येँयाःया झ्वलय् रथय् तयाः कुमारीलिसें जात्रा यायेमाःम्ह गनेद्यः थौं ह्यूगु दु । माःकथया विधि पूवंकाः थौं न्हूगु गणेश तःगु खः ।

येँ पाछैगल्लीयाम्ह प्यदँत्या दुम्ह रोदिनमान शाक्ययात न्हूम्ह गनेद्यः ल्यःगु खः । थ्वयां न्ह्यः, १४ दँनिसें पाको न्हू सडकया समवेग शाक्य गणेश जुयावःगु खः ।

येँया तलेजुया मूल पुजारी उद्धव कर्माचार्यं विधि कथं पूजाआजा यानाः रोदिनमानयात न्हूम्ह गणेशया रुपं प्रतिस्थापन यानादीगु खः । व झ्वलय् पुलांम्ह गणेश समवेगया पाक्वस्थित छेँय् नं गणेशया दक्वं माःगु हलंज्वलं पाछैगल्लीइ रोदिनमानया छेँय् हयाः पूजाविधि क्वचायेकूगु खः ।

दिनेशमान शाक्य व रोजि शाक्यया काय् रोदिन थौंकन्हय् स्वयम्भुस्थित मैत्री विद्यालयस यूकेजीइ ब्वनाच्वंगु दु ।

वंगु निदँ न्ह्यःनिसें येँयाःया गणेश व भैरव हिलेगु खँ जुयाच्वंसां थीथी हुनिं याये मफयाच्वंगु खः ।

लुँया भाः थौं च्यासः थहावःगु दु।

म्हिगः तोलाया ९३ हजार ५ सय रुपैयाँ कारोबार जुगु खःसा थौं च्यासः थहावना ९४ हजार ३ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोला न नीन्यातका थहावःगु दु ।

थौं वहः तोलाय् नीन्यातका थहावना १२ सय ८० थ्यःगु दु।

राष्ट्रिय सतर्कता केन्द्रं सिंहदरबार दुहांवनीपिं कर्मचारीया युनिफर्म चेकजाँच न्ह्याकूगु दु ।

सतर्कता केन्द्रं सिंहदरबारया दक्षिण गेटय् कर्मचारीतय्सं युनिफर्म फ्यूवा मफ्यूगु चेकजाँच न्ह्याकूगु खः ।

सिंहदरबार दुने ज्या याइपिं कर्मचारी व पिनं ज्या ज्वनावइपिं कर्मचारी दक्वसितं सुथय् ९ताः इलंनिसें चेकजाँच यायेगु यानाच्वंगु दु ।

आपाःथे कर्मचारीत युनिफर्म मफ्यूसे वइगु खनेदयेधुंकाः सचेत याकेत चेकजाँच न्ह्याकागु केन्द्रं न्ह्यथंगु दु ।

आःयात युनिफर्म फिनामवःपिं कर्मचारीयात सचेत याकाः दुहांवनेबियाच्वंगु दु 

स्वास्थ्य मन्त्रालयया कथं वःगु २४ घण्टाय् जक स्वनिगलय् थप ३६३ म्ह कोरोना संक्रमण पुष्टि जूगु दु ।

थौं पुष्टि जूपि १५२ म्ह मिसा व मिजंपि २११ म्ह खः।

अथेहे येँ जक २७३ म्हेसित कोरोना सक्रमण जूगु दु ।

ख्वपय् ४१ म्ह व यलय् ४९ म्ह न्हुपि संक्रमित थपे जूगु दु धका धाःगु दु।