प्रधानमन्त्री केपी शर्मा ओलीं गौतम बुद्ध नेपाःया लुम्बिनीइ जन्म जुगु प्रामाणिक तथ्य दुसा अय्न गुलि न देशया पाठ्यक्रमय् थुकिया गलत खँ समावेश यागुलि भिंकेत ध्यानाकर्षण यागु दु।

प्रम ओलीं बुद्धया जन्म नेपालया लुम्बिनीइ जुगु व बुद्धवादया मुहान न अन हे खः धका धयादीगु दु।

२५६५ क्वःगु बुद्धजयन्ती व बुद्ध परिनिर्वाण नाप लुम्बिनी दिवसया लसताय् थौं छगु सन्देश बियादीसे प्रधानमन्त्री ओलीं ‘थज्यागु खँ भिंकूगु मदु धइगु न्यने दु ।जि सकसित न थज्यागु गल्ती थौंया वैज्ञानिक युगय्, सूचंया युगय् गल्ती निरन्तर कायम याना मस्तयत वा न्हुगु पुस्तायात अज्यागु गल्ती ब्बकेगु बालागु खँ मखु ।

उकि सत्य ब्बकेगुपाखे, सत्य स्यनेगुपाखे व मस्तयत सत्य खँया अवगत यायेगुपाखे न्ह्यावनेत सकसित ध्यानाकर्षण याये चाहे जु।’ ‘नेपाः बुद्धया हे जन्मभूमि खः व बुद्धिज्मया, बुद्धवादया, बुद्ध दर्शनया उद्गमस्थल न खः। नाप शान्तिया सन्देश ह्वलेगु थाय् न खः,’ धका प्रम ओली धयादीगु खः। ‘तर बुद्धया उपदेश, बुद्धया चिन्तन व बुद्ध क्यंनादीगु शान्तिया लँय् व मानव जातिया सुखय नितिं जः सीइ मखु व सीगु मदु,’ धका वयकः न च्वयादीगु दु।

राष्ट्रपति विद्यादेवी भण्डारीं विश्वशान्तिया अग्रदूत गौतम बुद्धया २५६५ क्वःगु जन्मजयन्तीया लसताय् स्वदेश व विदेशय् च्वपि बौद्धधर्मावलम्बी, शान्ति व अहिंसाप्रेमी सकल नेपाःमिपिन्त सुख, शान्ति व समृद्धिया लागि भिंतुना देछानादीगु दु।

विश्वय् शान्ति जः कथं उच्च सम्मान याइम्ह महान् गौतमबुद्धया जन्मभूमि नेपाः जुगुलि सकसिया लागि गौरवया विषय जुगु धयादीसे वयकलं बुद्धजयन्तीयात झीगु राष्ट्रयागु प्राचीन सभ्यता व समृद्ध इतिहासपाखे प्रेरणा कया प्रगतिया लँय् न्ह्यावनेत प्रण यायेगु अवसरया रूप कायमागुलि बःबियादीगु दु।

हलियकं  कोभिड–१९ या महामारीपाखे याकन हे उन्मुक्ति जुइगु भलसा कयादीसे राष्ट्रपतिं बुद्धजयन्तीया लसताय् नेपाःया राष्ट्रिय एकताय् थप मजबुत दयकेत सकसित अभिप्रेरित याये फयमाः धका कामना यानादीगु दु।

थौं हलियकं बौद्ध धर्मावलम्बीपिनिगु २५६५ क्वःगु बुद्ध जयन्ती खः।

दँय् दँसं वैशाख पुन्हि कुन्हु तःजिक हनिइगु बुद्ध जयन्ती थुगु दँय् कोरोना भाइरस महामारीया कारण थौं छु न विशेष ज्यााझ्वः मदु।

भगवान बुद्धया बुदिं, बुद्धत्व प्राप्त यागु व महापरिनिर्माण जुगु दिं वैशाख पुन्हि जुगुलि थौंया दिं बौद्धमार्गीपिन्स विशेष पर्व कथं काइगु दिं खः।

थौंया दिं बुद्ध बुगु थाय् लुम्बिनी लगायत दक्को बौद्ध स्तुपा नाप थीथी बिहारय् बुद्ध जयन्ती हनेगु याइ। तर कोरोनाया कारण थुगु दँ लुम्बिनी न दीप प्रज्वलन बाहेक मेगु छु न विशेष ज्याझ्वः मदु।

लुम्बिनीमा २५६५ गु दीप प्रज्ज्वलन व परित्राण पाठ याना सामान्य कथं जक माने यायेत्यंगु दु।

स्वनिगः दुने २४ घण्टाय् थौं मंगलवाः २ हजार ६१३ म्हेसित कोभिड संक्रमित थपे जुगु दु।

थौं येँ १ हजार ८६३ म्ह कोरोना सक्रमित थपे जूगु दु।

यलय् ४२७ म्ह व ख्वपय् ३२३ म्ह न्हुपि संक्रमित थपे जूगु दु।