येँ हाकन बर्डफ्लु संक्रमण पुष्टि जुगु दु।

येँया किपूया निगु थासय् व चन्द्रागिरीइ लहिनातःपि टर्कीयाके बर्डफ्लु संक्रमण पुष्टि जुगु दु धका पशु सेवा विभागं धागु दु।

किपूया निगु प्वाइन्ट व चन्द्रागिरीया छगु थासय् सोमवाः बर्डफ्लु संक्रमण पुष्टि जुगुलि अन टर्की नष्ट यायेत टोली खटे जुगु दु धका विभागया प्रवक्ता डा. चन्द्र ढकालं धाथु दु।

प्रारम्भिक रुपं करिब ८ सय टर्की नष्ट यायेत व उगु थासय् निसंक्रमण यायेत बुधवाः सुथनिसे प्राविधिक खटे यागु दु। ।

अस्वभाविक रुपं टर्की सीगु सूचं वयेवं विभागं नमूना संकलन यासे केन्द्रीय प्रयोगशालाय् रियलटाइम पिसिआर विधिपाखे यागु परिक्षणय् बर्डफ्लु पुष्टि जुगु खः।

टर्कीयात नष्ट व निसंक्रमण विधि लिपा बुधवाः बहनि तक बिष्तृत विवरण सार्वजनिक यायेगु तयारी जुयाच्वंगु दु धका विभागं धागु दु।

येँया तारकेश्वर, यलया नख्खु लगायतया थासय् छु महिना न्ह्यः लोकल खाँ व टकीयाके बर्डफ्लु लुगु खः ।

चन्द्रागिरि नगरपालिकाया प्रमुख घनश्याम गिरीयात कोरोना संक्रमण पुष्टि जुगु दु।

नगरप्रमुख गिरीयात वंगु सोमवाःनिसे भचा ज्वरोया लक्षण खनेदुगुलि पीसीआर परीक्षण यागुलि म्हिगः मङ्गलवाः वंगु रिपोटय् कोरोना संक्रमण पुष्टि जुगु खः।

आः वयकः होम आइसोलेशनय् च्वनाच्वंगु दु।

येँ महानगरपालिकाया ग्वाहालिं थौंनिसे छत्रपाटी निःशुल्क चिकित्सालय विशेष कोविड अस्पताल सञ्चालनय् वंगु दु ।

थौं छगु ज्याझ्वः दथुइ सहरी विकास राज्यमन्त्री रामवीर मानन्धर व येँ महानगरपालिकाया प्रमुख विद्यासुन्दर शाक्यं मंकाः कथं अस्पतालया उलेज्यया यानादीगु दु । थुकिया लागि येँ महानगरं पूर्वाधार सुधारया लागि एकमुष्ट ३० लाख ३४ हजार ७ सय ५३५ व मासिक सञ्चालन यायेत करीब ४८ लाख १६ हजार ६५७ रुपैयाँ बिइ। थुगु कोबिड अस्पतालयात वंगु बैशाख ३१ गते सम्झौता यागु खः ।

महानगरया भगिनी सहर ल्हासां उपलब्ध यानाबिगु भेन्टिलेटर मध्ये निगः छत्रपाटी चिकित्सालययात बिगु खः । अथेहे अस्पतालं खरिद याइगु थप स्वगः भेन्टिलेटरया लागि रकम महानगरं भुक्तानी यागु खः। अस्पतालया क्षमता बढे यायेत कोविड संक्रमणय्

विरामीपिनिगु याउक उपचारया वातावरण दयकेत महानगरं सरकारी व सामुदायिक अस्पतालनाप सहकार्य यानागु खँ धका येँ महानगरया प्रमुख विद्यासुन्दर शाक्यं, आः जनताया जीवन रक्षायायेत मागु दक्को ज्याय् प्राथमिकता तयागु दु धका धयादीगु खः। अस्पतालया क्षमता अप्वोकेगु व संक्रमणयम दर घटे यायेगु ज्यायात नाप यकूुुुसा जक कोविडयात नियन्त्रणय् हये फइ धका धयादीसे दक्को मिले जुया न्ह्यावनेगु बाहेक मेगु विकल्प मदु, प्रमुख शाक्यं धयादीगु दु।कोविड नियन्त्रण यायेत बैज्ञानिक आधार खोजी यायेमाः । गुवलय् तक थुकिया नियन्त्रणया लागि विज्ञानया आधारित समाधान वइ मखु, उगु इलय् तक प्राप्त जुगु उपलब्धी व सामुहिक कुतः यायेमाः धका धयादीगु दु ।

थुगु अस्पतालया पूर्वाधार सुधारया लागिजिमिस करीब ३० लाख रुपैयाँ खर्च याना लिफ्ट तयागु दु। न्हुगु भवन निर्माण यायेत करीब ५ करोड रुपैयाँ विनियोजन याये धुककागु दु धका महानगरया प्रमुख प्रशासकीय अधिकृत राजेश्वर ज्ञवालीं धयादीगु दु । महानगरया ग्वाहालिं थुगु अस्पतां गुलिफु उलि जनताया सेवा याये। जिमिसं यानागु सेवा सम्बन्धि विवरण हरेक दिं महानगरय् छ्वया हये ।

अस्पतालया अध्यक्ष डा. मनोजमान श्रेष्ठं धयादीगु दु, जिमित अक्सिजन व्यवस्थापन यायेत अझ न थाकुनि । थुकिया लागि प्लान्ट स्थापना यायेगु योजनादु धका धयादीगु दु । अस्पतालया निर्देशक डा. प्रेमलकुमार जोशीया कथै आः अस्पतालय् ७ आइसीयू, ४ भेन्टिलेटर ६ एचडीयू नाप ३५ वेडया कोविड अस्पताल सञ्चालन जुइ धका धयादीगु दु।

स्वास्थ्य तथा जनसंख्या मन्त्रालयं स्वास्थ्य अवस्था सामान्य जूपि कोरोना संक्रमितपि होम आइसोलेसनय् च्वनेत इनाप यागु दु ।

लक्षण खने मदुपि व सामान्य अवस्थाय् संक्रमित जूपि अस्पतालय् च्वनिगु इलय् जटिल अवस्थाया संक्रमितपिन्त बेड मदइगु समस्या जुगुलि मन्त्रालय अथे इनाप यागु खः । अयन मन्त्रालयं गज्यापि कोरोना संक्रमित तत्काल अस्पताल वनेमाः धका स्पष्ट यागु दु।

मन्त्रालयया कथं थःगु हेरचाह याये मफुपि बुढाबुढी व अपाङ्गता जुपि संक्रमितपि तत्काल अस्पताल वनेमाः धका धागु दु। ज्वरो वया वासः नंसा १०१ फरेनहाइट ज्वरो लगातार स्वन्हु तक वःसा तत्काल अस्पताल वनेमाः धका मन्त्रालयं धागु दु।

लगातार छाती स्यांसा व म्हय् अक्सिजनया मात्रा कम जुया थाकुगु महसुस जूसा छेँ मच्वंसे अस्पताल वनेमाः धका स्वास्थ्य मन्त्रालयं धागु दु। अथहे तांहाकेक न्ववाय् मफुसा वा न्ववायेगु अस्पष्ट जुगु अवस्थाय् छेँ च्वना जोखिम मकास्ये तत्काल अस्पतालय् वना उपचार याये मागु मन्त्रालयं धागु दु।

चिकित्सकपिनिगु कथं होम आइसोलेसन अस्पतालं बाघौं स्वया कमया दूरी जुइमाः। संक्रमितपिन्त स्वास्थ्यय् समस्या खनेदुगु बाघौं दुने कोभिड अस्पताल थ्यके मफुसा थप समस्या जूइ धका चिकित्सकपिन्स धागु दु ।

वरिष्ठ गायक स्वयम्भूराज शाक्य ६४ दँय् मन्त ।

वंगु वैशाख २६ गतेनिसे वयकः विपि स्मृति अस्पतालय् उपचार यानाच्वनादीगु खः। कोरोना संक्रमणया कारण उपचारया लागि अस्पताल भर्ना जुयादीम्ह शाक्यं लिपागु इलय् पीसीआर नेगेटिभ वंगु धका वयकःया परिवारपाखे जानकारी बिगु खः।

न्हुगु न्हुगु शैली व सृजनाय् तल्लीन वरिष्ठ गायक शाक्य थःगु त्वालय् ग्वसाः ग्वंगु एकल साँझया सफलता लिपा मेगु एकल प्रस्तुतिया योजना दुगु खः । रेकर्डिङ सहज व सुलभ मजुगु इलय् छगु कोठाय् वाद्यवादक नाप गायक÷गायिका व मेगु कोठाय् प्रविधि व प्राविधिकया नाप ३ दशक न्ह्यः नेपालभाषाया ‘मतिना’ रेकर्ड यागु खः ।

नेपालया सांगीतिक विकासय् ईल्वहंया रुपय् थुगु म्येया गीति संग्रहया संग्रहित वयकः दक्को म्ये आः न लुमकूगु दनिइ।  सांस्कृतिक संस्थानपाखे सेवानिवृत वरिष्ठ गायक शाक्य रेडियो नेपालया विशिष्ट श्रेणीया गायक जुयादीम्ह खः ।

थीथी पुरस्कार व सम्मानपाखे सम्मानित जुयादीम्ह शाक्यं तिब्बत, श्रीलंका, बंगलादेश, साउदी अरेबिया, जापान, हङकङ, बैंङ्ककय् सांगीतिक प्रस्तुति बियादीइ धुकुगु दु।

न्यागु गीति संग्रह नाप २५० स्वया अप्वो म्ये हालादीइ धकुम्ह वरिष्ठ गायक शाक्यं प्यंगु एकल शो तक यानादी धुकुगु दु।