Display Style:
Column Style
नेपालय् थप सच्छि व ५२म्हसिके कोरोना संक्रमण पुष्टि
चिल्लागा पञ्चमी ११४१, चैत्र २० गते शुक्रबाः
नेपालय् थप सच्छि व ५२म्हसिके कोरोना संक्रमण पुष्टि जूगु दु । लिपांगु २४ घौ दुने ४ द्वः २सः व १३ म्हसिया जूगु पीसीआर परीक्षणय् ३ गू फुति ६गू प्रतिशत मनूखय् संक्रमण खनेदूगु खः ।
स्वास्थ्य तथा जनसंख्या मन्त्रालयं प्रकाशन याःगु धलः कथं स्वनिगःलय् थप ८६ म्हसिके संक्रमण खनेदूगु दु । गुकिइ येँय् ७३म्ह, यलःय् ८ म्ह व ख्वपःय् ५ म्हसिके संक्रमण खनेदत ।
स्वनिगःलय् खनेदूगु संक्रमित ल्याःया ५६गू फुति ५गू ७गू प्रतिशत मनूखय् संक्रमण खनेदूगु दु । स्वनिगःलय् धाःसा लूपिं संक्रमितया ल्याः छुं लाय् थुखेया दक्वःलय् अप्वः खः ।
थ्व नापं नेपालय् मुक्कं कोरोना संक्रमितया ल्याः २ गू लख ७७ द्वः ४ सः व ६१म्ह थ्यंगु दु । थुगु ई दुने संक्रमणया हुनिं थप छम्ह सीगु दु । थ्व नापं नेपालय् कोरोना संक्रमणया हुनिं सीपिनि ल्याः ३ द्वः व ३१म्ह थ्यंगु दु ।
लिपांगु २४ घौ दुने थप ६५म्हसिनं संक्रमणयात त्याकुगु नापं संक्रमण मुक्त जूपिनि ल्याः २ गू लख ७२ द्वः ८ सः व ५१म्ह थ्यंगु दु । आः देय्यंक सक्रय संक्रमितया ल्याः द्वःछि ५सः व ७९म्ह दु ।
नेपालय् छवा थुखे संक्रमितया ल्याः अप्वःगु नापं सक्रिय संक्रमितया ल्याः नं अप्वःगु दु ।
येँ महानगरपालिका व सिसडोलवासी दथुया वार्ता लिच्वःलय् मथ्यन
लहनान्यूज | चिल्लागा पञ्चमी ११४१, चैत्र २० गते शुक्रबाः
स्वनिगःया फोहोर मैला व्यवस्थापनया नितिं नुवाकोट सिसडोल क्षेत्रया स्थानीयलिसे म्हिगः जूगु वार्ता असफल जूगु दु ।
सिसडोलबासि व येँ महानगरपालिका दथुई जूगु म्हिगःया वार्ता असफल जुइवं सिसडोल ल्याण्डफिल्ड क्षेत्रया स्थानीयपिन्सं फोहोर वान्छ्वय्गुलिइ पंगः थना हे च्वनेगु जूगु दु । सिसडोलबासी व येँ महानगरपालिका दथुई बुधबाः व विहीबाः येँ वार्त जूगु खः । वार्ताय् काठमाडौं महानगरपालिकाया मेयर विद्यासुन्दर शाक्य विरामी जुल धकाः झासेंलि वार्ता असफल जूगु सिसडोल क्षेत्र फोहोर मैला व्यवस्थापन तथा सरोकार समितिया नायः नवराज ढुङ्गानां धयादिल । वय्कलं मेयर शाक्यया धिनां थःपिनिगु छुं न माग पूवनिगु भलसाः मदुगु धयादिल ।
सिसडोलबासीं अव्यवस्थित फोहोर बिसर्जन जुया वातावरणय् लिच्वः लागू हुनिं स्वास्थ्यय् प्रतिकुल असर लाःगु हुनिं थ्वसियां न्ह्यः जूगु सम्झौताहरु थथें कार्यान्वयन यायेत माग यानावयाच्वंगु दु ।
उमिसं सिसडोल ल्याण्डफिल्ड साइट प्रभावित क्षेत्रया ब्वनेकूथिइ पूर्ण शिक्षक दरबन्दि उपलब्ध यायेमाःगु, सतक विस्तार याना कालोपत्रे यायेमाःगु, अस्पताल, प्रभावित थाय्या छेँखां छम्हेसित रोजगारीया व्यवस्था लगायत सम्झौता थथें कार्यान्वयन यायेत माग याःगु दु । फोहर वान्छ्वय्गुलिइ पंगया हुनिं स्वनिगःया फोहोर मैला चैत १३ गतेनिसें अथेस्तुं दु ।
थ्वयां न्ह्यः बुधबाः जूगु वार्ताय् येँ महानगरपालिका प्रमुख विद्यासुन्दर शाक्यं सिसडोल ल्याण्डफिल्ड साइटं लिच्वः लाःगु क्षेत्रया पूर्वाधार विकासया लागि खुगु क्वति ध्येबाया प्रस्ताव यानादिगु खः ।
बुधबाः येँया सिसडोल ल्याण्डफिल्ड साइटं लिच्वःलय् लाःपि स्थानीयलिसें जनप्रतिनिधि दथुई सहलहया झ्वलय् मेयर शाक्य थीथी पूर्वधार विकासलिसें स्थानीय वासिन्दाया शिक्षा व स्वास्थ्य क्षेत्रया नितिं छुं प्रस्ताव याःगु खः ।
फोहोर मैला प्रभावित क्षेत्र शिक्षक व्यवस्थापन संघर्ष समिति व स्थानीय बसिन्दापिन्सं थीथी माग याना चैत १३ गतेनिसें फोहोर वान्छ्वयेत पंगः ब्वलंकाच्वंगु खः ।
उगु झ्वलय् मेयर शाक्यं प्रभावित जिल्ला नुवाकोटया ककनी गाँपालिका व धादिङको धुनिवेसी गाँपालिकाया पुर्वाधार विकासका लागि वइगु दँया बजेटय् स्वंगु–स्वंगु क्वःति ध्येबाया व्यवस्था यानाबिइगु प्रस्ताव तःगु खः ।
अथेहे प्रभावित क्षेत्रय् १५गु बेडया अस्पताल न्ह्याकेया नितिं पुर्वाधार निर्माण, १५गू बेड व प्यम्ह डाक्टरया नितिं माःगु ध्येबा ग्वहालि यायेगु प्रस्ताव नं शाक्य तयादिगु खः ।
अथेहे मेयर शाक्यं थ्वयांन्ह्यः हे प्रभावित क्षेत्रय्या नितिं छगः एम्बुलेन्स न्याना बिउगु व मेगु छगः एम्बुलेन्स हाकनं न्यायबिइगु बचं बियादिल । थ्वसिबें न्ह्यः यलः महानगरपालिकां छगः एम्बुलेन्स न्यानाबिइगु धाःसां मबिउगुलिइ प्रभावित क्षेत्रया स्थानीयपिन्सं असन्तुष्टि न्ह्यब्वसेंलि मेयर शाक्य एम्बुलेन्स न्यानाबिइगु बचं बियादिगु खः ।
उगु सहलहले दुथ्यापिं जनप्रतिनिधि व स्थानीय वासिन्दापिन्सं फोहोर वान्छ्वयेगुलिइ पंग ब्वलंकेगु रहर मजुसे बाध्यता जूगु धयादिल । ककनी गाँपालिकाया न्वकू सिता लामां नं फोहोर व्यवस्थापनया विकल्प मालेहेमाःगुलिइ बः बियादिल ।
उमिसं विगतय् न्ह्याबलें सम्झौता कार्यान्वयनय् लिबाकूगु धासें नुवाकोटया दक्व दलया शिर्ष नेतालिसें उपस्थितिइ सहलह याना निर्णय यायेगु धयादिल ।
कंग अजिमा द्यः छेँया पुनर्निर्माण क्वचाल
लहनान्यूज | चिल्लागा चर्तुर्थी, ११४१, चैत्र १९ गते विहीबाः
येँ महानगरपालिकाया न्ह्यलुवाय् येँया यट्खा त्वाःया कंग अजिमा द्यः छेँया पुनर्निर्माण क्वचाःगु दु ।
२०७२ सालय् भुखाचं स्यंगु अजिमाया द्यः छेँया पुनर्निर्माण क्वचाला थौं उलेज्या याःगु खः । येँ महानगरपालिकाया मेयर विद्यासुन्दर शाक्यं उगु ज्याझ्वलय् उलेज्यायानादीगु खः ।
ज्याझ्वलय् मेयर शाक्यं भुखाचं लाना स्यनाच्वंगु सांस्कृति सम्पदाया भिंकेज्याः याना हे च्वनागु धयादिल ।
महानगरपालिका येँया पुरतात्विक सम्पदा म्वाकातयेत न्ह्याबलें तयार हे दूगु धासें मेमेगु थासय् नं स्यनाच्वंगु झिगु सम्पदा त दुसा वडाय् स्वापूतय्त इनाप यानादिल ।
नेवाः पत्रकार राष्ट्रिय दबू येँ जिल्ला कचाःया दँ मुँज्या क्वचाल
लहनान्यूज | चिल्लागा चर्तुर्थी, ११४१, चैत्र १९ गते विहीबाः
देय्न्यंकया नेवाः पत्रकारतय्गु नेवाः पत्रकार राष्ट्रिय दबूया च्याक्वःगु दँमुँज्या कन्हय् जुइत्यंगु दु । थिमिया शंखधर पार्टी प्यालेसय् जुइगु दँमुँज्याय् ब्वति कायेत थीथी जिल्लां पत्रकारत स्वनिगः थ्यंकवयेगु झ्वः न्ह्याःगु दु ।
देय्न्यंकंया २५गु मल्याक जिल्लाय् संगठन बिस्तार यायेधुंकूगु पत्रकार राष्ट्रिय दबूया थ्वसिवे न्ह्यः थीथी जिल्लाय् दँमुँज्या याःगु दु । थ्वहेदथुइ येँ, यल, ख्वप, सुनसरी, चितवन, काभ्रे नापया जिल्लाय् दँमुँज्या याःगु दु ।
थ्वहेदथुइ येँय् जूगु दँमुँज्याय् छ्याञ्जे रत्नकाजी महर्जनं आर्थिक वर्षय् येँ कचां याःगु थीथी ज्याया प्रगति विवरण कनादीगु खः । अथेहे दाँभरी राजेन्द्र मानन्धरं आर्थिक प्रतिवेदन न्ह्यब्वयादिल ।
ज्याझ्वलय् न्वंवासें मूपाहाँ केन्द्रीय नायः बज्राचार्यं थः नेवाः जुयागुया हुनिं नेवाः पत्रकार जुइखंगु, थुगु पहिचान गौरव खः धयादिल । वय्कलं कोभिड–१९ या प्रभाव, लकडाउनया इलय् येँ कचापाखें याःगु ज्याया बारे न्ववासें येँ कचाःया ११९म्ह दुजःपिन्त लकडाउनया इलय् ग्वाहालि याःगुया तःजिगु ज्या खः धयादिल ।
ज्याझ्वलय् न्वंवासें केन्द्रीय न्वकू रचना श्रेष्ठं बार्षिक प्रगति प्रतिवेदनय् उल्लेख जूगु ज्यां थः प्रभावित जुयागु धयादिसेँ बाँलागु नेतृत्वं हे संस्थां बांलागु लँपु ज्वनीगु खँ न्ह्यथनादिल । वय्कलं येँ जिल्ला कचाया लखतिर्थय् चाःगु ज्याकूया नं प्रशंसा यानादिल ।
येँ जिल्लाया नायः ज्याझ्वःया सभानायः अर्विन्द्रमान सिं नं येँ जिल्ला शाखाया दक्वं ज्याय् ज्यासना पुचःया हे सक्रियता दुगु धयादिसें थुगु पुचःया १५म्ह दुजः धइगु १५गः हे थां खः धयादिल ।
ज्याझ्वलय् वयकलं भावी योजनाया बारे कनादिसें येँ महानगरपालिकां महानगर दुने स्थानीय भासं स्थानीय पाठ्यक्रम लागू याःगु लसताय् मेयर विद्यासुन्दर शाक्ययात नागरिक अभिनन्दन यायेत्यनागु खँ कनादिल । चैत्र २४ गते वसन्तपुर दबुलिइ जुइगु थुगु ज्याझ्वलय् भाषिक आन्दोलनया उपलब्धि थुगु ज्यायात तिबः बीत सकलें झायादीत इनाप नं यानादिल ।
पत्रकार राष्ट्रिय दबूया येँ कचां बैशाखय् सानुकाजी स्मृति फुटसल व पत्रकारिता तालिम, जेठय् स्वयम्भूइ बृत्तचित्र प्रदर्शनी व फोटो प्रदर्शनी यायेगु ग्वसाः दुगु नं कनादिल ।
स्वनिगः दुहाँ वइगु नाकाय् चेकजाँचय् कडाइ
चिल्लागा चर्तुर्थी, ११४१, चैत्र १९ गते विहीबाः
कोरोना संक्रमण दर अप्वयावनेधुंका स्वनिगः दुत्यनिगु मू नाकाय् कडाइ याःगु दु ।
स्वनिगःलय् संक्रमणया जोखिम अप्वइगु जूगुलिं स्वनिगः दुत्यनिगु नाकाय् कडाइ यानागु काठमाडौया प्रमुख जिल्ला अधिकारी कालीप्रसाद पराजुलीं जानकारी बियादील ।
स्वनिगः दुत्यनिगु मू नाका थानकोटया नागढुङ्गा व त्रिभुवन अन्तर्राष्ट्रिय विमानस्थलय् एन्टीजेन परीक्षण न्ह्यागु दु । संक्रमण दर अप्वयावनेधुंका आइतबाः निसें हे नाकाय् लक्षण खनेदूपिं मनूखय् एन्टीजेन परीक्षण न्ह्यागु प्रमुख जिल्ला अधिकारी पराजुलीं धयादील ।
अथेहे सचेतनामूलक अभियान न्ह्यागु व थुगु कथंया अभियान न्ह्याकेत फुक्क पालिकाया नं निर्देशन जूगु वयेकलं जानकारी बियादील । संक्रमणया अवस्था स्वया वइगु दिंलय् थप पलाः न्ह्याकेगु पराजुलीं धयादील ।
भक्तपुर व ललितपुर जिल्ला प्रशासनं नं संक्रमणं ल्यनेत भीडभाड मयायेत, स्वास्थ्य मापदण्ड पालना यायेत, भेला सम्मेलन लिसेंया भीडभाड जुइगु ज्याझ्व मयायेत धाःगु दुसा जिल्ला दुत्यनिगु नाकाय् कडाइ याःगु दु ।
