं धाःगु दु।

राष्ट्रपति रामचन्द्र पौडेल अस्पतालय् भर्ना जुगु दु।थौ शनिवाः जेनजी प्रतिनिधि तयेगु दथुइ सहलह यायेगु ज्याझ्वः दुगु खःसा उसाँय् स्यना अस्पतालय् वःगु खः।

अस्पतालया स्रोत कथं, राष्ट्रपति पौडेल महाराजगन्जस्थित मनमोहन कार्डियोथरासिक भास्कुलर एन्ड ट्रान्सप्लान्ट सेन्टरय् भर्ना जुगु दु।

सरकारं जेनजीया प्रतिनिधित्व धका धासे मन्त्री जुइपि नां सार्वजनिक याउगुलि जेनजी अभियन्ता मिराज ढुङ्गाना नापं मेमेपि अभियन्ता तय्स असन्तुष्टि प्वकूगु दु।

ढुङ्गानां “सू जेनजी खः? सूनां सिफारिस यात?” धइगु न्ह्यसः यासे छनोट प्रक्रिया व मनूत तय्त न्ह्यसः थःगु खः।

सरकारं रामजी रामयात स्वास्थ्य, गणपतिलाल श्रेष्ठयात संस्कृति, बब्लु गुप्तायात युवा व टासी ल्हाजोमयात महिला मन्त्रालय जिम्मा बिइगु तयारी यायेत्यःगु खः।

राष्ट्रपति रामचन्द्र पौडेलनाप जेनजी तयेगु दथुइ जुइ धाःगु सहलह सोमवाः जक जुइगु दु। थौ सुथय् १० बजे निसे सुरु जुइ धागु उगु सहलह निन्हुया निति लिछाय्गु दु।

सहलहया निति शीतलनिवास थ्यकवःपि जेनजी पुचः वःगु खःसा राष्ट्रपति पौडेलया स्वास्थ्यय् सामान्य समस्या वयेवं उगु मुँज्या लिछाउगु खः।