अमेरिकी सहयोग नियोग मिलेनियम च्यालेन्ज कर्पोरेसन (एमसीसी) या उपाध्यक्ष फतिमा सुमार नेपाल भ्रमण वइगु जुगुनि थौं येँया सुरक्षा व्यवस्था कडा याउगु दु।

एमसीसीया विरोधय् प्रदर्शन जुइफुगुलि येँया मू मू सतकय् सुरक्षाकःमिपिन्त तैनाथ याना तःगु दु। थापाथली, नयाँबानेश्वर, पुतलीसडक, माइतीघर, महाराजगञ्ज लगायतया थासय् सशस्त्र प्रहरी गणया टोली परिचालित याना तःगु दु।

अमेरिकी अनुदान सहयोग सम्बन्धी सम्झौता एमसीसीया विरोधय् छु दिं न्ह्यः जक न्हिन्हि प्रदर्शन जुयाच्वंगु दु। बुधबाः जक येँ ६ सय सुरक्षाकःमिपि परिचालित याउगु दु सा छगु दर्जन स्वया अप्वो प्रदर्शनकारीपिन्त ज्वंगु खः।

अमेरिकी सहयोग नियोग मिलेनियम च्यालेन्ज कर्पोरेसन (एमसीसी) या उपाध्यक्ष फतिमा सुमार नेपाल थौं वइगु जुगु दु।

एमसीसी परियोजना कार्यान्वयन जुगु देशय् वार्षिक रुपं कार्यान्वयनया अवस्था थुइकेगु झ्वलय् थौं बिहीबाः कतार जुया नेपाः वयत्यंगु खः। नेपालय् एमसीसी परियोजना स्वीकार यायेगु कि मयायेगु बहस जुयाच्वंगु इलय् थुगु भ्रमण जुइत्यंगु खः।

प्यन्हुया नेपाल भम्रणय् उपाध्यक्ष सुमारं एमसीसी परियोजना कार्यान्वयनया अवस्थाबारे थीथी पक्षपि नाप खँ ल्हायेगु ज्याझ्वः दु। वयकलं प्रधानमन्त्री शेरबहादुर देउवा, अर्थमन्त्री जनार्दन शर्मा लगायत थीथी राजनीतिक दलया शीर्ष नेतापि नाप भेटघाट यायेगु ज्याझ्वः दु।

सन् २०१९ य् हे कार्यान्वयनय् जुइमाःगु एमसीसी परियोजना नेपालय् राजनीतिक खिचातानीया कारण जुइमफुगु खः। आः नेपाल स्पष्ट जुइत छु बुँदाया लिसः एमसीसीइ छ्वंगु खः।

राष्ट्रपति विद्यादेवी भण्डारीं हरितालिका तीजया लसताय् तताकेँहपिन्त भिंतुना देछानादीगु दु।

भिंतुना सन्देशय् राष्ट्रपति भण्डारीं तीजं समाज व राष्ट्रयात तक भावनात्मक एकताया सुत्रय् आबद्ध यायेत ग्वाहाली जूगु भलसा कयादीगु दु।

वयकलं तीज पर्वं परिवार नाप थःथीतिपि दथुइ सम्बन्धयात अझ बलागु भलसा कयादीगु दु। तीज पर्वया मौलिकतायात कायम यासे थुकिं सांस्कृतिक महत्वया जगेर्ना यायेत थुगु पर्व हनेगु सन्दर्भय् तसकं तधका भदक मयायेमा धका धयादीगु दु।

देछात प्रधानमन्त्री शेरबहादुर देउवां हरितालिका तीजया लसताय् सकल तहकेँहपिन्त भिं उसाँय्या कामनायासे भिंतुना देछानादीगु दु।

प्रधानमन्त्री देउवां बिउगु भिंतुना सन्देशय् तीजं नेपाली समाजय् विद्यमान लैङ्गिक जातीय, वर्गीय विभेद व दक्को किसिमया असमानता अन्त्य यायेत सामाजिक सद्भाव, सहिष्णुता व मेलमिलाप याना समुन्नत समाजया निर्माणय् अभिवृद्धि यायेत उत्प्रेरित याये फयेमाः धका भिंतुना देछाउगु दु।

कोभिड–१९ या कारण तजिक पारिवारिक जमघट याना नापच्वना माने याये मखंसा महामारीया थुगु अवस्थाय् स्वास्थ्य मापदण्ड पालना यासे हरितालिका तीजया मौलिकता व सांस्कृतिक महत्वयात जगेर्ना यासे हनेत प्रधानमन्त्री देउवां सकसित इनाप याउगु दु।

सरकारं प्रमुख विपक्षी दल नेकपा एमालेें नाराबाजी व अवरोधया दथुइ न राजनीतिक दलसम्बन्धी अध्यादेश प्रतिनिधिसभा बैठकय् पेश याउगु दु।

नेकपा एमाले न थःपिन्स कारबाही यानापि १४ सांसदपिन्त सभामुखं मान्यता मबिगु धासे थौं बुधबाः विरोध यासे प्रतिनिधिसभा बैठक अवरुद्ध याउगु दु।

तर एमालेया अवरोध दथुइ सभामुख गृहमन्त्री बालकृष्ण खाँडयात अध्यादेश पेश यायेत अनुमति बिउगु दु। एमाले सांसदया अवरोध व नाराबाजी छले याना गृहमन्त्री खाँड रोष्टमय् वना अध्यादेश पेश याउगु दु।