नेकपा माओवादी केन्द्रया अध्यक्ष प्रचण्ड व अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) उपाध्यक्ष फतिमा सुमार दथुइ भेटवार्ता जूगु दु।

भेटवार्ताया लागि उपाध्यक्ष सुमार नापया टोलीं थौं शुक्रबाः सुथय् प्रचण्ड निवास खुमलटार वउगु खः। उगु खँल्हाबल्हा १ घण्टा जुगु खः। बिहीबाः नेपाः वयेवं हे सुमारं राजनीतिक भेटवार्ता जारी याउगु खः।

प्रतिपक्षी दल नेकपा एमालेया अध्यक्ष केपी शर्मा ओलीपाखे राजनीतिक भेटवार्ता सुरु याना बिहीबाः हे नेकपा एकीकृत समाजवादीया अध्यक्ष माधव कुमार नेपाल व जसपाया अध्यक्ष उपेन्द्र यादव व डा. बाबुराम भट्टराई नाप न सहलह याये धुकुगु दु।

अथेहे प्रधानमन्त्री शेरबहादुर देउवा व अर्थमन्त्री जनार्दन शर्मा नाप न भेटवार्ता याइगु ज्याझ्वः दु।

पुच्वय् निसः दँ न्ह्यः पुलागु इतिहास दुगु फल्चा पुनर्निर्माण जुइगु दु।

जिल्ला अदालत लगनखेलं वंगु भदौ २ गतेय् बिउगु अन्तरकालीन आदेश खारेज यासे म्हिगः बिहीबाः फल्चा शिलान्यास याउगु दु।

लालीगुँरास बहुउद्देश्य सहकारी संस्थाया कर्मचारी तक निवेदक जुगु उगु फल्चा पुनर्निर्माण रोक्का याये दय्मा धका निवेदन दर्ता याउगु खः।

यल महानगरया मेयर चिरीबाबु महर्जनं थ्वः सत्य न्ह्यावलय् त्याइ धका धयादीगु खः। ‘सर्वाेच्च अदालत व जिल्ला प्रशासन कार्यलय ललितपुरं पाटी पुनर्निर्माण रोके यायेमते धइगु आशय नाप आदेश वय धुकुगु खः,’ वयकलं धाउगु दु, ‘अय्न जिल्ला अदालतं अन्तरकालीन आदेश जारीयात।

थुकिइ भदौ ३ गतेय् याये धइगु शिलान्यास थौं जुल।’ फल्चा पुनर्निर्माण यायेत रोबिन महर्जनया अध्यक्षताय् उपभोक्ता समिति गठन याये धुकुगु दु। पुनर्निर्माण लगत ३३ लाख १६ हजार खः। उकिइ जनसहभागितापाखे ३ लाख ३१ हजार व महानगरपाखे २९ लाख ८५ हजार रुपैयाँ तइगु जुगु दु।

छत्रपाटी निःशुल्क चिकित्सालय अस्पतालय् न्हूगु भवनया ‘माउ बद्रि भवन’ छगु ज्याझ्वः दथुइ येँ महानगर मेयर विद्यासुन्दर शाक्य व उपमेयर हरिप्रभा खड्गी श्रेष्ठं शिलान्यास यानादिु दु।

उगु भवन शिलान्यासया झ्वलय् महानगर मेयर शाक्यलिसें उप मेयर खड्गी श्रेष्ठ, १७ वडाया वडाध्यक्ष नविन मानन्धर व अस्पतालया अध्यक्ष डा. मनोजमान श्रेष्ठं मंकाः कथं भूमि पुजा यानादीगु खः।

उगु ज्याझ्वलय् न्ववानादीसे मेयर शाक्यं इलय् हे स्तरीय ज्या यायेत इनाप यासें धेबाया चिन्ता मकायेत धयादिल। क्षेत्रपाटीइ १० आना १ दाम जग्गा करीब ३५ करोड तकाया लागतय् अस्पतालया न्हूगु भवन दयेकेत्यंगु खः।

अथेहे ज्याझ्वलय् महानगर उप मेयर खड्गी श्रेष्ठं दक्वं अधिकारमध्ये नं नागरिकयात स्वास्थ्य सम्बन्धी अधिकारया प्रत्याभूति याकेत थःपिन्सं कुतः यानाच्वनागु धयादिल। वडा १७ या वडाध्यक्ष मानन्धरं ०७२ सालया भुखाय्, ०७५ य् डेंगु व आः विश्व महामारी जुयाच्वंगु कोभिड संक्रमणया इलय् चिकित्सालयं स्वास्थ्योपचारय् ब्यूगु योगदानयात च्वछानादिल।

अस्पतालया नायः डा. मनोजमान श्रेष्ठं मेगु वालंनिसें न्हि सच्छि सिलिण्डर अक्सिजन उत्पादन क्षमताया प्लान्ट स्थापना यायेत्यनागु जानकारी बियादिल। अस्पताल निर्माणया न्हापांगु चरणय् १२ करोड तकाया लागतय् भूमिगत १ तलालिसें ७ तलाया भवनया स्ट्रक्चर तयार याइ।उकिया नितिं येँ महानगरं न्हापा हे २ करोड ५० लाख तका उपलब्ध याकेधुंकूगु दु।

आः थप २ करोड ५० लाख तकालिसें महानगरं ५ करोड तका बीगु धाःगु दु।थ्व बाहेक अस्पतालया आन्तरिक आय व दातापिनिगुपाखें चूलाइगु ग्वहालि धेबा छ्यलेगु नायः श्रेष्ठं धयादिल।अस्पतालय् आः २४ घौ हे इमर्जेन्सी, शल्यक्रिया, जनरल वार्ड, आइसीयू, भेन्टिलेटर, प्याथोलोजी ल्याबलिसें दक्वं कथंया सामान्य व विशेषज्ञ स्वास्थ्य सेवा न्ह्यानाच्वंगु दु।

कोभिड संक्रमणया निगूगु लहरया इलय् महानगरं थुगु अस्पतालयात महानगरया कोभिड विशेष अस्पतालया रुपं न्ह्याकूगु खः। २०१७ सालय् राजनीतिक अस्थिरताया इलय् जूगु झडपय् घाःपाः जूपिन्त वासः यायेगुलिइ थुगु चिकित्सालयया तःधंगु भूमिका दु।

 नेपाली कांग्रेसया महाधिवेशन स्थगित यायेत माग यासे बिउगु रिटय् सर्वोच्च अदालतं खारेज याना बिगु दु।

कांग्रेस प्रदेशसभा सदस्य नरोत्तम वैद्यं कोरोना कारण क्यना महाधिवेशन रोके यायेगु माग यासे रिट दायर याउगु खः। न्यायाधीश अनिलकुमार सिन्हाया एकल इजलास उगु रिट खारेज यायेगु आदेश बिउगु खः।

कांग्रेसया महाधिवेशन वइगु मंसिर ९ निसे १३ गते तक येँ जुइत्यंगु खः। आः थीथी जिल्लाय् वडा अधिवेशन जुइ धुकुगु दु।