कोरोना भाइरस (कोभिड १९) विरुद्धया खोप अभियान कथं थौं निन्हुया दिं देयन्यक २८ हजार स्वया अप्वोसित खोप बिःगु दु।

स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं थौं बिहीबार छगु प्रेस विज्ञप्ति जारी यासे ७७ जिल्लाय् कुल २८ हजार ७३२ म्ह स्वास्थ्यकर्मी व फ्रन्टलाइनरपिन्स खोप लगे याःगु दु धका जानकारी बिःगु दु ।

प्रदेश १ य् ३ हजार ८४७म्हेसिया, प्रदेश २ य् २ हजार १७४म्ह, वाग्मती प्रदेश य् ११ हजार ४६१म्ह, गण्डकी प्रदेशय् ४ हजार ८५३म्ह, लुम्बिनी प्रदेशय् २ हजार ३०३म्ह, कर्णाली प्रदेशय् १ हजार ६७७ म्ह व सुदूरपश्चिम प्रदेशय् २ हजार ४१७ म्हेसिया खोप काःगु दु धका मन्त्रालयं धाःगु दु।

यल महानगरपालिका– १६ व अरनिको समाजं बृहत निशुल्क स्वास्थ्य शिविरक याये त्यःगु दु। वइगु माघ १७ गते निसे फागुण २२ गते तक हरेक शनिवाः यलया १६ वडा थीथी थासय् स्वास्थ्य शिविर व स्वास्थ्य परीक्षण यायेत सार्वजनिक आहवान याःगु दु।

स्वास्थ्य सेवा पहुँच योग्य, सर्वसुलभ व विशेषतः आर्थिक स्तर कमजोर जूपिन्त लक्षित यासे स्वास्थ्य शिविरया ग्वसाः ग्वःयाःगु धका १६ वडा अध्यक्ष निर्मलरत्न शाक्यं लहनान्युजयात धयादीगु दु। ‘थःथःगु विषय विज्ञ व अनुभवी चिकित्सकपिनिगु उपस्थितिइ शिविरपाखे यक्को स्वया यक्कोसिया लाभ कायेत इनाप याःगु दु ।’ वडाअध्यक्ष शाक्यं धयादीगु दु ।

समाजया अध्यक्ष नाप वरिष्ठ न्यूरो चिकित्सक डा. सर्वोत्तम श्रेष्ठं थीथी थासय् स्वास्थ्य समस्या जुपि मनू तयेत थःगु स्वास्थ्य परीक्षण यायेत इनाप यासे बिहीबार वडाय् ग्वसाः ग्वःु स्वास्थ्यकर्मीपिनिगु बैठकय् धयादीगु दु ‘ स्वास्थ्य शिविर बारे थःथिति व पासापिन्त जानकारी बियादीत इनाप यानादीगु खः ।’ न्हापागु शिविर माघ १७ गते मंगलबजारय् जुइ ।

अन नशा व हाडजोर्नीया परीक्षण जुइ । अथेहे मुटु ल्वय् सम्बन्धी माघ २४ गते बुबहाः, गाःबहाः, फागुण १ गते बाल तथा छाला रोग सम्बन्धी शिविर बालिफल (अशोक हलय् फागुण ८ गते स्त्रीरोग सम्बन्धी शिविर नागबहाः, फागुण १५ गते प्वा व स्येँ सम्बन्धी शिविर दौबहाः व फागुण २२ गते शनिवाः ज्येष्ठ नागरिकपिनिगु लागि नशा, युरोलोजी, मधुमेह व जनरल सम्बन्धी शिविर सञ्चालन जुइ । उगु शिविरय् स्वास्थ्य सम्बन्धी थःत समस्या जुगु बारे परामर्श कायेत व निःशुल्क वासः तक वितरण यायेगु धका समाजया महासचिव डा. सुशील प्रजापतिं धयादीगु दु ।

प्रतिनिधि सभा सदस्य माननीय जीवनराम श्रेष्ठं येँ महानगरपालिका वडा नं. १५ य् डल्लु चौतारा दलु लवंहिति (ढुङ्गेधारा) छगु ज्याझ्वः दथुइ उलेज्या यानादीगु दु ।

स्थानीय जनसमुदायया माग कथं निर्माण ज्या येँ क्षेत्र नं. ८ स्थानीय पूर्वाधार विकास साझेदारी ज्यााझ्वः अन्तर्गत १५ लाख बजेट बिनियोजन याःगु खः । लवंहिति हमुमान ढोका विश्व सम्पदानिसे स्वयम्भू विश्व सम्पदातक वनेगु लँय् लाः । श्रेष्ठं येँयात सांस्कृतिक शहर दयेके माःगु व थनया पहिचान कायम यासे व पर्यटन उद्योग बिकासया लागि थःम्हेसिया हनुमानढोका पाखे स्वयम्भू तक वनेगु लँय् सम्पदामार्ग दयेका न्ह्या वनेय्गु कथं थुगु ज्या जुगु खः धका धयादीगु खः।

उगु ज्याझ्वलय् जेष्ठ नागरिक प्रेम मानन्धरया सभाध्यक्षताय् जुगु ज्याझ्वलय् मनराजा रन्जित लसकुस यानादीगु खः । अथेहे ज्याझ्वलय् क्लबया अध्यक्ष नाप समितिया सदस्य मधुसुदन मानन्धर, १५वडा अध्यक्ष नाप येँ महानगरपालिका प्रबक्ता ईश्वरमान डगोल, संरक्षण तथा जिर्णोद्वार उपभोक्ता समितिया अध्यक्ष अमर बहादुर रंजित, समाजसेवी सुबर्णमान डगोल, गंगा रंजित, राजु खरेल व उपभोक्ता समितिया पदाधिकारीपि नाप स्थानीयपिनिगु न उपस्थिति दुगु खः।

दशरथ चन्द व गंगालाल श्रेष्ठयात गोली क्यका स्यागु थाय् येँया शोभा भगवती खुसिसिथय् थौं वयकःपिन्त लुमकूसे छगु श्रद्धाञ्जलीसभा जूगु दु।

येँ महानगरपालिकां नेपाल राष्ट्रया स्वाधिनता व नेपाःमिपिनिगु स्वतन्त्रताया लागि १०४ दँ हुकुमी शासन व उगू शासकयात चुनौती बिउसे छातिइ गोली फःपि चन्द व श्रेष्ठया लुमन्तीइ थौं छगू ज्याझ्वः जूगु दु । उगु  श्रद्धाञ्जली सभाय् न्ववासे येँ महानगरया मेयर विद्यासुन्दर शाक्यं चन्द व श्रेष्ठ सूयात न अप्पा मक्यकूसे, खुकुरी–तरवार चले मयासे, गोला–बारुद क्यकिइगु ज्या मया ।

उगु इलय् हतियार छुयगूसा सू मनू घाइते जुइफु, सू सीइ फू । तर वयकपिन्स अथे याना मदीइ ‘तर, वयकःपिनिग सः वः स्वया यक्को सशक्त जू । वयकःपिनिगु सः देश–विदेश हे तरंगित यानाबिल।’ वयकलं धयादीगु दु सहिदपिनिगु योगदानया उच्च मुल्याङकन यासे शहिदपिनिगु लिपातक न लुमकिइगु कथं महानगरपालिकां प्यम्ह सहिदपिािगु पूर्ण कदया सालिक निर्माण यानागु खँ लुमकादीगु दु । छम्हेसिया मेम्हसित द्धपं जक बिइ स्वया सहकार्य याना न्ह्या वःसा जक विकास व समृद्धि न्ह्यने वनिइ धका धयादीगु खः । वयकं टीमओर्कय् विश्वास याःसा जक सकारात्मक परिणाम बिइ फइ व थः न उगु कथं हे न्ह्यने वनाच्वनागु दु धका धयादीगु दु।

‘जनप्रतिनिधि निर्वाचित जुया वये धुका भचा छु लिच्वः बालक्क वःगु दु धका धयादीसे,’ मेयर शाक्यं ‘लिच्वः छिकपिनिगु न्ह्यने हे दु । मूल्याङ्कन यायेगु जिम्मेवारी छिकपिनिगु खः ।’ ज्या यायेगु झ्वलय् छु भचा कमजोरी जुइफु व ध्यान मवगु जुइफु धका धयादीसे ध्यानाकर्षण याना सुझाव बियादिसँ । ‘याइम्हेसिया न्ह्यावलय् बालाक्क यायेत स्वइ । तर, मेपिन्स मूल्याङ्कन याये वलय् फरक जुइफु । उगु इलय् कमी–कमजोरी जुलकि छिकपिन्स सचेत यानादीसँ भिंका न्ह्यावनेत जिपि तयार दु ।’ वयकलं धयादीगु दु ‘सहिदपिनिगु झ्वाताय् न्ह्यने दना सकसिया द्वन्द्व व इष्र्या मखु छम्ह नाप मेम्हसिया सहकार्य व समन्वय याना सिङ्गो देशया सामाजिक–आर्थिक, साँस्कृतिइ ह्यूपाः हयेत छवाः छप्प जुइनु ।’

उगु सभाय् येँ महानगरपालिका वडा नं. १५ या वडाध्यक्ष नाप प्रवक्ता ईश्वरमान डंगोलं सहिदपिनिगु म्हगस पूरा यायेत दक्को छप्प जूइमाः धका धयादीगु खः।