कन्ह्य निसे न्ह्यायगु कार्तिक प्याखनय् बराहयात न्हुगु मुकुटया लागि यल महानगरपालिका १६ वडाया ग्वाहालि याःगु दु।

कन्ह्य शुक्रवाः निसे यलया मंगलबजारया कार्तिक डबूलि बहनिनिसे बराह प्याखं क्यने त्यःगु खः। थुगुसि कोरोनाया कारण निन्हु जक जुइ त्यःगु खः। न्हापा लच्छि तक जुइगु खःसा लिपा वना झीनिन्हु जक जुया वयाच्वंगु खः। यल महानगरपालिका– १६ वडां न्हुगु मुकुटया लागि माःगु दक्का खर्च व्यहोरे याःगु धका कार्तिक नाच संरक्षण समितिया कार्यकारिणी सदस्य नाप प्रचार संयोजक सञ्जयराज शर्मां लहानान्युजयात जानकारी बिःगु दु। आः छ्याला वयाच्वंगु पुलागु मुकुट गुलि दत धइगु मस्यू।

‘अय्न जिमिस न्यना तइगु कथं आः छ्यला वयाच्वनागु  मुकट सच्छि दँ स्वया पुलागु धका अनुमान याये फु।’ धका संयोजक शर्मा लहानान्युजया कनादिगु खः। १६ वडाया हे ग्वाहालि वःगु दँय् नरसिंहं पुइगु मुकुट न ह्यूगु खः। अथेहे १६ वडां कार्तिक नाचया लागि अक्षयकोष कन्ह्य शुक्रवाः १० लाख रुपैयाँया चेक हस्तान्तरण याये त्यःगु दु ।

कार्तिक नाच निरन्तरताया लागि वःगु दँर्य प्रतिबद्धता प्वकूगुु कथं चेक हस्तान्तरण याये त्यनागु खः धका यल महानगरपालिकाया १६ वडाअध्यक्ष निर्मलरत्न शाक्य धयादिगु खः। 

कार्तिक नाच ३८० दँ पुलागु प्याखं खः। उगु प्याखं यलया जुजु सिद्धिनरसिह मल्लं १६९७ य् थःगु शिक्षा गुरु हरिवंश राजोपाध्याय व तन्त्र गुरु विश्वनाथ उपाध्यायपिनिगु ग्वाहालि उगु प्याखं न्ह्याकूगु खः।

प्रहरी वरिष्ठ उपरीक्षक (एसएसपी) बसन्तबहादुर कुँवर प्रहरी प्रवक्ताय् चयन जूगु दु।

प्रहरी प्रधान कार्यालयं बिहीवाः एसएसपी कुँवरयात प्रवक्ता तोके याःगु खः।

थ्व स्वया न्ह्यः प्रहरी प्रवक्ता कुवेर कडायत प्रहरी युक्ति तालिम महाविद्यालय (जर्गाह, नवलपरासी) सरुवा जूगु खः।

वगु २४ घन्टाया दुने कोरोनामुक्त जूपि १४३७ म्ह डिस्चार्ज जूया छेँ लिहा वःगु दु।

थ्व नाप नेपालय् आःतक कोरोनामुक्त जूपि २ लाख ९ हजार ४३५ म्ह थ्यःगु दु।

अथेहे नेपालय् सक्रिय संक्रमितपि १६ हजार ७९३ म्ह थ्यःगु दु। वःगु २४ घन्टाया दुने नेपालय् थप २३ म्ह कोरोना संक्रमणपि सीगु दु।

स्वास्थ्य तथा जनसंख्या मन्त्रालयया कथं नेपालय् कोरोना संक्रमण मदुपि १४१२ म्ह थ्यःगु दु।

वःगु २४ घन्टाया दुने नेपालय् थप १६१४ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

वःगु २४ घण्टाया दुने ९ हजार ४१ म्हेसिगु पीसीआर परीक्षण याःगु दु।

मन्त्रालयया कथं थौं बिहीवाः न्हुपि थपे जूपि कोरोना संक्रमितपि २ लाख २७ हजार ६४० म्हेसित पुष्टि जूगु दु।

वःगु २४ घण्टाया दुने स्वनिलय् ७८५ म्हेसित कोरोना संक्रमित थपे जूगु दु।

स्वास्थ्य तथा जनसंख्या मन्त्रालयया कथं थौं बुधवाः बिगु जानकारी कथं संक्रमित जूपि ३३७ मिसा व ४४८ म्ह मिजंपि खः।

मन्त्रालयं बिःगु जानकारी कथ येँ जक ६२०म्हेसित कोरोना सक्रमित जूगु दु।

अथेहे, ख्वपय्  ५१ म्ह व यलय् ११४ म्हेसित कोरोना संक्रमण जूगु दु।

थौं देय् यकं बिहीवाःसंक्रमित पुष्टि जूपि १ हजार ६१४ म्हेसित पुष्टि जूगु दु।